1. Taano ta masasabi ni Pablo na ‘si Cristo an kapangyarihan nin Diyos’?

PAAGI ki Jesu-Cristo, ipinahiling ni Jehova sa pambihirang mga paagi an saiyang kapangyarihan. Mababasa ta sa apat na Ebanghelyo an nakakapakusog sa pagtubod na mga detalye kan nagkapirang milagro ni Cristo. Posibleng kadakul pa siyang ibang milagro. (Mat. 9:35; Luc. 9:11) Iyo, nahiling nanggad ki Jesus an kapangyarihan nin Diyos. Kaya dapit sa saiya, masasabi ni apostol Pablo: ‘Si Cristo an kapangyarihan nin Diyos.’ (1 Cor. 1:24) Pero, may epekto daw sa satong buhay an mga milagro ni Jesus?

2. Ano an manunudan ta dapit sa mga milagro ni Jesus?

² Sinabi ni apostol Pedro na naggibo si Jesus nin mga milagro, o ‘ngangalasan.’ (Gui. 2:22) An mga milagrong ginibo ni Jesus digdi sa daga mga patanaw kan maabot na mas dakula pang mga bendisyon sa saiyang pamamahala bilang hadi. Ilinaladawan kaiyan an mga milagrong gigibuhon ni Jesus sa bilog na daga sa bagong kinaban nin Diyos! Paagi man sa mga milagrong iyan, nasasabutan tang marhay an personalidad ni Jesus pati kan saiyang Ama. Pag-ulayan ta an nagkapira sa mga milagro ni Jesus asin aramon ta an puwedeng magin epekto kaiyan sa satong buhay ngunyan asin sa maabot.

3. (a) Ano an nangyari kaya ginibo ni Jesus an inot niyang milagro? (b) Paano nahiling sa Cana an pagkabukas-palad ni Jesus?

³ Ginibo ni Jesus an inot niyang milagro sa sarong bangkete sa kasal sa Cana nin Galilea. Posibleng mas dakul na bisita an nag-abot kisa sa inaasahan. Ano man an dahilan, kinulang an arak. Kaiba sa naimbitaran an ina ni Jesus na si Maria. Siguradong haloy na niyang pinag-iisipan an gabos na hula may koneksiyon sa saiyang aki, na aram niyang aapudon na ‘Aki nin Kahuruhalangkawi.’ (Luc. 1:30-32; 2:52) Naniniwala daw siya na may nakatagong kapangyarihan si Jesus? Dai ta aram, basta an malinaw iyo na parehong nagmalasakit si Maria asin Jesus sa bagong kasal asin gusto nindang tabangan an mag-agom na dai mapasupog. Aram ni Jesus na responsabilidad kan ikinasal na istimaron an mga bisita. Kaya milagroso niyang ginibong “marahay na arak” an mga 380 litro nin tubig. (Basahon an Juan 2:3, 6-11.) Obligado daw si Jesus na gibuhon iyan? Dai. Ginibo niya iyan huling may pagmakulog talaga siya sa mga tawo asin inaarog niya an pagigin bukas-palad kan saiyang Ama sa langit.

4, 5. (a) Anong leksiyon an manunudan ta sa inot na milagro ni Jesus? (b) Ano an itinutukdo sa sato kan milagro sa Cana dapit sa mangyayari sa maabot na panahon?

⁴ Kadakul na primera klaseng arak an milagrosong ginibo ni Jesus, na igo para sa sarong dakulang grupo. Ano an itinutukdo sa sato kan milagrong ini? Sinisiyerto sa sato kan gikan sa buot na paggibo ni Jesus kan siring na makangangalas na bagay na importante sa saiya asin sa saiyang Ama an namamatian kan mga tawo. Bakong maimot si Jehova o si Jesus. Ngunyan, imahinaron kun paano bukas-palad na gagamiton ni Jehova an saiyang kapangyarihan tanganing magtao sa bagong kinaban nin abundang bangkete para sa ‘gabos na banwaan’ sa bilog na daga.—Basahon an Isaias 25:6. *

⁵ Isip-isipon ini! Maabot an panahon na mapapaniguan na an talagang mga pangangaipo asin tamang mga minamawot nin lambang tawo, arog kan masustansiyang kakanon asin disenteng istaran. Lugod na maugma niyatong antisiparon an abundang suplay kan mararahay na bagay na itatao sa sato ni Jehova sa Paraiso.

