1. Bõe yĩng t’a Poll yeel tɩ Kirist “yaa Wẽnnaam pãnga”?

A ZEOVA tũnuga ne a Zezi Kirist n maan bũmb toor-toor n wilg t’a yaa pãn-kãseng soaba. A Zezi sẽn wa n be tẽngã zugã, a maana yel-soalem wʋsgo. B gʋlsa yel-solem-kãens kẽer Biiblã pʋgẽ, tɩ d tõe n karem tɩ keng d tẽebo. (Mat. 9:35; Luk 9:11) Vẽenega, a Zeova kõ a Zezi pãn-kãsenga, hal tɩ tʋm-tʋmd a Poll yeel tɩ Kirist “yaa Wẽnnaam pãnga.” (1 Kor. 1:24) La wãn to la yel-soalem nins a Zezi sẽn maanã tõe n naf tõndo?

2. Yel-soalem nins a Zezi sẽn maanã wilgda tõnd bõe?

² Tʋm-tʋmd a Pɩɛɛr yeelame t’a Zezi maana bõn-bãna, la yel-soalma. (Tʋʋ. 2:22) Yel-solem-kãens wilgda tõnd bõe? B wilgda a Zezi sẽn na n maan bũmb nins a naamã sẽn na n kaoos yʋʋm tusrã sasa wã. Wakat kãnga, a na n maana yel-soalem wʋsgo, tɩ naf neb nins fãa sẽn na n vɩɩmd tẽngã zugã. Sẽn paase, yel-soalem nins a sẽn maanã sõngda tõnd tɩ d bãng yẽ menga, la a Ba wã sẽn yaa Wẽnnaam ning buudã sõma. Sõs-kãngã pʋgẽ, d na n goma yel-soalem a tã  a Zezi sẽn maan yelle. D na n bãnga b sẽn tõe n naf tõnd to-to rũndã-rũndã, la beoog-daar me.

3. a) Bõe n kɩt t’a Zezi maan a pipi yel-solemdã? b) Kana yi-kãadmã sasa, wãn to la a Zezi wilg t’a yaa kõta?

³ A Zezi maana a pipi yel-solemdã Kana tẽngẽ wã, yi-kãadem kibs sasa. Yi-kãadmã sasa, rãamã wa n paoogame. D pa mi bũmb ning sẽn kɩt tɩ rãamã paoogã ye. La d miime tɩ woto ra tõe n yɩɩ yãnd wʋsg ne sẽn nan kẽ-b kãadmã. Bala, wakat kãnga, sãan sã n da wa f yiri, f segd n deeg-a-la sõma. A Zezi ma a Maari ra bee sẽn wa-b yi-kãadmã sʋka. A kosa a Zezi t’a maan bũmb n sõng sẽn nan kẽ-b kãadmã. Tõe tɩ yaa a sẽn da tagsd t’a Zezi tõe n maana yel-solemd n sõng-b yĩnga. Sɩd me, sãmbg kae t’a Maari ra bʋgsa bãngr-goam nins sẽn da gomd a biigã yellã zugu. Sẽn paase, a ra miime tɩ b na n bool-a lame tɩ “Sẽn-ka-to Biiga.” (Luk 1:30-32; 2:52) La yaa vẽeneg t’a Maari ne a Zezi fãa ra rat n sõnga sẽn nan kẽ-b kãadmã. Rẽ n so t’a Zezi maan yel-solemde, n kɩt tɩ koom na maan litr kobs lebg rãam. (Karm-y Zã 2:3, 6-11.) Ra yaa tɩlae t’a Zezi maan yel-solemdã bɩ? Ayo. Yaa nebã yell sẽn pak-a wã, n paas a sẽn dɩk a Ba wã togs-n-taar n yaa kõtã yĩng n kɩt t’a maan dẽ.

4, 5. a) A Zezi pipi yel-solemdã wilgda tõnd bõe? b) Yel-solemd ning a Zezi sẽn maan Kana wã wilgdame tɩ bõe n na n maan ka la bilfu?

