“HAN nabatian ko an pahibaro nga an akon anak ginpaiwas ha kongregasyon, baga hin ginbuno an akon kasingkasing,” siring ni Julian. “Hiya an akon suhag, ngan duok gud kami; magkaupod kami ha pagbuhat han damu nga butang. Maopay hiya nga anak, pero tigda nga nagbag-o an iya panggawi. Pirme nagtatangis an akon asawa, ngan diri ako maaram kon paonan-o hiya liliawon. Pirme namon ginpapakianhan an amon kalugaringon kon diri ba kami maopay nga kag-anak.”

Kay ano nga masisiring nga an pagpaiwas ha kongregasyon mahigugmaon nga tagana kon nagigin hinungdan ito hin duro nga kasakit? Ano an Kasuratanhon nga mga hinungdan han sugad nga kahikayan? Ngan kay ano nga may ginpapaiwas ha kongregasyon?

Duha nga butang—nga kinahanglan pariho makita—an magriresulta ha pagpaiwas ha kongregasyon ha usa nga Saksi ni Jehova. Siyahan, nakahimo hiya hin seryoso nga sala. Ikaduha, diri hiya nagbabasol.

Bisan kon diri naglalaom hi Jehova nga diri kita makakasayop, may suruklan hiya han pagkabaraan nga iya ginlalaoman nga susundon naton. Pananglitan, gin-oobligar kita niya nga diri magbuhat hin seryoso nga mga sala sugad han seksuwal nga imoralidad, idolatriya, pangawat, panikas, pagpatay, ngan espiritismo.—1 Cor. 6:9, 10; Pah. 21:8.

An limpyo nga mga suruklan ni Jehova makatadunganon ngan nagpapanalipod ha aton. Hin-o ba an diri naruruyag makig-upod ha mamurayawon, desente, ngan matataporan nga mga tawo? Sugad hito nga mga indibiduwal an nakakaupod naton ha Kristiano nga kongregasyon. Tungod ini kay nagkikinabuhi kita uyon ha mga suruklan nga aada ha Pulong ni Jehova, sugad han aton iginsaad han nagdedikar kita ha iya.

Pero ano man kon nakasala hin seryoso an usa nga bawtismado nga Kristiano tungod han iya kaluyahan? May magtinumanon nga surugoon hi Jehova ha naglabay nga nakasala hin seryoso, pero waray niya hira bug-os nga isalikway. Usa hito hi Hadi David. Nakabuhat hiya hin pag-adulteryo ngan pagpatay; pero ginsidngan hiya ni propeta Natan: “Isinikway . . . ni Jehova an imo sala.”—2 Sam. 12:13.

Ginpasaylo han Dios hi David tungod han iya sinsero nga pagbasol. (Sal. 32:1-5) Sugad man, an usa nga surugoon ni Jehova yana paiiwason ha kongregasyon kon diri hiya mabinasulon o kon nagpapadayon hiya ha pagbuhat hin maraot. (Buh. 3:19; 26:20) Kon diri makita han mga tigurang nga membro han hudisyal nga komite an tinuod nga pagbasol ha nakasala, kinahanglan nira hiya paiwason ha kongregasyon.

Ha tinikangan, bangin abaton naton nga an desisyon ha pagpaiwas ha nakasala mabug-at hinduro nga disiplina o diri pa ngani mahigugmaon, labi na kon duok kita ha iya. Kondi an Pulong ni Jehova  naghahatag ha aton hin makakombinse nga mga rason nga mahigugmaon an sugad nga desisyon.

Hi Jesus nagsiring nga an “kinaadman napapamatud-an nga matadong pinaagi han mga buhat hito.” (Mat. 11:19) An maaramon nga desisyon ha pagpaiwas ha usa nga diri mabinasulon may-ada maopay nga resulta. Tagda ini:

An pagpaiwas ha mga nakasala nagpapasidungog ha ngaran ni Jehova. Tungod kay gintatawag kita ha ngaran ni Jehova, an aton panggawi sigurado nga nakakaapekto ha iya ngaran. (Isa. 43:10) Sugad la nga an panggawi han anak mahimo magpasidungog o magpasipara ha iya mga kag-anak, an maopay o maraot nga panggawi han katawohan ni Jehova may epekto liwat ha impresyon han mga tawo ha Iya. Napapasidunggan an maopay nga ngaran ni Jehova kon an katawohan nga gintatawag ha iya ngaran nagkikinabuhi uyon han iya suruklan ha moral. Puropariho ito han nahitabo ha panahon ni Esekiel diin iginkaw-ing han katawohan han mga nasud an ngaran ni Jehova ha mga Judio.—Esek. 36:19-23.

