1. Pine nemene matre Paulo a qaja ka hape, “Keriso la mene i Akötesie”?

NYIMU pengöne aqane amamane Iehova la mene i Nyidrë jëne Iesu. Ame ngöne lo Iesu e celë fen, hnei nyidrëti hna kuca la itre iamamanyikeu. Easa öhne itre eje e hnine la Tusi Hmitrötr, nge itre eje a acatrene la lapaune së. (Mataio 9:35; Luka 9:11) Eje hi, tru catre la men hnei Iehova hna nue koi Iesu, celë hi matre qaja jë Paulo aposetolo ka hape: “Keriso la mene i Akötesie.” (1 Korinito 1:24) Ngo, kola ketri së tune kaa hnene la itre iamamanyikeu i Iesu?

2. Nemene la hna ini së hnene la itre iamamanyikeu i Iesu?

² Öni Peteru aposetolo, hnei Iesu hna kuca la “ite haten,” ene la itre iamamanyikeu. (Ite Huliwa 2:22) Nemene la hna ini së hnene la itre iamamanyikeu cili? Kola amamane koi së la nyine troa kuca hnei Iesu elanyi ngöne la Musi nyidrë Ka Caa Thauzane Lao Macatre. Ame ngöne la ijine cili, tro nyidrëti a kuca la itre iamamanyikeu ka tru catre hmaca kö, nge nyine troa kepe thangane hnene la nöjei atr asë e cailo fen. Ketre, easa  atrehmekune jëne la itre iamamanyikeu i nyidrë la itre thiina i nyidrë me Tretretro i nyidrë. Ame ngöne la tane mekune celë, tro sa ce ithanatane la köni iamamanyikeu i Iesu, memine la thangane itre ej koi së enehila me ngöne la itre drai elany.

3. (a) Hnei nemene laka kuca jë Iesu la pane iamamanyikeu? (b) Hnei Iesu hna amamane tune kaa la aqane hame i nyidrë e Kana?

³ Hnei Iesu hna kuca la pane iamamanyikeu i nyidrë ngöne lo faipoipo e Kana. Thatre kö së la kepine matre tha ijije ju la waina kowe la nöjei ka traqa. Nyine hmahmane lai kowe la lue trefën, ke qa i nyidro troa hnëkëne la ka ijije kowe la itre hna hën. Maria, thine i Iesu la ketre e angatr. Eahlo a sipo ixatua ju koi Iesu, ke eahlo jë a mekune ka hape, ijiji Iesu hi troa kuca la ka ijij. Eje hi laka, hnei Maria hna mekune hnyawa lo aqane qeje Iesu hnene la itre hna perofetan, nge atre hnyawa hi eahlo ka hape, tro lo a hë nyidrë, ‘Hupuna ne la Kasisitria.’ (Luka 1:30-32; 2:52) Ame la ka mama hnyawa, tre, ene la aja i Maria me Iesu troa xatuane la lue trefën. Celë hi matre, ujëne jë Iesu la 380 lao litë tim koi “waina ka loi.” (E jë la Ioane 2:3, 6-11.) Tha jole i Iesu kö lai troa kuca la iamamanyikeu cili. Ngo ame laka kuca jë nyidrë, tre hnene la etrune la ihnimi nyidrëti kowe la itre atr. Ketre, nyidrëti a nyitipune la aqane ham ne la Tretretro i nyidrë.

4, 5. (a) Nemene la hna ini së hnene la pane iamamanyikeu i Iesu? (b) Nemene la hna ini së hnene la iamamanyikeu e Kana göne la itre drai ka troa xulu?

⁴ Tru la waina hnei Iesu hna hamëne jëne la iamamanyikeu, matre ijije kowe la ka ala nyim. Nemene la hna ini së hnene la iamamanyikeu cili? Kola amamane koi së ka hape, ame Iehova me Iesu, tre tha lue ka cipane kö nyidroti la loi, ngo lue ka hame catr. Ketre, nyidroti a wangatrune la mekuna ne la itre atr. Ketre mina, kola amamane ka hape, ngacama tro ju hë sa mele ngöne la ketre götrane la fene ka hnyipixe, ngo tro kö Iehova elanyi lai a huliwane la mene i Nyidrë matre tro pala hi a mana la xen.—E jë la Isaia 25:6.

⁵ Pane mekune jë! Easenyi hë matre hamëne pi Iehova la nöjei ewekë hne së hna ajan nge ka nyipi ewekë. Tro la nöjei atr a isa hetrenyi la uma ka mingöming, me xeni ka loi. Tru la ole së la easa mekune la nöjei ewekë ka lolo hna troa hamë së hnei Iehova ngöne la Paradraiso e celë fen.