⁴ A Zezi maana yel-solemde, tɩ rãam sẽn yaa noog sek nebã fãa. Bõe la rẽ wilgd tõndo? Wilgdame t’a Zeova ne a Zezi yaa kõtb meng-menga, la tɩ nebã yell sɩd pak-b lame. Yãmb we n mams n ges a Zeova sẽn yaa kõtã sẽn na n maan bũmb ning dũni-paalgã pʋgẽ wã. A na n ‘maana kibs buudã fãa yĩnga,’ tɩ nebã paam dɩɩb tɩ seke.—Karm-y Ezai 25:6.

⁵ Woto wilgdame tɩ ka la bilfu, a Zeova na n sõng-d lame tɩ d paam bũmb nins d sẽn sɩng n datã. Ned kam fãa na n paama ro-sõngo, la rɩɩb tɩ seke. D sã n tagsd bõn-sõma nins a Zeova sẽn na n wa kõ-dã yelle, pa noom-d sɩda?

6. A Zezi maana yel-soalmã n sõng ãnd dãmba, la wãn to la d tõe n dɩk a togs-n-taare?

⁶ A Zezi pa tol n maan yel-solemd a meng nafr yĩng ye. Tẽeg-y t’a Sʋɩtãan sẽn wa n yeel-a t’a kɩt tɩ kugã lebg burã, a zãgsame. (Mat. 4:2-4) La a maana yel-soalem ne yamleoog n sõng neb a taaba. Wãn to la d tõe n dɩk a togs-n-taare? A Zezi yeelame tɩ d segd n yɩɩ kõtba. (Luk 6:38) D sã n dat n wilg tɩ d yaa kõtba, d tõe n baoo rɩɩb n bool d tẽed-n-taas tɩ d naag taab n dɩ, la d sõs n keng taab raoodo. D leb n tõe n baoo sẽk tigsg poore, n sõng ned sẽn dat  sõngre. Wala makre, d tõe n sõnga saam-biig t’a segl a sõsga. Sẽn paase, d tõe n sõnga d tẽed-n-taag t’a koe-moonegã minim paase. D sã n maand d sẽn tõe fãa n sõngd neb a taabã, d rɩkda a Zezi togs-n-taar n yaa kõtba.

7. Dũni-kãngã sã n ketẽ, zu-loe-bʋg n pa na n sa?

⁷ Naong sẽn sɩng pa rũndã ye. A Zeova yeela Israyɛll nebã tɩ “naong rãmb na n zĩnda tẽngã pʋgẽ wakat fãa.” (Tõo. 15:11) Yʋʋm kobs loogr poore, a Zezi yeela woto: “Yãmb tara naong rãmb ne yãmb daar fãa.” (Mat. 26:11) A Zezi ra rat n yeelame tɩ naong rãmb na n zĩnda tẽngã zug wakat fãa bɩ? Ayo. A ra rat n yeelame bal tɩ dũni-kãngã sã n ketẽ fãa, naong rãmb me na n beeme. La yel-soalem nins a Zezi sẽn maanã wilgdame tɩ Wẽnnaam Rĩungã naam sasa, yɛlã na n toeemame. Nebã fãa na n paama rɩɩb tɩ seke. D sẽn mi woto wã pa kengd d raood sɩda?

8, 9. a) Bõe yĩng t’a Zezi maan yel-solemd n dɩlg neb tusa? b) Bõe yĩng t’a Zezi sẽn maan woto wã noom yãmba?