6. Para kiisay ginamit ni Jesus an saiyang kapangyarihan na magmilagro, asin paano ta siya maaarog sa bagay na ini?

⁶ Interesanteng mangnuhon na kan tentaran kan Diyablo si Jesus na gibuhon na tinapay an mga gapo, nagsayuma si Cristo na gamiton an saiyang kapangyarihan na magmilagro para paniguan an saiyang sadiri. (Mat. 4:2-4) Pero ginamit niya an saiyang kapangyarihan para tabangan an iba asin paniguan an pangangaipo ninda. Paano ta maaarog an pagmakulog asin pagigin bakong maimot ni Jesus? Dinadagka niya an mga lingkod nin Diyos na “ugalion an pagtao.” (Luc. 6:38, NW) Puwede ta daw ipahiling an pagkabukas-palad paagi sa pag-imbitar sa iba sa satong harong para makaibanan sinda sa literal na pagkakan asin espirituwal na bangkete? Puwede daw kitang magin matinao kan satong panahon pagkatapos kan pagtiripon tanganing magtabang sa iba, arog baga kan pagdangog sa sarong brother mantang pinapraktis niya an saiyang kabtang?  Ano an magigibo ta para sa mga nangangaipo nin tabang sa ministeryo? Ipinapahiling niyato na inaarog ta si Jesus kun bukas-palad kitang nagtatao nin materyal asin espirituwal na tabang sagkod na kaya niyato.

7. Anong sitwasyon an dai mawawara sagkod na yaon pa an maraot na sistemang ini nin mga bagay?

⁷ Kaidto pa, problema na an kadukhaan. Sinabi ni Jehova sa suanoy na Israel na dai mawawaran nin mga dukha sa daga. (Deut. 15:11) Pakalihis nin dakul na siglo, sinabi ni Jesus: ‘An mga dukha parating nasa saindo.’ (Mat. 26:11) An buot sabihon daw ni Jesus dai mawawaran nin dukha digdi sa daga? Dai, an buot niyang sabihon pirming igwa nin dukha sagkod na yaon pa an maraot na sistemang ini nin mga bagay. Kaya, nakakapakusog nanggad sa buot na maaraman na an mga milagro ni Jesus mga patanaw kan maabot na mas marahay na buhay sa pamamahala kan Kahadian, kun sain an gabos makarakan asin magkakabarasog!

8, 9. (a) Ano an nangyari kaya ginibo ni Jesus an milagro na pagpakakan sa rinibong tawo? (b) Ano an namatian mo manungod sa milagrosong pagpakakan ni Jesus sa rinibong tawo?

⁸ Dapit ki Jehova, sinabi kan salmista: “Ibinubuka mo an saimong kamot asin pinapaniguan an mawot nin lambang bagay na may buhay.” (Sal. 145:16, NW) Arog kan saiyang Ama, parating ibinubuka ni Cristo, bilang ‘an kapangyarihan nin Diyos,’ an saiyang kamot asin pinapaniguan an mga mawot kan mga parasunod niya. Ginibo niya iyan bako sanang huli ta gusto niyang ipahiling an saiyang kapangyarihan, kundi huli ta udok sa puso siyang nagmamakulog sa iba. Pag-ulayan niyato an Mateo 14:14-21. (Basahon.) Nagdulok ki Jesus an mga disipulo niya tanganing sabihon an problema ninda sa kakanon. Apuwera sa gurutom na sinda, posibleng iniisip man ninda an mga tawong gurutom asin pagal-pagal na sa kalalakaw magpuon pa sa mga siyudad para magsunod ki Jesus. (Mat. 14:13) Ano an gigibuhon niya?

⁹ Paagi sa limang tinapay asin duwang sira, pinakakan ni Jesus an mga 5,000 na lalaki, apuwera pa sa mga babayi asin aki! Dai daw kita napapahiro pag naiisip ta kun paano ginamit ni Jesus an kapangyarihan niya na magmilagro tanganing ipahiling an saiyang pagmalasakit asin pagmakulog sa gabos na pamilyang yaon duman, kaiba na an saradit na mga aki? “Nagkarakan asin nagkabarasog” an gabos. Buot sabihon abunda an kakanon na itinao ni Jesus. Dai sinda tinawan ni Jesus nin dikit sanang tinapay, kundi pinakakan niya sinda sagkod na mabasog para sa saindang halawig na pagbaklay papuli. (Luc. 9:10-17) May 12 basket pa na napano kan mga tadang kakanon!

