1. a) ¿Mbaʼérepa tekotevẽterei ñañemoĩ mbarete Satanás kóntrape? b) ¿Mbaʼérepa jaʼekuaa ikatuha ñandepuʼaka Satanás rehe?

KOʼÁG̃A Satanás oñorairõ entéro Jehová siervokuéra kóntrape. Oñemoĩ mbarete umi unhído oĩvare gueteri ko yvy ape ári ha avei umi “ambue ovechakuéra” rehe (Juan 10:16). Oikuaa rupi saʼipaitemaha itiémpo, oñehaʼãmbaite oity iñuhãme umi oservívape Jehovápe, anive hag̃ua oadora chupe (elee Apocalipsis 12:9, 12). Upévare tekotevẽterei jasegi ñañemoĩ mbarete hese. Péro, ¿ikatúpa ñandepuʼaka Satanásre? Si, ikatu. La Biblia voi heʼi: “Peñemoĩ mbaretéke pe Añáre ha haʼe odiparáta pendehegui” (Sant. 4:7).

2, 3. a) ¿Mbaʼérepa Satanás oipota umi hénte opensa haʼe ndoexistiriha? b) ¿Mbaʼérepa jaikuaa porã Satanás oexistiha?

² Heta oĩ opensáva Satanás ndoexistiriha. Chupekuéra g̃uarã Satanás ha umi demónio ndahaʼéi rreál, síno oñeinventánte oñemoĩ hag̃ua umi pelíkula de terrórpe, umi videohuégope, térã umi lívrope. Ha heʼi voi hikuái ñandetavyetereiha jaroviáramo oĩha umi espíritu aña. Añetehápe, Satanáspe okonveni umi hénte opensa haʼe ndoexistiriha. ¿Mbaʼérepa? Pórke péicha ifasilve ombotavy hag̃ua chupekuéra (2 Cor. 4:4). Upévare  haʼe ojapo ikatúva guive oroviaka hag̃ua upéva umi héntepe.

³ Péro Jehová siervokuéra oikuaa porã Satanás oexistiha. La Biblia heʼi Satanás oipuru hague peteĩ mbóipe oñeʼẽ hag̃ua Évape (Gén. 3:1-5). Avei heʼi oñeʼẽ hague Jehovándi heʼírõ guare Job oserviha chupe por interés (Job 1:9-12). Upéi oñeʼẽ avei Jesús ndive omoñuhãsérõ guare chupe (Mat. 4:1-10). Ha oiko rire rréi Jesúsgui áño 1914-pe, Satanás oñepyrũ oataka umi kristiáno unhídope oĩva ko yvy ape ári (Apoc. 12:17). Koʼag̃aite peve pe Diablo oataka entéro oservívape Jehovápe, tahaʼe unhído térã ambue ovechakuéra. Ikatu hag̃uáicha ñandepuʼaka hese, tekotevẽ ñañemoĩ ikóntrape ha jajerovia mbarete. Ko artíkulope jahecháta mbaʼépa ikatu jajapo ani hag̃ua jaʼa mbohapy ñuhã Satanás oipurúvape.

4. ¿Mbaʼérepa ikatu jaʼe Satanás haʼeha pe persóna ijorgullosovéva?

⁴ Satanás ningo pe persóna ijorgullosovéva. ¿Mbaʼérepa jaʼe upéva? Pórke odesafia pe derécho Jehová orekóva ogoverna hag̃ua. Hiʼarive ojapo ikatúva guive yvyporakuéra oadora hag̃ua chupe Jehovápe rangue. Koʼã mbaʼe ohechauka Satanás ijorgullosoitereiha. Upévare, ñandepuʼaka hag̃ua hese, tekotevẽ ñaneumílde (elee 1 Pedro 5:5). ¿Mbaʼépa hína pe orgúllo? ¿Ivaípa siémpre upéva?

5, 6. a) ¿Ivaípa siémpre pe orgúllo? b) ¿Mbaʼépa ikatu oiko ñandeorgullósoramo? c) ¿Máva mávapa oñembotuicha vaʼekue?