Mapapasiparahan naton an baraan nga ngaran han Dios kon magbubuhat kita hin imoralidad. Hi apostol Pedro nagsagdon ha mga Kristiano: “Sugad nga masinugtanon nga mga anak, ayaw na kamo pagpamolde ha mga hingyap niyo hadto tungod han iyo kaignorante, lugod, magin baraan kamo ha ngatanan nga panggawi niyo, pariho ha Usa nga Baraan nga nagtawag ha iyo, kay ini an iginsurat: ‘Kinahanglan magin baraan kamo, kay ako baraan.’” (1 Ped. 1:14-16) An limpyo ngan baraan nga panggawi nagpapasidungog ha ngaran han Dios.

Kon an usa nga Saksi ni Jehova magbuhat hin maraot, posible nga hibaroan ito han iya kasangkayan ngan mga kakilala. An pagpaiwas ha iya ha kongregasyon nagpapakita nga hi Jehova may limpyo nga katawohan nga nagsusunod han mga giya tikang ha Kasuratan basi matipigan ito nga pagkabaraan. Usa nga diri Saksi an tinambong ha katirok ha Kingdom Hall ha Switzerland ngan nagsiring nga karuyag niya magin Saksi. Ginpaiwas ha kongregasyon an iya bugto tungod hin imoralidad. Nagsiring hiya nga karuyag niya magin membro hin organisasyon nga “diri nakonsinter han maraot nga buhat.”

An pagpaiwas nagpapanalipod han limpyo nga Kristiano nga kongregasyon. Ginpahamangnoan ni apostol Pablo an mga taga-Corinto han peligro han padayon nga pakig-upod hadton tinuyo nga nagbubuhat hin sala. An maraot nga impluwensya han sugad nga mga indibiduwal iginpariho niya ha libadura nga nakakapatubo ha bug-os nga minasa. Hiya nagsiring: “An gutiay nga libadura nakakapatubo han bug-os nga minasa.” Katapos, ginsagdonan niya hira: “Paiwasa tikang ha iyo an maraot nga tawo.”—1 Cor. 5:6, 11-13.

Posible nga an “maraot nga tawo” nga gin-unabi ni Pablo dayag nga nagbuhat hin imoralidad. Ngan ginpakamatadong pa ngani han iba nga membro han kongregasyon an iya ginbuhat. (1 Cor. 5:1, 2) Kon ginkonsinter ito nga seryoso nga sala, bangin naaghat liwat an iba nga Kristiano ha pagbuhat han imoral nga mga kustomre han ira syudad. An pagkonsinter hadton tinuyo nga nagbubuhat hin sala nag-aaghat ha iba nga balewarayon an mga suruklan han Dios. (Ekles. 8:11) Dugang pa, an diri mabinasulon nga mga nakasala mahimo magin pariho ha mga “bato nga nakatago ha ilarom han tubig” nga magpapaluya han pagtoo han iba ha kongregasyon.—Jud. 4, 12.

An pagpaiwas mahimo mag-aghat ha nakasala nga mamurubuot. Makausa, hi Jesus nag-istorya mahitungod hin batan-on nga lalaki nga binaya ha balay han iya amay ngan ginwaldas an iya panurundon ha maraot nga pagkinabuhi. Tungod han iya mapait nga eksperyensya, hinbaroan han makaragon nga anak nga an pagkinabuhi nga waray ha poder han iya amay makasurubo ngan puno hin kasakitan. Ha urhi, nakapamurubuot hiya, nagbasol, ngan nagdesisyon pagbalik ha iya pamilya. (Luc. 15:11-24) An paghulagway ni Jesus ha mahigugmaon nga amay nga nalipay ha pagbag-o han iya anak nabulig ha aton nga hibaroan an pagbati ni Jehova. Hi Jehova nagpasarig ha aton: “Diri ko ikinalilipay an kamatayon han maraot; kondi nga an maraot tumalikod tikang han iya paagi ngan mabuhi.”—Esek. 33:11.

