1. Paula’n engvângin nge ‘Krista chu Pathian thiltihtheihna a ni,’ tia a sawi theih?

JEHOVA chuan a thiltihtheihna chu Isua hmangin mak takin a târ lang a. Chanchin Ṭha ziak palite chuan rinna tichaktu Isua thil mak tih ṭhenkhat chungchâng chipchiar takin a târ lang a ni. Ani chuan thil mak dang tam tak pawh a ti ngei ang. (Mt. 9:35; Lk. 9:11) Ni e, Pathian thiltihtheihna chu Isuaah a lang chhuak a ni. Chuvângin, chhan ṭha tak neiin tirhkoh Paula chuan Isua chungchângah: ‘Krista chu Pathian thilthihtheihna a ni,’ tiin a sawi a. (1 Kor. 1:24) Mahse, Isua thil mak tihte chuan kan nunah nghawng eng nge a neih theih?

2. Isua thilmak tihte aṭangin eng nge kan zir theih?

² Tirhkoh Petera chuan Isua’n thilmakte a tih thu a sawi a. (Tirh. 2:22) Leia Isua thiltih ropuite chuan a rorêlna hnuaia malsâwmna ropui zâwk lo thleng tûrte chu a entîr lâwk a. Pathian khawvêl thara khawvêl pum huapa Isua thilmak tih tûrte thlîr lâwkna a ni bawk. A thilmak tihte chuan a mizia leh a Pa mizia tam tak min hriattîr bawk a ni. Isua thilmak tih ṭhenkhat chu ngaihtuahin, chûng chuan tûnah leh nakin hun thlenga min nghawng theih dân chu i lo en ang u.

3. (a) A vawi khatna atâna Isua thilmak tihtîrtu dinhmun chu sawi rawh. (b) Kana-a thilthlengah chuan Isua thilphalna chu engtin nge a lan?

³ Galili rama Kana khuaa inneihnaah, Isua chuan a thilmak tih hmasak ber chu a ti a. Chutah chuan, an beisei aiin mikhual an nei tam pawh a ni mai thei. A enga pawh chu ni se, uain a zo va. Mikhual zîngah chuan Isua nu Mari pawh a tel a. Kum tam tak chhûng chu “Chungnungbera Fapa” tia koh la ni tûr a fapa nêna inkûngkaih hrilh lâwkna thutiamte chu a ngaihtuah ngei ang. (Lk. 1:30-32; 2:52) A fapa hian la târ lan loh thiltihtheihna a nei tih a ring em? Mari leh Isua chuan innei thar nupate chu an lainatin, an mualpho an duh lo a ni tih Kana khuaa thilthlengah hian a lang a ni. Isua chuan khualchhâwn thiamna chu tih tûr pawimawh tak a ni tih a hria a. Chuvâng chuan, mak tak maiin tui Litre 380 chu ‘uain ṭhaah’ a chantîr a ni. (Johana 2:3, 6-11 chhiar rawh.) He thilmak ti tûr hian Isua’n mawhphurhna a nei em? Nei lo. Ani chuan mite chu a ngaihsak a, a Pa vâna mi thilphalna chu a entawn a ni.

4, 5. (a) Isua thilmak tih hmasak ber chuan eng nge min zirtîr? (b) Kana khuaa thilmak tihna chuan nakin hun tûr chungchângah eng nge min zirtîr?

⁴ Isua chuan a thilmak tihtheihna hmangin mipui ṭhahnem tâwk takte tân uain ṭha tam tham tak a siam a. He thilmak tihnain min zirtîr chu i hria em? Isua’n inhuam taka chutiang thilmak a tihna chuan, amah leh a Pa chuan mite rilru veizâwng an ngaih pawimawhzia min hriattîr a. An thilphal ve ve a ni. Tûnah chuan Pathian Jehova’n khawvêl thara lei pum puia “mi tinrêngte tân” ruai ropui tak ṭhehsak nân a thiltihtheihna phal taka a hman dân tûr chu mitthla ang che.—Isaia 25:6 chhiar rawh.

⁵ Han ngaihtuah teh! Ei tûr ṭha leh chênna in ṭha ang chi kan mamawh tak takte chu phuhrûksak kan nih vek hun a lo thleng ang. Lei Paradis-a Pathian Jehova’n phal taka min pêk tûr thil ṭhate beiseiin, kan thinlung chu hlimnain khat liam rawh se.

6. Isua chuan tute tân nge a thilmak tih theihna chu a hman a, engtin nge he mi chungchângah hian ani chu kan entawn theih?