⁵ Sapyʼánte ningo ndaivaíri ñañesenti orgullóso. Por ehémplo ikatu ñañeñandu upéicha peteĩ persóna ojapóramo peteĩ mbaʼe iporãva. Apóstol Pablo heʼi vaʼekue umi kristiáno Tesalonicaguápe: “Oreaguara pendereheve Ñandejára kongregasión apytépe, peaguantágui jerovia reheve oĩramo pendepersegíva ha pehasa asýramo jepe” (2 Tes. 1:4). Ndaivaíri avei ñañesenti porã umi mbaʼe jahupytývare, jajapóvare térã jarekóvare, por ehémplo ñane família rehe, ñande kultúrare, térã ñane nasionalidáre (Hech. 21:39).

⁶ Péro ñañemombaʼeguasúramo ikatu japyta vai ñane amigokuérandi, ha koʼýte Jehovándi. Jaikóramo ñañembotuicha, nañandegustamoʼãi umi konsého oñemeʼẽva ñandéve, ha ikatu voi ñamboyke umíva (Sal. 141:5). Umi persóna ijorgullósava opensa ivaletereiha ha iñimportanteveha umi ótrogui. Ha Jehová ndaijaʼéi umichaguáre (Ezeq. 33:28; Amós 6:8). Péro Satanás ovyʼa umi hénte oñemombaʼeguasu jave haʼéicha. Por ehémplo, katuete ovyʼáne raʼe ohechávo mbaʼéichapa Nemrod, Absalón ha pe rréi de Egipto oñembotuicha ha ijejapo (Gén. 10:8, 9; Éx. 5:1, 2; 2 Sam. 15:4-6). Caín avei ijorgullóso vaʼekue. Peteĩ jey Jehová heʼi chupe mbaʼépa oikóta nokambiáiramo, péro haʼe nopenái hese. Caínpe ndoúi ni ndohói Jehová heʼíva, ni opekáramo ikóntrape. Upévare Jehová orrechasa chupe (Gén. 4:6-8).

7, 8. a) ¿Mbaʼépa hína pe rrasísmo? b) ¿Mbaʼérepa irrasísta heta persóna? c) ¿Mbaʼéichapa pe orgúllo ikatu operhudika pe kongregasión?

⁷ Pe orgúllo káusare heta hénte oiko vai oñondive. Por ehémplo, hetaiterei persóna oñemombaʼeguasúva ningo irrasísta. ¿Mbaʼépa hína pe rrasísmo? Upéva heʼise peteĩ persóna ndaijaʼeiha umi hénte ótra rrasaguáre, térã opensa oĩha rrása iñimportantevéva. ¿Mbaʼérepa irrasísta heta persóna? Pórke ijorgullóso ha opensa iñimportanteveha ótrogui. Upéva káusare oĩ heta oñorairõva, ojojukáva gerrahápe, térã oasesináva hetápe haʼégui ótra rrasaguánte.

⁸ Jaikuaaháicha, kongregasiónpe ndaipóri vaʼerã opensáva upéicha. Péro ñandeorgullósoramo, ikatu hína ñañepyrũ jajodiskuti ótrondi ha upeakuére jaju tuicha ñane  provléma. Upéva oiko vaʼekue unos kuánto kristiánore síglo primérope. Upéicha rupi Santiago oporandu chupekuéra: “¿Moõgui piko ou pe ñorairõ ha joavy oĩva pende apytépe?” (Sant. 4:1). Japorodespresiárõ térã ñapensáramo ñaneimportanteveha ótrogui, ikatu hína jaʼe térã jajapo peteĩ mbaʼe omoñeñandu vaítava ñande rapichápe (Prov. 12:18). Jahechaháicha, pe orgúllo káusare ikatu ojeiko vai kongregasiónpe.

9. ¿Mbaʼéichapa la Biblia ñanepytyvõ ani hag̃ua ñapensa ñaneimportanteveha ótrogui? (Ehecha pe taʼanga oĩva iñepyrũme.)

