A JULIAN a melekoi el kmo, “Sera krengesii a subed er a ongdibel el kmo a ngelekek el sechal a mla mesuld a ngklel, e ngkmal mlo mekngit a renguk el di mlo diak kudengei el kmo ak mekerang. Ngikang a mle kot el klou el ngelekek, me kemam a kmal mle kmes a deleuill er kemam e le ki mle blechoel el dmak e meruul a betok el tekoi. Ngmle blechoel el ungil el kerebai el kirir a rebebil, engdi a blekerdelel a di mle mereched el mo diak loltirakl a ulekrael er a Jehovah. A bechik a mle blechoel el lmangel, e dimlak kudengei el kmo ngmekerang a kungelaod er ngii. Aki mle blechoel el omdasu el kmo aki locha metitur el oungalek.”

Ngera uchul me a omesuld el ngakl er a Rekristiano a olechotel a bltikerreng a lsekum ngmo uchul a klou el ringel? A Biblia ngera ngmelekoi el uchul me ngkired el meruul er tia el kmal meringel el tekoi? Ngera sel mera el uchul me a chad a mo mesuld a ngklel?

Aika el teblo el tekoi a kirel el duubech er a osisiu el taem el mo uchul me ngmesuld a ngklel a Sioning er a Jehovah. A kot, e a mla metecholb el Sioning a rullii a oberaod el klengit. E a ongerung, e ngdiak lobult er a kngtil.

Nguaisei a Jehovah a medengei el kmo ngdiak decherrungel, engdi ngar er ngii a llechul el kirel a klikiid el omeruul el soal a remesiungel a bo loltirakl. El uai tiang, a Jehovah a mengerechir er kid el mo mengeroid er kid er a oberaod el klengit el ua deleboes el delengerenger, me a omengull el bleob el chelid, me a omerechorech, me omengeblad e melai a kloklir a rechad, me a rumekoad, me a ruuelai.​—1 Ko. 6:9, 10; Och. 21:8.

Kau ke omdasu el kmo aika el klikiid el llechul a Jehovah a tabesul e mileketmokl el kirel el omekerreu er kid? Ngsoam el kiei el kmeed er a rechad el ungil a blekerdelir e meruul a budech e sebeched el oumerang er tir? Ngsebeched el metik er a uai tia el blekeradel er a delongelir a rekldemed er a klaumerang, e le kid el rokui el mla tibir er a rengud el mo mesiou er a Dios e olengesenges a llechul el medung er a Biblia.

E kuk mekerang a lsekum a mla metecholb el Kristiano a rullii a oberaod el klengit el chelitechetul a klechad a uchul? Te mla er ngii a reblak a rengrir el mesiungel a Jehovah er a ngar er a mong el mirruul a osisiu el klengit engdi a Dios a dimlak loltngakl er tir. A king el David a lodengelii a rebetok el chad el mle ta er tir. Ngrirebet er a deleboes el omeruul e ulemekoad engdi a profet el Nathan a silbedii el kmo: “A RUBAK a ousubes er kau.”​—2 Sa. 12:13.

A Dios a uluusubes er a David e le ngii el uluuchel er a rengul e ulebult. (Psa. 32:1-5) Me ngdi osisiu, a mesiungel a Jehovah er chelechang a di mesuld a ngklel a lsekum ngdiak lobult er a kngtil me a lechub e ngmelemolem el meruul a klengit. (Rel. 3:19; 26:20) A lsekum a chad a diak lochotii el mo er a chelechad er a remechuodel el oukerekeriil el kmo ngmla obult er a kngtil, e ngmocha kirir el suldii a ngklel.

A kot, e ngsebeched el mo omdasu el kmo tia el omeruul el mesuld er a ngklel a chad el mlo er a klengit a  meringel el tekoi, tokubets a lsekum kede kmal kmeed er ngika el chad. Me nguaisei, engdi a tekingel a Jehovah a meketeklii el kmo a uai tia el omeruul a uchul a bltikerreng.

A Jesus a millekoi el kmo, a “llomeserreng er a Dios a chemolt el klemerang el oeak a ikel lukdubech el tekoi.” (Mt. 11:19) A omelilt el mo mesuld er a ngklel a chad el diak lobult er a kngtil a mo uchul a betok el ungil el tekoi. Ka molatk aika el edei el tekoi:

A omesuld el ngklir a remeruul a klengit a oldanges er a ngklel a Jehovah. Kid el oba ngklel a Jehovah a uchul me a omerelled a ulterekokl el ngar er ngii a bo lerellii el kirel a ngklel. (Isa. 43:10) Ngdi ua omerellel a ngalek el sebechel el mo uchul a chetengakl me a lechub e ngotuub el mo er a rechad er a blil, me a uldesuir a rechad el kirel a Jehovah a sebechel el mo ungil me a lechub e ngmekngit sel lomes a blekerdelir tirke el chad el oba ngklel. Ngsebeched el mengebkall er a ungil el ngklel a Dios a lsekum kid el Sioning er a Jehovah a mo klikiid e oltirakl a llechul. Tiang a di ua blekeradel er a taem er a Esekiel el rechad er aike el renged a ulemes er a rechad er a Israel el kmo te oba ngklel a Jehovah.​—Ese. 36:19-23.

