1. Dikon Pablo a bisa ku ‘Kristu ta demostrashon di e poder di Dios’?

YEHOVA a duna Hesukristu poder p’e hasi kosnan ekstraordinario. E kuater Evangelionan ta duna detaye di algun di e milagernan ei, pero sin duda el a hasi hopi mas. (Mat. 9:35; Luk. 9:11) Sí, Yehova a manifestá su gran poder pa medio di Hesus. P’esei apòstel Pablo a bisa: “Kristu ta demostrashon di e poder i sabiduria di Dios.” (1 Kor. 1:24) Awor bon, dikon e milagernan di Hesus ta asina importante pa nos?

2. Kiko nos por siña for di e milagernan di Hesus?

² Apòstel Pedro a bisa ku Hesus a hasi milager i “kosnan maravioso.” (Echo. 2:22) E obranan poderoso ku Hesus a hasi riba tera ta un muestra di kosnan mas grandi ku lo e hasi na un eskala mundial durante su Reinado di Mil Aña. Ademas, su milagernan ta yuda nos komprondé su personalidat mihó i tambe esun di su Tata. Laga nos analisá tres di e milagernan ei i wak ki efekto nan por tin riba nos bida awor i den futuro.

3. (a) Ki situashon a pone Hesus hasi su promé milager? (b) Dikon loke Hesus a hasi na Kana tabata un muestra di generosidat?

³ Hesus a hasi su promé milager na un fiesta di kasamentu na Kana di Galilea. Kisas tabatin mas invitado ku nan a spera, i biña a kaba. Esei a pone kara di e pareha resien kasá un poko na bèrgwensa, ya ku nan tabatin e deber di mustra hospitalidat! Maria, mama di Hesus, tabata un di e invitadonan. Pa años el a meditá riba e profesianan relashoná ku su yu. E tabata sa ku Hesus lo a ser yamá “Yu di e Haltísimo.” (Luk. 1:30-32; 2:52) El a pidi Hesus yudansa pasobra el a kere ku e tabatin algun poder spesial? Nos no sa. Loke sí tabata bisto ta ku tantu e komo Hesus a sinti duele di e pareha i kier a yuda nan. P’esei, Hesus milagrosamente a kambia 380 liter (100 galòn) di awa den biña di bon kalidat. (Lesa Huan 2:3, 6-11.) Akaso Hesus tabatin e obligashon di hasi e milager akí? Nò. El a hasié pasobra hende tabata importante p’e i pasobra e kier a imitá e generosidat di su Tata.

4, 5. (a) Kiko nos ta siña for di e promé milager di Hesus? (b) Kiko e milager na Kana ta siña nos tokante futuro?

⁴ Hesus a produsí biña di bon kalidat pa un grupo grandi di hende. Kiko nos ta siña for di e milager akí? Ku Hesus i Yehova ta interesá den e sintimentunan di hende i ku nan ta generoso. Ni e Tata ni e Yu no ta miskiña. Tambe nos por imaginá ku den e mundu nobo Yehova lo usa su poder pa laga “tur pueblo” riba tera disfrutá di bon kuminda na abundansia.—Lesa Isaías 25:6.

⁵ Pensa un ratu riba lo siguiente: Pronto Yehova lo duna tur hende riba tera tur loke nan tin mester i asta mas ku esei. Tur hende lo tin un kas bunita i bon kuminda. Nos ta anhelá di mira tur e kosnan maravioso ku nos Dios generoso lo duna nos den Paradeis!

6. (a) Kon Hesus semper a usa su poder? (b) Kon nos por imitá su generosidat?

⁶ Hesus nunka a usa su poder pa satisfasé su propio deseonan. Ora Diabel a purba di hink’é den tentashon, el a nenga di kambia piedra den pan pa benefisiá su mes. (Mat. 4:2-4) Pero sí el a usa su poder pa satisfasé e nesesidatnan di otro hende. Kon nos por imitá Hesus su interes den hende? E mes a bisa ku nos mester “kustumbrá duna.” (Luk. 6:38) Nos por invitá rumannan pa bin kome i pasa un ratu agradabel na nos kas? Kiko si un ruman hòmber ke trein su diskurso despues di reunion òf si un ruman ke haña yudansa pa mehorá su sirbishi? Nos lo dediká sufisiente tempu na nan? Ora nos ta generoso ku nos rekursonan i ku nos tempu, nos ta demostrá ku nos ta sigui e ehèmpel di Hesus.

