JULIAN mbutaka ɔnɛ: “Etena kakamoke diewoyelo ɔnɛ ɔnami la pami ambotshanyema lakayaoke dia handjokoka nsɛna nto. Nde mbele ɔnami l’enondo, takikɔ la diɔtɔnganelo dia ma ma ndo takasalaka awui efula kaamɛ. Nde aki ɔna lakashaka ɛnyɛlɔ k’ɔlɔlɔ koko mbala kakɔ ɔtɔi nde akatatɛ monga la yoho ya lɔsɛnɔ ya kɔlɔ. Wadɛmi akalelaka mbala efula ndo dimi kombeya woho wa mbosamba. Takayambolaka mbala la mbala dia mbeya kana takɛmbɛ ɔkɛndɛ aso w’ambutshi dimɛna.”

Lande na katamadiɔ ɔnɛ wotshanyelo w’Okristo ekɔ yɛdikɔ yoludi la ngandji etena kele dui sɔ mbishaka paa efula l’asolo? Naa ɛkɔkɔ washa Afundelo wa mbitshanya onto? Ndo akambo akɔna shikaa wakonya onto dia mbitshanyema?

Ekɔ akambo ahende wakonya di’Ɔmɛnyi wa Jehowa mbitshanyema. Dui dia ntondo ele, naka nde ambosala pɛkato woke. Dui dia hende ele, naka nde hayatshumoya lo pɛkato kande.

Kaanga mbele Jehowa hatɔlɔmbɛ dia sho monga kokele, nde ekɔ l’atɔndɔ ande w’ekila walongamɛnde di’ekambi ande mbayela. Ɛnyɛlɔ, Jehowa tɔtɔmiyaka dia sho mbewɔ pɛkato ya weke yele oko awui wa mindo wa dieyanelo, ɔtɛmwɛlɔ wa dikishi, wovi, lokeso, odiakanelo ndo diɔtɔnganelo dia l’ɛdiɛngɛ.—1 Kɔr. 6:9, 10; Ɛny. 21:8.

Onde wɛ hetawɔ dia atɔndɔ waki Jehowa wa pudipudi wekɔ wa la wɛdimo ndo wekɔ l’oyango wa tokokɛ? Onde ekɔ onto ɔmɔtshi lahakombola nsɛna l’atei w’anto wele la wɔladi ndo wakokawɔ mbɛkɛ otema? L’atei w’anangɛso l’akadiyɛso wa lo nyuma, sho mbɛkanɛka etema. Etena kakatabatizama, takatshike dɔkɔlɔkɔ dia sɛnaka lo yoho yɔtɔnɛ la ɛlɔmbwɛlɔ kaki Nzambi katanema lo Ɔtɛkɛta ande.

Ko kayotota naka Okristo wakabatizama ambosala pɛkato ka woke l’ɔtɛ wa wɔdu wa demba? Ekambi waki Jehowa wa kɔlamelo wa lo nshi y’edjedja wakasale pɛkato ya ngasɔ, koko Jehowa kombaoka ɔkɔngɔ lo pondjo. Khumekanga Davidɛ ekɔ ɛnyɛlɔ ka ntondo. Nde akasale loseka ndo akadiake, koko ɔprɔfɛta Natana akayowotɛka ɔnɛ: “[Jehowa] . . . ambukudimanyia kolo kaye.”—2 Sam. 12:13.

Nzambi akadimanyiya Davidɛ pɛkato kande nɛ dia Davidɛ akayatshumoya l’otema ɔtɔi. (Osam. 32:1-5) Woho akɔ waamɛ mbele, ɛlɔ kɛnɛ okambi waki Jehowa koka mbitshanyema paka naka nde hayatshumoya kana tetemalaka nsala kɛnɛ kele kɔlɔ. (Ets. 3:19; 26:20) Naka nde hayatshumoyisha l’otema ɔtɔi la ntondo ka dikumanyi dia lo kɔmite ka kilombo kande, kete nde pombaka mbitshanyema.