10. Ano an madali nang mangyari sa kadukhaan?

¹⁰ Ngunyan, dai napapaniguan an panginot na pangangaipo kan ginatos na milyon na tawo huli sa bakong makatanusan na pamamahala nin tawo. Dawa an nagkapira sa satong mga tugang, minsan ngani igwa kan kinakaipuhan para mabuhay, dai talaga ‘nababasog’ o naniniguan. Pero, madali nang mag-abot an panahon na mabubuhay an masinunod na mga tawo sa sarong kinaban na mayo na nin korapsiyon asin kadukhaan. Kun may kapangyarihan kang paniguan an mga pangangaipo nin mga tawo, dai mo daw gigibuhon iyan? An Diyos na Makakamhan sa Gabos parehong igwa kan kapangyarihan asin pagmawot na iyan—asin madali na niyang gibuhon iyan. Iyo, natatanaw ta na an kaginhawahan!—Basahon an Salmo 72:16.

11. Taano ta kumbinsido ka na madali nang gamiton ni Cristo an saiyang kapangyarihan sa bilog na daga, asin huli kaiyan napapahiro ka na gibuhon an ano?

¹¹ Kan yaon si Jesus sa daga, sadit sanang teritoryo an nahulitan niya sa laog nin limitadong panahon na tulo may kabangang taon. (Mat. 15:24) Bilang pinamuraway na Hadi, magigin sakop kan saiyang teritoryo an bilog na daga. (Sal. 72:8) Pinapakusog kan mga milagro ni Jesus an satong pagtitiwala sa saiyang kakayahan asin pagmawot na gamiton, sa dai na mahahaloy, an saiyang awtoridad para sa satong ikakarahay. Dawa dai ta kayang gumibo nin mga milagro, puwede tang entusiyastikong darahon an atensiyon kan mga tawo sa ipinasabong na Tataramon nin Diyos. Sinisiyerto kan mga hula sa Bibliya an nagdadangadang na mas  marahay na buhay. Bilang dusay na mga Saksi ni Jehova na nakakaaram kan magayunon na panugang ini, dai daw niyato namamatian na garo may utang kita sa iba? (Roma 1:14, 15) Lugod na an paghurop-hurop sa bagay na ini magpahiro sa sato na sabihon sa iba an maugmang bareta kan Kahadian nin Diyos.—Sal. 45:1; 49:3.

12. Taano ta makakasiyerto kita na nasasabutan na marhay ni Jesus an ekolohiya kan daga?

¹² Kaiba an saiyang bugtong na Aki bilang “ekspertong trabahador,” linalang nin Diyos an daga asin an mga bagay na yaon diyan. (Tal. 8:22, 30, 31, NW; Col. 1:15-17) Kun siring, nasasabutan na marhay ni Jesus an ekolohiya kan daga. Aram niya kun paano gagamiton, papamahalaan, asin ididistribwir nin pantay-pantay asin tama an natural na kayamanan kan daga.

13, 14. Magtao nin halimbawa kun paano ipinahiling ni Cristo an kapangyarihan niya na kontrulon an puwersa nin naturalesa.

¹³ Kan nasa daga si Jesus, ipinahiling niya na siya ‘an kapangyarihan nin Diyos’ paagi sa pagkontrol sa mga puwersa nin naturalesa. Isip-isipa kun ano an ginibo ni Jesus kan biglang magbagyo nin makusog na nagsapeligro sa buhay kan mga disipulo niya. (Basahon an Marcos 4:37-39.) Sinabi nin sarong iskolar sa Bibliya: “An Griegong terminong ginamit [para sa ‘bagyo nin duros’ na nasa Marcos 4:37] nanunungod sa sarong makusugon na bagyo. Nungkang ginagamit iyan para sa saro sanang paghuyop nin duros . . . kundi sa sarong bagyo na biglang nabilog hali sa maitumon na panganuron na may kaibang makusugon na duros, daguldol saka kadakul na uran, asin kayang pabaralintungon an mga bagay.” Inapod ini sa Mateo na ‘makuring bagyo.’—Mat. 8:24.

¹⁴ Imahinaron an eksena: Nagtuturog si Jesus huling pagal-pagal siya sa ministeryo. Minasalpok sa baroto an mga alon na nagtatapuyas asin minalaog sa baroto. Pero, dawa makusugon an duros asin inuuruulanto an baroto, dai man giraray nagigimata si Jesus. Kaipuhan niyang magpahingalo. Pinukaw si Jesus kan takot nang mga disipulo asin nagkururahaw: “Magagadan kami”! (Mat. 8:25) Kan mapagmata si Jesus, pinagbutan niya an duros asin an dagat: ‘Tuninong! Untok!’ asin puminundo an makusugon na duros. (Mar. 4:39) Ano an resulta? Nagkaigwa nin ‘katuninungan.’ Talagang makapangyarihan nanggad si Jesus!