7. Ki fenómeno lo keda eksistí tanten ku nos ta biba den e mundu di Satanas?

⁷ Pobresa no ta un fenómeno nobo. Yehova a bisa e israelitanan ku semper lo tin hende pober den e pais. (Deu. 15:11) I siglonan despues, Hesus a bisa: “Semper boso lo tin hende pober serka boso.” (Mat. 26:11) Akaso Hesus tabata ke men ku pobresa ta un problema sin solushon? Nò. Loke e kier a bisa ta ku pobresa lo keda eksistí tanten ku nos ta biba den e mundu di Satanas. Pero den e mundu nobo kos lo ta kompletamente diferente! E milagernan di Hesus ta un indikashon ku lo bini tempunan mihó i ku ora e Reino ta goberná e tera tur hende lo disfrutá di kuminda na abundansia i keda satisfecho.

8, 9. (a) Dikon Hesus a alimentá míles di hende? (b) Kiko bo ta sinti ora bo pensa riba e milager akí?

⁸ Un di e eskritornan di salmo a bisa lo siguiente di Yehova: “Bo ta habri bo man, i ta satisfasé e deseo di tur ser bibu.” (Sal. 145:16) Riba tera, Kristu a imitá su Tata, i komo ‘e poder di Dios,’ e tambe hopi biaha a habri su man pa satisfasé e nesesidatnan di otro hende. E no a hasié djis pa demostrá ku e tabata poderoso, sino pasobra di bèrdat e tabata preokupá pa e hendenan, manera e relato di Mateo 14:14-21 ta mustra. (Les’é.) Hopi hende di e statnan den bisindario a sigui Hesus na pia. (Mat. 14:13) Ora a bira anochi, e disipelnan a mira ku e hendenan tabata agotá i hambrá. Pues, nan a rekomendá Hesus pa manda e hendenan bai kumpra algu pa nan kome. Kiko Hesus a hasi?

⁹ Hesus a hasi un milager! Usando sinku pan i dos piská, el a alimentá mas o ménos 5.000 hòmber, sin konta hende muhé ku mucha. E relato ta bisa ku “tur hende a kome i keda satisfecho.” De echo, a sobra 12 makutu yen di pan! Pues, Hesus no a duna nan djis un pida pan. Mas bien, el a sòru pa nan haña un bon kuminda ku a duna nan sufisiente energia pa kuminsá ku nan biahe largu pa kas. (Luk. 9:10-17) Wak kuantu kompashon Hesus a demostrá pa e famianan ei, inkluso pa e chikitinnan! Bo no ta sinti bo konmoví ora bo pensa riba e kariño ku e tabatin pa hende?

10. Kiko lo pasa djis akí ku pobresa?

¹⁰ Awe, sientos di miónes di hende ta biba den pobresa pa motibu di mal maneho di gobernantenan korupto. Algun di nos rumannan tin masha tiki di kome, i aunke nan no ta muri di hamber, no por bisa ku nan ta “keda satisfecho.” Pero pronto sirbidónan di Dios lo biba den un mundu sin korupshon i sin pobresa. Si abo tabatin poder, lo bo no a hasi algu pa drecha e situashon? Nos Dios Todopoderoso, Yehova, tin e poder i e deseo di satisfasé nos nesesidatnan. I el a primintí ku djis akí lo e kaba ku tur sufrimentu!—Lesa Salmo 72:16.

11. (a) Dikon bo tin sigur ku Kristu pronto lo usa su poder pa nos bon? (b) Komo Testigu di Yehova, kiko nos ta sinti nos motivá pa hasi?

¹¹ Ora Hesus tabata riba tera, el a prediká den un teritorio relativamente chikitu pa tres aña i mei so. (Mat. 15:24) Pero komo Rei den shelu, su teritorio lo abarká tur skina di e tera. (Sal. 72:8) E milagernan di Hesus ta duna nos e konfiansa ku pronto lo e usa su poder pa nos bon. I aunke nos no por hasi milager, nos por usa nos tempu i energia pa siña hende tokante e futuro maravioso ku Beibel ta primintí. Komo Testigu di Yehova, nos tin e deber di kompartí e konosementu ei ku  e hendenan, pasobra nos sa kiko ta bai pasa pronto. (Rom. 1:14, 15) Si nos meditá riba loke e Reino di Dios lo hasi pa humanidat, nos lo sinti nos motivá pa papia ku tur hende tokante e bon notisia ei.—Sal. 45:1; 49:3.