L’etatelo, sho koka mɛna dia wotshanyelo w’otshi wa kɔlɔ ekɔ yɛdikɔ yambotamba elelo kana  ɔnɛ hawowoke ngandji, djekoleko naka tekɔ l’onto akɔ la diɔtɔnganelo dia ma ma. Koko Ɔtɛkɛta wa Jehowa toshaka ɛkɔkɔ wa mbetawɔ ɔnɛ ɔsɔ ekɔ yɛdikɔ ya la ngandji.

Yeso akate ɔnɛ “lomba lamboyindjama oma l’etsha alɔ.” (Mat. 11:19) Yɛdikɔ ya la lomba ya mbitshanya otshi wa pɛkato wahayatshumoya mbelaka etombelo w’ɛlɔlɔ. Tɔsɛdingole awui asato anɛ:

Wotshanyelo w’otshi wa kɔlɔ tombolaka lokombo laki Jehowa. Lam’ele sho mbelamɛka lo lokombo laki Jehowa, etsha aso pombaka monga la shɛngiya lo lokombo lande. (Is. 43:10) Oko wakoka lɔkɛwɔ l’ɔna mbisha ambutshi ande kɛnɛmɔ kana mbatɛngamisha, mbele ndo woho wayɔsa anto Jehowa nemanɛka lo yoho mɔtshi la etsha w’ɛlɔlɔ kana wa kɔlɔ wɛnawɔ le anto welamɛ lo lokombo lande. Lokombo la dimɛna laki Nzambi layolama kitshimudi yalɔ naka anto welamɛ lo lokombo lɔsɔ kambaka l’atɔndɔ waki Jehowa. Dui sɔ mbɔtɔnɛka la kɛnɛ kakete lo nshi yaki Ɛzɛkiyɛlɛ etena kakasangana ase wedja kaamɛ l’ase Juda ko nanya lokombo laki Jehowa.—Ezek. 36:19-23.

Sho koka tɛngamisha lokombo l’ekila laki Nzambi naka sho nsala awui wa mindo wa dieyanelo. Ɔpɔstɔlɔ Pɔɔlɔ akasha Akristo dako ɔnɛ: “Oko wenyu ana wele la okitanyiya, nyotshike ndjela nsaki yaki la nyu ntondo lam’akinyu nyateye Nzambi, koko lo yoho yɔtɔnɛ la Ɔnɛ lele Ekila lakanyelɛ, nyoyale ekila lo dionga dianyu tshɛ, dikambo akafundama ɔnɛ: ‘Nyoyale ekila, nɛ dia dimi lekɔ ekila.’” (1 Pet. 1:14-16) Mbokɛmaka dia dionga di’ekila tombolaka lokombo la Nzambi.

Naka Ɔmɛnyi wa Jehowa ɔmɔtshi ambosala dui dia kɔlɔ, angɛnyi ndo anto wonga kaamɛ la nde koka mbeya dui sɔ. Tshelo ya mbitshanyaka anto mɛnyaka dia Jehowa ekɔ la wodja wele pudipudi wayela ɛlɔmbwɛlɔ k’oma lo Afundelo l’oyango wa nama ekila kɛsɔ. Onto ɔmɔtshi akaye mbala ka ntondo lo losanganya lo Mbalasa ka Diolelo la Suisse ndo akate dia nde kombolaka nkoma Ɔmɛnyi wa Jehowa. Kadiyɛnde aki oma la mbitshanyema l’ɔtɛ wakandayasha lo awui wa mindo wa dieyanelo. Nde akate dia nde kombolaka monga lo okongamelo “wahadihe washo lo lɔkɛwɔ la kɔlɔ.”

