1. Ahabw’enki Paulo yaagizire ngu ‘Kristo, n’amaani ga Ruhanga’?

YEHOVA akooreka amaani ge arikukoresa Yesu Kristo omu miringo erikutangaaza. Ebitabo bina eby’engiri nibigamba aha by’okutangaaza ebimwe ebi Kristo yaakozire ebirikubaasa kuhamya okwikiriza kwaitu. Kandi naabaasa kuba yaakozire eby’okutangaaza ebindi bingi. (Mat. 9:35; Luk. 9:11) Buzima amaani ga Ruhanga gakareeberwa omu bi Yesu yaakozire. Egi niyo nshonga ahabw’enki entumwa Paulo yaayetsire “Kristo, amaani ga Ruhanga.” (1 Kor. 1:24) Kwonka, eby’okutangaaza ebi Yesu yaakozire nibitukwataho bita?

2. Nitwegyera ki aha by’okutangaaza ebi Yesu yaakozire?

² Entumwa Petero akagira ngu Yesu akakora ‘eby’okutangaaza.’ (Byak. 2:22) Eby’okutangaaza ebi Yesu yaakozire obu yaabaire ari omu nsi, bikaba nibyoreka emigisha mingi ei turaatungye ku araabe naategyeka ensi. Bikaba nibyoreka eby’okutangaaza ebi Yesu araije kukora omu nsi ensya yoona. Kandi eby’okutangaaza ebyo nibituhwera kumanya gye emitwarize ya Yesu n’eya Ishe. Ka tushwijume eby’okutangaaza bimwe ebi Yesu yaakozire tureebe oku birikutukwataho hati n’omu biro by’omumaisho.

3. (a) Ahabw’enki Yesu yaakozire eky’okutangaaza ky’okubanza? (b) Omuri Kaana Yesu akooreka ata ngu n’efura?

³ Obu Yesu yaabaire ari aha bugyenyi omuri Kaana eya Galilaaya nibwo yaakora eky’okutangaaza ky’okubanza. Abantu abaizire aha bugyenyi nibabaasa kuba baabaire bari baingi kukira abu baabaire beetsire. Ekyo nikibaasa kuba nikyo kyareeteire viinyo kuhwaho. Mariamu nyina Yesu nawe akaba ari omu bugyenyi obwo. Kumara emyaka mingi, naabaasa kuba yaabaire naateekateeka aha bunabi obwabaire nibukwata aha mwana we, ou yaabaire naamanya ngu naija kwetwa “Omwana wa Rukira-boona.” (Luk. 1:30-32; 2:52) Mbwenu shi Mariamu akaba naamanya ngu Yesu aine amaani agu yaabaire atakoorekire? Ekirikweyoreka butunu, n’okugira ngu aha bugyenyi obwo, Mariamu na Yesu bakasaasibwa abagore abo abasya kandi bakaba nibenda kubahwera kutahemuka. Yesu akaba naamanya ngu obufura n’ekintu kikuru. Akakora eky’okutangaaza yaahindura rita 380 z’amaizi zarugamu “viinyo nungi.” (Shoma Yohaana 2:3, 6-11.) Mbwenu shi Yesu akaba aine kukora eky’okutangaaza eki? Ngaaha. Akakikora ahabw’okufayo aha bantu kandi akaba naatooreza Ishe omu kuba efura.

4, 5. (a) Nitwega ki aha ky’okutangaaza eki Yesu yaabandize kukora? (b) Eky’okutangaaza ekyabaire omuri Kaana nikitwegyesa ki aha biro by’omumaisho?

⁴ Omu ky’okutangaaza eki, Yesu akakora viinyo nungi nyingi erikumara abantu boona. Waayetegyereza eki turikwegyera aha ky’okutangaaza eki? Yesu okwikiriza kukora eky’okutangaaza eki, nikitwegyesa ngu we na Ishe nibatwara enyehurira z’abantu nka nkuru. Omwana na Ishe boona n’efura. Teekateeka aha ku Yehova arikwija kukoresa amaani ge mu nsi ensya kukorera “amahanga goona” obugyenyi bw’ebishaju.—Shoma Isaaya 25:6.

⁵ Kiteekateekyeho! Obwire buri haihi kuhika obu buri omwe araatungye eby’okurya birikumara n’oburaaro burungi, ahakuba buri muntu naija kutunga okumarwa. Ka tugirire ekihika ebintu birungi bingi ebi Yehova araatuhe omu Paradiso.

