WIRINA nga Julian aya: “Ho mi agi gu tingidapai ni nga i ima kusa wire kusayo rogo dungurati, mi aberẽhe nga digido zegino ima da fere. Ko angia bambata wire, na ani aima mbeda na ko, ani anaamanga dungu apai kina sa. Ko angia wene gude, ono wakina ikpiro gumba ko atona ka manga apai ngba gu gene naarunga ya. Diare akpari tipa gbanga regbo ka mi ainonga wai ka fu wasa furi ya. Ani anaasana tirani dedede singia pai ho ani amanganga ha ya.”

Wai tie rengbe aboro ka ya kusa boro rogo dungurati nga wene mbakadapai baraho si aba bakere gberãrago ni ti aboro? Gini nduapai Ziazia Kekeapai afuhe tipa gi ngbatunga nyanyaki diaberã re? Na ginipai nzunzu nasa gupai nga i kusi boro kusayo rogo dungurati?

Apai ue rengbe ka sa gupai nga i kusi boro rogo dungurati. Bambataha nga, gu boro zi bapatiza ni Dezire Yekova mangi kere ingapai. Uehe nga, ni asanga berãni ti gani ingapai te.

Wa vura duhe nga Yekova ima ino gupai nga ani nga kpakpa aboro, ko naida aida ani mangipai kuti gu gako andiko nga ga du gigiri. Ni kpiapai, Yekova aidanga ani mangi gu kere ingapai du wa wasiwasi kodaba, irisokpiahe, dĩi, aura, imo boro, na sangbaatoro te.—1 Kor. 6:9, 10; Yugo. 21:8.

Ya mo mo arengbanga ka ida kuti gupai nga ga Yekova andiko tipa ruru mangapai ni wenehe na si tipa ka banda rani te? Da aidanga ka raka dagba agu aboro nga aboro zereda, na agu aboro namanga rurupai rengbe boro ka kido kuti yo ya? Ani nabi ngbatunga agi aboro re dagba agu awirinarani nga ga toro yo, mbiko gu kidohe ani amangihe ti regbo gaani kparatise fu Mbori ka raka ringbisihe kuti agu arugute du ni kekehe rogo Fugoko yo.

Na ginipai rengbe ka manga ka si du nga gu Kristano naima zio bapatiza mangi kere ingapai mbiko gu rungbura nga ga borose? Gu ga Yekova ruru amoyambu naraki bakuru kusayo aima manga kere aingapai, ono Yekova aambunga yo kindi te. Bakindo Davide nga gu ni sa dagba agu aboro re. Davide amangi bäri na ki imi boro; wa si avura du wo gu nebi nangia Natana aya fuko: “Yekova di ga ingapai ti ro ku sa yo.”—2 Sam. 12:13.

Yekova ambupai fu Davide ti gako ingapai mbiko ko adu na ndikidi saberã. (Tam. 32:1-5) Wakina gure a, i rengbe ka kusa ga Yekova moyambu areme kinagu ka ni asanga berãni ya watadu ka ni nye kindi kuti manga gupai du ni gbegberẽhe. (Amo. 3:19; 26:20) Ka si du nga gu boro re ayugonga ndikidi saberã fu agu abaakumba du rogo rondo sarangbanga te, i du wa ka i kusi ni kusayo.

Ti bambataha, ani ima rengba ka bihe nga gu diaberã re arunga te watadu si ni gbegberẽhe, gbe ka si du nga gu boro re nga mbembedi gumerani. Wa  vura duhe wo, Fugo Yekova naundo rani ani bi ndu gupai si aida ani bi gu diaberã re ti ni ni wenehe.

Yesu aya: “I asapa ngbanga fu tatamana mbiko sabehe.” (Mt. 11:19) Gu wene diaberã nga ka kusa gu boro asanga berãni ya na kusa wene sangbanaha. Oni bingo agi pai du biata re:

Kusa gu boro mangi irairapai nafu iriso fu rimo Yekova. Wa duhe nga ani na rimo Yekova rirani, gupai ani amangaha nasa rimoko si du ni wenehe watadu ni gbegberẽhe. (Yes. 43:10) Kina wai gu mangapai nga ga gude narengbe ka ye na irisa watadu gbarasarimo fu avunguru, kinawo a rengbe gu bipai nga ga aboro kadu tipa Yekova ka si du nga ani namanga wenepai watadu gbegberẽpai. Rimo Mbori rengbe kadu ni wenehe ka si du nga agu aboro du na rimoko riyo namangapai kuti gako arugute. Ngbatunga gupai re naadu ti regbo Yezekere ho agu aboro naadu pati aYudo anaayamba yo ni na rimo Yekova.—Yeze. 36:19-23.

