1. (1) ¿Jamüsü choʼujaaka maʼin eejiraainjanain waya nümaa Satanaa? (2) ¿Jamüsü watüjaaka saaʼu wayamüleechin Satanaa?

ATKAASHI Satanaa maaʼulu yaa namaa na wayuu yaainjanakana kepiain yaa Mmapaʼa jee na chainjanakana chaa iipünaa yaayüliika mmapaʼa (Juan 10:16). Tü keeʼireekat naaʼin Satanaa shia nümalajeʼerüin nanoula napüshuaʼa na wayuu aʼyataakana nümüin Jeʼwaa. Naainjakaʼa tia, shia sutuma nütüjaain saaʼu sülüʼülüin nükalia süpüla ataʼünaa (paashajeʼera Alateetkat Mapeena 12:9, 12). Ayatajanaʼaya waya eejiraain nümaa Satanaa. ¿Wounteeiche wakanalüin nia? Jamüsaʼa shia. «Müleka jüleejüle chi Yolujaakai, oʼunamaateechi juulia» müsüjeseʼe sümüin tü Wiwüliakat (Sant. 4:7).

2, 3. (1) ¿Jamüsü anaka nümüin Satanaa suunjunnüle nüchiki? (2) ¿Jamüsü watüjaaka saaʼu sünain eein Satanaa?

² Eeshii na wayuu nnojoliikana anoujain sünain eein Satanaa. Naashin nayakana, chi Yolujaakai nia chi aashajeʼennawaikai achiki suluʼu tü karalouktakalüirua, nia chi ojuʼitawaikai suluʼu peliikula keemaka maʼin, nia chi ojuʼitawaikai suluʼu videojuego. Akaataajaʼa neʼe na yolujaa nümaajanakanaya, müsia neʼe nakuwaʼipa. Chi eekai nunoujain sünain eein Satanaa, malashi neʼe naashin naya wayuukana. Talatashaatasü naaʼin Satanaa müleka nuunjunnüle achiki suulia wayuu. Anasü tia nümüin süka mapüleejeerüin nümüin emeejaa saaʼin wayuu (2 Cor. 4:3, 4). Niapajaʼa katumasirüin tia makat.

 ³ Wayakana aʼyataakana nümüin Jeʼwaa, nnojotsü mochoojuuin woʼu nuulia Satanaa süka watüjaain saaʼu eein nia. Saashin tü Wiwüliakat, sümaiwa paala, yootushinka Satanaa sümaa Eva. Yootoyoosü wanee wüi nutuma, niapejeʼe neʼe niakai kanüikin atuma tü wüikat (Gén. 3:1-5). Yootushinkamaʼinka nia nümaa Jeʼwaa süpüla niperulajüin Job (Job 1:9-12). Yootushinka nia nümaa Jesuu süpüla nuuʼulaküin naaʼin (Mat. 4:1-10). Atkaashi Satanaa namaa na aluwataainjanakana chaa iipünaa, na yaayüliikana yaa Mmapaʼa. Alatüsü tia wanaa sümaa nuʼttüin Jesuu sünain aluwatawaa soʼu tü juyakat 1914 (Alat. Map. 12:17). Akaʼaya maaʼulu yaa, ayatshia atkaain nia wamaa wapüshuaʼa wayakana aʼyataakana nümüin Jeʼwaa. Süpüla wakanajüin nia, acheküshii eejiraainjanain waya nümaa jee katsüinshaatainjatü tü wanoulakat nünain Jeʼwaa. Sünain ekirajaayakat tüü, aküjüneerü wamüin tü waaʼinrajatkat suulia nimeejüin waya Satanaa süka apünüinsü kasa.

4. ¿Kasa naainjaka paala Satanaa süpüla yaletüinjatüin naaʼin?

