1. Wetin mek Pɔl bin se “Krays na Gɔd in pawa”?

JIOVA sho se i gɛt pawa bay we i yuz Jizɔs Krays fɔ du wɔndaful tin dɛn. Matyu, Mak, Lyuk, ɛn Jɔn tɔk bɔt sɔm pan di mirekul dɛn we Krays bin du. Wi kin rid bɔt dɛn mirekul ya na di Baybul ɛn dɛn go ɛp wi fɔ gɛt mɔ fet. (Mat. 9:35; Lyuk 9:11) Fɔ tru, Gɔd bin gi Jizɔs pawa. Na dat mek di apɔsul Pɔl bin se: “Krays na Gɔd in pawa.” (1 Kɔr. 1:24) Bɔt aw Jizɔs in mirekul dɛn go ɛp wi?

2. Wetin wi kin lan frɔm Jizɔs in mirekul dɛn?

² Di apɔsul Pita bin se Jizɔs bin pafɔm mirekul dɛn, ɔ “wɔndaful tin dɛn.” (Akt 2:22) Di pawaful tin dɛn we Jizɔs bin de du we i de na di wɔl de sho di kayn blɛsin dɛn we i go kam wit insay di Wan Tawzin Ia Rul. Dɛn tin ya we Jizɔs bin de du de sho di mirekul dɛn we i go du ɔlsay na di wɔl insay Paradays! Di mirekul dɛn we Jizɔs du ɛp wi fɔ no di kayn pɔsin we i bi ɛn di kayn pɔsin we in Papa bi. Lɛ wi tɔk smɔl bɔt sɔm mirekul dɛn we Jizɔs bin du ɛn si wetin dɛn gɛt fɔ du wit wi layf naw ɛn tumara bambay.

3. (a) Wetin bin mek Jizɔs pafɔm in fɔs mirekul? (b) Aw Jizɔs bin sho se i gɛt fri-an na Kena?

³ Jizɔs pafɔm in fɔs mirekul na wan mared pati na Kena insay Galili. Di pipul dɛn we kam di mared go dɔn bɔku pas di wan dɛn we dɛn bin fil se go kam. Bɔt ilɛksɛf na dat apin ɔ nɔto dat apin, wetin wi no na dat, di wayn dɔn. Wan pan di pipul dɛn we dɛn bin invayt na Meri, we na Jizɔs in mama. Na tru se i go dɔn te we Meri de tink gud wan bɔt ɔl di tin dɛn we di prɔfɛt dɛn bin tɔk bɔt in pikin ɛn i bin no se dɛn gɛt fɔ kɔl in pikin “Gɔd we de pantap ɔlman, in bɔy Pikin.” (Lyuk 1:30-32; 2:52) Fɔ se i bin biliv se Jizɔs gɛt pawa we i nɔ sho yet? Wi nɔ no. Wetin wi no na dat, Meri ɛn Jizɔs bin fil sɔri fɔ di nyu ɔkɔ ɛn yawo ɛn dɛn bin want fɔ ɛp dɛn mek dɛn nɔ shem. Jizɔs bin no se fɔ du gud to di wan dɛn we kam fɛn yu na tin we yu fɔ du. So i pafɔm mirekul; i tɔn 100 galɔn (380 lita) wata to “fayn wayn.” (Rid Jɔn 2:3, 6-11.) Fɔ se pawpa Jizɔs fɔ du dis mirekul? Nɔ. I bin du dis mirekul bikɔs i bisin bɔt pipul dɛn ɛn i bin de falamakata in Papa fɔ sho se i gɛt fri-an.

4, 5. (a) Us lɛsin wi lan frɔm di fɔs mirekul we Jizɔs du? (b) Di mirekul we Jizɔs pafɔm na Kena, wetin i de tɛl wi bɔt tumara bambay?