6. Nemene la aqane huliwane lapane Iesu la mene i nyidrë, nge tro fe sa hane nyitipu nyidrëti tune kaa?

⁶ Tha hnei Iesu pi kö hna huliwane la mene i nyidrë göi itre sipu mekuna i nyidrë. Pane mekune jë la ewekë ka traqa lo Diabolo a tupathi Iesu, ene la troa ujëne la etë  nyine falawa. Hnei Iesu hna thipën, ke xele nyidrëti troa huliwane menune la mene thatraqane la itre sipu mekuna i nyidrë. (Mataio 4:2-4) Ngo, canga saqe Iesu pe huliwane la mene i nyidrë nyine ixatua kowe la itre atr. Tro sa xötrethenge tune kaa la tulu i Iesu göi troa meku itre xan? Öni nyidrë, “hamënejë.” (Luka 6:38) Easa trongëne lai ngöne la easa hëne la itre xan troa hane ce xeni me easë. Ijije tro fe sa nue la traeme së thupene la hna icasikeu matre troa xatuane la ketre trejin, tune la troa drenge la ketre trejine trahmanyi a amacane la cainöje i angeic. Maine pena, ijije tro sa xatuane la itre trejin ngöne la hna cainöje trootro. Easë hi lai a nyitipune la aqane hame i Iesu la easa canga xatuan e nöjei ijine la itre atr.

7. Nemene la ketre jol ka tha tro kö a patr ngöne la fene i Satana?

⁷ Tha ka qaane kö enehila la puafala. Hnei Iehova ha ekö hna qaja kowe la angetre Isaraela ka hape, “tha tro kö a pa ate pë ewekë ngöne la nöj.” (Deuteronomi 15:11) Nge itre hadredre lao macatre thupene lai, öni Iesu: “Celë pala kö thei nyipunie la ange pë ewekë.” (Mataio 26:11) Iesu kö la a qaja ka hape, tro pala hi a hetre ka puafala ngöne la fen? Ohea. E Satana pala hi la ka mus, tro pala hi a hetre ka pë ewekë ngöne la fen. Ngo tro hë lai a saze elanyi e traqa pi së ngöne la fene ka hnyipixe. Ame ngöne la ijine cili, pë hmaca kö ca ka puafala. Troa mana la xen, nge troa meji la nöjei atr!

8, 9. (a) Pine nemene matre ithuane jë Iesu la 5 000 lao atr? (b) Nemene la mekuna i epun göne la iamamanyikeu cili?

⁸ Kola qeje Iehova hnene la atre cinyihane la salamo me hape: “Cilieti a shathe la iwanakoime i cilie, me amejine la ite ewekë ka mele asëjëihë.” (Salamo 145:16) Ame lo Iesu e celë fen, hnei nyidrëti hna nyitipune hnyawa la Tretretro i nyidrë, me hamëne la ka nyipi ewekë kowe la itre atr. Tha nyidrëti kö a pi nyi waina i atr fë la mene i nyidrë. Ngo tru pe la ihnimi Iesu kowe la itre atr. Tro sa ce wange la hna qaja ngöne Mataio 14:14-21. (E jë.) Hna trongë iwaca hnene la ka ala nyim qa ngöne la itre traone i angatr troa xötrethenge Iesu. (Mataio 14:13) Ngo hejiheji hë, itretre dreng a mekune la itre atr, ke kucakuca ha angatr, me mecijin. Celë hi matre qaja jë angatr koi Iesu troa upe la ka ala nyim, matre tro angatr a isa itö nyine xen thatraqai angatr. Matre nemene ju hë la hna kuca hnei Iesu?

⁹ Hnei Iesu hna xome la faifi lao falawa me lue ie nyine ithuane la ala 5 000 lao thupëtresij, me itre föe me ha nekö i angatr. Pine nemene matre kuca jë Iesu la iamamanyikeu celë? Pine laka, tru la ihnimi nyidrë kowe la itre atr, nge nyidrëti fe a meku angatr. Ketre, tru la xen hnei Iesu hna hamën, ke, ‘xeni meji asë hi’ la ka ala nyim. Hetrenyi hë angatre la trenge catre troa isa bëeke hmaca koi isa hnalapan. (Luka 9:10-17) Nge, thupene hë la hna isa xeni mej, hnene hmaca kö la itretre dreng hna hleme la itre munëne xen, me nyialiene la 12 lao watreng!