6. Yesu akakoresa amaani ge kuhwera baahi, kandi nitubaasa kumutooreza tuta?

⁶ Omuregi ku yaategire Yesu ngu ahindure amabaare eby’okurya, Yesu akanga kukoresa amaani ge kwigutsa ebyetengo bye. (Mat. 4:2-4) Kwonka akakoresa amaani ge kufayo aha byetengo by’abandi n’okubiigutsa. Nitubaasa kutooreza tuta Yesu tukooreka ngu nitufayo aha bandi? Akahiga abaheereza ba Ruhanga kuguma ‘nibaha’ abandi. (Luk. 6:38) Nitubaasa kuba efura aha bandi turikubeeta omu ka yaitu kurya nabo eby’okurya by’omubiri n’eby’omwoyo. Nitubaasa n’okukoresa gye obwire bwaitu bwanyima y’enteerane kuhwera abandi abarikuba baine eki barikwetenga, nk’okuhurikiza ow’eishe-emwe yaaba naayegyeza omu  rubazo rwe. Kandi nitubaasa kuteeraho kuhwera abarikuba nibeetenga obuhwezi omu kubuurira. Nitworeka ngu nitutooreza Yesu twafayo kuhwera abandi omu by’omwoyo n’omu by’omubiri nk’oku turikubaasa.

7. Niki ekirikwija kugumaho ensi egi embi yaaba ekiriho?

⁷ Obworo butwireho. Yehova akagambira Abaisraeli ngu abooro tibarihwa mu nsi yaabo. (Bir. 15:11) Ku haahingwireho obwire, Yesu akagira ati: “Ahabw’okuba abooro mutuura nabo obutoosha.” (Mat. 26:11) Mbwenu shi Yesu akaba naamanyisa ngu abooro nibaija kugumaho omu nsi ebiro byona? Ngaaha, akaba naamanyisa ngu ensi egi embi yaaba ekiriho nihaija kugumaho abooro. N’ahabw’ekyo, nikigaruramu amaani kumanya ngu eby’okutangaaza ebi Yesu yaakozire bikaba nibyoreka ebirungi ebi Obukama buraareete, obwo twena twine eby’okurya birikumara kandi tumazirwe!

8, 9. (a) Ahabw’enki Yesu yaakozire eky’okutangaaza eky’okuriisa abantu baingi? (b) Niki ekirikukushemeza aha ky’okutangaaza eki?

⁸ Omuhandiiki wa Zaaburi akagamba ahari Yehova ati: “Oshashaanura engaro zaawe, ohaazya ekintu kyona ekihuriire ebi kirikwetenga.” (Zab. 145:16) “Kristo, amaani ga Ruhanga,” arikutooreza Ishe, butoosha akaba ashashaanura engaro ze aha abakuratsi be ebi barikwetenga. Akaba atarikworeka ngu aine amaani kwonka, kureka akaba naayoreka ngu naafayo n’aha bandi. Ka tushwijume ebiri omu Matayo 14:14-21. (Kishome.) Abeegi ba Yesu bakaija kugaaniira nawe ebirikukwata aha by’okurya. Nabo bakaba baine enjara kandi bakaba nibafayo n’aha bantu nyamwingi abaizire aha bigyere bakuratiire Yesu kuruga omu tauni. (Mat. 14:13) Akaba naija kukora ki?

⁹ Yesu akariisa abashaija nka 5000 n’abakazi n’abaana, arikukoresa eby’enyanja bibiri n’emigaati etaano. Buzima torikushemererwa munonga ku orikuteekateeka aha ku Yesu yaakoreise amaani ge kugirira amaka embabazi otwariiremu n’abaana? Abantu bakarya “baahaaga.” Eki nikyoreka ngu hakaba hariho eby’okurya birikumara. Yesu akaha abantu eby’okurya abyabahaire amaani g’okugyenda orugyendo ruraingwa kugarukayo owaabo. (Luk. 9:10-17) Kandi ebyatsigaireho bikaijuza ebiibo 12!

