Baebolo Kpuya Mɔɔ Bɛbua
Ndɛnebualɛ Kenle ne a le duzu?
Duzu ati a ndɛnebualɛ kenle ne bayɛ anyelielɛ mekɛ ɛ?
Wɔ Baebolo mekɛ zo, Nyamenle luale ndɛnebuavolɛma anwo zo liele ye menli vile nzisi bo. (Maanlebuvolɛma 2:18) Baebolo ne ka kenle bie Ndɛnebualɛ Kenle ne anwo edwɛkɛ kɛ ɔle anyelielɛ mekɛ mɔɔ Gyihova, ewiade amuala Ndɛnebuavolɛ ne balie alesama avi nzisi nu.—Kenga Edwɛndolɛ 96:12, 13; Ayezaya 26:9.
Nyamenle ɛkpa Gyisɛse kɛ ɔva pɛlepɛlelilɛ ɔbua anyewɔzoamra nee mɔwuamra ndɛne. (Gyima ne 10:42; 17:31) Menli dɔɔnwo ɛwu mɔɔ ɛnee bɛnze Nyamenle a. Wɔ Ndɛnebualɛ Kenle ne anu, Gyisɛse badwazo menli ɛhye mɔ amaa bɛanwu nɔhalɛ Nyamenle ne na bɛahulo ye.—Kenga Gyima ne 24:15.
Duzu ati a Ndɛnebualɛ Kenle ne bayɛ ɛvolɛ apenle ɛ?
Bɛbadwazo mɔwuamra wɔ ɛvolɛ apenle ko ne anu. (Yekile 20:4, 12) Bɛbanyia mekɛ dɔɔnwo bɛazukoa Nyamenle ndenle ne mɔ na bɛadie ɔ ne. Menli dɔɔnwo ɛnlie ɛnli ɛdeɛ, noko Baebolo ne ka kɛ bɛbalua mɔɔ menli bayɛ wɔ bɛ ewudwazo ne anzi la azo a bɛabua bɛ ndɛne a.—Kenga Wulomuma 6:7.
Eza Baebolo ne ka ndɛnebualɛ kenle mɔɔ bazi arɛlevilɛ nu, kolaa na ɛvolɛ apenle ko ne abɔ ɔ bo la anwo edwɛkɛ. Eza bɛfɛlɛ kenle zɔhane awieleɛ ne, kɛmɔ yɛzuzu nwo wɔ edwɛkɛ titili ne anu la. Mekɛ zɔhane, Nyamenle baye menli mɔɔ ɛnze ye nee amumuyɛma kɔsɔɔti avi ɛkɛ. (2 Pita 3:7) Zɔhane ati, ɔwɔ kɛ yɛyɛ debie yɛfa yɛkile kɛ yɛkulo Nyamenle.—Kenga 2 Pita 3:9, 13.