10. Nemene la pengöne la puafala ngöne la itre drai ka calemi?

¹⁰ Hnene laka, tru la pi aja mo me huliwa qene atrekënö ne la itre ka mus, matre itre hadredre milio lao atr ka puafala. Tru mina fe hnei trejine me easë ka mecijin. Ngo easenyi hë matre tro la itre atr ka  drengethenge Iehova a mele ngöne la fene gaa pë ka puafala me ka qene atrekënö. Iehova la Akötresieti ka pucatinasë, nge hetrenyi Nyidrëti la men me aja troa eatrëne la aja ne la nöjei atr. Nyidrëti a thingehnaeane ka hape, calemi catre hë la ijine tro Nyidrëti a apatrene la akötr!—E jë la Salamo 72:16.

11. Pine nemene matre xecie hnyawa koi së ka hape, easenyi hë matre tro Keriso a huliwane la mene i nyidrë kowe la fen asë, nge qa ngöne lai, nemene la aja i epuni troa hane kuca?

¹¹ Ame lo Iesu e celë fen, hnei nyidrëti hna kuca la itre iamamanyikeu ngöne la itre hnepe götrane hi, nge ngöne hi la köni macatre nge sin. (Mataio 15:24) Ngo ame hë la kola Joxu hnei Iesu, tro hë nyidrëti a xatuane la nöjei atr ngöne la Musi nyidrë Ka Caa Thauzane Lao Macatre. (Salamo 72:8) Itre iamamanyikeu i Iesu a anyipicine koi së ka hape, aja i nyidrëti troa huliwane la mene i nyidrë nyine loi koi së. Pëkö mene së troa kuca la itre iamamanyikeu, ngo nemene la hne së hna atreine kuca? Ijije tro sa huliwane la traeme së, me trenge catre së troa qaja kowe la itre atr la mele ka mingöming elanyi hna thingehnaeane hnine la Tusi Hmitrötr. Hnëqa së hi lai, Itretre Anyipici Iehova. (Roma 1:14, 15) Maine tro sa lapa mekune hnyawa la nyine troa kuca elanyi hnei Keriso, tro fe hi së lai a canga hane thuemacane la itre xa atr.—Salamo 45:1; 49:3.

12. Pine nemene matre xecie hnyawa koi së ka hape, atre hnyawa hi Iesu la pengöne la itre hna xup?

¹² Ame ngöne la Akötresieti a xupe la ihnadro me itre alien ej, “ce [Iesu] hi me anganyidë nge [“ka atreine huliwa,” MN].” (Ite Edomë 8:22, 30, 31; Kolose 1:15-17) Celë hi matre, atre hnyawa hi Iesu la pengöne la itre hna xup. Atre hnyawa hi nyidrëti la aqane troa huliwane me musi kowe la ecatrene la itre ewekë ka ej ngöne la fen, tune la wene, me sa, me di, me itre xa ewekë ka tune lai.

13, 14. Qaja jë la ketre ceitun ka amamane la aqane musi Iesu kowe la ecatrene la itre ewekë ka ej ngöne la fen.

¹³ Ame ngöne lo Iesu e celë fen, hnei nyidrëti hna amamane ka hape, thei nyidrë la mene i Akötresie ngöne la nyidrëti a musi kowe la ecatrene la itre ewekë ka ej ngöne la fen. Pane mekune jë la aqane musi Iesu kowe lo janacas. (E jë la Mareko 4:37-39.) Hnene la ketre atre ithanatane la pengöne la Tusi Hmitrötr hna qaja ka hape, ame la qene heleni ne la “janacas” ngöne la tusi Mareko, tre hna xome nyine troa qejepengöne la enyi ka catr maine wene ka catre pena. Kola qaja la ketre enyi ka catr nge ka ce tro me itre iawe ka mitihnin, me itre atu eny, me hedreng, me di. Nge thupene lai, tru hnei ewekë hna angazon.

¹⁴ Pane mekune jë së la ewekë ka traqa: Kola kaca trane la bootr hnei gejë, me lö tim. Ngacama tru la mejene la janacas nge kola jume la he, ngo Iesu pala hi a meköl, ke kucakuca catre nyidrë. Tru la trenge xou ne la itretre dreng, ame hnei angatre hna ahlë Iesu me hape: “Nyishëti ha la troa mec.” (Mataio 8:25) Nemene la hna kuca hnei Iesu? Nyidrëti a mejë me hape kowe la enyi me hnagejë: “The ilu kö, humuju.”  (Mareko 4:39) Upu ju hi la janacas, ame hna “haodrai atraqate pi.” Hane hi la ka amamane la aqane musi Iesu kowe la ecatrene la itre ewekë ka ej ngöne la fen!