10. Niki ekiraabeho aha bikwatiraine n’obworo?

¹⁰ Omu bunaku obu abantu nyamwingi tibarikutunga ebi barikwenda ahabw’obutegyeki bw’abantu abarikweyendeza. Nangwa n’obu ab’eishe-emwe abamwe baraabe baine eby’okwebaisaho, kwonka ‘tibamazirwe’ gye. Beitu obwire buri haihi kuhika obu abantu abarikworobera Ruhanga baraatuure omu nsi etarimu bworo n’obutari buringaaniza. Ku ogire ngu oine obushoboorozi tiwaakubaasize kwigutsa ebyetengo by’abantu? Ruhanga ow’Obushoboorozi bwona aine amaani n’ekihika ky’okukora ekyo omu bwire bwa haihi. Buzima nihaija kubaho oburuhuuko!—Shoma Zaaburi 72:16.

11. Ahabw’enki noohamya ngu Kristo ari haihi kukoresa amaani ge kuhwera abantu omu nsi yoona, kandi ekyo nikikuhiga kukora ki?

¹¹ Obu Yesu yaabaire ari omu nsi, akabuurira omu bicweka bitari bingi kumara emyaka eshatu n’ekicweka yonka. (Mat. 15:24) Kwonka hati obu ari Omugabe w’ekitiinisa, obutegyeki bwe nibwija kuba obw’ensi yoona. (Zab. 72:8) Eby’okutangaaza ebi Yesu yaakozire nibihamya ngu aine amaani n’ekihika ky’okukoresa amaani ge kutuhwera. N’obu turaabe tutarikubaasa kukora eby’okutangaaza, nitubaasa kuhwera abantu kwetegyereza ebiri omu Kigamba kya Ruhanga. Obunabi bw’omu Baibuli nibutuhwera kumanya ngu ebiro by’omumaisho nibiija kuba birungi. Mbwenu shi obu Abajurizi  ba Yehova turikumanya ebiraabeho omu biro by’omumaisho, titurikwetegyereza ngu twine eibanja ry’okugambiraho abandi? (Rom. 1:14, 15) Okuteekateeka munonga ahari eki, nikituhiga kugambira abandi amakuru marungi agarikukwata aha Bukama bwa Ruhanga.—Zab. 45:1; 49:3.

12. Ahabw’enki nituhamya ngu Yesu naayetegyereza gye oku ebiri omu nsi birikukoragana?

¹² Ruhanga akahanga ensi n’ebigirimu byona, ari n’Omwana we omwe nyamunegyere aha rubaju rye ‘nk’omukozi mukuru.’ (Enf. 8:22, 30, 31; Kol. 1:15-17) N’ahabw’ekyo, naayetegyereza gye oku ebiri omu nsi birikukoragana. Naamanya kukoresa gye eby’obutungi ebiri omu itaka kandi naija kureeba ngu buri omwe yaahikwa.

13, 14. Ha eky’okureeberaho kworeka oku Kristo aine obushoboorozi aha maani g’obuhangwa.

¹³ Obu Yesu yaabaire ari omu nsi, akooreka ngu niwe ‘maani ga Ruhanga’ arikucureeza amaani g’obuhangwa. Teekateeka aha ku yaacureerize eihunga eryabaire riri ery’akabi aha beegi be. (Shoma Mako 4: 37-39.) Omuhandiiki omwe akagira ati: “Ekigambo ky’Orugriika [“eihunga” ekirikukoresibwa omuri Mako 4:37] nikimanyisa eihunga ry’amaani nari eshato. Tikirikumanyisa omuyaga ogurikuhuuha mpora kumara akiire kakye . . . kureka eihunga eririkuhuuha n’amaani kandi eririmu enkuba n’enjura y’amaani ririkukumbagaza n’ebintu.” Ebiri omu Matayo nibigamba aha ihunga eri, ‘nk’eihunga ry’amaani.’—Mat. 8:24.

¹⁴ Teekateeka aha mbeera egi: Kristo aruhire ahakuba yaaruga kubuurira. Ebingonzi biriyo nibizongoza obwato n’amaizi nigeeshuka omu bwato. Kwonka, n’obu amaizi garaabe nigahoorera munonga n’eihunga riri ery’amaani, Yesu yaaguma abyami. Omubiri gwe gukaba nigwenda kuhuumuraho. Abeegi be bakaba batiinire munonga kandi bakamusisiimura barikucura bati: “Tujune, twafa.” (Mat. 8:25) Yesu aimuka araagiira eihunga n’enyanja ati: “Reka, cureera!” reero eihunga ryacureera. (Mak. 4:39) Yesu akaragiira omuyanga n’enyanja byacureera kandi byaguma bicureire. Ekyarugiremu? “Haabaho obucureera bwingi.” Buzima Yesu akooreka ngu aine amaani!

