1. (a) U mulandu ci uno ndakai cicindamiile ukuombesya pakuti tucimvye Satana? (b) Uzye twamanya uli ukuti tungacimvya Satana?

 SATANA akalwisya apakwe aacili pano nsi alino na ‘mfwele na zyuze.’ (Yoa. 10:16) Satana amanyile ukuti asiile sile na kasita akanono, fwandi cino akulondesya ukucita, u kuponzya aomvi aingi yakwe Yeova ukuti yataombela Yeova. (Welengini Umbwilo 12:9, 12.) Uzye tungacimvya Satana? Ee! Baibo ikaati: “Mwakanya Ciwa, nawe aluutuka kufuma kunomuli.”—Yako. 4:7.

2, 3. (a) U mulandu ci uno ukwelenganya ukuti Satana kutaaya kukalenga ukuti aaponzya sana antu? (b) Twamanya uli ukuti Satana akuno waya?

² Antu aingi yakaelenganya ukuti kutaaya Satana. Yene yakaelenganya ukuti Satana ni viwa i vyakupanga sile vino vikaaya umu mabuku ya malyasi, mu mafilimu, nu mu vyangalo vya pa kompyuta. Antu yaayo, yakaelenganya ukuti kutaaya umuntu wino wazumila umu mipasi iipe. Satana ni viwa vyakwe yataasakamala uku malyasi aufi yano antu yakalanda pali aliyo. Nupya ndi cakuti antu yakuti ataayako, aali lino cikamwangukila nu kuyaponzya pakuti yatamanya icumi. (2 Kol. 4:4) Fwandi  Satana akaponzya antu ukuomvya inzila kwene ii iyakwelenganya ukuti ataayako.

³ Fwe yaomvi yakwe Yeova, tutaaya wa antu yano Satana waponzya pa kukanamanya icumi. Twamanya ukuti Ciwa akuno waaya, nupya Satana kwene u waomvizye inzoka pa kulanda na Eva. (Utan. 3:1-5) Satana walanzile na Yeova lino walandanga apa utailo wakwe Yobo. (Yobo 1:9-12) Satana kwene u wezizye na Yesu. (Mate. 4:1-10) Nupya lino Uwene watandike ukuteeka umu 1914, Satana watandike ukulwisya aomvi apakwe. (Umbw. 12:17) Na ndakai kwene Satana acili akalwisya aomvi apakwe ya 144,000 na mfwele na zyuze pakuti aonone utailo wao. Pakuti tucimvye Satana tufwile ukuya nu utailo uukome. Isambilililo lii iililanda apa nzila zitatu izingatwavwa ukuya nu utailo uukome.

4. Uzye Satana walangizya uli ukuti waya ni cilumba?

⁴ Satana waya ni cilumba wakwe cimwi. Ukulanda sile icisinka, vino Satana wapondokile ukateeka wa papela-pela wakwe Yeova, i cilumba icipisye na ucintumvwa. Fwandi, pa kucimvya Satana, tutafwile ukuya ni cilumba lelo tulinzile ukuya aicefye. (Welengini 1 Petulo 5:5.) Uzye icilumba i cani? Uzye caipa lyonsi?

5, 6. (a) Uzye a lyonsi lino icilumba ciipa? Londololini. (b) Uzye i cilumba ca musango ci icaipa, alino aaweni aalembwa muli Baibo aali ni cilumba?

⁵ Ibuku limwi lyalondolola izwi lyakuti icilumba ukuti, “u kuyuvwa kuno muntu akayuvwa pali vino wakwanisya ukucita nanti pa mulandu wakuti antu yamwi yaamucitila vintu vimwi ivisuma.” Ukuyuvwa kwa musango uwo kutaipa. Umutumwa Paulo wanenyile aina Tesalonika ukuti: “Swemo tukaitumika pa mulandu winu mu mauvi yakwe Leza. Swemo tukaitumika pa kutwalilila kwinu ukwa kuposya, nga nu kutaila lino mukupita mu kuzunyiwa nu mu macuzi amuponiile.” (2 Tesa. 1:4) Fwandi ukuvwa ningo apa mulimo uno antu yanji yakaomba alino nu kukanaya ni cilumba pali sweineco, kutaaya nu mulandu. Tusiyuvwa ukuti twazewana apa lupwa luno twavyalilwamo, lutambi lwitu, nanti sile incende kuno twavyalilwa.—Mili. 21:39.