⁶ Diabola’n Isua chu lung chhanga chantîr tûra a thlêm khân, ani chuan a thilmak tihtheihna chu mi mal duhzâwng tihpuitlin nâna a hmang duh lo chu a ngaihven awm hle. (Mt. 4:2-4) Mahse, a thiltihtheihna chu mi dangte mamawh phuhrûksak nân a hmang a ni. Isua’n mahni hma sialna tel lova mi dangte a ngaihtuahna chu engtin nge kan entawn theih? Ani chuan Pathian chhiahhlawhte chu “pe rawh u” tiin a fuih a. (Lk. 6:38) Mi dangte chu kan ina chaw ei tûr leh thlarau lam chaw eipui tûra sâwmin thilphalna mize duhawm tak chu kan lantîr thei ang em? Inkhâwm bânah hian, unaupain a thusawi tûr tihchhinna a neih ngaihthlâksak ang chi ṭanpui ngaite tân kan hun chu phal takin kan pe thei ang em? Rawngbâwlnaah ṭanpui ngaite chu eng ang ṭanpuina nge kan pêk theih? Kan theih ang tâwka mi dangte hnêna tîsa lam leh thlarau lam thilte phal taka kan pêk hian,  Isua hnêna aṭanga kan inzir tawhzia kan lantîr a ni.

7. He kalhmang a awm chhûng hian eng nge awm reng ang?

⁷ Retheihna hi thil thar a ni lo. Jehova chuan hmân lai Israel mite hnênah, chu ramah chuan mi retheite awm loh lai a awm ngai dâwn lo tih a hrilh a. (Deut. 15:11) Kum zabi tam tak hnuah, Isua pawhin: “Mi retheite chu kumkhuaa in hnêna awm an ni alâwm,” tiin a sawi a ni. (Mt. 26:11) Isua chuan leiah hian mi retheite kumkhuain an awm reng dâwn a tihna a ni em? Ni lo ve, he kalhmang suaksual tak a awm chhûng chu, mi retheite an awm reng dâwn a tihna mai a ni zâwk. Chuvângin, Isua thilmak tihte chuan Lalram rorêlna hnuaia mi tinin ei leh in tûr hnianghnâr tak an neihna nakin hun ṭha zâwk a entîr a ni tih hriat chu a va phûrawm tak êm!

8, 9. (a) Engvângin nge Isua’n mi sâng tam takte chu thilmak tia a hrai? (b) Thilmak tihna hmanga sâng tam takte hraina chungchângah engin nge i rilru a khawih?

⁸ Fakna hla phuahtu chuan Pathian Jehova chungchângah: “I kut i phar a, thil nung zawng zawng châkna chu i tihrehsak ṭhîn,” tiin a sawi a. (Sâm 145:16) A Pa entawnin, “Krista, Pathian thiltihtheihna” chuan a kut a phar a, a hnungzuitute duhzâwng chu a phuhhrûksak a ni. Chu a thiltih chu a thiltihtheihna târ lan nân mai a ni lo. Mi dangte hmakhua a ngaih vânga ti a ni. Matthaia 14:14-21-a thu hi i lo ngaihtuah ang u. (Chhiar rawh.) Isua zirtîrte chu ei tûr chungchâng sawipui tûrin a hnênah an lo kal a. Anmahni rilṭâm vâng mai ni lovin, an khua aṭanga kea Isua zuitu mipui chau takte leh rilṭâm takte hmakhua an ngaih vâng a ni. (Mt. 14:13) Isua’n eng nge a tih ang?

⁹ Isua chuan chhangpêr panga leh sangha pahnih hmangin hmeichhia leh naupang tiam loh patling hlîr 5,000 chu a hrai a. A thilmak tih theihna chu lainatna nêna naupangte pawh tiamin chhûngkuate ngaihsak nâna a hmanna hian kan rilru a khawih hle a ni lâwm ni? Mipuihote chuan “an ei a, an puar ta vek a.” He thu hian ei tûr tam tak a awm tih min hriattîr a. Isua chuan chhang a temtîr mai ni lovin, an ina an lêt leh hun thlenga daih tûrin mipuiho chu a hrai puar a. (Lk. 9:10-17) Bâwm râng 12 lai an ei bâng tlat a ni.

10. Retheihna chungchângah eng inthlâkna nge lo thleng thuai dâwn?

¹⁰ Tûn lai hian mihringte rorêlna dik lo avângin mi maktaduai tam takte mamawh bulpuite chu phuhrûksak a ni lo va. Kan unau ṭhenkhat pawhin ei an hmu ṭâwk ṭâwk a, “puar” khawp an nei lo. Nimahsela, thu âwih mihringte tân ei rûkna leh retheihna awm tawh loh hun chu a hnai tawh a ni. Thiltihtheihna nei ta la chuan, mihringte mamawh chu i phuhhrûksak dâwn lâwm ni? Pathian Engkimtitheia chuan thiltihtheihna leh tih duhna a nei a, chu chu a rawn ti thuai ang. Ni e, hahdamna chu ban phâk lekah a awm tawh a ni.—Sâm 72:16 chhiar rawh.

