JULIAN atene: “Na ngoi so mbi mä tokua ti bingo molenge ti mbi ti koli na gigi, nzara ti gigi asigigi na yâ ti mbi. Lo yeke lani kozo molenge ti mbi, nga mbi na lo e habitué mingi, e sara aye mingi legeoko. Lo yeke lani nzoni molenge, me gi hio tongaso lo to nda ti sara ye na lege ni pëpe. Wali ti mbi ayeke toto lakue nga mbi hinga ye so mbi lingbi ti sara ti dë bê ti lo pëpe. E yeke hunda tere ti e lakue wala e sara kua ti e ti babâ na mama na lege ni pëpe.”

So bingo zo na gigi ti bungbi asara zo vundu mingi tongaso, ngbanga ti nyen e tene so ayeke mbeni ye so a sara na ndoye? Araison wa la Bible afa so amû lege ti tene a bi mbeni zo na gigi ti bungbi? Nyen la mbilimbili a yeke bi mbeni zo na gigi ti bungbi ndali ni?

A yeke bi mbeni Témoin ti Jéhovah so awara batême awe na gigi ti bungbi ndali ti aye use: Témoin ni asara mbeni kota siokpari nga lo ke ti changé bê ti lo.

Atâa so Jéhovah ahunda na e ti duti nzoni kue kue kue pëpe, lo mû na e ambeni ndia na ndo ti dutingo nzoni-kue so lo ye ti tene awakua ti lo asara ye alingbi na ni. Na tapande, Jéhovah ahunda na e lakue ti kpe akota siokpari tongana lango-sioni, vorongo ayanda, nzi, mungo ye ti zo na likisi, fango zo nga na sarango yorö.—1 aCor. 6:9, 10; Apoc. 21:8.

Kite ayeke dä pëpe so mo yeda so andia ti Jéhovah ayeke nzoni nga ayeke bata e. E ye ti duti na popo ti azo so aye siriri nga so ayeke sara ye na lege ni na so e lingbi ti zia bê ti e kue na ala. E wara ndo so e lingbi ti duti dä tongaso na popo ti aita ti e aChrétien grâce na mungo yanga so e mû na ngoi ti mungo tere ti e na Nzapa ti sara ye alingbi na afango ye ti lo so ayeke na yâ ti Bible.

Me, ka tongana mbeni Chrétien so awara batême awe asara mbeni kota siokpari ndali ti so lo yeke na awokongo? Awakua ti Jéhovah ti ândö so ayeke be-ta-zo asara mara ti afaute so, me Nzapa ake ala biani biani pëpe. Tapande so azo mingi ahinga ni ayeke ti Gbia David. David agi mbeni wali nde nga lo fâ zo; ye oko, prophète Nathan atene na lo, a tene: “[Jéhovah] alungula ngbanga ti sioye ti mo awe.”—2 Sam. 12:13.

Nzapa apardone David ndali ti so David achangé bê ti lo biani (Ps. 32:1-5). Legeoko nga, laso a yeke bi mbeni wakua ti Jéhovah na gigi ti bungbi gi tongana lo ke ti changé bê ti lo wala lo ngbâ ti sara ye ti sioni (Kus. 3:19; 26:20). Tongana a-ancien so bungbi ti a-ancien asoro ala ti fâ ngbanga ti zo so asara siokpari abâ so zo ni afa biani pëpe so lo changé bê ti lo, ala yeke bi zo ni na gigi ti bungbi.

Na tongo nda ni, e lingbi ti pensé so desizion ti bingo zo so asara sioni na gigi ti bungbi ayeke ngangu mingi wala a mû ni na nzoni bê pëpe, mbilimbili tongana e yeke na kpengba songo na zo ni. Ye oko,  Bible afa na e anzoni raison so amû lege na e ti yeda so a mû desizion so na ndoye.

Jésus atene so “ndara ayeke mbilimbili na lege ti akusala ti lo.” (Mat. 11:19). Nzoni desizion so a mû ti bi mbeni zo so ake ti changé bê ti lo na gigi ti bungbi ayeke ga na aye ti nzoni. Zia e bâ aye ni ota:

Bingo zo so asara siokpari na gigi amû gonda na iri ti Jéhovah. Teti so iri ti Jéhovah ayeke na ndo ti e, sarango ye ti e alingbi ti sara si iri ti lo awara gonda wala zonga (És. 43:10). Legeoko tongana ti so sarango ye ti mbeni molenge alingbi ti sara si iri ti babâ na mama ti lo awara gonda wala zonga, tongaso sarango ye ti awakua ti Jéhovah la ayeke mû lege na azo ti gonda lo wala ti zonga lo. Tongana azo so iri ti Jéhovah ayeke na ndo ti ala asara ye alingbi na andia ti lo, a yeke sara si azo agonda iri ti Nzapa so ayeke nzoni. A yeke mara ti ye so asi lani na ngoi ti Ézéchiel na ngoi so azo ti amara abâ aJuif tongana azo so iri ti Jéhovah ayeke na ndo ti ala.—Ézéch. 36:19-23.

