ЮЛИАН доганымыз шейле гүррүң берйәр: «Оглумың йыгнак билен гатнашыкдан кесилендиги барада билдириш эдиленде, мениң дүнйәм даралан ялы болды. Ол мениң илкинҗи перзендим, якын достумды ве көп зады онуң билен биле эдердим. Ол гөрелделиди, йөне вагтың гечмеги билен, месихчилере ярашмаян затлары эдип башлады. Аялым гиҗе-гүндиз аглаярды. Мен оны нәдип көшешдирҗегими билмейәрдим. Биз говы ата-эне болуп билмедик дийип, өзүмизи гүнәкәрлейәрдик».

Гөршүмиз ялы, месихчиниң йыгнак билен гатнашыкдан кесилмеги якынларына хасрат гетирйәр. Онда муңа нәдип сөйги билен берилйән тербие дийип болар? Мукаддес Язгыларда шейле берк чәре барада нәме айдыляр? Месихчиниң йыгнак билен гатнашыкдан кесилмегине нәме себәп боляр?

Ехованың Шаяды йыгнак билен гатнашыкдан кесиленде, бири-бири билен багланышыклы шу ики ягдай гөз өңүнде тутуляр: 1) сувда чокундырылан месихчи агыр гүнә эдйәр ве 2) тоба этмейәр.

Ехова мукаддес када-канунлары берди. Ол бизден кәмиллиге гарашмаса-да, канунларына эермегимизи ислейәр. Мысал үчин, Ол җынсы ахлаксызлык, бутпаразлык, огурлык, талаңчылык, адам өлдүрмек ве җадыгөйлүк ялы агыр гүнә итерйән затлардан гача дурмагымызы талап эдйәр (1 Кор. 6:9, 10; Ылх. 21:8).

Сиз Ехованың када-канунларының пайхаслыдыгына ве эрбетликден гораяндыгына ынанярмысыңыз? Ким парахат, эдепли ве ынамдар адамлар билен яшамак ислемейәр? Биз шейле адамлары доган-уяларың арасында гөрйәрис, себәби олар өзүни Ехова багыш эдип, Мукаддес Язгыларың гөркезмесине эермеги вада берйәр.

Эгер месихчи бир себәбе гөрә агыр гүнә этсе нәме? Ехованың гечмишдәки вепалы гуллукчыларының хем кәбири агыр гүнә эдипди. Эмма Худай олардан деррев йүз өвүрмеди. Меселем, Давут патыша зына эдип, адам өлдүрсе-де, Натан пыгамбер оңа: «Реб сениң гүнәңи гечди» дийди (2 Шам. 12:13).

Ехова Давут патышаны йүрекден тоба эдендиги үчин багышлады (Зеб. 32:1—5). Эмма Ехованың гуллукчылары тоба этмән, эрбет ишлерден йүз өвүрмеселер, йыгнак билен гатнашыкдан кесилйәр (Рес. иш. 3:19; 26:20). Эгер месихчиниң йүрекден тоба эдйәндиги иш йүзүнде гөрүнмесе, Дүзедиш комитетиниң яшулулары оны йыгнак билен гатнашыкдан кесмели болярлар.

Биз, илкибада, доган-гарындашымызың я-да достумызың йыгнак билен гатнашыкдан  кесилмегине ёвуз ве рехимсиз берлен темми хөкмүнде гарамагымыз мүмкин. Эмма Ехованың Сөзүнде онуң сөйги билен берилйән тербиедиги дүшүндилирйәр.

Иса: «Акылдарлык өз ишлери билен тассыкланар» дийди (Мат. 11:19). Тоба этмейән месихчиниң йыгнак билен гатнашыкдан кесилмеги говы миве берйәр. Гелиң, оларың үчүсине середелиң.

