1. Omokonda yatyi Paulu apopila okuti “Kristu epondolo lia Huku”?

 JEOVA waundapesile Jesus Kristu opo alekese epondolo liae mononkhalelo mbumwe mbuhuvisa. Etyi Jesus eli pano pohi, walingile omahuviso. Tupondola okutanga omahuviso amwe Mombimbiliya, apondola okupameka ekolelo lietu. (Mateus 9:35; Lucas 9:11) Tyotyili, Jeova waavelele Jesus epondolo enene, iya apostolu Paulu wapopia okuti: “Kristu epondolo lia Huku.” (1 Coríntios 1:24) Mahi oñgeni omahuviso a Jesus etukalesa?

2. Oityi tupondola okulilongesila komahuviso a Jesus?

² Apostolu Paulu wapopia okuti Jesus walingile “omahuviso.” (Atos 2:22) Oityi omahuviso oo etulongesa? Etulongesa etyi Jesus makalinga mokueenda Kuoutumini wae Womanima Ovityita Ekwi. Momuvo oo, makalinga omahuviso omanene makaetela ouwa ovanthu aveho kombanda yohi.Tupu omahuviso oo, etukuatesako  okunoñgonoka ovituwa via Jesus novia Tate yae. Monthele ei, matupopi omahuviso etatu a Jesus, iya matulilongesa oñgeni apondola okutukalesa hono, nokomutue.

3. (a) Omokonda yatyi Jesus alingilile ehuviso liae liotete? (b) Oñgeni Jesus alekesile okuti una otyali mo Kanaa?

³ Jesus walingile ehuviso liae liotete motyipito mepundaumbo lio Kanaa. Katutyii omokonda yatyi, mahi ankho mutupu ovinyu pala ovaenda aveho veyamo. Otyo ankho tyipondola okukundisa ovalinepi, mokonda ankho vena okutambula nawa ovaenda. Me ya Jesus, Maliya, nae ankho wakongwa. Okuti ankho Maliya waita ku Jesus opo evekuateseko mokonda ankho utyii okuti una epondolo liokutyilinga? Pahe ankho Maliya upondola okusoka komaulo aeho konthele yomona wae, iya ankho utyii okuti maihanwa okuti “Omona wo Mukulami.” (Lucas 1:30-32; 2:52) Otyo tyayandyuluka nawa okuti Maliya na Jesus ankho vahanda okukuatesako ovalinepi. Ngotyo, kehuviso Jesus atyitula omaande ena onolitulu 380 akala “ovinyu ikahi nawa.” (Tanga João 2:3, 6-11.) Okuti ankho Jesus wapangale okulinga ehuviso olio? Au. Wetyilinga mokonda ankho wesuka novanthu, iya ankho uhetekela Tate yae una otyali.

4, 5. (a) Ehuviso lia Jesus liotete litulongesa tyi? (b) Oityi ehuviso liomo Kanaa litulongesa konthele yetyi matyiya komutwe?

⁴ Jesus kehuviso waavelele ovinyu ikahi nawa ovanthu ovanyingi. Okuti wetyimona oityi ehuviso olio litulongesa? Litulongesa okuti Jeova na Jesus kavanumina, mahi ovakuatyali. Ehuviso olio litukalesa nonthumbi yokuti vesuka unene netyi ovanthu velitehelela. Tupu litulekesa okuti Jeova makaundapesa epondolo liae opo aavele okulia okunyingi ovanthu mouye omupe, ponomphangu mbatyo ambuho.—Tanga Isaías 25:6.

⁵ Soka kuetyi! Apa katutu Jeova metuavela ovipuka aviho tuesuka navio. Ovanthu vatyo aveho mavakakala no nondyuo onongwa, nokulia kukahi nawa. Tupandula unene tyina tusoka kovipuka oviwa Jeova meketuavela otyali Momphangu Yombembua pano pohi.

6. Oñgeni Jesus apeho aundapesa epondolo liae, iya oñgeni tupondola okumuhetekela?

⁶ Jesus kaundapesile epondolo liae pala ouwa wae muene. Soka kuetyi tyamonekele-po puetyi Eliapu lialolele Jesus opo atyitule omamanya akale onombolo. Jesus ehetavela okuundapesa  epondolo liae pala ouwa wae muene. (Mateus 4:2-4) Mahi Jesus ankho uhanda okuundapesa epondolo liae pala okukuatesako vakuavo. Oñgeni tupondola okuhetekela otyituwa tyae tyokuhakala nelungavi? Jesus wapopia okuti tupondola “okukala ovakuatyali.” (Lucas 6:38) Tupondola okulinga ngotyo pokukonga vakuetu opo tuye okulia navo meumbo lietu. Tupu tulinga ngotyo pokupameka ovakuatate konthyulilo yeliongiyo, nopokutehelela nawa tyina omukuatate alinga elongomona. Ine hamwe okukuatesako vakuetu opo vakale ovaivisi ovanongo. Tuhetekela otyali tya Jesus tyina tukuatesako vakuetu muetyi tuvila.