Ani rengbe ka ye na gbarasarimo kuti ziazia rimo Mbori ka sidu nga ani mangipa wasiro. Gu mokedi nangia Petero afu rugute fu aKristano nga: “Oni dú wa agude giasangba, ka oni mbákadi nga tironi sa gu kuru nyemuahe nadu ti roni mbata ya, ho oni aruga nga tironi ni na pai ya. Ono wa du gu ko nayambu roni du ni ziazia ko oni dú a wo ni ziazia roni rogo gaoni apai dũ, mbiko Ziazia Kekeapai naya, ‘Oni dú ziazia bambiko mi du ziazia.’” (1 Pet. 1:14-16) Gigiri sino mangapai naye na iriso fu rimo Mbori.

Ono tie, ka si du nga Dezire Yekova namanga gupai du ni gbegberẽhe, si nawira abakureani na agu aboro ini ni ima rengba ka inopai tipa gipai re. Gu diaberã nga ga kusa boro nayugo gupai nga Yekova na gigiri aboro beko nga agu yo nakakuti agu arugapai nga ga Ziazia Kekeapai tipa ka banda padu ziazia. Kura boro Switzerland yo aye tipa dunguratise ku Bambu Kindo yo na ki pe gupai nga ko naida kada ni Dezire Yekova. I akusi dawiriko mbiko ri amangi meteka. Ko ape gupai nga ko naida ka du rogo gu riigbu “ambunga aboro i nimangi gbegberẽ apai ya.”

Kusa gu boro mangi irairapai nabanda gu dungurati nga ga aKristano si du ni gigirihe. Gu mokedi nangia Pauro afu zahe fu agu awirina naadu Korinda yo tipa gu gbegberẽpai rengbe ka mangayo ka i mbu gu boro namanga ingapai niwia. Ko aringbisi gu maapai kurii nga ga agu aboro namanga ingapai niwia kuti agbooro nga gu rengbe ka sa ngungo si fuko, ko aya: “Oni aina nga ya toni agbooro nandu rogo boro kakputu he dunduko te?” Na ko afu rugute fuyo nga: “Oni kúsi gu gbegberẽ boro dagba roni yo re.”—1 Kor. 5:6, 11-13.

Si tie ziazia nga, “gu gbegberẽ boro” Pauro afura tipa ni re aamanga kere meteka. Na gu kura aboro rogo dungurati aima tona ka fura tipaha nga si gu ruaru. (1 Kor. 5:1, 2) Wa ka si adu nga i ambu gu ngbatunga kere ingapai re si nimangi rogo dungurati, ka gu kura aKristano atona ka pekafuo gu ngbatunga wasiwasi mangapai naamanga rogo gu gbata re. Ka i mbu agu aboro namanga ingapai rogo wia yo rogo dungurati, si rengbe ka sa gupai nga aboro naabi gu wene arugute nga ga Yekova na taatapaha. (Batu. 8:11) Kurigure, gu boro aidanga ka saberã ni ti gani ingapai ya rengbe kadu wakina “airabiriki” na kini rindosi ga kura aboro idapase rogo dungurati.—Yuda 4, 12.

Kusa gu boro mangi irairapai rengbe ka sa ni ni aria gani berã. Ti kura regbo sa Yesu afura tipa paranga na guari kua bako na ki gbarasipa gako aũkumuko ngba iraira gene. Gu ingiingi paranga re awirikipai ngba iigira gene nga zanga raka kua bako ayengo na ngbarago fuko te. Gu paranga re aini gu kerepai ko amangihe na ki saberã ko, na ki karaga tiko fuo gako aborokporo. (Rk. 15:11-24) Wai Yesu asakipai tipa gu ngbarago ba gu paranga re adu na ni ho ko asa berã ko ni naundo rani ani inipa gu ngbarago du Yekova na ni. Ko nakido rani nga: “Rago angba nga ti re tipa kpio gbegberẽ boro te, ono gu ngba nga gbegberẽ boro sa tini ti gani pai ki nye ni ungani.”—Yeze. 33:11.