⁶ Lelo, kwaya icilumba cimwi icingonona ucuza witu na Yeova. Icilumba ca musango uu, cingatulenga ukukanaya aicefye lino yakutulungika icakuti tukaana nu kuvwila. (Masa. 141:5) Icilumba kwene cii calondololwa ukuti, “u kuituntumba” nanti “ukuitaila kuno antu yaitaila ukuti yacindama ukucila antu yauze.” Yeova wapata ukuitumika. (Ezek. 33:28; Amo. 6:8) Nomba Satana akazanga sana ukulola antu yali ni cilumba, pano avino nawe kwene waya. Satana watemilwe sana lino Nimulodi, Falao na Abusalomu, yizile yaaya ni cilumba! (Utan. 10:8, 9; Kufu. 5:1, 2; 2 Sam. 15:4-6) Nupya na Kaini kwene wizile aya ni cilumba. Leza wamulungike, lelo Kaini wali ni cilumba cakuti akaana nu kuvwila vino Leza wamunenanga. Icilumba, i camulenzile ukuti atuvwila vino Yeova akumulungika, nakupya calenzile ukuti aifye.—Utan. 4:6-8.

7, 8. (a) I vyani vikalanga ukuti umuntu ali ni cilumba, nupya u mulandu ci uno caipila? (b) Londololini vino icilumba cingalenga amu cilongano ukukanaya nu mutende.

⁷ Ndakai, antu yakalanga ukuti yaaya ni cilumba ukupitila umu vintu ivingi. Insita zimwi icilumba cingalenga umwi ukupata antu yamwi pa mulandu na kuno yaafuma, alino nu kupusana kwa milolekele ya nkanda. U mulandu ci uno kwaela  ulupato lwa musango uu? Pano antu yamwi yakaelenganya ukuti yacindama ukucila yauze pa mulandu na kuno yafuma nanti imilolekele ya nkanda yao. Cii calenga ukuti kwaya ivyongo, inkondo nu kukoma sana antu.

⁸ Fwandi umu cilongano ca Ina Klistu mutafwile ukuya imiyele iiyo iyakuilola ukucindama ukucila yauze. Lelo, insita zimwi cilumba ndi cakuti calenga Aina Klistu ukutandika ukupazyanya, cingaleta icimvulunganya. Vikwene i vyacitikiile Aina Klistu yano Yakobo uzizye ukuti: “Uzye pacani mukalwisyanya nu kupazyanya?” (Yako. 4:1) I cacumi ukuti ukuitumika nu kuilola ukuti twacindama ukucila yauze, kungamanyikilwa uku mivwangile itu ni vicitwa vitu, nupya kungalenga ukuti yauze yaculilemo. (Mapi. 12:18) Ukwaula nu kutwisika icilumba cingalenga ukuti umu cilongano mutaaya umutende.

9. Uzye Baibo ikatwavwa uli ukuta ukuya ni cilumba nu kuta ukucita ivikalanga ukuti tuli ni cilumba? (Lolini icikope ca kutandikilako.)

⁹ Ndi cakuti tukayuvwa ukuti twacindama ukuluta yauze, twaiusya ukuti “Yeova wapata umwenzo wa cilumba.” (Mapi. 16:5) Tulinzile kucindika antu afuma kuze nanti sile intambi zyao. Ndi cakuti tukwelenganya ukuti antu afuma kuuze yatacindama, ala tukusula icisinka cakuti Leza waumvile imitundu yonsi iya antu “ukufuma ku muntu wenga.” (Mili. 17:26.) Antu yonsi yaaya sile icili conga, pano yonsi yafumile kuli Adamu. Fwandi, i ciipe sana ukwelenganya ukuti antu yamwi yacindama kuluta yauze. Ukwelenganya kwa musango uu, kungalenga tute ukutemwana nu kuombela pamwi na Ina Klistu yanji. (Yoa. 13:35) Pakuti tucimvye Satana tutafwile ukuya ni cilumba.—Mapi. 16:18.

10, 11. (a) U mulandu ci uno cangupalila ukutemwa ivintu vya mu nsi? (b) U munzila ci muno Demasi walangiizye ukuti watemilwe sana ivintu vya mu nsi?