7. Otyitateka patyi matyitualako mouye wa Satanasi?

⁷ Oluhepo hatyitateka otyipe. Jeova wapopilile ova Isilayeli okuti “apeho mamukala ovahepi motyilongo.” (Deuteronômio 15:11) Etyi palamba omanima otyita Jesus apopi okuti: “Onwe apeho mamukala novahepi pokati kenyi.” (Mateus 26:11) Okuti etyi Jesus apopia tyilekesa okuti apeho mapakala ovanthu vahepa pano pohi? Au, ankho uhanda okupopia okuti mouye uno wa Satanasi apeho mamukala oluhepo. Otyo tyelikalela unene netyi matukakala mouye omupe! Pomuwo opo, kamakukakala vali oluhepo. Aveho mavakakala nokulia, iya aveho mavakahambukwa!

8, 9. (a) Omokonda yatyi Jesus aavelele okulia ovanthu ovanyingi? (b) Oñgeni ove ulitehelela mokonda yehuviso olio?

⁸ Omuhoneki wo no salmu wapopila Jeova okuti: “Ove wikula eke liove, iya ohambukiswa ovipuka aviho vina omuenyo.” (Salmo 145:16) Puetyi eli pano pohi, Jesus wahetekelele nawa Tate yae iya ankho ukuatesako vakuavo. Jesus kalingile ovipuka ovio opo alekese okuti una epondolo. Jesus tyili-tyili ankho wesuka novanthu. Matulilongesa Mateus 14:14-21. (Tanga.) Ovanthu ovanyingi vaendelele pohi okulandula Jesus momapundaumbo. (Mateus 14:13) Etyi kuahimbika okunthikovela, ovalongwa avasukalala novanthu ankho vaponwa nokualiwa nondyala. Ngotyo avaiti Jesus apopile ovanthu ovo opo vakelilandele okulia. Oityi Jesus alinga?

⁹ No nombolo ononthano no nombisi onombali, Jesus aavela okulia ovalume 5.000 tyahavalula ovakai novana. Omokonda yatyi Jesus alingila ehuviso olio? Omokonda uhole ovanthu iya ankho wesuka navo. Jesus walingile okulia okunyingi mokonda ovanthu aveho “valile avekuta.” Okulia valia kueveavelele ononkhono vesukisa opo valinge oungendi wokukondoka komaumbo avo. (Lucas 9:10-17) Etyi aveho vamana  okulia, ovalongwa avaongolola okulia kuahupapo aveyulisa onosesu 12.

10. Apa katutu oityi matyikamoneka noluhepo?

¹⁰ Mokonda yotyipululu nonkhi yovatumini, ovanthu ovanyingi vahepa. Alo umwe vamwe povakuatate vetu, vetupu etyi valia. Mahi apa katutu, ovanthu vetavela Jeova mavakakala mouye muhena vali onkhi notyipululu. Jeova o Huku yepondolo aliho, iya uhanda okukafuisapo omahando ovanthu aveho. Walaa okumananako ononkhumbi apa katutu!—Tanga Salmos 72:16.

11. Omokonda yatyi tuna onthumbi yokuti Kristu apa katutu makaundapesa epondolo liae pala ovanthu aveho vekahi kombanda yohi? Mokonda yotyo, oityi ove uhanda okulinga?

¹¹ Etyi Jesus ekahi pano pohi, walingile omahuviso povilongo vimwe momanima vala etatu notyihupe. (Mateus 15:24) Mokonda Ohamba, Jesus makakuatesako ovanthu aveho mokueenda Kuomanima Ovityita Ekwi. (Salmos 72:8) Omahuviso a Jesus etuavela onthumbi yokuti uhanda ukuundapesa epondolo liae pala ouwa wetu. Onthue tutupu epondolo liokulinga omahuviso, mahi oityi tupondola okulinga? Tupondola okuundapesa omuwo wetu no nonokhono mbetu, opo tupopile vakuetu ovipuka oviwa Ombimbiliya yalaa. Mokonda Tunombangi mba Jeova otyo otyilinga tyetu. (Romanos 1:14, 15) Tyina tusokolola kuetyi Kristu makalinga apa katutu, tukala nondundo yokutyipopila vakuetu.—Salmos 45:1; 49:3.

12. Omokonda yatyi tuna onthumbi yokuti Jesus wii nawa oñgeni ohi yundapa?

¹² Etyi Huku atunga ohi novipuka aviho vikahimo, Jesus ankho opo “ekahi ngomesene yovilinga.” (Provérbios 8:22, 30, 31; Colossenses 1:15-17) Ngotyo Jesus wii nawa oñgeni ohi yatungwa. Wii nawa oñgeni tyiundapa ovipuka vikahi pano pohi.

13, 14. Popia ongeleka ilekesa okuti Jesus upondola okuyunga ononkhono mbohi.