⁸ Yɩɩl-gʋlsdã yeela a Zeova woto: “Yãmb pukda y nugu, la bõn-vɩɩs fãa paamda bark tɩ seke.” (Yɩɩl 145:16) A Zezi sẽn wa n be tẽngã zugã, a rɩka a Ba wã togs-n-taare, n da sõngd neb nins sẽn wat a nengẽ wã. A ra pa maand woto n na n wilg bal t’a tara tõog ye. Yaa nebã yell sẽn sɩd ra pak-a wã yĩnga. Wala makre, tẽeg-y kibar ning sẽn be Matɩe 14:14-21 wã. (Karm-y-yã.) Neb kʋʋng n yi tẽns pʋsẽ n kẽn ne nao n babs a Zezi. (Mat. 14:13) Tõe tɩ zaabrã sẽn wa n ta wã tɩ kom n da tar a Zezi karen-biisã. La pa rẽ n da pak-b ye. B ra maanda yɩɩr kʋʋngã yĩnga. Bala, b ra nee vẽeneg tɩ nebã yaame, tɩ kom tar-b me. Rẽ n so tɩ b yeel a Zezi t’a bas nebã, tɩ b kẽng tẽn-kɩremsã n tɩ ra rɩɩbo. Bõe la a Zezi na n maane?

⁹ A Zezi rɩka bur a nu ne zĩm a yiib n dɩlg rap tus a nu, n paas pagb la kamba. Bõe yĩng t’a maan yel-solem-kãngã? Yaa a sẽn nong nebã n dat n sõng-bã yĩnga. A Zezi kõ-b-la rɩɩbã wʋsg me. Bala, kʋʋngã “rɩ n tɩgame.” Ra yaa sẽn na yɩl tɩ b paam pãng n tõog n tog soay n leb b zagsẽ wã. (Luk 9:10-17) Nebã fãa rɩɩme n tɩge, la b wʋka gɩrsã sẽn kellã n pid pet piig la a yiibu.

10. Bõe n na n maan ka la bilf tɩ naong pa le zĩndi?

¹⁰ Rũndã-rũndã, nanambsã sẽn yaa pʋ-lik rãmbã kɩtame tɩ neb milyõ-rãmb vɩ nimbãaneg pʋgẽ. Baa tõnd tẽed-n-taas kẽer meng pa paamd n dɩtẽ tɩ sekdẽ ye. La ka la bilfu, wẽn-sakdbã na n vɩɩmda dũni-paalg pʋgẽ, tɩ pʋ-lik la naong pa le beẽ ye. A Zeova sẽn yaa Wẽnnaam sẽn tõe fãa wã rat n sõnga nebã tɩ b paam bũmb nins b sẽn datã. A pʋlmame tɩ ka la bilfu, a na n kɩtame tɩ namsg buud fãa sa.—Karm-y Yɩɩl Sõamyã 72:16.

11. Bõe n kɩt tɩ y kɩs sɩd tɩ ka la bilfu, Kiristã na n sõnga ãdem-biisã dũniyã tɛk fãa? Rẽ kɩtame tɩ y rat n maan bõe?

¹¹ A Zezi sẽn wa n be tẽngã zugã, a maana yel-soalem yʋʋm a tã la pʋɩ-sʋka, Israyɛll soolmã pʋgẽ bala. (Mat. 15:24) La a naamã sẽn na n kaoos yʋʋm tusrã sasa, a na n tõog n sõnga ãdem-biisã dũniyã tɛk fãa. (Yɩɩl 72:8) Yel-soalem nins a Zezi sẽn maanã kɩtame tɩ d kɩs sɩd t’a tõe n sõnga tõndo, la t’a rat n sõng-d lame. Wãn to la d tõe n dɩk a togs-n-taare? Yaa sɩd tɩ d pa tõe n maan yel-soalem ye. La d tõe n baoo sẽk n moon koe-noogã ne  yẽesem, n wilg d taabã bõn-sõma nins Wẽnnaam sẽn pʋlem tɩ watẽ wã. D sẽn yaa a Zeova Kaset rãmbã, rẽ yaa bũmb d sẽn segd n maane. (Rom 1:14, 15) D sã n bʋgsd bũmb nins Kiristã sẽn na n maan ka la bilfã zugu, na n kɩtame tɩ d rat n wilg neb a taabã rẽ ne d sũur fãa.—Yɩɩl 45:2; 49:4.

