VHO Julian vho ri: “Musi ndo thetshelesa nḓivhadzo ya uri murwa wanga o bviswa tshivhidzoni, zwo tou nga vhutshilo hanga ho swika magumoni. Ho vha hu ene tanzhe, ro farana vhukuma, ri tshi ita zwithu zwinzhi ri roṱhe. O vha e tsumbo yavhuḓi, fhedzi o mbo ḓi sokou shanduka, a thoma u ḓifara nga nḓila i si yavhuḓi. Mufumakadzi wanga o vha a tshi dzulela u lila nahone ndi sa ḓivhi na uri ndi nga mu khuthadza hani. Ro vha ri tshi dzulela u ḓivhudzisa uri: ‘Zwenezwi zwi amba uri ro kundelwa naa sa vhabebi?’”

Ri nga amba hani uri u bvisa Mukriste tshivhidzoni ndi ndugiselelo ya lufuno arali zwi tshi vhavha nga u rali? U ya nga Maṅwalo, ndi ngani hu tshi tea u dzhiiwa vhukando vhuhulwane nga u rali? Nahone ndi ngani muthu a tshi bviswa tshivhidzoni?

Hu na zwiitisi zwivhili zwine zwa tshimbidzana zwine zwa ita uri Ṱhanzi ya Yehova i bviswe tshivhidzoni. Tsha u thoma, Ṱhanzi yo lovhedzwaho i ita tshivhi tshihulwane. Tsha vhuvhili, ha rembuluwi kha tshivhi tshawe.

Naho Yehova a sa lavheleli uri ri vhe vhathu vho fhelelaho, samusi e mukhethwa, u ri vhetshela mikano ine sa vhathu vhawe a lavhelela uri ri i tevhedze. Sa tsumbo, Yehova ha ṱoḓi ri tshi ita zwivhi zwihulwane zwi fanaho na u ḓifara luvhi nga zwa vhudzekani, u gwadamela midzimu ya zwifanyiso, vhuvhava, vhuvemu, u vhulaya na u ḓidzhenisa kha zwa vhungome.​—1 Vhakor. 6:9, 10; Nzumb. 21:8.

Naa ni a tenda uri mikano ye Yehova a ri vhetshela yone i a pfala nahone yo itelwa u ri tsireledza? Ndi nnyi a sa ṱoḓi u tshila vhukati ha vhathu vhavhuḓi vha re na mulalo, vhane wa nga vha fhulufhela? Vhathu vho raloho ndi vhahashu vha Vhakriste, ngauri vha tshila u tendelana na zwe vha zwi ana musi vha tshi lovhedzwa uri vha ḓo tevhedza vhulivhisi vhu re Ipfini ḽa Mudzimu.

Fhedzi hu pfi mini arali Mukriste o lovhedzwaho a ita tshivhi tshihulwane nga nṱhani ha uri u na vhushayanungo? Vhashumeli vha Yehova vha fhulufhedzeaho vha tshifhingani tsho fhiraho na vhone vho ita vhukhakhi vhu fanaho, fhedzi Mudzimu ho ngo vha laṱa. Tsumbo ine ra nga humbula nga hayo ndi ya Khosi Davida. Davida o ita vhupombwe nahone a vhulaya muthu, fhedzi muporofita Nathani o mu vhudza uri: “Yehova o u hangwela tshivhi tshau.”​—2 Sam. 12:13.

Mudzimu o hangwela Davida tshivhi tshawe, nge Davida a rembuluwa zwa vhukuma. (Ps. 32:1-5) Na ṋamusi, mushumeli wa Yehova u ḓo bviswa tshivhidzoni arali a sa rembuluwa kana arali a bvela phanḓa a tshi ita zwithu zwo khakheaho. (Mish. 3:19; 26:20) Arali vhahulwane vha re kha komiti ya khaṱhulo vha sa vhona uri muitazwivhi o rembuluwa zwa vhukuma, vha tea u mu bvisa tshivhidzoni.

