1. Dahaka dainai Paulo ia gwau, “Keriso be Dirava ena siahu”?

IESU be hoa karadia ia karaia neganai, Iehova ena siahu bada ia hahedinaraia. Evanelia bukadia foa be Keriso ena hoa karadia idia sivarailaia, unai ese eda abidadama ia hagoadaia. To, unai sibona lasi, Iesu ese hoa karadia ma haida ia karaia danu. (Mat. 9:35; Luka 9:11) Oibe, Iesu be Dirava ena siahu amo unai ia karaia. Unai dainai Paulo ia gwau: “Keriso be Dirava ena siahu.” (1 Kor. 1:24) To, edena dala ai Iesu ena hoa karadia ese ita ia durua?

2. Iesu ena hoa karadia amo dahaka ita dibaia?

² Aposetolo Petero ia gwau Iesu be hoa o “toa” karadia ia karaia. (Kara 2:22) Iesu ese tanobada ai ia karaia hoa karadia ese idia hahedinaraia, vaira negana ai ia lohia neganai ia be hoa kara badadia do ia karaia. Iesu ese ia karaia hoa karadia be Dirava ena tanobada matamatana ai do idia vara gaudia ia laulaulaia! Danu, ena hoa karadia amo iena kara bona Tamana ena kara ita dibaia. Mani Iesu ena hoa karadia haida ita herevalaia, bona hari bona vaira negana ai ita ia durua diba dalana ita itaia danu.

3. (a) Dahaka idia vara guna bena Iesu ese ena hoa karana ginigunana ia karaia? (b) Edena dala ai Kana ai Iesu be hariharibada karana ia hahedinaraia?

³ Kana, Galilea ai, headava aria ta dekenai Iesu ese ena hoa karana ginigunana ia karaia. Unai aria ai, reana hutuma idia lao dainai, wain ia ore. Iesu ena sinana be unai aria dekenai ia noho danu. Lagani haida lalonai, Iesu ena sinana be iena natuna totona idia gwauraia peroveta herevadia ia lalohadailaia, bona ia diba ia do idia gwauraia “Atai Momokani Dirava ena Natuna.” (Luka 1:30-32; 2:52) Maria ia abia dae Iesu be mai ena siahu, a? Kana ai ia vara gauna ita laloa: Maria bona Iesu be headava matamata taudia dekenai idia hebogahisi, bona idia ura heduru idia henia. Iesu ia diba heabidae karana ia hahedinaraia be namo. Unai dainai hoa dalanai hodu 6 lalonai ia noho ranu be “wain namo hereana” ai ia halaoa. (Ioane 2:3, 6-11 duahia.) Iesu be ta ese ia doria dainai unai hoa karana ia karaia, a? Lasi. To taunimanima ia laloa bona iena guba Tamana ia tohotohoa dainai, unai hariharibada karana ia hahedinaraia.

4, 5. (a) Iesu ena hoa karana ginigunana ese ita dekenai dahaka ia hadibaia? (b) Kana ai ia vara hoa karana ese ia hahedinaraia vaira negana ai dahaka do ia vara?

⁴ Iesu be hoa dalanai wain ia hegaegaelaia, bona unai be hutuma totona ia hegeregere. Unai hoa karana ese ita dekenai dahaka ia hadibaia? Ia hahedinaraia Iesu be mai ena ura ida unai kara namodia ia karaia, unai amo ita diba Iehova bona Iesu dekenai taunimanima edia hemami be mai anina bada. Idia ruaosi be idia kara auka lasi. Mani oi laloa, Iehova be tanobada matamata ai ena siahu do ia gaukaralaia, unai amo “tanobada ena bese idauidau ibounai totona” aria badana do ia hegaegaelaia.—Isaia 25:6 duahia.

⁵ Mani inai oi laloa: Taunimanima ibounai be ruma namodia dekenai do idia noho bona aniani be momo. Namona be ita moale bada, badina tanobada Paradaiso ai Iehova ese ita dekenai gau namodia momo do ia henia.