¹³ Etyi Jesus ankho ekahi pono pohi, walekesa okuti una epondolo lia Huku etyi atuliya ononkhono mbohi. Mongeleka, soka oñgeni Jesus atuliya omphepo. (Tanga Marcos 4:37-39.) Omunongo umwe wapopia okuti, ondaka yo Gregu yahangununwa okuti “omphepo” momukanda wa Marku, ihangununa otyipepe otyinene ine epuku-puku. Ipopia omphepo onene yeya nomakaka omanthikovei, nomitetanena, nombila onene yomamanya. Tyina tyameyapo ovipuka aviho viteketeswa. Apostolu Mateus wapopia otyipepe otyo otyinene okuti “omphepo onene.”—Mateus 8:24.

¹⁴ Nkhele soka kuetyi: Omanyonda elunga aehimbika okuveta mowato, aehimbika okuitahela nthele na nthele.  Namphila owato ukahi nokuviela iya ukahi nokulityinda-tyinda, Jesus ankho ulele mokonda waponua. Mahi ovalongwa ankho vawela owoma, avakapahulapo Jesus avati: “Tuhungi kokunkhia!” (Mateus 8:25) Oityi Jesus alinga? Wapindukapo apopila omphepo nelunga okuti: “Wahaviele! Tula!” (Marcos 4:39) Omphepo aitalama iya “elunga alitulu.” Oyo ongeleka imwe onene ilekesa okuti Jesus una epondolo liokuyunga ononkhono mbohi!

15. Oityi tyilekesa okuti Jeova utyivila okuyunga ononkhono mbohi?

¹⁵ Epondolo lia Kristu liatunda ku Jeova, iya onthue tutyii okuti Huku Wepondolo Aliho utyivila okuyunga ononkhono mbohi. Mongeleka, etyi Ombila onene yeheneye, Jeova wapopia okuti: “Mononthiki vala epandu-vali, mandyilokesa ombila mononthiki 40 novinthiki 40.” (Gênesis 7:4) Tupu, Êxodo 14:21 yati: “Jeova wakondola elunga nomphepo yatundilila koutakelo.” Iya Jonas 1:4 yati: “Jeova waeta omphepo onene melunga, iya akukala otyipepe tyimwe otyinene melunga iya owato auhimbika okuenda nokohi.” Tyituhambukiswa okunoñgonoka okuti mouye omupe, Jeova makayunga ononkhono mbohi.

16. Omokonda yatyi tyitupameka okunoñgonoka okuti Jeova na Jesus vena epondolo liokuyunga ononkhono mbohi?

 ¹⁶ Tyitupameka okunoñgonoka okuti Jeova na Jesus vena epondolo liokuyunga ononkhono mbohi. Mokueenda Kuomanima Ovityita Ekwi Outumini wa Kristu, ovanthu aveho vakala pano pohi mavakayovoka. Nawike vali mekeliveta ine okuipawa nomitetanena, novinimawe novikuavo vali. Kamatukakala nowoma notyiponga natyike, mokonda “Ekaka lia Huku” malikala novanthu! (Revelação 21:3, 4) Onthue tupondola okukala nonthumbi yokuti Jeova maavela Jesus epondolo liokuyunga ononkhono mbohi mokueenda Kuomanima Ovityita Ekwi Woutumini wa Kristu.

17. Onkhalelo patyi hono tupondola okuhetekela Huku na Kristu?

¹⁷ Tyotyili, onthue katutyivili okulityilika kovinimawe. O Jeova vala na Jesus vapondola okuvityilika. Mahi pena etyi onthue tupondola okulinga. Tupondola okulinga etyi tyipopia Provérbios 3:27. (Tanga.) Tyina ovakuatate vetu vamona ononkhumbi, onthue tuvekuatesako muetyi vesukisa nokuvepameka. (Provérbios 17:17) Mongeleka, tupondola okuvekuatesako tyina pamalambe otyiponga. Omuhepe umwe wahanyenwa ondyuo yae notyinimawe wapopia okuti: “Napandula unene eongano lia Jeova mokonda liankhuatesako muetyi nesukisa, nokupameka oupanga wange na Jeova.” Omphange umwe wahanepelue wasoyele unene etyi ondyuo yae yahanyuapo. Etyi ovakuatate vapindulapo ondyuo yae, wapopia okuti: “Tyanthyuvisile unene! Hityivili okupopia ehambu enene ndyinalio.” Ayawisako okuti: “Napandula Jeova!” Tuahambukwa unene novakuatate vetu nonomphange mokonda yesuko vena navakuavo. Mahi tupandula vali unene Jeova na Jesus Kristu esuko vena nonthwe.

18. Oityi tyikuhambukiswa konthele yomahuviso a Jesus?

¹⁸ Mokueenda kuovilinga viae viokuivisa, Jesus walekesile okuti una “epondolo lia Huku.” Mahi nalumwe aundapesile epondolo liae opo ahuvise vakuavo ine pala ouwa wae muene. Jesus waundapesile epondolo liae opo alinge omahuviso mokonda ankho uhole ovanthu. Matulilongesa konthele yomahuviso a Jesus monthele mailandulako.