Ri nga thoma ri tshi vhona u nga phetho ya u bvisa muitazwivhi tshivhidzoni yo kalula kana a si yavhuḓi, zwihuluhulu arali ri na vhushaka ha tsini na onoyo muthu. Naho zwo ralo, Yehova a tshi shumisa Ipfi ḽawe u ri thusa u vhona uri yeneyo ndi phetho i sumbedzaho lufuno.

Yesu o amba uri “vhuṱali vhu vhonala nga mishumo yaho.” (Mat. 11:19) Phetho ya vhuṱali ya u bvisa muitazwivhi a sa rembuluwi tshivhidzoni i ita uri hu vhe na mvelelo dzavhuḓi. Kha ri ambe nga ha hedzi mvelelo tharu:

U bvisa vhavhi tshivhidzoni zwi hulisa dzina ḽa Yehova. Samusi ri tshi vhidzwa nga dzina ḽa Mudzimu, nḓila ine ra ḓifara ngayo i kwama dzina ḽawe. (Yes. 43:10) Samusi nḓila ine murwa a ḓifara ngayo i tshi nga ita uri vhabebi vhawe vha huliswe kana u nyadziwa, na nḓila ine vhathu vha ḓipfa ngayo nga ha Yehova i a kwamea nga tsumbo yavhuḓi kana i si yavhuḓi ya vhathu vhane vha vhidzwa nga dzina ḽawe. Dzina ḽa Mudzimu ḽi a huliswa musi vhathu vhane vha vhidzwa ngaḽo vha tshi tshila nga milayo ya Yehova ya vhuḓifari. Zwo vha zwo tou ralo na misini ya Hesekiele ngauri vhathu vha dzitshaka vho vha vha tshi ḓivha vhathu vha Yuda hu vhone vhathu vha Yehova.​—Hesek. 36:19-23.

Ri nga nyadzisa dzina ḽa Mudzimu ḽine ḽa vha ḽikhethwa arali ra ḓifara nga nḓila i si yavhuḓi. Muapostola Petro o eletshedza Vhakriste a ri: “Zwino ni vhana vha Mudzimu vhane vha mu thetshelesa. Ni songo tsha ṱuṱuwedzwa nga nyemulo dze na vha ni nadzo musi ni sa athu u ḓivha tshithu, nṱhani hazwo, ivhani vhakhethwa kha zwoṱhe zwine na ita, samusi we a ni vhidza e Mukhethwa, ngauri ho ṅwaliwa u pfi: ‘Ni tea u vha vhakhethwa, ngauri nṋe ndi mukhethwa.’” (1 Pet. 1:14-16) Vhuḓifari havhuḓi vhu hulisa dzina ḽa Mudzimu.

Arali muṅwe wa Ṱhanzi dza Yehova a ita zwithu zwi si zwavhuḓi, khonani dzawe dzi nga zwi ḓivha. Nzudzanyo ya u bvisa muthu tshivhidzoni i sumbedza uri Yehova u na vhathu vho kunaho vhane vha tevhedza vhulivhisi vhu re Bivhilini u itela uri vha dzule vhe vhakhethwa. Muṅwe muthu o vhuya a ya Holoni ya Ṱhanzi dza Yehova ya ngei Switzerland nga tshifhinga tsha miṱangano nahone a amba uri u ṱoḓa u vha muraḓo wa tshivhidzo. Khaladzi awe o vha o bviswa nga nṱhani ha u ḓifara luvhi. O amba uri u ṱoḓa u vha ndanguloni “i sa konḓeleli u ḓifara luvhi.”