Wotshanyelo kokɛka pudipudi k’etshumanelo k’Akristo. Ɔpɔstɔlɔ Pɔɔlɔ akahɛmɔla Akristo wa la Kɔrɛtɔ lo waale waya lo ntshika wanɛ wasala pɛkato l’okonda dia vɔ tanema l’atei awɔ. Nde akɛdika shɛngiya ya kɔlɔ yonga l’anto la woho wafudia wodoya okuna walɔsɔha. Nde akate ɔnɛ “yema ya wodoya tshitshɛ mbidoyaka okuna tshɛ wa lɔsɔha.” Oma laasɔ nde akawatɛ ɔnɛ: “Nyonya onto a kɔlɔ ɔsɔ oma l’atei anyu.”—1 Kɔr. 5:6, 11-13.

Mɛnamaka dia “onto a kɔlɔ” lakatɛkɛta Pɔɔlɔ akasalaka awui wa mindo wa dieyanelo l’okonda. Ase etshumanelo akina wakatatɛ mbuta dia onto ɔsɔ kosala ndooko kɔlɔ. (1 Kɔr. 5:1, 2) Otondongaka wakadihe washo lo pɛkato ka woke kɛsɔ tshike Akristo akina wakakoke ndjokoma lo mbokoya mbekelo ya mindo yakasalemaka l’osomba wakawadjasɛka. Atɔndɔ wa lo Bible mɔnywamaka naka Akristo dihaka washo lo pɛkato ya weke. (Und. 8:11) Laadiko dia laasɔ, atshi wa pɛkato wahayatshumoya koka ndjokoma “oko ave woshɛmi l’etei k’ashi” ndo ndjolanya mbetawɔ k’ase etshumanelo akina.—Judɛ 4, 12.

Wotshanyelo mbeyaka nkimanyiya otshi wa pɛkato dia nde nkana lomba. Yeso akatɛkɛta di’ɔlɔngɔ wa pami wakonɔ oma lakawɔ ko tomana okitɔ ande lo lɔsɛnɔ la mindo. Etena kakandamɔ oma lakawɔ, ɔna la lotshito ɔsɔ akatɛnaka dia lɔsɛnɔ la lɛnɛ akandatshu laki anyanya ndo edika w’edika. L’ekomelo, ɔn’ɔsɔ akatokanaka lomba, akayatshumoya ndo akɔshi tɛdikɔ ta nkalola otsha lakawɔ. (Luka 15:11-24) Ɛnyɛlɔ kaki Yeso k’ombutshi wa ngandji wakangɛnangɛna lo etshikitanu wakasale ɔnande tokimanyiyaka dia nshihodia woho wayaoka Jehowa. Nde toshikikɛka ɔnɛ: “Dimi hangenangena nyoi k’untu a kolo! Dimi nangaka ndi nkalula uma lu kolo kandi, la ndi ndjala la lumu.”—Ezek. 33:11.

Woho akɔ waamɛ mbele, etena katshanyema anto ko waya bu lo etshumanelo k’Akristo vɔ mbeyaka ndjokana lomba lo kɛnɛ kambowoshisha. Woho wayowodiɛnɛ la etombelo w’oma lo pɛkato kakawasale ndo wayowohɔka nshi y’ɔngɛnɔngɛnɔ yaki la wɔ etena kakiwɔ la diɔtɔnganelo  dia dimɛna la Jehowa ndo la Ɛmɛnyi ande, dui sɔ koka mbakimanyiya dia vɔ nkana lomba.

Ngandji ndo eshikikelo ekɔ ohomba dia etombelo w’amɛna monga. Omembi w’esambo Davidɛ akate ate: “Untu ololo ankomole, laso kawo; ndi ampangweli, ku laso ndjalaka uku iso l’ote ami.” (Osam. 141:5) Tɔshi ɛnyɛlɔ kɛnɛ: Ohɔsa di’onto ɔmɔtshi ekɔ lo ndɛ ko weka wambekama beka lo wudi. Nde hayɔhɛnga dimɛna, wolo ande wamboshila ndo hayɔtɛkɛta. Naka onto hawokimanyiyisha esadi, kete nde ayovɔ. Mbala kakɔ ɔtɔi, osekande amboya dia ndjowɔsɔsɔmiya mpita lo wudi dia minya weka akɔ. Dui sɔ mbeyaka mbosha paa koko diɔ koka mbokokɛ. Woho akɔ waamɛ mbele, Davidɛ akeyaka di’onto ɔlɔlɔ mbeyaka monga l’ohomba wa engwelo kakoka mbosha paa koko dui sɔ di’ekɔ lo wahɔ ande.