Tongana e sara ye ti sioni, e yeke sara si iri ti Nzapa awara zonga. Bazengele Pierre amû wango na aChrétien, lo tene: “Teti so ala yeke amolenge so amä yanga, a yeke nzoni ala zia lege ti sarango ye alingbi na anzara ti bê so ala yeke na ni ândö na ngoi so ala de ti hinga ndo pëpe so, me ti gue oko na Lo so ayeke nzoni-kue so airi ala, zia ala nga aga azo so ayeke nzoni-kue na yâ ti sarango ye ti ala kue, ngbanga ti so a sû na Mbeti ti Nzapa, a tene: ‘A yeke nzoni ala ga nzoni-kue, ngbanga ti so mbi yeke nzoni-kue.’” (1 Pi. 1:14-16). Nzoni sarango ye ayeke sara si iri ti Nzapa awara gonda.

Ye oko, tongana mbeni Témoin ti Jéhovah asara ye ti sioni, kite ayeke pëpe so akamarade ti lo nga na azo so ahinga lo ayeke hinga ni. Bingo zo na gigi ti bungbi afa so Jéhovah ayeke na azo ti lo so ayeke nzoni-kue so ayeke sara ye alingbi na afango ye ti Bible tongaso si ala ngbâ lakue ti duti nzoni-kue. Mbeni lâ, mbeni koli ague na Da ti Royaume na Suisse na lo tene so ni ye ti ga mbeni membre ti congrégation ni. A bi ita ti lo ti wali na gigi ndali ti so lo sara lango-sioni. Koli ni atene so ni ye ti duti na yâ ti mbeni bungbi so “akanga lê na ndo ti ye ti sioni pëpe.”

Bingo zo na gigi ti bungbi ayeke bata congrégation ti aChrétien so ayeke nzoni-kue. Bazengele Paul awa azo ti Corinthe na ndo ti kpale so ayeke si tongana ala zia si azo so asara siokpari na mbana angbâ na popo ti ala. Lo haka ye so sioni sarango ye ti ala alingbi ti sara na ndo ti tanga ti aita na mama ti mapa so a zia na yâ ti farine na so ayeke sara si farine ni kue asuku. Lo tene: “Kete mama ti mapa asara si mengo farine ni kue asuku.” Na pekoni, lo mû wango na ala, lo tene: “Ala zi zo ti sioni na popo ti ala.”—1 aCor. 5:6, 11-13.

Amanke “zo ti sioni” so Paul asara tënë ti lo so asara lango-sioni na kamene pëpe. Nga ambeni ita na yâ ti congrégation ayeda même na sarango ye ti zo ti sioni so (1 aCor. 5:1, 2). Tongana a kanga lê lani na ndo ti kota siokpari so, ambeni Chrétien alingbi ti tï na yâ ti sarango lango-sioni tongana ti azo ti gbata so ala yeke dä. Tongana a kanga lê na ndo ti asiokpari so a sara na mbana ayeke sara si azo abâ andia ti Nzapa na nene ni pëpe (Zo-ti. 8:11). Nga, azo so asara siokpari si ake ti changé bê ti ala alingbi ti ga “akota tênë so ahonde tere ti ala na gbe ti ngu” nga ala lingbi ti kinda mabe ti aita na yâ ti congrégation.—Jude 4, 12.

Bingo zo na gigi alingbi ti sara si li ti zo so asara siokpari aga dä. Mbeni lâ, Jésus asara tënë ti mbeni molenge-koli so azia da ti babâ ti lo na lo buba aye ti lo na sarango aye ti kirikiri. Molenge-koli so amanda ye na ngoi so gigi akpengba na lo na ngoi so lo zia da ti babâ ti lo. Na nda ni, li ti lo aga dä, lo changé bê ti lo nga lo mû desizion ti kiri na yanga-da (Luc 15:11-24). Tënë so Jésus atene na ndo ti nzoni babâ so ayeke na ngia na ngoi so molenge ti lo ti koli achangé bê ti lo amû maboko na e ti hinga atënë ti bê ti Jéhovah. Jéhovah adë bê ti e, lo tene: “Mbi wara ngia pëpe na lege ti kui ti zo ti sioni; me Mbi ye zo ti sioni [azia] lege ti lo si lo wara fini.”—Ézéch. 33:11.