U bvisa muthu tshivhidzoni zwi tsireledza tshivhidzo tsha Vhukriste tsho kunaho. Muapostola Paulo o tsivhudza Vhakorinta nga ha khombo ya u sa bvisa vhaitazwivhi vha sa rembuluwi. O fanyisa nḓila i si yavhuḓi ine vha nga ṱuṱuwedza vhaṅwe ngayo na mbiliso ine ya kukumusa fuḽauru. O ri: “Mbiliso ṱhukhu i kukumusa fuḽauru yoṱhe.” A dovha a ri: “Bvisani muvhi vhukati haṋu.”​—1 Vhakor. 5:6, 11-13.

Zwi vhonala u nga muthu “muvhi” o ambiwaho nga Paulo o vha a tshi ḓifara luvhi a sa shoni. Nahone vhaṅwe tshivhidzoni vho vha vha tshi vho imelela nḓila ine a ḓifara ngayo. (1 Vhakor. 5:1, 2) Arali ho vha hu songo dzhiiwa vhukando ha u bvisa tshivhidzoni onoyo munna ane a khou ita tshivhi tshi nengisaho, vhaṅwe Vhakriste vho vha vha tshi ḓo ṱoḓa u tevhedza mikhwa ya u ḓifara luvhi nga zwa vhudzekani ine ya itwa kha yeneyo ḓorobo. Musi muthu o itaho tshivhi nga khole a sa dzhielwi vhukando zwi ita uri vhaṅwe vha dzhiele fhasi nḓila ine Mudzimu a ṱoḓa ri tshi ḓifara ngayo. (Muh. 8:11) Zwiṅwe hafhu, vhaitazwivhi vha sa rembuluwi vha nga nga “matombo a re fhasi ha maḓi,” zwa ita uri lutendo lwa vhaṅwe vha re tshivhidzoni lu tshinyale.​—Yuda 4, 12.

U bvisa muitazwivhi tshivhidzoni zwi nga mu thusa u vhona uri zwe a ita zwo khakhea. Yesu o vhuya a amba nga ha murwa we a ṱuwa hayani, a swika a phusukanya ifa ḽe khotsi awe vha mu ṋea nahone a tshila nga nḓila ya vhuhwarahwara. Onoyu murwa wa ḽihwarahwara o guda nga nḓila i vhavhaho uri musi e siho hayani zwithu zwi a konḓa. Murwa o fheleledza o zwi vhona uri zwe a ita zwo khakhea, o mbo ḓi rembuluwa nahone a vhuyelela hayani. (Luka 15:11-24) Nḓila ye Yesu a ṱalusa ngayo khotsi a re na lufuno we a takala musi murwa wawe a tshi shanduka, i ri thusa u pfesesa nḓila ine Yehova a ḓipfa ngayo. Yehova u ri: “A thi takaleli lufu lwa muvhi, fhedzi ndi takalela uri muvhi a shandule nḓila dzawe, a bvele phanḓa a tshi khou tshila.”​—Hesek. 33:11.

Vhathu vho bviswaho tshivhidzoni na vhone vha a thoma u zwi vhona uri vho xelelwa. Vha nga vhona uri zwe vha ita zwo khakhea musi vha tshi vhona masiandoitwa a vhukhakhi havho na u humbula zwifhinga zwavhuḓi zwe vha ḓiphiṋa ngazwo musi vha tshee na vhushaka havhuḓi na Yehova na vhathu vhawe.

Arali ri tshi ṱoḓa u thusa muitazwivhi a sa rembuluwi, ri fanela u mu sumbedza lufuno nahone ri khwaṱhise tshanḓa. Muphisalema Davida o ri: “Arali muvhuya a nthwa, u ḓo vha a tshi khou ntsumbedza lufuno lu sa shanduki; arali a nkaidza, zwi ḓo nga u khou shela mapfura ṱhohoni yanga.” (Ps. 141:5) Sa tsumbo, kha ri ri muṅwe muthu u khou ḽa ṋama, ya mu tzhipa mukuloni. U balelwa u fema zwavhuḓi nahone a thoma u fhelelwa nga nungo, a si tsha kona na u amba. Arali a sa thuswa nga u ṱavhanya, u ḓo fa. Khonani i ḓa ya mu gikhinya muṱana uri a ṱanze yeneyo ṋama. A nga kha ḓi pfa u vhavha musi a tshi khou gikhinyiwa, fhedzi zwi ḓo mu tshidza. Na Davida o zwi ṱhogomela uri muthu o lugaho u tea u mu kaidza u itela u mu thusa naho zwi tshi vhavha.