⁴ Yaletashaata aaʼinchi Satanaa. Jamüshijaʼa nia, nüküjüin sünain nnojoluin anain Jeʼwaa süpüla aluwatawaa saaʼu tü wayuukalüirua. Nüchajaainya sukuwaʼipa süpüla niainjachin aʼwaajünüin niakai nuulia Jeʼwaa. Süpüla wakanalüin nia nnojoishii waya yaletüinjanain aaʼin (paashajeʼera 1 Pedro 5:5). ¿Kasa jaʼyaka naaʼu wanee wayuu müleka yaletüle naaʼin?

5, 6. (1) ¿Jamüsü naaʼin wanee wayuu müleka nnojorüle yaletüin naaʼin? (2) ¿Kaseerü alataka müleka yaletüle waaʼin? (3) ¿Jaralii na wayuu yaletapuʼukana aaʼin namaiwa paala?

⁵ Talatüsü waaʼin weʼrüle anain nukuwaʼipa wanee wayuu. Jamüshijaʼa Pablo, talatüsü naaʼin sutuma ichein nanoula na wawalayuu chejeʼewaliikana Tesalónica, süka jamüin, eejiraain naya sümaa wainma kasa (2 Tes. 1:4). Talatüsü waaʼin sutuma wountüin waaʼinrüin wanee kasa jee shiale sutuma eein wamaʼana shia. Talatüinjatü waaʼin sutuma kapüshin waya, talatüinjatü waaʼin sümaa tü akuwaʼipaa nekirajakalü anain waya na watuushinuukana, talatüinjatü waaʼin sünain waküjüin sünülia tü mma eejeʼewaliire waya (Aluw. 21:39).

⁶ Shiainjaʼa mojuin yaletüle waaʼin, süka jamüin, nnojoleerüin anain wakuwaʼipa namaa na waʼaleewainkana. Eesü shiale amojujaajeerüin atuma wakuwaʼipa nümaa Jeʼwaa. Müleka yaletüle waaʼin, nnojoleerü anain wamüin müleka wachiaanüle otta nnojoleena waya oonooin sümaa tü münakat wamüin (Sal. 141:5). Chi wayuu yaletakai aaʼin, nia alanaʼaleeka suulia wayuu naashin. Üttapajaʼa naaʼin Jeʼwaa nooʼomüin wayuu eekai müin akuwaʼipa (Eze. 33:28; Amós 6:8). Talatapajaʼa naaʼin Satanaa müle sukuwaʼipa wayuu. Talatashaatasü naaʼin suʼunnaa yaletüin naaʼin Nemrod, Faraón ooʼulaka Absalón (Gén. 10:8, 9; Éx. 5:1, 2; 2 Sam. 15:4-6). Eeshi wanee wayuu yaletapuʼukai aaʼin, Caín nünülia. Wanaa sümaa nüchiaain nia Jeʼwaa, aisü neʼe nümüin tü aküjünakat nümüin, nnojotsü kachipünaayaain naaʼin tü münakat, kaainjalashi nia mapa sutuma macheʼein nia. Akatalaashi Jeʼwaa nuulia, nnojoluichipa nia aleewain nümaa Caín (Gén. 4:6-8).

7, 8. (1) ¿Kasa jaʼyaka naaʼu na wayuu yaletakana aaʼin? (2) ¿Kasache kasitka wanee wayuu süpüla yaletüinjatüin naaʼin? (3) ¿Kaseerü alataka müleka yaletüle naaʼin wanee wawala?

⁷ Mojusü nukuwaʼipa wayuu müleka yaletüle naaʼin. Üttüsü naaʼin sooʼomüin tü wayuu naatakat eʼiruku, süka jamüin, niain anain eʼiruku niakai naashin. Eesü niyoujüle wayuu saaʼu naatajatüin sukuwaʼipa. Shiajaʼa shikiisüka kasachiki tia, oʼuniraasü saaʼin wayuu saaliijee otta atkaajiraasü wayuu sutuma.