Teketeke a, agu aboro i nakusiyo rogo gu dungurati nga ga aKristano du nga gu kpuyo nga ga toro ima rengba ka ino pa nyaka pa guhe i aingisihe. Gu gbegberẽ sangbanapai rengbe ka ye mbiko gani ingapai, na berãkurii pa gu ngbarago ni anaagbiaha  ho ni adu ni na wene pagume na Yekova na gako aboro ima rengba ka sani ni sa gani berã.

Si naida nyemuse gbiati ru nyanyaki tipa ka kusa gi surungba pai re. Davide aya: Ka “ruru boro ta re si adú ni wenepai fere, ni rúgu re, ono si adù wa nzeme ku rire yo.” (Tam. 141:5) Ani yugungo ho na kpiapai: Oni moingo kpia gupai ku berã roni yo nga boro nari tĩo meme ru ki kongo ni goni yo. Ka gene adu nga wa ka ni ongo wenengai ya, omeni ki ima nyasa dũ. Gene beni wa ka ni fura te. Ka boro aundongo ni niˈipo ya ni kpi akpi. Bakureani kini tona ka yawa gini yo tipa ni suku gu meme re. gu yawa ni re ima rengba ka igirãsi ni, ono si ima rengba ka batasa ni. Wakina gure a, Davide aima ino gupai nga si naida aida ruru boro fu iigira arugute fuko tipa si undo ko.

Rogo dungu agene, kusa gu boro mangi ingapai rogo dungurati naruga ni. Tingbafuo agarã bawe, wiri Julian ani nifura tipa ko ti tonatonaha ambakadi gako gene raka, na ki karaga tiko ku rogo dungurati na ko awere nga bakumba. Ko ape gupai nga: “Kusa yo re rogo dungurati asa gupai nga mi gbia tire na sangbana gimi gbegberẽ mangaapai. Si aida aida mi gbia ngbatunga gu rugute re.”—Eb. 12:7-11.

Rengo ngaha nga, kusa boro rogo dungurati naye na gberango, ono si aidanga si da ni gu kere gberango fu ri ome te. Ani dunduko si aida ani mangipai kuti gu ringbisapai du tipa kusa boro rogo dungurati tipa si undo gu boro re.

Abaakumba nga agu aboro namanga gu kpakarakpakara diaberã nafu kina rungo fuyo re nga ga kusa boro rogo dungurati, si naida i yugu ga Yekova nyemuse. Ho i pepa gayo diaberã ni fu gu boro re, i napeka pa agu apai funi si aida nimangihe wa ka i karaga ni berewe ku rogo dungurati ngba wene gene. Tipa ka undo agu aboro i nakusiyo i karagatiyo fuo Yekova, abaakumba nandu ti kura aregbo ka bi yo baraho i nayuguhe ni nga i naida ka aria gayo sino raka. *

Aborokporo rengbe ka yugo gayo nyemuse tipa dungurati na gu boro mangi ingapai ni mangayo pai kuti gu diaberã nga ga kusa gu boro re rogo dungurati. Julian aya: “Ko angia kina wire kindi, ono gako mangapai amoi ndugu dagbarani na ko.”

Agu aboro du rogo dungurati rengbe ka yugo gayo nyemuse ni zanga koda yo tiyo watadu ka fura na gu boro i nakusi ni re. (1 Kor. 5:11; 2 Yo. 10, 11) Rogo gi gene re, i namangapai kuti agu arugute Yekova nafuhe fu gu boro re vurube abaakumba. Kurigure, i ima rengba ka yugo gayo nyemuse fu agume gu boro i nakusi ni rogo dungurati re, nga agu yo rengbe ka du na gberãrago na si aidanga i ni bi tiyo nga i wa agu aboro i naima kusayo rogo dungurati a te.—Rom. 12:13, 15.

Julian aya: “Kusa boro rogo dungurati nga gu mbakadapai si aida ani idi aida na ni, si naundo rani ani raki kuti ga Yekova arugute. Ku mbatayo gizo, wa vura duhe nga si rengbe ka fuda rani, si nakusa wene surungbaha akusa. Wa ka mi aabia wire aabia na gako mangapai ka ko akaraganga tiko te.”