Legeoko nga, azo so a bi ala na gigi so ayeke mbeni pëpe na popo ti aita ti congrégation so ayeke tongana afami ti ala na lege ti yingo, a lingbi ti bâ so ala perdre aye mingi. Tongana ala bâ aye ti sioni so aga na peko ti siokpari ti ala nga tongana ala dabe ti ala na anzoni ye so ala wara na ngoi so ala yeke lani na nzoni songo na Jéhovah nga na awakua ti lo, a lingbi ti sara si li ti ala aga dä.

 Ti mû maboko na zo so asara siokpari ti changé, a lingbi a sara ye na lo na ndoye nga a sara tënë na lo polele. David so asû mbeni psaume atene: “Zia zo ti mbilimbili apika mbi, fade a ga ye ti nzoni na mbi; na zia lo zingo na mbi, fade a ga mafuta na ndo li ti mbi.” (Ps. 141:5). Zia e mû mbeni tapande: Bâ so mbeni zo so ayeke sara yongoro tambela na ngoi ti dê afatigué na lo tï na sese. Lo komanse ti dö na dê nga lo tï na lango. Tongana lo ngbâ ti lango na yâ ti dê ni lo yeke kui. Na ngoi so lo yeke ku ti tene mbeni zo aga amû maboko na lo, ngoi na ngoi mba ti lo ayeke pika ngbangba ti lo ti tene lo lango pëpe. Pikango ngbangba ti lo ni alingbi ti son lo, me a lingbi ti sö fini ti lo. Legeoko nga, David ahinga so zo ti mbilimbili ayeke na bezoin ti mû na lo ngangu wango ndali ti nzoni ti lo.

Fani mingi, bingo mbeni zo na gigi ayeke mbeni sengo ndo so alingbi na zo so asara siokpari na lo ke ti changé bê ti lo. Na peko ti ngu bale-oko, molenge ti Julian, so e sara tënë ti lo fade, achangé sarango ye ti lo, lo kiri na yâ ti congrégation, nga fadeso lo yeke ancien. Lo tene: “So a bi mbi lani na gigi ti bungbi, mbi mä fion ti asioni ye so mbi wara na pekoni. Mbi yeke lani na bezoin ti sengo ndo tongaso.”—aHéb. 12:7-11.

Biani, bingo zo na gigi ti bungbi asara aita vundu, me a lingbi vundu ni ahon ndo ni pëpe. E kue e yeke sara mbeni ye ti tene mbeni zo so a bi lo na gigi achangé bê ti lo.

A-ancien so ayeke fa na zo ni desizion so a mû ti bi lo na gigi, a yeke sara ngangu ti sara ye na ndoye tongana ti Jéhovah. Na ngoi so ala yeke fa na lo desizion so ala mû, ala yeke fa na lo polele aye so a lingbi lo sara ti kiri na yâ ti congrégation nga ala yeke sara ni na nzoni bê. Ngoi na ngoi, a-ancien alingbi ti sara vizite na azo so a bi ala na gigi so afa na yâ ti sarango ye ti ala so ala ye ti changé, ti dabe ti ala na aye so ala lingbi ti sara ti kiri na Jéhovah. *

Azo ti sewa alingbi ti fa so ala ye congrégation nga na fami ti ala so asara siokpari tongana ala sara ye alingbi na desizion so andu sarango ye na mbage ti zo so a bi lo na gigi ti bungbi. Julian atene: “Lo ngbâ lani molenge ti mbi, me sarango ye ti lo afâ yâ ti songo so ayeke na popo ti mbi na lo.”

Azo ti congrégation kue alingbi ti fa so ala ye andia ti Jéhovah tongana ala bara zo ni pëpe nga ala sara lisoro na lo pëpe (1 aCor. 5:11; 2 Jean 10, 11). Tongaso, ala yeke yeda na sengo ndo so Jéhovah ase na lo na lege ti a-ancien. Nga, tongana a bi mbeni zo na gigi ti bungbi afami ti lo alingbi ti sara vundu mingi. Tongaso, a lingbi aita ti congrégation aye afami ti zo ni mingi nga ala mû maboko na ala mingi ti tene ala pensé pëpe so ala nga kue a ke na ala ti sara songo na amba ti ala aChrétien.—aRom. 12:13, 15.

Julian atene na nda ni atene: “Bingo zo na gigi ti bungbi ayeke mbeni ye so e yeke na bezoin ni, a lingbi ti mû maboko na e ti sara ye alingbi na andia ti Jéhovah. Atâa so a son, a yeke ga na aye ti nzoni mbeni lâ. Tongana mbi kanga lê ti mbi lani na ndo ti sioni sarango ye ti molenge ti mbi, ka lo yeke changé lâ oko ape.”