⁸ Nnojotsü anain müle wakuwaʼipa wayakana anoujashiikana nünain Jeʼwaa. Eesüjaʼa tü kaʼi eere naʼülüjiraain na wawalayuukana, makaʼa sülatüin tia shia süka yaletüin naaʼin. Majatüinkamaʼinka nakuwaʼipa waneeinnua wawalayuu namaiwajana. Anuujeseʼe nünüiki Santiago  namüin: «¿Jamüshii jia jüʼülüjaajiraakaʼa?» (Sant. 4:1). Üttüle waaʼin sooʼomüin wanee wayuu süka wayain anain akuwaʼipa waküjainruʼu, eesü süpüla waainjain kasa mojusü namüin jee airuʼulajaain wanüiki namüin (Prov. 12:18). Nnojoleechi paaʼinwajiraain wanee wawala namaa na wawalayuukana müleka yaletüle naaʼin.

9. ¿Kasa süküjaka wamüin tü Wiwüliakat süpüla nnojoluinjatüin yaletüin waaʼin? (Piirakaa sümüin tü ayaakuaa suluʼukat süpana 14.)

⁹ Nnojoishii waya yaletüinjanain aaʼin saashin tü Wiwüliakat. Üttüsü naaʼin Jeʼwaa sooʼomüin tü wayuu eekai yaletüin aaʼin (Prov. 16:5). «Nünainjee waneeshia wayuu, naainjüin tü wayuukalüirua süpüshuaʼa, tü wattakat saalin shiʼipapaʼa sainküin mmakat» (Aluw. 17:26). Wanaawasü weʼiruku wapüshuaʼa süka nünainjeejanain waya Adán. Nnojotkalaka anain shiale wekiiruʼuin tü yaletaakat aaʼin. Shiainjaʼa anain yootule waya suluʼu waaʼin süchiki ee müin aka tüü: «¿Eesüchejeʼe kaʼi eere joo yaletaka oʼu taaʼin sünain tayain anain eʼiruku taashin?». Shiale suluʼuin waaʼin kasa ee müin aka tia, numojujeʼereerü Satanaa wakuwaʼipa süpüla nnojoliinjanain anaawajiraain waya namaa na wawalayuukana (Juan 13:35). Wakanajeechi Satanaa müleka nnojorüle yaletüin waaʼin (Prov. 16:18).

10, 11. (1) ¿Kasa naainjaka Satanaa süpüla washatüinjatüin nakuwaʼipa na manoujainsaliikana? (2) ¿Kasa alataka nümüin Demas saaliijee nuʼunajaain nuulia Pablo?

¹⁰ Nia Satanaa aluwataaka saaʼu süpüshuaʼa wayuu manoujüinsat (Juan 12:31; 1 Juan 5:19). Wainma tü kasa mojusü eʼikeʼerakat saaʼin wayuu maaʼulu yaa. Nüchajaain sukuwaʼipa Satanaa süpüla keejiain wamüin tü kasa kamalainkat sümüin tü manoujainsatkalüirua. Naainjain tia süpüla wojolooinjanain suulia oonowaa nümaa Jeʼwaa (paashajeʼera 1 Juan 2:15, 16).

¹¹ Majatüinka nukuwaʼipa Demas, aʼyataajiraapuʼushi nia wanaa nümaa Pablo. Shiasejeʼe soʼu wanee kaʼi, oʼunajaashi Demas nuulia Pablo (2 Tim. 4:10). Nnojotsü süküjüin tü Wiwüliakat kasanainjeejachin nuʼunüin Demas. Eeshijaʼa nuʼunüle saalin washireein nia. Shia alanaʼaleeka ojutü nümüin tü nneetkat nuulia Jeʼwaa. Makatayüireje Demas sünain aʼyatawaa nümüin Jeʼwaa, wainmasüje tü kasa anasü niʼrakat. Eeyaai neʼe niʼrüin kasa anasü sünainjee tia naaʼinrakat, amülasü neʼe müin nukuwaʼipa. Anasüjeʼe nukuwaʼipa makatayüire nia sünain aʼyatawaa nümüin Jeʼwaa (Prov. 10:22).