⁴ Di mirekul we Jizɔs bin pafɔm bin mek dɛn gɛt bɔku fayn wayn we bin du fɔ di pipul dɛn we bin de na di mared. Yu ebul fɔ si wetin wi go lan frɔm dis mirekul? Dis wɔndaful tin we Jizɔs bin du de mek wi biliv se in ɛn in Papa valyu di we aw pipul dɛn de fil. Dis de sho se Jizɔs ɛn in Papa nɔ krabit. Naw imajin aw Jiova go yuz in pawa insay di nyu wɔl fɔ gi fayn fayn it dɛn to “ɔl di pipul dɛn” we go de na di wɔl.—Rid Ayzaya 25:6.

⁵ Jɔs tink bɔt dis! I nɔ de fa igen, Jiova go mek ɔlman gɛt ɔl di tin dɛn we dɛn rili nid, lɛk gud fud ɛn fayn os, we go mek ɔlman satisfay. Lɛ wi gladi as wi de wet fɔ di fayn fayn tin dɛn we Jiova gɛt fɔ gi wi insay Paradays.

6. Udat dɛn Jizɔs bin de yuz in pawa fɔ? Aw wi kin falamakata Jizɔs?

⁶ We Setan bin tɛmpt Jizɔs Krays fɔ tɔn ston to bred, Jizɔs nɔ bin du am bikɔs i nɔ bin want fɔ yuz in pawa fɔ satisfay insɛf. (Mat. 4:2-4) Bɔt i bin yuz in pawa fɔ ɛp ɛn satisfay ɔda pipul dɛn. Aw wi go falamakata Jizɔs fɔ sho se wi bisin bɔt ɔda pipul dɛn? Jizɔs bin ɛnkɔrej Gɔd in savant dɛn fɔ “de gi.” (Lyuk 6:38) Aw wi go ebul fɔ du dis? Na we wi invayt pipul dɛn fɔ kam it na wi os, we wi spɛn tɛm wit pipul dɛn afta di mitin fɔ ɛp dɛn, lɛk fɔ lisin to brɔda we de praktis in tɔk, ɔ wi kin ɛp fɔ tren ɔda brɔda ɛn sista dɛn na di ministri. Wan ɔda we we wi go sho se wi gɛt fri-an lɛk Jizɔs na we wi de gi tin fɔ  it ɛn ɔda tin dɛn to wi brɔda ɛn sista dɛn ɔ we wi de ɛp dɛn wit tin dɛn we go mek dɛn gɛt tayt padi biznɛs wit Jiova.

7. Wetin go de as lɔng as wi de na Setan in wɔl?

⁷ I dɔn te we po de na di wɔl. Jiova bin tɛl di Izrɛlayt dɛn se po pipul dɛn go de wit dɛn ɔltɛm. (Dyut. 15:11) Afta lɔng lɔng tɛm, Jizɔs insɛf bin tɔk se: “Di po wan dɛn go de wit una ɔltɛm.” (Mat. 26:11) Fɔ se Jizɔs bin de tray fɔ tɔk se po pipul dɛn go de na di wɔl ɔltɛm? Nɔ, nɔto dat Jizɔs bin min. Jizɔs bin de tray fɔ tɔk se po pipul dɛn go de as lɔng as wi de na Setan in wɔl. So wi rili gladi fɔ no se di mirekul dɛn we Jizɔs bin pafɔm de sho wi se tin go bɛtɛ ɔnda Gɔd in Kiŋdɔm ɛn ɔlman go gɛt plɛnti tin fɔ it ɛn satisfay!

8, 9. (a) Wetin bin mek Jizɔs pafɔm mirekul fɔ fid bɔku bɔku pipul dɛn? (b) Wetin yu lɛk pan dis mirekul we Jizɔs bin du fɔ fid bɔku bɔku pipul dɛn?