Гүнә эден адамың йыгнак билен гатнашыкдан кесилмеги Ехованың адыны гораяр. Биз Ехованың адыны гөтерйәрис, шол себәпли бизиң эдим-гылымымыз онуң ат-абрайына гөнүден-гөни тәсир эдйәр (Иш. 43:10). Оглуның өзүни алып баршы ата-энесине ыснат я-да хормат гетириши ялы, Ехованың халкының өзүни алып баршы хем адамларың оңа болан гарайшына тәсир эдйәр. Эгер месихчилер Ехованың када-канунларына эерсе, бу Худайың адына шөхрат гетирйәр. Эзекиел пыгамбериң дөврүнде хем Ехованың адыны гөтерйән ехудылара башга миллетдәки адамлар сын эдйәрди (Эзек. 36:19—23).

Эгер биз ахлаксыз ишлере баш гошсак, Ехованың адына ыснат гетирерис. Петрус ресул хем месихчилере шейле маслахат берди: «Диен эдиҗи чагалар ялы наданлыгыңыздакы озалкы хөвеслериңизе уйман, эйсем сизи чагыраның мукаддес болшы ялы, әхли эдим-гылымыңызда мукаддес болуң. Себәби: „Мукаддес болуң, чүнки Мен мукаддесдирин“ дийип язылгыдыр» (1 Пет. 1:14—16). Биз өзүмизи мукаддес, ягны арасса алып бармак билен Худайың адыны шөхратландырярыс.

Ехованың Шаятларының бири эрбет иш этмегини довам этсе, онуң доган-гарындашлары я-да достлары муны хөкман билерлер. Шейле ярамаз ишлери эдйән адамларың йыгнак билен гатнашыкдан кесилмеги Ехованың халкының мукаддес яшамага җан эдйәндигини гөркезйәр. Худайың гуллукчылары Мукаддес Язгылардакы гөркезмелере эермеги әхли затдан илери тутярлар. Швейцарияда яшаян уя ахлаксызлык эдендиги үчин йыгнак билен гатнашыкдан кесилйәр. Онуң Ехова иман этмейән доганы йыгнак душушыгына барып, «эрбет ишлере гөз юммаян» гурама гошулмак ве Ехованың Шаяды болмак ислейәндигини айдяр.

Гүнә эден адамың йыгнак билен гатнашыкдан кесилмеги йыгнагың арасса сакланмагына ярдам эдйәр. Павлус ресул коринтослылара билгешлейин гүнә эдйән адамлары йыгнакда галдырмагың ховплудыгыны дуйдурды. Ол шейле адамларың эрбет тәсирини «азаҗык хамырмаяның бүтин хамыры туршадышы» билен деңешдирди. Соңра Павлус: «Яманы өз араңыздан чыкарың» дийип маслахат берди (1 Кор. 5:6, 11—13).

Павлусың агзан «яман» адамы гөз-гөртеле ахлаксыз ишлери этсе-де, месихчилериң кәбири оны аклаярдылар (1 Кор. 5:1, 2). Эгер месихчилер шейле агыр гүнә гөз юмсалар, онда азгын шәхериң ахлаксыз ишлерине баш гошардылар. Йыгнакда месихчиниң билгешлейин эдйән эрбет ишлерине бипервай гаралса, онда Худайың када-канунларына әсгермезчилик эдилер (Ваг. 8:11). Тоба этмейән гүнәкәрлер «сувуң астындакы дашлар» ялы, йыгнакдакы доган-уялары бүдредип, иманыны говшадып билйәрлер (Яхуда 4, 12, ТД).

Гүнә эден адамың йыгнак билен гатнашыкдан кесилмеги оңа ялңышына дүшүнмәге көмек эдйәр. Бир гезек Иса яш йигидиң өйүнден гидип, атасының мирасыны кейпи-сапа соврандыгыны гүррүң берйәр. Яш йигит кын гүне дүшенде, дурмушының манысыз хем ёвуздыгына гөз етирди. Ол ялңышына дүшүнип, тоба эдйәр ве өйүне доланяр (Лука 15:11—24). Атасының оглуны гуҗак ачып гаршыламагы Ехованың дуйгусына дүшүнмәге көмек эдйәр. Себәби Алла «эрбет адамың өлмегине дәл-де, онуң эрбет ёлундан дөнүп, дири галмагына хошал боляндыгына» ынандыряр (Эзек. 33:11).