Ngmo uchul a otuub el mo er a chedaol el ngklel a Dios a lsekum e kede melemolem el ngar er a deleboes el omeruul. A apostol el Petrus a milellach er a Rekristiano el kmo: “Bo moltirakl a tekingel a Dios, e lak bechei a klengar er kemiu ma blekerdeliu me bo loltirakl a ikel di mla somiu el mekngit el tekoi er ser a dirkak bo moumerang. E bai bo mchedaol el diak a telemelliu er a ikel rokui el moruul, el di ua ia Dios el ulemekedo er kemiu el chedaol el diak a telemellel. A Chedaol Llechukl a kmo, ‘Bo mchedaol ele ngak a chedaol.’” (1 Pe. 1:14-16) A klikiid el omeruul a mengebkall er a ngklel a Dios.

A lsekum a ta er a Sioning er a Jehovah a di meruul a mekngit e ngsebechir a resechelil me a rekuk bebil er a rechad el mo medengelii tia el omerellel. Me a omesuld el ngakl a ochotii el kmo, a Jehovah a ngar er ngii a rechedal el tir a oltirakl a ulekrael er a Biblia me lolemolem el klikiid a ongdibel er tir. A ta el chad el mlo er a miting er a Blil a Ongdibel er a beluu er a Switzerland a mle soal el mo chedal tia el ongdibel er a uriul er a lemesuld a ngklel a ochedal el deleboes el omeruul a uchul. Ngika el chad a dilu el kmo ngsoal el mo chedal a cheldebechel el “diak lebechei a mekngit el omeruul me lolemolem.”

A omesuld el ngakl a omekerreu er a klikiid el ongdibel er a Rekristiano. A apostol el Paulus a ulemeklatk er a rechad er a Korinth er a telemellel a lebechititerir tirke el durengrir el meruul a klengit me lolemolem el ngar er a delongelir. Ngulemekesiu a mekngit el blekerdelir tirka el chad el mo er a omkukel a blauang. Ngdilu el kmo: “A omkukel a blauang a di kekerei e mkukii a klou el klalo.” E sola e milellach er tir el kmo: “Mcheridii er a delongeliu ngikel chad el ngar a deleboes el delengerenger.”​—1 Ko. 5:6, 11-13.

Ngbleketakl el kmo a “chad el ngar a deleboes el delengerenger” el lulsaod er ngii a Paulus a chad el mle durengul el meruul er tia el klengit. E a rebebil er a rechad er a ongdibel a mlo omuchel el omes er a omerellel el kmo ngdi ungil. (1 Ko. 5:1, 2) Omko te milecherei tia el kikiongel el omeruul, e a rebebil er a Rekristiano a locha mlo omdasu el kmo ngdi ungil a loltirakl aike el mekikiongel el siukang er a mats el lekiliei er ngii. A lsekum e ke olechib er a medam er a chad el durengul el meruul a klengit e ngua lak molisiich a llechul a Jehovah. (Oli. 8:11) Me tirke el chad el diak lobult er a kngterir a mo ua “terached el mengidokel a blengur er a klauchad er kemiu,” e sebechir el tomall a klaumerang er a rebebil el ngar er a ongdibel.​—Jud. 4, 12.

A omesuld el ngakl a sebechel el rullii a chad el mirruul a klengit el mo ouuchel er a rengul. A Jesus a mle ta lolekoi el kirel a kekerei el chad el tilobed er a blil a demal e ngilai a blingelel e okngemed er a diak a belkul el tametereng. Me ngika el ririid el ngalek a silubii el kmo a klengar el cheroid er a blil a demal a mle bechachau el diak a klechubechub er ngii. Me ngmlo ouuchel er a rengul, e ulebult, e liluut el mo remei. (Lk. 15:11-24) A omesodel a Jesus el kirel ngika el betik a rengul el chedam el mle dmeu a rengul er a ngelekel el ngildechii a blekerdelel, a ngosukid el mo medengelii a uldesuel a Jehovah. Ngoterekeklii a rengud el kmo: “Ng diak ledeu a renguk el mesa tal mekngit el chad el mad. Ng bai soak el mesang el mo diak le ngar a klengit me ng diak le mad.”​—Ese. 33:11.