6. Iesu be ena hoa karadia ia karaia daidia ia durua totona, bona edena dala ai ia ita tohotohoa diba?

⁶ Diabolo ese Iesu ia dibagania, nadi be paraoa ai ia halaoa totona, to Keriso be ia ura lasi ena siahu ia gaukaralaia ena ura ia hagugurua totona. (Mat. 4:2-4) To, ena siahu ia gaukaralaia ma haida ia durua totona. Iesu be ma haida ia laloa bada. Edena dala ai ia ita tohotohoa diba? Ia ese Dirava ena hesiai taudia ia hagoadaia ‘henia kara do idia manadalaia.’ (Luka 6:38) Hariharibada karana ita hahedinaraia totona, ma haida be eda ruma dekenai ita boiria ita aniani hebou, a? Bema hebou murinai tadikaka ta ia ura ena tok ia praktis, nega ita atoa ita helai bona kamonai totona, a? Bema haida idia ura edia haroro dalana idia hanamoa, idia ita durua diba, a? Bema haida idia dabu  dainai idia ita durua bona Baibel amo heduru ita henia, ita hahedinaraia ita be Iesu ita tohotohoa.

7. Inai tanobada dikana ai, edena hekwakwanai ia do vara noho?

⁷ Ogogami be gau matamatana lasi. Iehova ese idaunega Israela taudia ia hamaoroa ogogami taudia be hanaihanai unai tano dekenai do idia noho. (Deu. 15:11) Lagani handred murinai, Iesu ia gwau: “Ogogami taudia be nega ibounai idia noho umui dekenai.” (Mat. 26:11) Iesu ena hereva ena anina be ogogami taudia be hanaihanai tanobada ai do idia noho, a? Lasi, ena hereva ena anina be inai tanobada dikana ai ogogami taudia idia noho. Unai dainai, Iesu ena hoa karadia ese idia hahedinaraia Basileia ena lohia henunai ogogami ibounai do ia ore, badina unai nega ai aniani be momo bona do ita moale. Unai hereva ese ita ia hagoadaia!

8, 9. (a) Dahaka dainai Iesu ese hoa dalanai taunimanima tausen ia ubua? (b) Edena dala ai unai hoa karana ese oi ia durua?

⁸ Salamo torea tauna be Iehova ia herevalaia, ia gwau: “Oi emu imana oi kehoa, mauri gaudia ibounai idia boga kunu noho.” (Sal. 145:16, BHḡ) Keriso, “Dirava ena siahu,” be ena imana ia kehoa bona ia murinai idia raka taudia edia dabu gaudia ia henia, unai amo ena Tamana ia tohotohoa. Unai bamona ia karaia badina taunimanima ia laloa bada. Mani Mataio 14:14-21 (duahia) ita itaia. Iesu ena hahediba taudia be ia dekenai idia mai aniani ena hekwakwanai idia herevalaia totona. Ena be hahediba taudia idia hitolo danu, to idia be taunimanima idia laloa, badina idia hitolo bona idia hesiku. (Mat. 14:13) Iesu be dahaka do ia karaia?

⁹ Iesu be paraoa faiv bona gwarume rua amo tatau 5,000 bona hahine bona natudia ia ubudia! Iesu ese hoa dalanai ena siahu ia gaukaralaia ruma bese taudia, natudia maragidia danu, ia ubua. Unai ese ita ia hamoalea, ani? Hutuma “idia aniani bona idia bogakunu.” Unai ese ia hahedinaraia aniani be momo. Iesu be hutuma taudia dekenai aniani momo ia henia, unai amo idia hegeregere dala daudauna ai idia raka ela bona edia ruma dekenai idia ginidae. (Luka 9:10-17) Bona aniani oredia be bosea 12 dekenai idia hahonua!