⁸ Wan pan di man dɛn we rayt di Sam buk bin tɛl Jiova se: “Yu opin yu an ɛn satisfay ɔltin we gɛt layf. Ɛn yu de gi dɛn wetin dɛn want.” (Sam 145:16) Jɔs lɛk in Papa, ‘Krays we na Gɔd in pawa,’ bin de opin in an bɔku tɛm ɛn satisfay di wan dɛn we bin de fala am. I nɔ bin de du dat jɔs fɔ sho se i gɛt pawa. I bin de du am fɔ sho se i rili bisin bɔt pipul dɛn. Lɛ wi tɔk bɔt wetin de na Matyu 14:14-21. (Rid.) Jizɔs in disaypul dɛn kam to am fɔ kam tɔk bɔt it biznɛs. I go mɔs bi se di disaypul dɛn bin angri, bɔt dɛn bin bisin mɔ bɔt di pipul dɛn we bin dɔn angri ɛn taya. Dɛn pipul ya bin dɔn fala Jizɔs frɔm di siti dɛn. (Mat. 14:13) Wetin Jizɔs go du?

⁹ Jizɔs bin yuz fayv bred ɛn tu fish fɔ fid 5,000 man dɛn wit bɔku uman ɛn pikin dɛn! Wi nɔ gladi fɔ di we aw Jizɔs yuz in pawa fɔ kia fɔ bɔku bɔku pipul dɛn, ivin smɔl pikin dɛn? Di pipul dɛn “it ɛn satisfay.” Dis sho se di it bin bɔku. Jizɔs nɔ bin jɔs gi dɛn smɔl tin fɔ it, bɔt i bin gi dɛn sɔntin we go mek dɛn bɛlful te dɛn go bak na dɛn os dɛn. (Lyuk 9:10-17) Ɛn 12 baskɛt bred bin lɛf!

10. Wetin gɛt fɔ apin to po jisnɔ?

¹⁰ Tide bɔku bɔku pipul dɛn nɔ de gɛt di tin dɛn we dɛn rili nid bikɔs mɔtalman nɔ de rul in kɔmpin di rayt we. Ivin sɔm pan wi brɔda dɛn we gɛt di tin dɛn we dɛn nid, nɔ gɛt ɔl di tin dɛn we go mek dɛn “satisfay.” Bɔt i nɔ go te igen, di wan dɛn we de obe Gɔd go de na wɔl usay kɔrɔpshɔn ɛn po nɔ go de. If yu bin gɛt pawa, yu nɔ go gi mɔtalman di tin dɛn we dɛn nid? Papa Gɔd we gɛt pawa pas ɔlman, gɛt di pawa ɛn i rili want fɔ gi mɔtalman wetin dɛn nid. I dɔn prɔmis se i nɔ go te igen, i go mek mɔtalman lɛf fɔ sɔfa!—Rid Sam 72:16.

11. Wetin mek yu biliv se i nɔ go te igen Krays go yuz in pawa ɔlsay na di wɔl? Wetin dis dɔn mek yu want fɔ du?

¹¹ Di tɛm we Jizɔs bin de na dis wɔl, na smɔl say i bin pafɔm mirekul fɔ tri ɛn af ia. (Mat. 15:24) Bɔt we i dɔn bi Kiŋ, i go pafɔm mirekul dɛn we go bɛnifit ɔlman na di wɔl. (Sam 72:8) Di mirekul dɛn we Jizɔs bin de pafɔm de ɛp wi fɔ biliv se i ebul ɛn i want fɔ yuz in pawa fɔ wi bɛtɛ wan. Wi nɔ gɛt di pawa fɔ pafɔm mirekul, bɔt wetin wi go ebul fɔ du? Wi kin yuz wi tɛm ɛn wi trɛnk fɔ tɛl ɔda pipul dɛn bɔt di wɔndaful tin dɛn we Gɔd dɔn prɔmis wi insay in Wɔd, di Baybul. Di tin dɛn we di Baybul bin dɔn tɔk ɛp wi fɔ no klia wan se tɛm go kam we tin go bɛtɛ. As pipul dɛn we dɔn gi dɛn layf to Jiova, wi sabi wetin gɛt fɔ apin tumara bambay. Yu nɔ  tink se wi fɔ tɛl ɔda pipul dɛn di tin dɛn we wi dɔn lan? (Rom 1:14, 15) We wi de tink gud wan bɔt di tin dɛn we Krays go du, i go ɛp wi fɔ tɛl ɔda pipul dɛn di gud nyus bɔt Gɔd in Kiŋdɔm.—Sam 45:1; 49:3.