12. ¿Kasa naainjaka Satanaa süpüla nimeejüin waaʼin?

¹² Aʼyataainjana waya süpüla waapüinjatüin tü kasa choʼujaakat sümüin wapüshi (1 Tim. 5:8). Tü keeʼireekat naaʼin Jeʼwaa shia anainjatüin wakuwaʼipa. Watüjaa aaʼu tia sünainjee nüsülajüin Jeʼwaa wanee mma anashaatasü maʼin nümüin Adán sümaa Eva (Gén. 2:9). Eejüinjatpajaʼa waaʼin suulia nimeejüin waya Satanaa maʼaka naainjüin shia nüka Demas. Niakai jülüjüsü naaʼin tü keeʼireekat waaʼin. Tü keeʼireekat naaʼin shia shiiʼireeinjatüin maʼin waaʼin tü washirüükat (Mat. 13:22). Wainmale maʼin tü nneetkat wamaʼana, kamalainjasü wamüin tü kasakalüirua nutuma süpüla wayaʼlaja wayaʼlaja wamüinjanain. Shia talateetka atuma waaʼin tia naashin Satanaa. Nnojotsü anain waainjüle tia süka wakayalaajeenain nuulia Jeʼwaa. Müsü nünüiki Jesuu: «Maa aka kojutaʼatüle piamashii laama nütüma chi aʼyataaikai sünain alin nüpüla wane je sünain maalin nüpüla chi waneʼe, meechi aka Maleiwa jütüma müleka shiale kachiiruain jaaʼin tü washirüükat nuulialeʼeya» (Mat. 6:24). Shiale maʼin alanaʼaleein sujutü tü nneetkat wamüin nuulia Maleiwa, shiimainjaʼa süchepchiain waya. Nnojoleerü anain wakuwaʼipa sünain aʼyatawaa nümüin Maleiwa müleka ayatüle waaʼinmaain tü nneetkat. Shiajaʼa keeʼireeka naaʼin Satanaa müinjatüin wakuwaʼipa. Süpüla wakanalüin Satanaa, acheküshi niainjachin Jeʼwaa alanaʼaleein ojutü wamüin suulia tü nneetkat (paashajeʼera 1 Timoteo 6:6-10).

13. ¿Jamüsü nnojotka waneesiain neʼe nuʼwayuuse wanee wayuu maaʼulu yaa?

¹³ Tü wanee kasa keeʼireekat naaʼin Satanaa wapüleerua shia waʼluwajiraain wakuwaʼipa sümaa wanee wayuu nnojotkat waʼwayuusein. Kamalaitpa maʼin amüinyüü kawalaʼatain tü jietkat nutuma chi toolokoi, akaʼaya neʼe tü jietkat, kawalaʼatashi chi suʼwayuusekai sutuma. Nnojoleerü talatüin naaʼin müleka kasaarüle naya naashin, shia anaka aluʼu müle naya naashin. Saashin wanee actriz, nnojotsü eein wayuu eekai mawalaʼatain suʼwayuuse sutuma. Saashin shiaka, maʼleesia sukuwaʼipa wayuu süpüshuaʼa. Wainmainjatü nuʼwayuuse wanee wayuu naashin wanee actor, nnojotsü anain naashin waneesiale neʼe nuʼwayuuse wanee wayuu. Talatashaatasü naaʼin Satanaa namaa na wayuu makana akuwaʼipa. Nnojotsü kojutüin namüin tü nuluwataakalü anain Jeʼwaa sünain waneesiainjatüin neʼe naʼwayuuse. Tü keeʼireekat naaʼin Satanaa shia nooʼulaajiraainjanain na wayuu kasaatkana. Süpüla wakanajüin chi Yolujaakai, kojutüinjatü wamüin tü nuluwataakalü anain Jeʼwaa sünain waneesiainjatüin neʼe nuʼwayuuse wayuu.

14, 15. ¿Kasa paainjüinjatka süntajaale suluʼu paaʼin puʼluwajiraweein pukuwaʼipa sümaa wayuu nnojotkat puʼwayuusein?