⁹ La Biblia ñanepytyvõ ani hag̃ua ñandeorgullóso ha ñapensa ñaneimportanteveha ótrogui. Por ehémplo, Proverbios 16:5 heʼi: “Umi oñembotuicháva ombojeguaru Ñandejárape”. Ha Hechos 17:26 heʼi: “Haʼe ojapo vaʼekue peteĩ kuimbaʼégui opaite tetãnguéra”. Upéicharõ, ikatu jaʼe enterovéva ñande haʼeha peteĩ rrásante pórke entéro jaju Adángui. Añetehápe ningo naisentidomoʼãi voi ñapensa Ñandejára ojapo hague algúna rrása iñimportantevéva ótrogui. Ñañeporandumína: “¿Apensápa cheimportanteveha umi persóna de ótra rrása térã de ótro paísgui?”. Péicha ñapensáramo, ñameʼẽta hína oportunida Satanáspe ombyai hag̃ua pe kongregasión, ha upéva káusare ermanokuéra ikatu ou ndojoayhuvéi ha ndaiporimoʼãi unida (Juan 13:35). Ñandepuʼaka hag̃ua Satanásre, ñañehaʼãmbaite vaʼerã ani hag̃ua ñandeorgullóso (Prov. 16:18).

10, 11. a) ¿Mbaʼépa ojapo Satanás jahayhu hag̃ua ko múndo? b) ¿Mbaʼépa oiko vaʼekue Démasre ohayhu rupi ko múndo?

¹⁰ Satanás ningo oreko ipoguýpe ko múndo (Juan 12:31; 1 Juan 5:19). Upévare heta mbaʼe ko múndo oikuaveʼẽva ivai, ha haʼe oipuru umíva ñanemoñuhã hag̃ua. Por ehémplo, oikuaveʼẽ ñandéve umi mbaʼe ñandestiráva ikatu hag̃uáicha jadesovedese Ñandejárape. Ha ojapo voi ikatúva guive jahayhuve hag̃ua ko múndo ha ani hag̃ua ñañehaʼã Jehová servísiope (elee 1 Juan 2:15, 16).

¹¹ Síglo primérope oĩ vaʼekue kristiáno hoʼáva ko ñuhãme. Upéva oiko vaʼekue peteĩ ermánore oipytyvõva Páblope, hérava Demas. Pablo heʼi: “Demas chereja ohayhu rupi ko múndo” (2 Tim. 4:10). ¿Mbaʼépa la ostira vaʼekue Démaspe? La Biblia nomombeʼúi upéva. Péro ikatu oime omombaʼeve raʼe pe pláta, omombaʼe rangue Jehová servísio. Demas ikatu kuri ojapo heta mbaʼe iporãitereíva oservívo Jehovápe, péro odesidi vai ha ojavy upe oportunida. Ko múndo ningo ni mbaʼevéicharõ ndoikuaveʼẽmoʼãi kuri chupe peteĩ mbaʼe iporãvéva Jehová ikatúvagui oofrese (Prov. 10:22).

12. ¿Mbaʼéichapa Satanás ikatu oipuru umi mbaʼe ñandestiráva ñanemoñuhã hag̃ua?

¹² Nañañatendéiramo ikatu avei oiko ñanderehe Démasre oiko vaʼekue. Jaikuaaháicha, entéro jaservíva Ñandejárape tekotevẽ ñambaʼapo ñañemantene hag̃ua ñande voi ha ñamantene hag̃ua ñane família (1 Tim. 5:8). Ha Jehová ndoipotái jaiko asy, síno oipota javyʼa. Upéva jaikuaa pórke haʼe omoĩ vaʼekue Adán ha Évape peteĩ hardín neporãvape (Gén. 2:9). Péro Satanás ikatu oaprovecha umi mbaʼe ñandestiráva, ha ñandereity ojapo haguéicha Demas rehe. ¿Mbaʼéichapa ikatu ñanemoñuhã? Haʼe oipuru ‘pe platarayhu ñanembotavy hag̃ua’ (Mat. 13:22). Satanás oipota ñapensa javyʼavetaha ñaganáramo heta pláta ha jajoguáramo heta mbaʼe. Péro ñapensáramo péicha, japerdéta ñane amista Jehovándi, ha jaikuaaháicha ndaipóri mbaʼeve ivaliosovéva upe amistágui. Jesús heʼi vaʼekue: “Avave ndaikatúi ombaʼapo tembiguáiramo mokõi patrónpe g̃uarã. Peteĩme ohayhúta ha pe  ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei, peẽ ndaikatúi peiko Ñandejára rembiguáirõ ha avei peiko pláta rapykuéri” (Mat. 6:24). Oiméramo ñandéve g̃uarã iñimportanteterei pe pláta, jaikóta ijesklávoramo, ha péicha ndaikatumoʼãi jaservi Jehovápe. Ha upéva la Satanás okonsegiséva. Upévare ñañemoĩséramo Satanás rehe, ñapensa vaʼerã iñimportanteveha jaiko Jehová amígoramo, jaiko rangue ñagana pláta térã jajogua heta mbaʼe (elee 1 Timoteo 6:6-10).