12. Wetin mek wi shɔ se Jizɔs rili ɔndastand aw di wɔl tan lɛk?

¹² We Gɔd bin de mek di wɔl ɛn di tin dɛn we de insay de, in wangren Pikin bin de nia am as “man we sabi wok.” (Prɔv. 8:22, 30, 31; Kɔl. 1:15-17) So Jizɔs rili ɔndastand aw di wɔl tan lɛk. Ɛn i sabi aw fɔ yuz, kɔntrol, ɛn sheb di tin dɛn we de na di wɔl di rayt we so dat ɔlman go gɛt.

13, 14. Gi wan ɛgzampul we de sho se Krays ebul fɔ kɔntrol di briz ɛn di wata.

¹³ We Jizɔs bin de na di wɔl, i bin sho se in na “Gɔd in pawa” bay we i bin kɔntrol di briz, di wata, ɛn ɔda tin dɛn. Lɛ wi tɔk bɔt aw Jizɔs bin kɔntrol wan big big briz we bin want fɔ kil in disaypul dɛn. (Rid Mak 4:37-39.) Wan man we stɔdi di Baybul gud gud wan bin tɔk se: “Di Grik wɔd we dɛn yuz [fɔ “big big briz” na Mak 4:37] min dɛn bad bad briz ɛn ren we kin pwɛl tin dɛn. I nɔ min smɔl briz we kin jɔs blo . . . bɔt i min big big briz we de blo we di klawd kin dɔn dak, ɛn we tɛnda de krak, wit ebi ebi ren, we de miksɔp ɔltin.” We Matyu bin de rayt, i bin se dis na bin “big big briz.”—Mat. 8:24.

¹⁴ Tink bɔt dis: Krays rili taya bikɔs i dɔn prich ol de. Di wata bin de bang bang di bot ɛn kam insay di bot. Pan ɔl we di big big briz bin de mek nɔys we i de blo ɛn di bot bin de shek shek na di wata, Jizɔs stil kɔntinyu fɔ slip. I bin rili nid fɔ rɛst. Di disaypul dɛn bin de fred so dɛn wek Jizɔs ɛn tɛl am se: “Na day wi de kam day so!” (Mat. 8:25) Jizɔs grap ɛn tɛl di briz ɛn di si se: “Stɔp! Stɛdi!” ɛn di briz stɔp fɔ blo. (Mak 4:39) We Jizɔs du dis, i bin de tɛl di briz lɛ i lɛf fɔ blo ɛn i tɛl di si fɔ stɛdi. Wetin apin we Jizɔs du dis? We i du dis “di ples kwayɛt.” Jizɔs sho se i rili gɛt pawa!

15. Aw Gɔd we gɛt pawa pas ɔlman dɔn sho se i ebul fɔ kɔntrol di briz, di wata, ɛn ɔda tin dɛn?

¹⁵ Na Jiova gi Krays pawa, so wi gɛt gud rizin fɔ biliv se Gɔd we gɛt pawa pas ɔlman ebul fɔ kɔntrol di briz, di wata, ɛn ɔda tin dɛn. Lɛ wi si sɔm ɛgzampul dɛn. Bifo da Ebi Ren bin kam na di wɔl, Jiova bin tɔk se: “Afta sɛvin dez, a go mek ren kam na di wɔl fɔ 40 dez ɛn 40 nɛt.” (Jɛn. 7:4) Semweso Ɛksodɔs 14:21 tɔk se: “Jiova mek big big briz kɔmɔt na di ist ɛn blo ol nɛt. Dis mek di si tɔn to dray grɔn.” Ɛn Jona 1:4 tɔk se: “Jiova mek wan big big briz bigin blo na di si ɛn di briz bin so bad dat i bin lɛf smɔl lɛ di bot kapsay.” Wi gladi fɔ no se Jiova ebul fɔ kɔntrol di briz, di wata, ɛn ɔda tin dɛn. So wi dɔn si klia wan se tumara bambay di wɔl go de na gud an.

