Bibliapi nishca shinaca, fin chayamujpica jatun llaquicunami tianga. Bibliapica cashnami nin: ‘Chai punllacunapica ninan manllanayai llaquimi tianga. Cai pacha tiai callarishca punllamandapacha cunangaman, chashna jatun llaquica nara tiarcachu. Llaqui punllacuna ama unaicaman tiachun, Dios na saquichijpica, shujllapash na quishpirinmanllu’ nishpa (Mateo 24:21, 22). Bibliapica ninbashmi: “Taita Dios munashcata rurajcunaca, causaitami causanga” nishpa (1 Juan 2:17).

Salvaringapaca ¿imatata rurana canchi? ¿Ashtahuan culquita, cosascunatachu mirachina canchi? Na. Chaipa randica Bibliapica cai consejotami cun: ‘Tucui ima tiashcatapash tucuchina cajpimi, Taita Diostalla tucui shunguhuan yariashpa, paipalla causana canguichi. Taita Diospa punlla ucha chayamuchun yashpami chapariana canguichi’ nishpa (2 Pedro 3:10-12). Ñaupa textocunata ricujpica intindichinmi nali gobiernocunapash, nali gobiernocunata apoyajcunapash, Diospa Reinota na cazujcunapash tucurina cashcata. Imashinami ricunchi, chai punllapica culquipash ñucanchicunataca na salvangachu.

Chai punllapi salvaringapaca Taita Dios munashcashnami causana canchi, paitami cazuna canchi (Sofonías 2:3). Gentecunaca tucuri punllacunapi causanajushcataca na cuenta japinllu. Shina cajpipash ñucanchicunaca Taita Diospa punlla ña chayamujushcataca yariami causana canchi. Testigo de Jehovacunaca chai punllapi salvaringapaj imata rurana cashcataca cushijushpami quiquinmanga yachachinga.