12. Bõe yĩng tɩ d tõe n kɩs sɩd t’a Zezi mii tẽngã ne a bũmbã fãa sõma?

¹² Wẽnnaam sẽn wa n na n naan tẽngã la bũmb nins fãa sẽn be a zugã t’a Zezi ra bee a “sɛɛgẽ wa tʋʋm-mita.” (Yel. 8:22, 30, 31; Kol. 1:15-17) Rẽnd a Zezi mii tẽngã ne a bũmbã fãa sõma. A mi a sẽn na n maan to-to tɩ bõn-kãens naf ninsaalbã.

13, 14. Bõe n wilgd t’a Zezi tõe n kɩtame tɩ koomã, sobgã la tẽngã bũmb a taabã tũ a raabã?

¹³ A Zezi sẽn wa n be tẽng zugã, a wilgame tɩ Wẽnnaam kõ-a-la tõog t’a tõe n kɩt tɩ koomã, sobgã la tẽngã bũmb a taab tũ yẽ raabã. Wala makre, tẽeg-y bũmb ning a sẽn maane, sob-kãseng sẽn wa n dat n kɩt tɩ koomã rɩ a karen-biisã. (Karm-y Mark 4:37-39.) Biibl-mit a yembr wilga gɛrk gom-bil ning b sẽn lebg tɩ ‘sob-kãseng’ a Mark sebrã pʋgẽ wã võore, n yeel t’a bilgda sobg sẽn wat ne pãng wʋsgo. A bilgda saag sẽn kʋɩ n wat ne pãnga, n naag ne sobg la sa-tãse. Naoor wʋsgo, saag a woto loogr poor tɩ teedã fãa yaa zũna.

¹⁴ Mams-y yɛlã sẽn yɩ to-to wã. Ko-pɛmã ra wat n wẽeda koglgã, tɩ koomã kẽedẽ. Baa ne sobgã la sa-tãsã bʋrgã, n paas koglgã sẽn lengdã, a Zezi ket n gõeeme, bala, a yaa wʋsgo. La karen-biisã ra yɛɛsdame. Rẽ n so tɩ b nek a Zezi n yeel woto: “Tõnd dat n kiime!” (Mat. 8:25) Bõe la a Zezi maan-yã? A tik n yikame, n leng sobgã la a yeel mogrã woto: “Sĩndi, bas bʋʋre.” (Mark 4:39) Sobgã yõkame, la “zĩigã lebga sɩddd.” Woto pa wilgd t’a Zezi tõe n kɩtame tɩ koomã, sobgã la tẽngã bũmb a taabã tũ a raabã sɩda?

15. Bõe la a Zeova maan n wilg t’a tõe n kɩtame tɩ koomã, sobgã la tẽngã bũmb a taabã tũ a raabã?

¹⁵ Tõog ning a Zezi sẽn tarã yaa a Zeova n kõ-a. Rẽnd d tõe n kɩsa sɩd tɩ Wẽnnaam Sẽn-tõe-a-fãa wã tõe n kɩtame tɩ koomã, sobgã la tẽngã bũmb a taabã tũ a raabã. Ad makr a wãn sẽn wilgd rẽ. Sẽn deng a Nowe wakatẽ sa-kãsengã, a Zeova yeela woto: “Keta rasem a yopoe tɩ mam kɩt tɩ saag ni dũniyã zug rasem pis-naas wĩntoog ne yʋngo.” (Sɩng. 7:4) Yikr 14:21 me yeelame tɩ “Zu-soabã kɩtame tɩ sob-kãseng yi yaang n pãrg koomã.” Sẽn paase, Zonas 1:4 yeelame: “Zu-soabã kɩtame tɩ sob-kẽeng yik koomã zug hal tɩ koglgã rat n sãame.” D sẽn mi t’a Zeova tõe n kɩtame tɩ koomã, sobgã la tẽngã bũmb a taabã tũ a raabã kengda d raoodo. Wilgdame tɩ dũni-paalgã pʋgẽ, sabab-wẽng pa na n tol n zĩnd ye.