11. Krista chuan a thiltihtheihna chu nakin lawkah khawvêl pumpuiah a hmang ang tih engvângin nge i rinngheh a, chu chuan engti tûrin nge a chêttîr che?

¹¹ Isua’n leia a awm laiin, kum thum leh a chanve chhûng chauh chu hmun zau vak lovah rawng a bâwl a. (Mt. 15:24) Lal ropui tak a nih angin, a ram chu lei kil lî thlenga zauh a la ni ang. (Sâm 72:8) Isua thilmak tihte chuan kan ṭhatna tûrin a thu neihna chu kan tân a hmang theiin, a hmang duh bawk tih min rinnghehtîr a. Thilmak chu kan ti thei lo va; mahse, Pathian thâwk khum Thu ngaihsak tûrin mite chu phûr takin kan ṭanpui thei a ni. Bible hrilh lâwknate chuan nakin hun ṭha zâwk min tiam a. Nakin hun chungchânga he hriatna hlu tak nei Jehova Thuhretu inpumpêk tawh kan nih angin, mi dangte chungah bat kan nei tih kan hria a ni lâwm ni? (Rom 1:14, 15) He mi chungchâng chhût ngunna hian mi dangte hnêna Pathian  Ram chanchin ṭha hrilh tûrin min chêttîr rawh se.—Sâm 45:1; 49:3.

12. Chhehvêl boruak leh thilnungte inlaichînna chu Isua’n a hre chiang tih engvângin nge kan sawi theih?

¹² A Fapa mal neih chhun “mi themthiam” nên, Pathian chuan lei leh a chhûnga thil awmte chu a siam a. (Thuf. 8:22, 30, 31; Kol. 1:15-17) Chuvângin, Isua chuan chhehvêl boruak leh thilnungte inlaichînna, ecology hnathawh dân zawng zawng chu a hria a ni. Ani chuan leilung hausaknate hman dân leh enkawl dân a hriat bâkah, dik tak leh ṭha taka sem rual dân pawh a hria a ni.

13, 14. Krista’n leilung pianken chaknate a thunun theih dân sawi rawh.

¹³ Isua chuan leia a awm laiin, leilung pianken chaknate thununna hmangin “Pathian thiltihtheihna” a nihzia a târ lang a. A zirtîrte nun tiderthâwngtu thlipui na tak a hmachhawn dân hi han ngaihtuah teh. (Marka 4:37-39 chhiar rawh.) Bible lama mithiam pakhat chuan: “[Marka 4:37-a “thilpui nasa tak” tia lehlin] Grik thumal hi thlipui thinur tak, a nih loh leh hurricane thlipui sawi nâna hman a ni a. Chu chu thâwklehkhata na taka tleh a, reh lehnghâl mai sawina a ni ngai lo . . . khawdur nasa tak leh ṭêk tla nêna inkawp thlipui na tak, ruahpui vânâwn nêna ṭang kawpa engkim tidarh phengphungtu thlipui sawina a ni,” tiin sawi.

¹⁴ Han mitthla teh: Krista chu a rawngbâwlnaah a chau êm êm a. Tui fâwnte chuan lawng chu a vûr hlup hlup mai a, tui inphuhte leh tui phuante chu lawngah chuan a lût a. Chawlh hahdam a ngaih êm avângin, thlipui nasa tak tleh thâwm leh lawng a vawrh sawn âwrh âwrh chung pawhin, Isua chu a muhîl reng tho a ni. Zirtîr thlabâr takte chuan Isua chu kai thovin: “Kan boral dâwn hi le,” tiin an au chhuak a. (Mt. 8:25) Isua chu a tho va, thlî leh dîl hnênah chuan: “Ngawi la, awm hle hle rawh!” tiin thu a pe a. (Mk. 4:39) A nihna takah chuan, Isua chuan thlî leh dîl chu awm hle hle reng tûrin thu a pe a ni. Eng nge lo thleng ta? “A lo reh ta ṭhup mai a.” Isua lantîr thiltihtheihna chu a va ropui tak êm!