¹⁴ Na wawalayuu nnojoliikana kasaalüin, aaʼinmajiraainjana nakuwaʼipa suulia naʼluwajiraain nakuwaʼipa yalapünaa. Akaʼaya na wawalayuu kasaatkanaya, aaʼinmajiraainjana nakuwaʼipa. Kapüleesü tia namüin na jimaʼaliikana jee na majayünnüükana maaʼulu yaa. Jamüshiijaʼa chaa eere koleejiain naya, aʼwaajaashii na koleejiajiraakana namaa süchiki wainmain tü jieyuu nainkaakalü amaa. Aʼwaataashii joo naya süka naluwataain suluʼupünaa naserulaatse nayaakua eere maichein naya, aluwataashii naya mensaaje eere naashajaain süchiki amaʼüjirawaa akuwaʼipa. Suluʼu waneeirua mma, tia müsü aka saaʼin naluwataale video eere jaʼyain tepichi sünain namaʼüjiraain nakuwaʼipa. «Müleka juʼluwajiraale jukuaippa sümaa wayuu jierü otta wane jierü nümaa wane toolo, shiimüin sünain kachajaaleerüin jiʼiruku sütüma», müsü tü Wiwüliakat (1 Cor. 6:18). Eeshii na ayuuikana suluʼujee naʼluwajiraain nakuwaʼipa sümaa wayuu nnojotkat naʼwayuusein otta wainmairü wayuu ouktaka sutuma tia. Eeshii jimaʼalii jee majayünnüü mojukana aaʼin mapa saaliijee naʼluwajiraain nakuwaʼipa. Saashin tü pütchi suluʼukat waneeirua karaloukta, waneeirua peliikula jee muusika, nnojoleerü jamüin wakuwaʼipa nnojoliire woonooin nümaa Jeʼwaa. Nnojotpajaʼa shiimain tia. Aneerü wakuwaʼipa woonoole sümaa nünüiki Jeʼwaa. Eejüinjatü waaʼin suulia «anasü tü waaʼinrakat» wamüin sümaa mojuin tü waaʼinrakat (Heb. 3:13).

¹⁵ Süntajaale suluʼumüin paaʼin puʼluwajiraweein pukuwaʼipa sümaa wanee wayuu nnojotkat puʼwayuusein, eeja paaʼin suulia tia kasa mojusü suchuntaakat paaʼin (Roma 7:22, 23). Puchuntamaata kaaliinwaa nümüin Jeʼwaa süpüla püchecherüinjatüin paaʼin suulia tia (Filip. 4:6, 7; Filip. 4:13, TNM). Aaʼinmajiraainjachi pia suulia tü eekat süpüla pümaʼüjiraain atuma pukuwaʼipa (Prov. 22:3). Piyouktamaatüinjatü tü kasa mojusü suchuntaakat paaʼin (Gén. 39:12).

16. (1) ¿Kasa naainjaka Jesuu wanaa sümaa nuuʼulakünüin aaʼin nutuma Satanaa? (2) ¿Kasa shikirajaka anain waya tü naainjakat Jesuu?

¹⁶ ¿Kasa naainjaka Jesuu wanaa sümaa nuuʼulakünüin aaʼin nutuma Satanaa? Niyouktajaa amaalü süpüshuaʼa tü kasa nüküjakat Satanaa nümüin, «anainjaʼa eera shia» nnojoishi nia majakuʼu müin suʼunnaa tia. Nüküjamaatüin Jesuu nümüin Satanaa tü pütchi suluʼukat tü nüchikimaajatkat Maleiwa (paashajeʼera Mateo 4:4-10). Tü shikirajakalü anain waya tü naainjakat Jesuu shia watüjüinjanain maʼin süpüleerua tü pütchi suluʼukat tü Wiwüliakat. Wanaa sümaa nuuʼulakünüin aaʼin Jesuu, nüküjajaain uatuwoʼushi nümüin Satanaa tü pütchi suluʼujeejatkat tü nüchikimaajatkat Maleiwa. Süpüla wakanalüinjachin Satanaa, wayouktüinjatü süpüshuaʼa tü eekat  süpüla waainjiraain atuma wakuwaʼipa sümaa wayuu nnojotkat waʼwayuusein (1 Cor. 6:9, 10).