16. Bõe yĩng tɩ d sã n tags pãng ning a Zeova la a Zezi sẽn tarã yell bɩ d yam gãe bãane?

¹⁶ D sã n tags pãng ning a Zeova la a Zezi sẽn tar n tõe n kɩt tɩ tẽngã bũmbã fãa tũ b raabã yelle, d yam pa gãe bãan sɩda? D tõe n kɩsa sɩd t’a Zezi naamã sẽn na n kaoos yʋʋm tusrã sasa, bãan na n zĩnda dũniyã gill zugu. Sabab-wẽng baa a ye pa na n zĩnd ye. Sẽn na n vɩɩmd-b tẽngã zugã pa na n le yɛɛsd tɩ sob-kãsenga, sa-kãseng la sunami wall tẽn-digimdg na wa n pogl ned wall kʋ  ned ye. Bala, wakat kãnga, “Wẽnnaam yir” na n zĩnda nebã sʋka. (Wil. 21:3, 4) D tõe n kɩsa sɩd t’a Zeova na n kõ a Zezi tõogo, t’a kɩt tɩ tẽngã bũmb fãa tũ a raabã a naamã sasa.

17. Bõe la d tõe n maan n dɩk Wẽnnaam la Kiristã togs-n-taare?

¹⁷ Yaa sɩd tɩ tõnd pa tõe n kɩt tɩ sabab-wẽng ra wa ye. Yaa a Zeova la a Zezi bal n tõe rẽ. La bũmb n be tõnd sẽn tõe n maane. D tõe n tũu Yelbũn 3:27 saglgã. (Karm-y-yã.) D tẽed-n-taag sã n wa tar zu-loɛɛga, d tõe n maana bũmb takɩ n sõng-a, n bels-a la d keng a raoodo. (Yel. 18:24) Wala makre, sabab-wẽng sã n mi n maane, d tõe n sõnga d tẽed-n-taas nins sẽn be yellã pʋgẽ wã. Saam-bi-poak a ye sẽn yaa pʋg-kõor paama sõngr a woto buudu. Sob-kãseng n sãam a roogã, t’a tẽed-n-taasã sõng-a n manege. A yeelame tɩ yẽ sẽn paam n be a Zeova siglgã pʋgẽ wã noom-a-la hal wʋsgo. Pa b sẽn sõng-a ne a roogã yĩng bal ye. Sẽn yɩɩd fãa, yaa b sẽn keng a tẽebã yĩnga. Sa-kãseng n da sãam saam-bi-poak sẽn pa kẽ kãadem doogo, t’a pa mi a sẽn maandg ye. Saam-biisã tɩ sõng-a lame n maneg a roogã. Rẽ poore, a yeela woto: “Mam pa tol n tõe n bilg m sũurã sẽn noom to-to wã ye.” A paasame tɩ yẽ sẽn tõe bal yaa a pʋʋs a Zeova barka. Vẽenega, d sẽn paam n tar saam-biis sẽn wilgd tɩ b taabã yell sɩd pak-b lame wã noom-d lame. La sẽn noom-d n yɩɩd yaa d sẽn mi t’a Zeova la a Zezi Kirist geta d yellã.

18. Bõe n noom yãmb yel-soalem nins a Zezi sẽn maanã pʋgẽ?

¹⁸ A Zezi sẽn wa n be tẽngã zugã, a maana bũmb toor-toor n wilg t’a yaa “Wẽnnaam pãnga.” La a zɩ n maan bũmb sẽn na yɩl tɩ nebã ges-a, wall a meng nafr yĩng ye. Yel-soalem nins a sẽn maanã fãa yaa a sẽn nong nebã n dat n sõng-bã yĩnga. D na n maneg n goma rẽ yell sõsg ning sẽn pʋgdã pʋgẽ.