¹⁰ Satana aali “kateeka wa nsi ii.” (Yoa. 12:31; 1 Yoa. 5:19) Acino fwandi, ivintu ivingi vino insi ii ikakomelezya, visiumvwana na masunde aaya muli Baibo. Ukuya kwene, aasi vyonsi iviipe vino insi ikakomelezya. Lelo, tulinzile ukwenekela ukuti Satana angaomvya ivintu vya mu nsi kwene ukuti twavikumbwa nu kutulenga ukwifya, nanti tuvitemwisye ukucila ukusumba amano uku kupepa Yeova.—Welengini 1 Yoane 2:15, 16.

¹¹ Aina Klistu yamwi akutandikilako, yaatemwisizye ivintu vya mu nsi iyata nu kuombela Leza ningo. Cikwene icalenzile na Paulo alembe ukuti: “Demasi wene watemwa ivya mu nsi nupya wamfutatila.” (2 Tim. 4:10) Baibo itaalanda ivintu vino Demasi watemilwe ivyamulenzile ukuti afutatile Paulo. Limwi Demasi watandike ukutemwisya ivyuma ukucila ukuombela Leza. Ndi cakuti aali vino caali, Demasi wapanyizye isyuko lyakuombela Leza ni nsansa. Uzye tungati ivintu vya mu nsi vyaziifile sana icakuti Demasi avitemwa ukucila isyuko lino Yeova wamupiile ilya kuombela pamwi na Paulo?—Mapi. 10:22.

12. Uzye Satana angaomvya uli ivyuma pakuti atusombe?

¹² Ica musango uu cingatucitikila naswe kwene. Fwe Ina Klistu, twamanya ukuti tulinzile ukukwata sile ivintu vya kutwavwa alino nu kusunga ulupwa. (1 Tim. 5:8) Yeova akalonda ukuti twaaya ni nsansa—pakuti twaelenganya pa vintu ivisuma vino wacisile kuli Adamu na Eva. (Utan. 2:9) Lelo  Satana angatulenga ukuti twaasombwa nu “ukama” nanti ivyuma. (Mate. 13:22) Antu aingi yakaelenganya ukuti impiya zingayapeela insansa nanti ivikwatwa ivingayalenga ukuti yaaya nu luzango umu umi wao. Icumi kwene ndi twatandika ukwelenganya vii, ala itusombwa, nupya tungata ukuya ya cuza yakwe Yeova. Yesu wanenyile alondezi yakwe ukuti: “Pasi umuntu angaombela aene yaili; pano angapata wenga nu kutemwa umuze, nupya angayela wenga nu kusula umuze. Mutangaombela Leza nga ni vyuma.” (Mate. 6:24) Ndi cakuti twaatemwisya Ivyuma, tukaata ukuombela Yeova, nupya vikwene aali vino Satana akalonda! Fwandi kusi ukwezya ukuleka impiya ni vintu vya munsi ukutononela ucuza witu na Yeova. Ndi cakuti tusikulondesya ivyuma, ale Satana tulamucimvya.—Welengini 1 Timoti 6:6-10.

13. U munzila ci muno antu amu nsi yakalandila ivya ufi apa cupo?

¹³ Inzila na yuzye ino Satana akaomvya ukuponzya antu, uuzelele. Ndakai, antu yakaelenganya ukuti, ukuya uwa cumi uku wako, nanti sile umu cupo, i cisendo nupya yakaati citanga cicitike. Mama umwi umulumbuke sana aakaomba ku vya kupanga ama filimu walanzile ati: “Citanga cicitike ukuya nu monsi nanti mama wenga. Ntamanya ndi cakuti kwaaya uwakwata umonsi nanti mama wenga.” Walanzile nu kuti: “Ntamanya ndi cakuti cingacitika umu umi witu ukukwata mama nanti umonsi wenga.” Satana akazanga sana ndi cakuti antu yakulanda ivya ufi apa wila wa cupo uno Leza wapeela antu. Ciwa atiikako amano uku cupo nupya asilonda ukuti ivyupo vyatunguluka. Fwandi pakuti twalwisya Satana nu kumucimvya, tufwile ukucindika icupo wakwe vino Yeova wacicindika.

14, 15. Tungataluka uli uku uzelele?