Vhathu vho khakhaho vha a vhuyelwa nga u bviswa tshivhidzoni. Nga murahu ha miṅwaha i ṱoḓaho u vha fumi, murwa wa Vho Julian o ambiwaho mathomoni, o lugisa vhutshilo hawe, a vhuyelela tshivhidzoni nahone zwino ndi muhulwane wa tshivhidzo. O ri: “U bviswa tshivhidzoni zwo ita uri ndi sedzane na masiandoitwa a nḓila ye nda vha ndi tshi khou tshila ngayo. Zwo vha zwo tea uri ndi bviswe tshivhidzoni.”​—Vhahev. 12:7-11.

Ndi ngoho uri u bvisa muthu tshivhidzoni ndi tshiimo tshi ṱungufhadzaho. Fhedzi tshenetsho tshiimo tshi nga lugisea. Roṱhe ri na zwine ra nga zwi ita uri musi muthu a tshi bviswa tshivhidzoni zwi vhe na mbuyelo dzavhuḓi.

Vhahulwane vha tea u lingedza u sumbedza lufuno u fana na Yehova musi vha tshi vhudza muitazwivhi phetho i ṱungufhadzaho ya uri u khou bviswa tshivhidzoni. Musi vha tshi khou mu vhudza nga ha yeneyo phetho, vha mu ṱalutshedza zwavhuḓi na nga vhuthu zwine a fanela u zwi ita uri a vhuyedzedzwe tshivhidzoni. Vhahulwane vha nga ita vha tshi dalela vhathu vho bviswaho tshivhidzoni vhane vha sumbedza uri vha khou shanduka u itela u vha humbudza nga ha zwine vha nga zwi ita u itela u vhuyelela kha Yehova. *

Miraḓo ya muṱa i nga sumbedza uri i funa tshivhidzo na muthu o khakhaho nga u ṱhonifha phetho yo dzhiiwaho ya u bvisa onoyo muthu tshivhidzoni. Vho Julian vho ri: “O vha a tshi kha ḓi vha ṅwananga, fhedzi nḓila ye a vha a tshi khou tshila ngayo yo ri fhandekanya.”

Miraḓo ya tshivhidzo i nga sumbedza lufuno nga u sa amba na muthu o bviswaho tshivhidzoni na u iledza u kwamana nae. (1 Vhakor. 5:11; 2 Yoh. 10, 11) Musi vha tshi ita nga u ralo vha vha vha tshi khou tikedza nḓila ye Yehova a mu kaidza ngayo a tshi shumisa vhahulwane. Zwiṅwe hafhu, vha nga tikedza na u sumbedza lufuno nga ho engedzeaho kha miraḓo ya muṱa ya muthu o bviswaho tshivhidzoni ngauri vhenevho vha a pfa vhuṱungu zwihulu nahone a vho ngo tea u itwa uri na vhone vha ḓipfe u nga vho bviswa tshivhidzoni.​—Vharoma 12:13, 15.

Vho Julian vha phetha nga uri: “U bvisa muthu tshivhidzoni zwi a ṱoḓea ngauri zwi ri thusa u tshila nga nḓila ine Yehova a ṱoḓa ri tshi tshila ngayo. Naho zwi tshi vhavha, hu vha na mvelelo dzavhuḓi mafheleloni. Ṅwananga o vha a sa ḓo shanduka arali ndi vhe ndo dzumba vhukhakhi hawe.”