16. We wi no se Gɔd ɛn in fɔs Pikin gɛt pawa fɔ kɔntrol di briz, di wata, ɛn ɔda tin dɛn, aw dat de ɛnkɔrej wi?

¹⁶ Gɔd gɛt pawa ɛn Jizɔs we na “man we sabi wok” insɛf gɛt pawa. We wi de tink bɔt di kayn pawa we dɛn gɛt, dat de ɛnkɔrej wi. Di tɛm we dɛn go tɔn ɔl dɛn atɛnshɔn na di wɔl insay di 1,000 ia, ɔlman go de wit kolat. Dɛn bad bad briz ɛn ren we de mek pipul dɛn fred nɔ go de igen. Nid nɔ go de fɔ fred dɛn big big briz, dɛn ebi ebi ren, dɛn faya dɛn we kin  bɔs na grɔn, ɔ atkwek insay di nyu wɔl. I rili fayn fɔ tink bɔt di tɛm we dɛn bad bad tin ya nɔ go kil ɔ damej ɛnibɔdi bikɔs “Gɔd in tɛnt [go] de wit mɔtalman”! (Rɛv. 21:3, 4) Wi biliv se Gɔd go yuz Krays fɔ kɔntrol di briz, di wata, ɛn ɔda tin dɛn insay di Wan Tawzin Ia Rul.

17. Aw wi kin falamakata Gɔd ɛn Krays?

¹⁷ Na tru se wi nɔ go ebul fɔ kɔntrol briz ɛn wata lɛk Jiova ɛn Jizɔs, bɔt wisɛf gɛt smɔl pawa. Aw wi kin yuz di pawa we wi gɛt? Wan we we wi kin yuz am na we wi du wetin de na Prɔvabs 3:27. (Rid.) We bad bad tin kin mit wi brɔda dɛn, wi kin ɛnkɔrej ɛn sɔpɔt dɛn. Wi kin tɛl dɛn sɔntin we go mek dɛn fil fayn, wi kin gi dɛn tin fɔ it ɛn ɔda tin dɛn, ɛn du tin we go ɛp dɛn fɔ gɛt tayt padi biznɛs wit Jiova. (Prɔv. 17:17) Fɔ ɛgzampul, we big big briz ɔ wata pwɛl usay dɛn de, wi kin ɛnkɔrej dɛn ɛn ɛp dɛn wit tin dɛn we dɛn nid. Lɛ wi si aw wan sista we in man dɔn day bin tɛl Jiova tɛnki di tɛm we wan bad bad briz bin pwɛl in os. I se: “A rili gladi fɔ de na Jiova in ɔganayzeshɔn, nɔto fɔ jɔs di tin dɛn we dɛn gi mi bɔt fɔ di ɛp we dɛn ɛp mi fɔ mek mi padi biznɛs wit Jiova tayt mɔ.” Lɛ wi si bak wetin wan sista we nɔ mared bin se afta wan bad bad briz pwɛl in os. I nɔ bin gɛt op ɛn i bin kɔnfyus. Bɔt afta dɛn ɛp am, i bin se: “A nɔ ebul fɔ ɛksplen! A nɔ rili ebul fɔ tɔk aw a de fil . . . Jiova tɛnki.” Wi gladi we wi de na ɔganayzeshɔn we rili bisin bɔt wi. Bɔt di tin we mek wi gladi pas ɔl na bikɔs Jiova ɛn Jizɔs Krays rili bisin bɔt wi.

18. Wetin mek Jizɔs bin de pafɔm mirekul?

¹⁸ Di tɛm we Jizɔs bin de prich, i bin sho se in na “Gɔd in pawa.” Bɔt wetin mek Jizɔs bin du dat? I nɔ bin ɛva yuz in pawa fɔ mek pipul dɛn kɔle am ɔ fɔ bɛnifit insɛf. Di mirekul dɛn we Jizɔs bin de pafɔm bin sho di kayn lɔv we i gɛt fɔ mɔtalman. Wi go tɔk mɔ bɔt dat na di nɛks atikul.