13. ¿Mbaʼépa opensa heta hénte pe matrimóniore?

¹³ Satanás ojevale avei pe inmoralida sexuál rehe omoñuhã hag̃ua umi héntepe. Koʼág̃arupi heta persóna opensa ndaivairiha ñaporomoakãratĩ, ha oimoʼã yma guarénte la ñemenda. Heʼi voi hikuái koʼã mbaʼe ñaneñapytĩ reieteha. Por ehémplo, peteĩ aktrís heʼi ndaikatuiha voínte jaiko siémpre peteĩ persónandinte. Ha heʼi avei ndoikuaaiha ni peteĩ persóna oikóva ni oikoséva péicha tóda la vída. Ótro aktór opensa yvyporakuéra ndojejapói hague voi oiko hag̃uáicha peteĩ persónandinte oikove aja pukukue. Oiméne Satanás ovyʼaite ohendúvo umi hénte ifamósova oñeʼẽ vaiha pe matrimóniore, haʼéva peteĩ rregálo porãite Jehová omeʼẽva. Satanás oipota osẽ vai umi matrimónio. Upévare, ñandepuʼaka hag̃ua hese, ñamombaʼe vaʼerã pe ñemenda Jehová omombaʼeháicha.

14, 15. ¿Mbaʼépa ikatu rejapo peichahágui ndestiráramo pe inmoralida sexuál?

¹⁴ Umi kristiáno soltéro ha omendáva ojekuida vaʼerã ani hag̃ua okomete inmoralida. Péro heta vése ijetuʼu upéva. Por ehémplo, umi mitãrusu ha mitãkuña ohendu jepi ikompañerokuéra ojalavaha oreko haguére rrelasión sexuál oimeraẽ ogustávandi chupekuéra. Térã omombeʼujoa hikuái oguerahaukaha ojupe mensáhe ha fóto tieʼỹ iselulár rupive. Heta paíspe umi léi okonsidera ko práktika igraveha oñemosarambirõguáicha pornografía infantíl. Avei la Biblia heʼi umi okometéva inmoralida ‘hetére voi ojapoha ivaíva’ (1 Cor. 6:18). Heta persóna omano térã osufrieterei ova haguére hesekuéra mbaʼasy vai rrelasión sexuál rupive. Ha opavave lénto umi imitãva orekóva rrelasión omendaʼỹre, oñarrepenti upe rire. Koʼág̃arupi heta lívro, pelíkula ha músika ogueroviaukase ñandéve ndoikomoʼãiha ñanderehe mbaʼeve ndajarrespetáiramo Ñandejára mandamientokuéra. Péro upéva japu hína. Upéicharõ, ñanemanduʼa vaʼerã tekotevẽha akóinte jajekuida ani hag̃ua ‘pe pekádo ñanembotavy’ (Heb. 3:13).

¹⁵ Ikatu ningo rehechakuaa ndestiraha pe inmoralida sexuál. Oiméramo upéicha hína, primeroite rerrekonose vaʼerã rerekoha upe devilida (Rom. 7:22, 23). Eñemboʼe Jehovápe ha ejerure chupe tanemombarete (Filip. 4:6, 7, 13). Ani voi reñemoĩ umi situasión ikatutahápe reʼa upe pekádope (Prov. 22:3). Ha oñepresenta jave ndéve peteĩ tentasión, upepete remboyke vaʼerã (Gén. 39:12).