15. Ruhanga ayorekire ata ngu aine obushoboorozi bw’okucureeza amaani g’obuhangwa?

¹⁵ Yehova niwe bukomooko bw’amaani ga Kristo, n’ahabw’ekyo nituhamiza kimwe ngu Ruhanga ow’Obushoboorozi bwona aine obushoboorozi aha maani g’obuhangwa. Teekateeka aha by’okureeberaho ebi. Omwegyemure gutakabaireho Yehova akagira ati: “Ebiro mushaju ku biraahwe, niinyija kugwisa enjura aha nsi okumara ebiro makumi ana, nyomushana na nyekiro.” (Kut. 7:4) Kandi Okuruga 14:21, nihagira ngu Yehova akareeta “omuyaga mwingi ogw’oburugwa-izooba.” Kandi omuri Yona 1:4 nihooreka ngu Yehova akoohereza “omuyaga mwingi aha nyanja, enyanja yaagira ebingonzi bingi, emeeri yaayenda kusheenyagurika.” Nikituhuumuriza kumanya ngu Yehova naabaasa kucureeza amaani g’obuhangwa. Hatariho kubanganisa, ebiro by’omumaisho eby’ensi egi nibiija kuba birungi.

16. Ahabw’enki nikituhuumuriza kumanya ngu Omuhangi waitu n’Omwana we omujigaijo baine obushoboorozi aha maani g’obuhangwa?

¹⁶ Ka nikigaruramu amaani kuteekateeka aha maani g’Omuhangi waitu ‘n’omukozi mukuru.’ Ku baraate omutima gwabo gwona aha nsi kumara emyaka 1,000, abantu boona nibaija kuba baine oburinzi. Tiharikwija kugaruka kubaho bihikiirizi. Omu nsi ensya nitwija kuba tutakitiina eihunga nka  tayifuuni, tsunami, nari emitsisa. Buzima nikigaruramu amaani okumanya ngu tiharikwija kubaho ebihikiirizi kwita abantu nari kubamuzya, ahakuba “eihema rya Ruhanga [niriija kuba] riri omu bantu”! (Kush. 21:3, 4) Nituhamya ngu amaani ga Ruhanga agaayorekirwe omuri Kristo nigaija kucureeza amaani g’obuhangwa omu butegyeki bw’emyaka rukumi.

17. Ni mu muringo ki gumwe ogu turikubaasa kutoorezamu Ruhanga na Kristo?

¹⁷ Itwe titurikubaasa kuzibira ebihikiirizi kubaho nka Yehova na Yesu, kwonka haine amaani agu twine. Nitugakoresa tuta? Omuringo gumwe ogu turikubaasa kugakoresa nookugyendera aha biri omu Enfumu 3:27. (Kishome.) Ab’eishe-emwe bagyenzi baitu baatunga oburemeezi nitubahuumuriza omu by’omwoyo n’omu by’omubiri. (Enf. 17:17) Nk’eky’okureeberaho, nitubaasa kubahuumuriza baahikwaho ebihikiirizi. Omufaakazi omwe akasiima obuhwezi obwamuhairwe bwanyima y’eihunga kushiisha enju ati: “Ninsiima munonga ekibiina kya Yehova ahabw’obuhwezi obu naatungire omu by’omwoyo n’omu by’omubiri.” Kandi munyaanyazi-itwe omwe otashwairwe akeereeba nk’otaine kihwera bwanyima y’eihunga kushiisha enju ye. Ku yaatungire obuhwezi akagira ati: “Eki kyandenga! Tindikubaasa kworeka gye oku ndikwehurira . . . Yebare Yehova!” Nitushemererwa okureeba ngu turi bamwe aha b’eishe-emwe abarikufayo ahari bagyenzi baabo. Kandi ekirikukira kutureetera okushemererwa n’okugira ngu Yehova na Yesu Kristo buzima nibafayo aha bantu.

18. Niki ekirikushemeza aha kigyendererwa kya Yesu eky’okukora eby’okutangaaza?

¹⁸ Yesu omu buheereza bwe akooreka ngu niwe ‘maani ga Ruhanga.’ Kwonka shi Yesu akaba aine kigyendererwa ki? Yesu tarakoreise maani ge kushemeza abandi nari kwegasira. Buzima eby’okutangaaza ebi Yesu yaakozire bikooreka rukundo ei yaabaire ainiire abantu. Nitwija kwega ahari ekyo omu kicweka ekirikukurataho.