Bible totɛka ɔnɛ ekomelo mendanaka ndo la elanyelo: “Mfɔnu ka woke kayoyala woho wahatayalaka oma ko etatelo k’andja polo ndo kakianɛ ndo woho wahayalaki nto pondjo. . . . Lo mɛtɛ, otondonga nshi shɔ kosusama, tshike ndooko onto lotoshimbamɛ.” (Mateo 24:21, 22) Koko, Nzambi tolakaka di’anto efula wayoshimbamɛ, Bible mbutaka ɔnɛ: “Andja ɔnɛ . . . wekɔ lo tete, koko ɔnɛ lasala lolango la Nzambi tshikalaka pondjo.”—1 Joani 2:17.

Naka wɛ nangaka ndjoshimbamɛ etena kayolanyema andja ɔnɛ ndo ‘nsɛna pondjo pondjo,’ kakɔna kahombayɛ nsala? Onde wɛ pombaka ntatɛ ndjamɔtshɛ mbo ya ndɛ kana nsala ɛlɔngɔswɛlɔ ekina wa lo demba? Ndooko. Bible tokeketshaka la wolo tshɛ dia mbetsha awui wotshikitanyi la wasɔ lo dihole dia ntondo. Tɔ mbutaka ɔnɛ: “Lam’ele diangɔ sɔ tshɛ diayɔlɛlɔ lo yoho shɔ, nyokanyiya weho w’anto wahombanyu monga lo lɔkɛwɔ l’ekila ndo lo ditshelo diɛnya dia nyekɔ lo mamema Nzambi, etena kakonganyu ndo kohɔnyu woongelo wa lushi la Jehowa.” (2 Petero 3:10-12) Awui wodingi avɛsa asɔ mɛnyaka dia l’atei wa “diangɔ sɔ tshɛ” diayɔlɛlɔ, mbele ndo emboledi wa kɔlɔ wa l’andja ɔnɛ ndo wanɛ tshɛ wakasɔnɛ dia ndjela ɛlɔmbwɛlɔ kawɔ ko ntona kaki Nzambi. Mbokɛmaka hwe dia, oyadi sho koyamɔtshɛka lomombo la l’emunyi, diangɔ sɔ hadiokoke toshimbɛ oma l’elanyelo kɛsɔ.

Lo mɛtɛ, dia sho ndjoshimbamɛ sho pombaka ndjakimɔ le Jehowa Nzambi ndo mbeka awui wendana la lɔkɛwɔ ndo etsha w’ɔngɛnyangɛnya. (Zefaniya 2:3) Lo dihole dia ndjela anto efula ɛlɔ kɛnɛ ndo minya yimba lo tolembetelo tɛnya dia tekɔ lo nsɛna lo etena k’ohomba kɛsɔ, sho pombaka “[mbohɔka] woongelo wa lushi la Jehowa.” Ɛmɛnyi wa Jehowa koka kɛnya oma lo Bible kɛnɛ kakokayɛ nsala dia ndjoshimbamɛ lo lushi laya ka ndja lɔsɔ.