10. Kahirakahira ogogami karana dekenai dahaka do ia vara?

¹⁰ Hari, tanobada gavamanidia be idia kara gageva dainai, taunimanima momo idia durua lasi. Ena be iseda tadikaka haida be mauri durua gaudia idia abia vadaeni, to idia laloa unai be hegeregere lasi. To, kahirakahira manau taudia be tanobada matamata ai do idia noho, unai nega ai kara gageva bona ogogami be lasi. Bema oi be mai emu siahu, taunimanima edia dabu gaudia oi henia diba, a? Siahu Ibounai Diravana be unai ia karaia diba, bona kahirakahira unai do ia vara!—Salamo 72:16 duahia.

11. Dahaka dainai ita diba Keriso ese kahirakahira tanobada ibounai dekenai ena siahu do ia gaukaralaia? Bona ita ia durua dahaka ita karaia totona?

¹¹ Iesu be tanobada ai ia noho neganai, lagani toi mai kahana lalonai Israela ena hanua haida sibona lalonai hoa karadia ia karaia. (Mat. 15:24) To hari Iesu be King dainai, iena hesiai taudia ese tanobada ibounai ai idia karaia gaukara ia durua noho. (Sal. 72:8) Iesu ena hoa karadia amo ita diba momokani ia be mai ena siahu ita ia durua, bona kahirakahira unai do ia karaia. Ena be hoa karadia ita karaia lasi, to mai ura bada ida taunimanima ita durua diba Dirava ena Hereva idia kamonaia totona. Baibel ena peroveta herevadia ese nega namodia idia herevalaia. Ita be bapatiso  Witnes taudia bona vaira negana ena hereva momokani ita diba dainai, ita be mai eda maduna ma haida dekenai unai ita herevalaia totona, a? (Roma 1:14, 15) Unai ita laloa dobu neganai, ita ia durua ma haida dekenai Dirava ena Basileia ita herevalaia totona.—Sal. 45:1; 49:3.

12. Dahaka dainai ita diba Iesu be tanobada latanai idia noho gaudia ia diba namonamo?

¹² Dirava ese tanobada bona ena latanai idia noho gaudia ia karaia neganai, ena vara guna Natuna be ia badinai “gaukara karaia namonamo tauna” bamona ia gaukara. (Aon. 8:22, 30, 31; NW; Kol. 1:15-17) Unai dainai, Iesu be tanobada latanai idia noho gaudia ia diba namonamo. Ia diba edena bamona tanobada gaudia do ia gaukaralaia namonamo.

13, 14. Iesu be edena dala ai ena siahu ia gaukaralaia lai bona medu ia koua totona? Haheitalai gwauraia.

¹³ Iesu be tanobada dekenai ia noho neganai, lai bada bona medu ia biagua karana amo ia hahedinaraia ia be “Dirava ena siahu.” Iesu ese lai badana ta, kahirakahira ena hahediba taudia ia hamasea lai, ia koua dalana mani ita laloa. (Mareko 4:37-39 duahia.) Baibel ia diba bada tauna ta ia gwau: “Greek herevana [Mareko 4:37 ese ia gwauraia “lai bada herea”] be lai gubana ia herevalaia. Ia be nega kwadogina dekenai ia toa lasi lai . . . to ia be ori koremadia mai medu bada ida bona gau ibounai ia hadikaia lai ia herevalaia.”

¹⁴ Mani inai oi laloa: Keriso be ena haroro gaukara ia karaia murinai, ia hesiku bada. Hurehure ese bouti ia botaia, bona ranu be bouti lalonai ia vareai. To, herevana lai ena regena be bada bona bouti be ia marere momo, to Iesu be ia mahuta noho. Ia hesiku dainai ia laga-ani be namo. Iena hahediba taudia be idia gari dainai, ia idia hanogaia bona idia gwau: “Ita be kahirakahira do ita mase!” (Mat. 8:25) Iesu ia toreisi bona lai bona davara ia hereva henia, ia gwau: “Hadokoa! Regerege lasi!” (Mar. 4:39) Iesu be lai bona davara ia hagania idia regerege lasi totona. Bona dahaka ia vara? “Lai ia doko, bona gohu ia namo lou.” Unai ese Iesu ena siahu ia hahedinaraia!