Lo waaso efula, wotshanyelo mingolaka otshi wa kɔlɔ. L’ɔkɔngɔ w’ɛnɔnyi oko dikumi, ɔnaki Julian lakatatɛkɛtshi diande lo mbɔtwɛlɔ akɛdia lɔsɛnɔ lande, akakalola l’etshumanelo ndo ɛlɔ kɛnɛ nde aya ekumanyi. Nde mbutaka ate: “Woho wakamatshanyema akasale dia dimi diɛnɛ la etombelo wa kɛnɛ kakamasale. Lakikɔ mɛtɛ l’ohomba wa engwelo ka ngasɔ.”—Hɛb. 12:7-11.

Wotshanyelo ekɔ mpokoso ka lo nyuma koko tɔ bu dui diamboleka kɔlɔ tshɛ. Sho tshɛ pombaka mbeya dia wotshanyelo wekɔ la oyango.

Dikumanyi diele l’ɔkɛndɛ wa mbewoya wotshanyemelo w’onto salaka la wolo dia nkɛnɛmɔla ngandji kaki Jehowa. Etena kewoyawɔ onto yɛdikɔ yawɔ, vɔ mbotɛka la ngandji tshɛ ndo hwe hwe wanya wahombande ntakola dia kawoyama l’etshumanelo. Dia mbohola wanɛ wambotshanyema kɛnɛ kahombawɔ nsala dia kalolɛ Jehowa, dikumanyi koka membolaka lo tena dimɔtshi anto wakatshanyema wele wekɔ lo mɛnya tolembetelo tɛnya dia wekɔ lo tasale etshikitanu. *

Ase nkumbo koka mɛnya ngandji kawɔ otsha le ase etshumanelo ndo otsha le owotɔ awɔ wambotshanyema lo nkitanyiya yɛdikɔ ya wotshanyelo. Julian mbutaka ɔnɛ: “Nde akikɔ paka ɔnami. Yoho yande ya lɔsɛnɔ akadje wekamu l’asami la nde.”

Ase etshumanelo tshɛ koka mɛnya ngandji kohikami lo atɔndɔ lo mbewɔ monga la diɔtɔnganelo l’onto lambotshanyema kana ntɛkɛta la nde. (1 Kɔr. 5:11; 2 Jni. 10, 11) Lo nsala ngasɔ, vɔ sukɛka dilanya diakawosha Jehowa lo tshimbo ya dikumanyi. Laadiko dia laasɔ, vɔ koka mɛnya ngandji kawɔ k’efula ndo nkimanyiya nkumbo k’onto lambotshanyema nɛ dia vɔ wekɔ la lonyangu l’efula ndo diaha vɔ ndjɛna diele oko ndo vɔ mbahayokoka monga kaamɛ l’asekawɔ ambetawudi.—Rɔmɔ 12:13, 15.

Julian mbutaka ɔnɛ: “Wotshanyelo ekɔ yɛdikɔ yeso mɛtɛ l’ohomba nɛ dia yɔ tokimanyiyaka dia sho nsɛna lo yoho y’ɔtɔnɛ l’atɔndɔ waki Jehowa. Kaanga mbakoka dui sɔ mbiviya ndo mbakokadiɔ mbisha paa l’asolo, diɔ mbelaka etombelo w’amɛna. Otondongaka lakadihe washo lo lɔkɛwɔ la kɔlɔ l’ɔnami, tshike totondoyatshumoya.”