15. Nemene la aqane amamane Iehova ka hape, Nyidrëti a musi kowe la ecatrene la itre ewekë ka ej ngöne la fen?

¹⁵ Qaathei Iehova la mene i Keriso, matre xecie koi së ka hape, Akötresie Kapucatinasë a musi kowe la ecatrene la itre ewekë ka ej ngöne la fen. Qëmekene lo Iwë Atraqatr, öni Iehova: “Luengemene [7] pë hë la o drai, nge tro ni a upe la manie kowe la fene luate [40] la o drai nge luate [40] la o jid.” (Genese 7:4) Ketre, easa e ngöne Esodo 14:21: “Iehova a akacane la hnagejë hnene la huja ka cate.” Nge easa e ngöne Iona 1:4: “Hnei Iehova hna upe la enyi atraqate kowe la hnagejë, ame hna wene atraqate ngöne la hnagejë, nge maine kaqa ha la he.” Haawe, ixatua ka tru koi së troa atre laka, ame ngöne la fene ka hnyipixe, tro pala hi Iehova elanyi a musi kowe la ecatrene la itre ewekë ka ej ngöne la fen.

16. Pine nemene matre kola akeukawanyi së la easa atre ka hape, Iehova me Iesu a musi kowe la ecatrene la itre ewekë ka ej ngöne la fen?

¹⁶ Kola akeukawanyi së la easa atre ka hape, Iehova me Iesu a musi kowe la ecatrene la itre ewekë ka ej ngöne la fen. Ame ngöne la Musi Keriso Ka Ca Thauzane Lao Macatre, tro ha mele xetietë la nöjei atr e  celë fen. Pë hmaca kö atr ka troa eatr maine meci hnene la itre hulö, tune la janacas, gejë madra, maine sa pena. Tha tro hmaca kö sa xouene la itre hulö, ke, “thei nöjei ate la uma ne heta i Akötesie.” (Hna Amamane 21:3, 4) Tha luelue kö së ka hape, ame ngöne la Musi Iesu Ka Ca Thauzane Lao Macatre, tro Iehova a nue koi nyidrë la mene troa musi kowe la ecatrene la itre ewekë ka ej ngöne la fen.

17. Nemene la ketre aqane tro sa nyitipu Akötresieti me Keriso enehila?

¹⁷ Eje hi laka, pëkö ka atreine troa neëne la itre hulö; Iehova me Iesu hmekuje hi la ka atrein. Ngo, hetre ewekë hne së hna atreine troa kuca. Ijije tro sa trongëne la hna qaja ngöne Ite Edomë 3:27. (E jë.) Ame la kola lepe la itre trejin hnene la ketre hulö, loi e tro sa hamëne la ka nyipi ewekë koi angatr, me amamane la ihnimi së koi angatr, nge tro fe sa akeukawanyi angatr. (Ite Edomë 17:17) Thupene la ketre wene ka catr, hna angazone la uma ne la ketre sine föe. Öni eahlo: “Tru la madrineng troa hane sine la organizasio i Iehova, tha qa ngöne hmekuje kö la hna ithue ewekëng, ngo hnene fe la ixatua hnenge hna kapa ngöne la götrane u.” Ame la ketre trejine föe ka pë föen, tre, kösë pëhë aliene la mele i angeic lo kola thë la uma i angeic hnene la ketre wene. Thupene la hna nyihnyawane hmaca la uma i angeic hnene la itre trejin, öni angeic: “Thatreine kö ni qeje pengöne la etrune la madrineng! Casi hi, eni a olene koi Iehova!” Tru la madrine së laka, itre trejin, trahmanyi me föe, a hnime me meku itre xan. Tru catre hmaca kö la madrine së koi Iehova me Iesu Keriso, lue ka hnimi së me meku së.

18. Ame la epuni a atre la kepine matre kuca jë Iesu la itre iamamanyikeu, ke, nemene la hnei epuni hna dreng e kuhu hni epun?

¹⁸ Ame ngöne lo Iesu e celë fen, hnei nyidrëti hna amamane ka hape, nyidrëti la “mene i Akötesie.” Ngo tha hnei nyidrëti pi kö hna huliwane menune la mene i nyidrë göi troa nyi waina i atr, maine göi troa kuca la itre sipu mekuna i nyidrë. Hnei Iesu pe hna huliwane hnyawane la mene i nyidrë, ke, tru la ihnimi nyidrëti kowe la itre atr. Tro pë hë sa ce wange lai ngöne la tane mekune ka troa xulu.