16. a) ¿Mbaʼépa Jesús ojapo Satanás omoñuhãsérõ guare chupe? b) ¿Mbaʼépa ñaaprende Jesús ehémplogui?

¹⁶ ¿Mbaʼépa ojapo vaʼekue Jesús omoñuhãsérõ guare chupe Satanás? Jesúspe nombotavýi umi mbaʼe Satanás oprometéva chupe. Haʼe noñepyrũi opensa umi mbaʼére, síno ensegída orrechasa. Upepete voi oipuru Ñandejára Ñeʼẽ ha heʼi: “Ñandejára Ñeʼẽme ojehai” (elee Mateo 4:4-10). ¿Mbaʼépa ñaaprende Jesús ehémplogui? Jahecha haʼe oikuaa porã hague Ñandejára Ñeʼẽ. Upévare, Satanás omoñuhãsérõ guare chupe, pyaʼe voi ou iñakãme umi téxto oĩva Ñandejára Ñeʼẽme. Ñande avei, ñandepuʼaka hag̃ua Satanásre, jajehekyiete vaʼerã umi  tentasión ikatúvagui ñandegueraha inmoralida sexuálpe (1 Cor. 6:9, 10).

17, 18. a) ¿Mbaʼe mbaʼépa oipuru avei Satanás ñanemokangy hag̃ua? b) ¿Mbaʼérepa nañanesorprendéi umi ñuhã Satanás oipurúva? c) ¿Mbaʼépa oikóta Satanásgui, ha mbaʼérepa javyʼa jaikuaávo mbaʼépa oikóta chugui?

¹⁷ Ko artíkulope jahecha mbohapy ñuhã Satanás oipurúva: Primero, oipota ñañemombaʼeguasu. Segundo, oipota jahayhu umi mbaʼerepy. Ha tercero, oipota jaʼa inmoralida sexuálpe. Péro oĩ avei hetave mbaʼe Satanás oipurúva ñanemokangy hag̃ua. Por ehémplo, heta Testígo oreko ihénte oñemoĩva hesekuéra ndoipotáigui oservi Jehovápe. Ótrore katu oñembohory ikompañerokuéra de eskuéla, térã kolehiopegua. Heta paíspe avei umi goviérno oproivi pe predikasión. Péro ñandéve nañanesorprendéi koʼã mbaʼe, pórke Jesús heʼi vaʼekue voi oikotaha upéva. Haʼe heʼi: “Avave ndaijaʼemoʼãi penderehe che réra káusare. Péro pe oaguantáva ipahaite peve, ojesalváta” (Mat. 10:22).

¹⁸ ¿Mbaʼéichapa ikatu ñandepuʼaka Satanásre? Jesús heʼi vaʼekue: “Peaguantáramo, pesalváta pende rekove” (Luc. 21:19). Ni peteĩ yvypóra ndaikatumoʼãi ñandeperhudika pára siémpre. Jaservi aja Jehovápe ñande pyʼaite guive, siémpre ñaiméta ijykére ha jaikóta iñamígoramo (Rom. 8:38, 39). Ha jasegíramo ñaneñeʼẽrendu, ñamanóramo jepe Satanás noganamoʼãi, pórke Jehová ñañemoingove jeýta (Juan 5:28, 29). Péro ¿mbaʼépa oikóta Satanásgui? Ñandejára ohundi rire ko múndo, Cristo oapresáta chupe 1.000 áñore, ha upe aja ndaikatumoʼãi oataka avavépe (Apoc. 20:1-3). Upe rire, ojepoi jeýta chugui, ha oñehaʼãta ombotavy jey yvyporakuérape. Ha upéi oñehundietétama chupe (Apoc. 20:7-10). Jahechaháicha, Satanáspe ningo nohaʼarõi mbaʼeve iporãva. Péro ñandéve katu ñaneraʼarõ heta mbaʼe ijojahaʼỹva. Upévare, aníkena ñanekangy. Upéva rangue, jajerovia mbarete Jehováre ha ñañemoĩ Satanásre. Péicha añoite ñandepuʼakáta hese.