Tirke el mesuld a ngklir el dikea el chedal a ongdibel er a Rekristiano me ngdikea el teloi er a rudam me a rudos er tir a sebechir el di tir el mo omelechesiu aike el tekoi el bla loriid. Aike el mekngit el tekoi el dilubech  el kngterir a uchul me a omeltkir er a taem el mle ungil a deleuill er tir me a Jehovah me a rechedal a sebechel el rulleterir el mo obult er a kngterir.

Kede ousbech er a bltikerreng me a ulterekokl el reng me bo el sebechel el mo ungil el meketmokl a tekoi. A Biblia a kmo: “Ele Rubak a mesmechokl er ngikel le betik a rengul er ngii, e omals er ngikel le nguu el mo ngelekel.” (Heb. 12:6) El ua tiang: Ka molatk er a chad el omengur e a telkib er a tech a metuchakl er a omerkolel, me ngdikea el sebechel el outeliil, e dikea el sebechel el mengedecheduch, e dirrek el dikea el sebechel el mekerang. Me a lak el mereched a chad el ngosuir e ngmad. E a sechelil a tuchetechii a ulkel me bo el sebechel el tuobed tia el tech. Me alta ngmle meringel er a lolechotech er a ulkel, engdi ngsebechel el osebelii a klengar er ngii. Me ngdi osisiu, a melemalt el chad a locha kirel el meskid a mesisiich el omellach el mo uchul a klungioled.

Ngar er a betok el blekeradel, e a omesuld el ngakl a mo uchul e a chad a ngmai aike el omellach el lousbech. A uriul er a teruich el rak, e a ngelekel a Julian el sechal, el dulsaod er ngii er a uchelel tia el suobel, a ngildechii a klengar er ngii, e liluut el mei er a ongdibel, e chelechang e ngmesiou el ta er a remechuodel. Ngdilu el kmo, “Ngak el milsuld a ngklek a uchul me ngmlo sebechek el melechesuar a mle mekngit el blekerdelel a klengar er ngak. Me ak uluusbech er a uai tia el omellach.”​—Heb. 12:7-11.

Me alta e a omesuld el ngakl a sebechel el mo uchul a klou el klengiterreng, engdi a chad el seluld a ngklel a sebechel el lmuut el mei er a ongdibel. Me kid el rokui a ngar er ngii a ngerecheled el oltirakl er a moktek er a omesuld el ngakl.

A remechuodel a melasem el oukerebai er a Jehovah me te olecholt a bltikerreng er sel taem el mo kirir el ouchais er a chad el kmo ngmo mesuld a ngklel. Me te oba delemedemek e meketakl a tekoi el kirel el meruul me bo el sebechel el lmuut el mei er a ongdibel. Ngar er ngii a taem e a remechuodel a mo oldingel er tirke el olecholt el kmo te melasem el melodech a blekerdelir, e omeklatk er tir er a rolel e ngsebechir el lmuut el mo er a Jehovah. *

A rechedal a telungalek a sebechir el olecholt a bltkil a rengrir el kirel a ongdibel me ngike el mirruul a klengit el oeak sel lolecholt a omengull el kirel a mla metib el tekoi er a omesuld el ngakl. A Julian a melekoi el kmo: “Ngdi millemolem el ngelekek, engdi ngua liliang a orars er a delongelam.”

A rokui el chad el ngar er a ongdibel a sebechir el olecholt a bltikerreng el oeak sel lak lobengkel e longedecheduch er a chad el mla mesuld a ngklel. (1 Ko. 5:11; 2 Jn. 10, 11) A loruul el uaisei, e te melisiich a omellach el Jehovah a ulemsang el okiu a remechuodel. Ngdirrek el sebechir el olecholt a bltikerreng me a ngeso el mo er a telungalek er ngike el milsuld a ngklel, el tir a kmal mlo chuarm, e diak lerelleterir el mo omdasu el kmo te diak el sebechir el teloi er a rechad er a ongdibel.​—Rom 12:13, 15.

A Julian a merekui er a cheldechedechal el kmo: “A omesuld el ngakl a mla meketmokl el tekoi el dousbech er ngii el ngosukid el mo kiei el oltirakl a llechul a Jehovah. A cherengel a taem e alta ngmeringel engdi a ulebongel er ngii a mo uchul a klungiaol. Omko ak di kilengei a mekngit el omerellel a ngelekek, e nglocha mlo diak el sebechel el obult er a kngtil.”