15. Paano ipinahiling kan mismong Diyos na Makakamhan sa Gabos na kaya niyang kontrulon an mga puwersa nin naturalesa?

¹⁵ Si Jehova mismo an Gikanan kan kapangyarihan ni Cristo, kaya may dahilan kita na magtubod na kayang-kaya kan Diyos na Makakamhan sa Gabos na kontrulon an puwersa kan naturalesa. Pag-isipan an pirang halimbawang ini. Bago an Baha, sinabi ni Jehova: ‘Pitong aldaw na sana, papauranan ko an daga [sa laog] nin 40 aldaw asin 40 banggi.’ (Gen. 7:4) Siring man, mababasa ta sa Exodo 14:21: ‘Ginibo ni Jehova na sumibog an dagat huli sa sarong makusog na duros na hali sa subangan.’ Asin mababasa ta sa Jonas 1:4: ‘Si Jehova nagpaduros nin makusog sa dagat, asin nagkaigwa nin kaniguan kakusog na bagyo sa dagat, [kaya madali nang] mabagbag an sakayan.’ Nakakapakusog nanggad sa buot na maaraman na kayang kontrulon ni Jehova an mga elemento. Malinaw nanggad na nasa marahay na kamot an puturo kan Daga.

16. Taano ta nakakapakusog na maaraman na an satong Kaglalang asin an saiyang panganay na Aki may kapangyarihan na kontrulon an mga puwersa nin naturalesa?

¹⁶ Nakakapakusog nanggad na hurop-hurupon an pambihirang kapangyarihan kan satong Kaglalang asin kan saiyang “ekspertong trabahador.” Sa panahon kan Sangribong Taon na Paghadi ni Cristo, matiwasay na maistar sa daga an gabos na tawo. An nakakatakot na natural na mga kalamidad na nangyayari ngunyan mawawara na. Sa bagong kinaban, dai na kita matatakot na maapektaran nin mga bagyo, tsunami, linog, o pagsabog nin bulkan. Nakakaugmang isip-isipon an panahon na mayo nang mga puwersa nin naturalesa na makakagadan o makakapabaldado, huling “an tolda nin Diyos nasa  mga tawo”! (Kap. 21:3, 4, NW) Makakasigurado kita na paagi sa kapangyarihan nin Diyos na ipinapahiling niya paagi ki Cristo, makokontrol na an mga puwersa nin naturalesa sa panahon kan Milenyo.

17. Ano an sarong paagi na maaarog ta ngunyan an Diyos asin si Cristo?

¹⁷ Siyempre, dai ta kayang kontrulon an natural na mga kalamidad arog kan kayang gibuhon ni Jehova asin ni Jesus, pero may kaya man kitang gibuhon. Ano iyan? Puwede tang iaplikar an Talinhaga 3:27. * (Basahon.) Kun an satong mga tugang nag-aagi nin mga kasakitan, puwede ta sindang rangahon asin suportaran sa pisikal, emosyonal, asin espirituwal na paagi. (Tal. 17:17) Halimbawa, puwede ta sindang tabangan na makabawi sa epekto nin natural na kalamidad. Ini an udok sa pusong pasasalamat nin sarong balo na an harong rinaot na marhay nin bagyo: “Nagpapasalamat akong marhay na kabilang ako sa organisasyon ni Jehova, bako sanang huli sa tabang ninda sa materyal kundi sa espirituwal man.” Sarong daragang sister man an namroblemang marhay asin nawaran nin paglaom pagkatapos na mahiling an danyos na ginibo kan bagyo sa harong niya. Kan hirahayon kan mga tugang an saiyang harong, sinabi niya: “Dai ako makapaniwala! Dai ko maipaliwanag an namamatian ko . . . Salamat po, Jehova!” Nauugma nanggad kitang mapabilang sa sarong kasararuan nin magturugang na talagang nagmamalasakit sa kapakanan kan iba. Asin an mas nakakapaugma pa sa sato iyo na si Jehova asin si Jesu-Cristo talagang nagmamalasakit sa mga lingkod nin Diyos.

18. Ano an kahanga-hanga sa nagin motibo ni Jesus sa paggibo niya nin mga milagro?

¹⁸ Sa panahon kan ministeryo ni Jesus, pinatunayan niyang siya ‘an kapangyarihan nin Diyos.’ Pero ano an motibo ni Jesus sa paggibo kaini? Dai nanggad niya ginamit an saiyang kapangyarihan tanganing pahangaon an iba o para sa sadiri niyang kapakinabangan. Iyo, ipinapahiling kan ginibong mga milagro ni Jesus na namumutan niya an mga tawo. Pag-uulayan ta iyan sa masunod na artikulo.