15. Pathian Engkimtitheia chuan leilung pianken chaknate a thunun thei tih engtin nge a târ lan?

¹⁵ Krista thiltihtheihna bul ber chu Jehova a ni a; chuvângin, Pathian Engkimtitheia chuan leilung pianken chaknate chu a thunun thei tih ring tûrin chhan ṭha tak kan nei a ni. Entîrna ṭhenkhat hi han ngaihtuah teh. Tui lêt hmain, Jehova chuan: “Ni sarih a la bâk a, chu mi hnuah chuan lei chungah hian ni sawmli leh zan sawmli chhûng zawng ruah ka sûrtîr ang,” tiin a sawi a ni. (Gen. 7:4) Chutiang bawkin, Exodus 14:21-ah chuan: “LALPAN . . . khawchhak thli na takin a rawn tlehtîr a,” tiin kan chhiar a. Jona 1:4-ah pawh: “LALPA chuan thli na tak mai tuifinriatah chuan a tlehtîr a, tuifinriatah chuan thlipui nasa tak a tleh a, tichuan, lawng chu keh dâwn ang maiin a awm ta a,” tiin kan chhiar bawk a ni. Jehova’n leilung pianken chaknate a thunun thei tih hriat chu a thlamuanthlâk hle. Leilung hi mi rin tlâk tak kutah a awm tih a chiang hle.

16. Min Siamtu leh a Fapa piang hmasa ber chuan leilung pianken chaknate thunun tûrin thiltihtheihna an nei tih hriat chu engvângin nge a thlamuan thlâk?

¹⁶ Min Siamtu leh a “mi themthiam” thiltihtheihna mak tak ngaihtuah chu a thlamuan thlâk hle. Kum 1,000 chhûng lei lama an ngaihsakna pumhlûm an pêk hunah chuan, mi zawng zawng chu him takin an awm ang a. Leilung chhiatna hlauhawm takte chu thil hmasate a ni tawh ang. Khawvêl tharah chuan typhoon thlipui te, tsunami te, tlângkâng te, a nih loh leh lîrnghîngte’n min tihnat kan hlauh nachhan tûr a awm tawh lo vang. “Pathian bâwktê chu mihring zîngah a lo awm” tâk  avânga leilung pianken chaknate’n min tihhlum emaw, ramtuileilova min siam emaw tawh loh hun tûr ngaihtuah chu a va ropui tak êm! (Thup. 21:3, 4) Krista hmanga Pathian thiltihtheihna chuan Kum Sâng Rorêl chhûngin leilung pianken chaknate a thunun ang tih kan chiang thei a ni.

17. Pathian leh Krista kan entawn theih dân kawng khat chu eng nge ni?

¹⁷ Jehova leh Isua angin, leilung chhiatnate chu kan dang thei lo ngei mai a; mahse, tih theih ṭhenkhat erawh kan nei a ni. Engtin nge chu chu kan hman ang? Kawng khat chu, Thufingte 3:27 nunpuina a ni. (Chhiar rawh.) Kan unaute’n harsatna an tawh hunah, tîsa lamah te, rilru lamah te, leh thlarau lamahte kan thlamuanin kan ṭapui thei a. (Thuf. 17:17) Entîr nân, leilung chhiatna tâwkte kan ṭanpui thei a. Hurricane thlipuiin a in a nuai chhiat hnuah hmeithai pakhat chuan heti hian lâwmthu a sawi a ni: “Jehova inawpna pâwl chhûnga ka tel hi ka lawm tak zet a ni, tîsa lama ṭanpuina vâng chauh ni lovin, thlarau lamah pawh ṭanpuina ka dawn avângin,” tiin. Thlipuiin a in a nuaichhiat avânga beisei bo leh hrilhhai tak unaunu nula pakhat thusawi pawh hi chhinchhiah ang che. Ṭanpuina a dawn chuan, heti hian a sawi a: “Sawifiah theih rual a ni lo! Ka lâwm dân pawh ka sawi chhuak thiam lo . . . Ka lâwm e, Jehova!” tiin. Mi dangte mamawh tih tak zeta ngaihsaktu unaute zînga kan tel chu kan lâwm hle a. Kan lâwm lehzual nachhan chu, Jehova leh Isua Krista’n min ngaihsak tak zet hi a ni.

18. Thilmak ti tûra Isua chêttîrtu chungchângah engin nge kan rilru hneh?

¹⁸ Isua chuan a rawngbâwl chhûngin “Pathian thiltihtheihna” a nihzia a târ lang a. Mahse, Isua’n eng rilru put hmang nge a neih? A thiltihtheihna chu mi dangte rilru hneh nân emaw, ama hlâwk nân emaw a hmang ngai lo tih kan hmu a. Dik tak chuan, Isua thilmak tihte chuan mihringte a hmangaihzia a târ lang a ni. Chu chu a dawta thuziakah kan sawiho vang. (w15-E 06/15)