Den tempu bíbliko, Dios a usa hues pa libra su pueblo di inhustisia. (Huesnan 2:18) Beibel ta deskribí e binidero Dia di Huisio komo un tempu felis ora ku Yehova, e Hues di henter tera, lo libra humanidat di inhustisia.—Lesa Salmo 96:12, 13; Isaías 26:9.

Dios a nombra Hesus pa hasi hustisia pa tantu e bibunan komo e mortonan. (Echonan 10:42; 17:31) Hopi hende a muri sin konosé Dios. Durante e Dia di Huisio, Hesus lo lanta e hendenan ei for di morto pa nan konosé e Dios berdadero i stim’é.—Lesa Echonan 24:15.

Beibel ta bisa ku e mortonan lo ser lantá durante e mil añanan ei. (Revelashon 20:4, 12) Nan lo tin mester di tempu pa siña konosé Dios i obedes’é. Kontrali na loke mayoria di hende ta kere, Beibel ta mustra ku hende lo ser husgá a base di loke nan hasi despues ku nan lanta for di morto.—Lesa Romanonan 6:7.

Beibel ta papia tambe di un otro dia di huisio ku lo bini diripiente promé ku e mil añanan ei kuminsá. Manera e promé artíkulonan di e revista akí a splika, e dia ei ta ser yamá tambe e fin. Durante e dia ei, Dios lo kaba ku tur hende malbado. (2 Pedro 3:7) P’esei nos tin ku hasi esfuerso pa demostrá nos amor pa Dios.—Lesa 2 Pedro 3:9, 13.