17, 18. (1) ¿Kasa keeʼireeka naaʼin Satanaa? (2) ¿Jamüshii nnojoliika mmoluin waya naashin Jesuu? (3) ¿Kaseerü alataka nümüin Satanaa mapa? (4) ¿Kasa eeka süpüla waainjain süka watüjaain saaʼu ouktajachin Satanaa?

¹⁷ Wekirajaaitpa anain waneeirua kasa nimeejaka aka wayuu Satanaa. Maʼaka saaʼin yaletüinjatüin naaʼin wayuu, nüshatüinjatüin nakuwaʼipa na manoujainsaliikana sünain shiainjatüin alanaʼaleein ojutü tü nneetkat nümüin wayuu jee nnojoluin mojuin nuʼluwajiraale nukuwaʼipa wanee wayuu sümaa wayuu nnojotkat nuʼwayuusein. Tü wanee kasa keeʼireekat naaʼin Satanaa shia woonooinjanain sümaa nanüiki na wapüshikana süpüla wooʼulaainjanain suulia anoujaa nünain Jeʼwaa. Eeshii wawalayuu aturaajünaka nakoleejiaseruʼu saalin nanoujain nünain Jeʼwaa. Eeshii wawalayuu kepiakana suluʼu wanee mma eere süpülajünüin noulia aküjaa pütchi. Nnojoliipajaʼa mmoluin waya süka nüküjatüjülin paala Jesuu sünain müinjatüin wakuwaʼipa, müsü nünüiki Jesuu: «Aʼürülaajeerü saaʼin wayuu süpüshua jünain saaliijee jünoujain tanain. Otta jia, müleka jüchecherüle jaaʼin suʼunnaa tü müliaa jiʼrakat, ayateena jia oʼtteʼennüin tatüma» (Mat. 10:22).

¹⁸ ¿Kasa waainjüinjatka süpüla wakanajüin Satanaa? «Müleka jüchecherüle jaaʼin suʼunnaa tü müliaa jiʼrakat, ayateena jia oʼtteʼennüin tatüma», müshi Jesuu (Luc. 21:19). Müliale waya atumawaa, motsoʼojeerü neʼe tü müliaa weʼrakat. Nnojotsü wanee wayuu eekai süpüla suuʼuleʼerüin waya suulia aleewaa nümaa Jeʼwaa (Roma 8:38, 39). Jaʼitakajeʼe ouktüle waya, nnojoishii waya nükanajüin Satanaa yalapünaa, süka jamüin, nüsoʼireʼereerü waaʼin Jeʼwaa wachikuaʼa (Juan 5:28, 29). ¿Kaseerü alataka nümüin Satanaa mapa? Süchikijee najaʼlajeʼerüin Jeʼwaa na wayuu mojulaakana, nütaʼüleechi Jesuu Satanaa, püreeseechi nia soʼu miit juya süpüla nnojoluin niʼikeʼerüin wayuu (Alat. Map. 20:1-3). Mapa süchikijee tia, ajütüneechi Satanaa nüchikuaʼa, shiasaʼa nüchajaweetka sukuwaʼipa süpüla nimeejüinjatüin tü wayuukalüirua. Süchikijee tia, oʼutüneechi aaʼin (Alat. Map. 20:7-10). Aluʼujasaʼa piakai, eeshi süpüla kepiain pia saaʼu mmakat süpüla kaʼikat süpüshuaʼa. Ayataʼaya pia eejiraain nümaa chi Yolujaakai, ayataʼaya pukooʼomüinjüin punoula nünain Jeʼwaa. Puunteechi pükanajüin Satanaa.