Белки-де, йыгнак билен гатнашыкдан кесилен месихчи рухы машгаласындан айра дүшүп, ваҗып затлары йитирендигине билер. Ол эден этмишини эгни билен чекип, Ехова Худай  ве онуң халкы билен достлуклы гатнашыгыны, гечирен шатлыклы гүнлерини ятлаяндыр. Бу затлар оңа ызына доланмага көмек эдер.

Гүнә эден адам ялңышына дүшүнер ялы, биз берилйән гөркезмә гышарныксыз эерип, оңа сөйги билдирмели. Мезмурчы Давут: «Догры адам мени урсын, хемаятдыр; маңа кәесин, баш ягыдыр» дийди (Зеб. 141:5). Гелиң, бир мысала середелиң. Сачак башында нахар ийип отуран адам бирденкә дүвнүгип, дем алмасы кынлашяр ве гепләп билмән галяр. Эгер деррев көмек берилмесе, ол өлер. Досты онуң дамагында галан эти чыкарҗак болуп, аркасындан уряр. Бу ургы агырылы болса-да, оны өлүмден халас эдип билер. Шонуң ялы-да, Давут патыша догры адамың берйән дүзедиши агыр дегсе-де, пейдалы болҗакдыгына дүшүнйәрди.

Йыгнак билен гатнашыкдан кесилмек көпленч адама ялңышына дүшүнмәге көмек эдйәр. Макаланың башында агзалан Юлианың оглы 10 йылдан соң дурмушыны өзгердйәр. Ол йыгнага доланяр, хәзир яшулы болуп гуллук эдйәр. Ол шейле белләп гечйәр: «Мениң йыгнак билен гатнашыкдан кесилмегим эден ишимиң хасылыны ормага меҗбур этди. Мен тербие берилмегине мәтәчдим» (Евр. 12:7—11).

Йыгнак билен гатнашыкдан кесилмек рухы тайдан зыян етирйән паҗыгалы ягдай болса-да, оны үйтгедип боляр. Гүнә эден адамың ызына доланмагы үчин хер биримиз өз гошандымызы гошуп билерис.

Яшулулар месихчини йыгнак билен гатнашыкдан кесмели диен кын карара геленде, Ехованың сөйгүсини гөркезйәрлер. Олар месихчә йыгнага доланмагы үчин нәхили әдимлери әтмелидигини мәхирли ве ачык-айдың дүшүндирйәрлер. Яшулулар дурмушында өзгеришликлер эдйән адамы вагтлы-вагтында идег эдип, Ехова доланмага көмек эдйәрлер *.

Йыгнак билен гатнашыкдан кесилен адамың машгала агзалары яшулуларың гелен карарына хормат гоюп, гүнә эдене ве имандашларына сөйгүсини билдирйәрлер. Юлиан: «Ол мениң оглум болса-да, онуң сайлан ёлы бизиң гатнашыгымыза арачәк гойды» диййәр.

Доган-уялар йыгнак билен гатнашыкдан кесилен адам билен хич хили гүррүңдешлик этмеселер, месихи сөйгини билдирйәрлер (1 Кор. 5:11; 2 Яхя 10, 11). Олар Ехованың яшулулар аркалы берйән тербиесини голдаярлар. Муңа гарамаздан, доган-уялар гүнә эден адамың эҗир чекйән машгала агзаларының өзлерини йыгнак билен гатнашыкдан кесилен ялы дуймазлыгы үчин, олара чуңңур сөйгүсини билдирмели ве йүрекден голдамалы (Рим. 12:13, 15).

Юлиан сөзүни шейле җемлейәр: «Йыгнак билен гатнашыкдан кесилмек ялы чәрелер Ехованың када-канунлары боюнча яшамага көмек эдйәр. Бу агырылы болса-да, ахырсоңы говы нетиҗе берйәр. Эгер оглумың эден гүнәли ишлерине совук-сала гаран болсам, ол ызына хич хачан доланмазды».