Sugad man, bangin masantop hadton mga ginpaiwas ha Kristiano nga kongregasyon—an ira espirituwal nga pamilya—kon ano an nawara ha ira. An makasurubo nga mga resulta han ira sala, pati na an makalilipay nga mga hinumdoman han may-ada pa hira maopay nga relasyon kan Jehova ngan ha iya  katawohan, mahimo mag-aghat ha ira nga mamurubuot.

Kinahanglan an gugma ngan karig-on basi makapamurubuot an nakasala. An salmista nga hi David nagsiring: “Pasamara ha akon an matadong, usa ito nga kalooy; ngan papagsusna hiya ha akon, masusugad ito hin lana dida ha ulo.” (Sal. 141:5) Ha pag-ilustrar: Hunahunaa an usa nga hiker nga sobra nga nakapoy durante hin mahagkot hinduro nga panahon. Naghamubo gud an temperatura han iya lawas, ngan naghingaturog hiya. Kon kumaturog hiya, mamamatay hiya. Samtang naghuhulat hin rescue, usahay gintataplong hiya han iya kaupod basi diri hiya mahingaturog. Maul-ol an taplong, pero makakasalbar ito han iya kinabuhi. Ha pariho nga paagi, maaram hi David nga bangin kinahanglan tagan hiya hin masakit nga disiplina han usa nga matadong nga tawo para ha iya kaopayan.

Ha damu nga higayon, naihahatag han pagpaiwas ha kongregasyon an disiplina nga ginkikinahanglan han nakasala. Paglabay hin napulo ka tuig, an anak ni Julian nga gin-unabi kanina, nagbag-o han iya pagkinabuhi, binalik ha kongregasyon, ngan usa na yana nga tigurang. Hiya nagsiring: “Han ginpaiwas ako ha kongregasyon, napiritan ako nga atubangon an resulta han akon paagi han pagkinabuhi. . . . Ginkinahanglan ko an sugad nga disiplina.”—Heb. 12:7-11.

Tinuod, an pagpaiwas ha usa ha kongregasyon masisiring nga trahedya ha espirituwal, pero diri ito kinahanglan magin hinungdan hin mas daku nga problema. Kita ngatanan may-ada papel basi masiguro nga an pagpaiwas ha kongregasyon magigin mapulsanon.

An mga tigurang nga magsusumat ha nakasala han ira desisyon nga pagpaiwas ha iya nangangalimbasog ha pagpakita han gugma ni Jehova. Kon iginpapahibaro ha nakasala an ira desisyon, ira iginsasaysay ha matin-aw ngan buotan nga paagi kon ano an iya kinahanglan himoon basi makabalik ha kongregasyon. Basi pahinumdoman an mga ginpaiwas kon paonan-o hira makakabalik kan Jehova, ha panapanahon ginbibisita han mga tigurang adton nagpapakita hin pagbag-o. *

Maipapakita han mga kapamilya an gugma ha kongregasyon ngan ha nakasala pinaagi ha pagtahod ha desisyon nga pagpaiwas. Hi Julian nagsiring: “Anak ko pa gihapon hiya, pero an iya paagi ha pagkinabuhi nagin ulang ha amon relasyon.”

Maipapakita han ngatanan ha kongregasyon an gugma nga iginbasar ha prinsipyo pinaagi ha paglikay ha pakigkita ngan pakigkomunikar ha ginpaiwas. (1 Cor. 5:11; 2 Juan 10, 11) Hito nga paagi, ginsusuportaran nira an disiplina nga iginhatag ni Jehova pinaagi han mga tigurang. Dugang pa, mahimo liwat magpakita an kabugtoan hin gugma ngan suporta ha pamilya han ginpaiwas, nga nasusubo gud ngan diri sadang umabat nga ginlilikyan gihap hira han kabugtoan.—Roma 12:13, 15.

“An pagpaiwas ha kongregasyon usa nga kahikayan nga aton kinahanglan, ngan nabulig ito ha aton nga magkinabuhi uyon ha mga suruklan ni Jehova,” siring ni Julian. “Ha kamaihaan, naghahatag ito hin maopay nga resulta bisan pa han kasakit. Kon ginkonsinter ko an maraot nga panggawi han akon anak, bangin waray gud hiya magbag-o.”