¹⁴ Ngi cakuti twaya umu cupo nanti foo, tulinzile ukuombesya pakuti twataluka uku musango onsi uwa uzelele. Uzye cangupala ukucita vivyo? Awe! Limwi umwance, anguvwako kuno yakasukulu yauze yakuilumba, pa uzelele nanti pa kutumilana amazwi aupulumusi alino ni vikope pa foni ivya uzelele, imiyile ino umu mpanga zimwi yakalola ukuti icilicimwi nu kutumila umwi icikope muno aance yakucita uzelele. Baibo ikaati: “Umuntu wino akacita uzelele wene akaifya ku mwili wakwe umwisikulu.” (1 Kol. 6:18) Ucuzi umwi ni mfwa vikacitika pa mulandu ni ndwala izikaambukila ukupitila umukucita uzelele. Acance aingi aatatala yatwala nanti ukutwalwa acitapo uzelele yakalanda ukuti yakaipeela imilandu pali vino yaacisile. Ivintu vino yakatambisya pa ma filimu, vingalenga twaelenganya ukuti ukusula amasunde yakwe Leza kusileta intazi. Ukwelenganya kwa musango uu kukalenga antu yaacita iviipe—Ayeb. 3:13.

¹⁵ Uzye mungacita uli, ndi cakuti mwaya nu wezyo wakucita uzelele? Nkoleelo mwamanya muno mwatoonta. (Loma 7:22, 23) Mwapepa kuli Leza pakuti aamwazwa ivya kucimvya intazi. (Filipi 4:6, 7, 13) Mwataluka uku vintu ivingalenga mucite uzelele. (Mapi. 22:3) Nupya lino uwezyo wiza, mwatalukako zuwa-zuwa.—Utan. 39:12.

16. Uzye Yesu waswike uli lino Satana wamwezizye, nupya i cani cino tungasambililako kuli Yesu?

¹⁶ Yesu watulanzile vino tungacita pa kucimvya uwezyo. Wene atasomvilwe ni vintu vino Satana wamulavile, nanti ukulolela pakuti atale alole ivintu vivyo vino vili. Lelo, zuzwa-zuwa waswike  ukuti: “Calembwa mu malembelo cati.” (Welengini Mateo 4:4-10.) Yesu wamanyile Baibo, nupya camwavwile sana ukuti aasuka zuwa nu kuomvya amalembelo lino weziwanga. Naswe kwene tulacimvya Satana ndi cakuti twakana uwezyo wonsi ungatulenga ukucita uzelele.—1 Kol. 6:9, 10.

17, 18. (a) Iinzila ci na zyuze zino Satana akaomvya pa kuponzya antu, nupya u mulandu ci uno tutalinzile ukuzungukila? (b) I vyani ivilacitikila Satana, nupya ukumanya vii kwamwazwa uli ukusipikizya amezyo?

¹⁷ Cilumba, kutemwisya ivyuma nu uzelele, ivintu vii a vimwi sile pali vino Satana akaomvya ukuponzya antu yakwe Yeova. Kwaya na vyuze ivingi. Wakwe vii ivikacitika uku Ina Klistu yamwi: Yakayacuzya kuli ya lupwa yao, kuyatumfya kuli ya kasukulu yauze, nanti sile uteeko ukukanya umulimo wa kusimikila. Ukucula kwa musango uu kutanga kutuzungusye, pano Yesu wanenyile alondezi yakwe ukuti: “Onsi yalamupata pa mulandu wane. Lelo wino wensi alaposya kufika nu ku mpelelekezyo, wene alatuulwa.”—Mate. 10:22.

¹⁸ Tungacita uli pakuti tucimvye Satana? Yesu wanenyile asambi yakwe ati: “Mukuposya kwinu, mulaya nu umi.” (Luka 21:19) Kusi nanti acimwi cino umuntu angatucita cino tungafilwa ukusipikizya. Kusi nanti aumwi angonona ucuza witu na Leza, suka sile ndi twazumilizya ukuti cicitike vivyo kwene. (Loma 8:38, 39) Nanti aomvi yakwe Yeova yafwa, cisipiliula ukuti Satana wacimvya, pano Yeova alasininkizya ukuti yatuutuluka! (Yoa. 5:28, 29) Lelo Satana wene alononwa. Apa cisila ca kononwa kwa yantu aipe, Satana alasumbilwa umu ciwina caula impela apa myaka 1,000. (Umbw. 20:1-3) Pa mpela ya Myaka 1000, iya kuteeka kwakwe Yesu, Satana “alasapulwa” apa nsita inono, nu kwezya antu aalaya amalilike umuku wa kusyalikizya. Lyene apa cisila ca kwezya antu alino alononwa. (Umbw. 20:7-10) Mwemo mutalononwa, lelo Satana wene alononwa! Fwandi twalililini ukulwisya Satana, nupya mwakomya utailo winu. Ndi mukucita vii, mulacimvya Satana!