15. Edena dala ai Siahu Ibounai Dirava be ia hegeregere lai bada bona medu bamona gaudia ia biagua totona?

¹⁵ Keriso ena siahu be Iehova amo ia abia, unai dainai ita diba momokani Siahu Ibounai Diravana be ia hegeregere lai bada bona medu bamona gaudia ia biagua totona. Haheitalai haida mani ita laloa. Abata do lasi neganai, Iehova ia gwau: “Dina 7 do idia ore murinai lau be medu do lau siaia tanobada dekenai. Dina 40 bona hanuaboi 40 medu do ia diho tanobada dekenai.” (Gen. 7:4) Unai hegeregerena, Esodo 14:21 ia gwau: “Lohiabada ese lai, dina ia daekau kahana dekena amo ia siaia, davara ia haloua.” Bona Iona 1:4 ia gwau: “Lohiabada ese davara dekenai lai bada herea ia siaia. Bona lai guba ia bada herea noho dainai, lagatoi be kahirakahira ia makohia.” Bona Iehova ese lai bona davara ia biagua karana ese ita ia hagoadaia. Unai ese ia hahedinaraia vaira nega ai tanobada be do ia namo lou.

16. Dahaka dainai ita diba iseda Havaraia Tauna bona ena Natuna be mai edia siahu lai bada bona sunami bamona gaudia idia biagua totona?

¹⁶ Iseda Havaraia Tauna bona ena “gaukara karaia tauna” edia siahu ita laloa karana ese ita ia durua. Iehova bona Iesu be lagani 1,000 lalonai tanobada idia lohiaia neganai, taunimanima ibounai be mai gari lasi ida do idia noho. Badina tanobada matamatana ai lai badadia, sunami, volkeino, o tano marere be do idia ore. Unai negai,  unai bamona gaudia ese taunimanima do idia hahisia o hamasea lasi, badina “Dirava ena palai rumana be taunimanima ida ia noho”! (Apok. 21:3, 4) Ita diba momokani, Lagani 1,000 Lohia Negana ai Iesu ese Dirava ena siahu amo lai bona medu bamona gaudia do ia biagua.

17. Edena dala ai hari Dirava bona Keriso ita tohotohoa diba?

¹⁷ Oibe, ita hegeregere lasi disasta ita koua totona, to ita be ma haida ita durua diba. Edena dala ai unai ita karaia diba? Dala ta be, Aonega Herevadia 3:27 (duahia) ena hereva ita badinaia. Iseda tadikaka be dika idia davaria neganai, namona be edia dabu gaudia bona edia hemami hegeregerena ita durudia. Bona Dirava ena hereva amo idia ita durudia. (Aon. 17:17) Hegeregere, idia ita durua disasta ai idia davaria hisihisi idia haheaukalaia totona. Vabu ta ena ruma be lai gubana ese ia hadikaia, to tadikaka ia tanikiu henia, ia gwau: “Iehova ena orea lalonai lau noho be hahenamo badana, badina tadikaka ese tauanina dalanai lau idia durua sibona lasi, to Dirava ena hereva amo lau idia durua danu.” Bona singul taihu ta ena ruma be lai badana ese ia hadikaia neganai, ia lalohisihisi. To heduru ia abia murinai, ia gwau: “Lau hoa bada! Egu hemami ibounai lau gwauraia diba lasi. . . . Tanikiu, Iehova!” Ita moale bada badina iseda orea be ita ta ta ia laloa bada. Danu, Iehova bona Iesu Keriso be ita idia laloa bada.

18. Iesu ese hoa karadia ia karaia ena badina be dahaka? Bona edena dala ai unai ese oi ia durua?

¹⁸ Iesu ia haroro neganai, ia hahedinaraia ia be “Dirava ena siahu” ia gaukaralaia. To, Iesu ese hoa karadia ia karaia ena badina be dahaka? Ia be nega ta ia sibona o ma haida hamoalea totona ena siahu ia gaukaralaia kerere lasi. To, Iesu ese ia karaia hoa karadia ese ia hahedinaraia, ia ese taunimanima ibounai ia lalokau henia. Atikol gabena ai unai do ita herevalaia.