12. Dikon nos por tin sigur ku Hesus sa perfektamente kon e tera ta funshoná?

¹² Hesus tabata banda di Yehova komo e “trahadó eksperto” durante kreashon di e tera i di tur loke tin riba dje. (Pro. 8:22, 30, 31; Kol. 1:15-17) Ta p’esei Hesus sa asina bon kon e tera ta funshoná. E sa presis kon pa usa i manehá e rekursonan di nos planeta i kon pa distribuí nan na un manera hustu.

13, 14. Duna un ehèmpel di e poder ku Hesus tin riba forsanan di naturalesa.

¹³ Riba tera, Hesus a demostrá di ta e poder di Dios ora el a dominá e forsanan di naturalesa. Pensa riba loke el a hasi ora ku un mal tempu a menasá bida di su disipelnan. (Lesa Marko 4:37-39.) Un analista di Beibel a komentá ku e palabra griego den e buki di Marko pa “bientu masha fuerte mes” ta ser usá pa deskribí un tormenta òf orkan. E ta referí na un tormenta ku nubia pretu, ráfaganan fuerte di bientu, bos i áwaseru ku ta kousa inundashon. Despues ku e pasa ta keda un destrukshon atras.

¹⁴ Imaginá bo e esena: Kristu tabata asina okupá ku su sirbishi ku el a keda morto kansá i a bai un soño profundo den e boto. Ni sikiera e olanan ku tabata gòlpia e boto ni e bochincha di e tormenta no a lant’é for di soño; asina kansá e tabata. Ma su disipelnan tabata morto spantá, i nan a bai lant’é i a bis’é: “Nos ta serka di muri!” (Mat. 8:25) Kiko Hesus a hasi? El a lanta para i a bisa e bientu i e laman: “Silensio! Keda ketu!” (Mar. 4:39) Anto mesora bientu a baha i tur kos a kalma kompletamente. Esta un gran ehèmpel di Hesus su poder riba forsanan di naturalesa!

15. Kon Yehova a demostrá ku e tin dominio kompleto riba e forsanan di naturalesa?

¹⁵ Hesus por a dominá e forsanan di naturalesa pasobra Yehova tabata e Fuente di su poder. Pues, ta mas ku klaru ku Yehova tambe por dominá nan. Ban wak algun ehèmpel di esei. Promé ku Diluvio, Yehova a bisa: “Aki shete dia mas lo mi manda áwaseru riba tera pa kuarenta dia i kuarenta anochi.” (Gén. 7:4) Despues, na Éksodo 14:21, nos ta lesa ku Yehova “a hasi e laman retirá pa medio di un bientu fuerte di pariba.” I na Yonas 1:4 nos ta lesa ku Yehova “a lanta un bientu duru riba laman, i tabatin un tormenta grandi riba laman, asina ku e barku tabata kore peliger di kibra.” E echo ku nos sa ku Yehova tin dominio kompleto riba naturalesa ta duna nos konfiansa. Ta bisto ku e futuro di planeta Tera ta den bon man.

16. Dikon ta trankilisante pa sa ku e Kreador i su Yu tin pleno poder riba forsanan di naturalesa?

¹⁶ Pues, nos Kreador i su “trahadó eksperto” tin poder ekstraordinario. Esei sigur ta trankilisá nos! Durante e 1.000 aña, ora ku tur nan atenshon lo ta dirigí riba tera, tur hende lo biba den siguridat. Desasternan natural, ku ta kousa asina tantu sufrimentu, lo pasa pa historia. Den e mundu nobo lo no tin motibu pa nos tin miedu di orkan, tsunami, erupshon di volkan òf temblor. Lo yega e dia ku forsanan di naturalesa lo no hasi daño mas na hende, pasobra “e tènt di Dios lo ta ku  humanidat.” (Rev. 21:3, 4) Nos por tin sigur ku e poder di Dios, ku Kristu lo ehersé, lo dominá e forsanan di naturalesa durante e Reinado di Mil Aña.

17. Den ki manera nos por imitá Dios i Kristu awe?

¹⁷ Klaru ku nos no tin e poder di prevení desaster natural. Ta Yehova ku Hesus so por hasi esei. Pero nos tur tin sierto poder sí. Kon nos por us’é? Wèl, nos por pone na práktika e palabranan di Proverbionan 3:27. (Les’é.) Ora nos rumannan ta pasa den difikultat, nos por konsolá nan i apoyá nan den sentido físiko, emoshonal i spiritual. (Pro. 17:17) Por ehèmpel, nos por yuda nan rekuperá di un desaster natural. Skucha loke un ruman biuda a bisa despues ku un orkan a kousa daño grandi na su kas: “Mi ta masha, masha gradisidu mes na Yehova i na su organisashon pa e yudansa físiko i spiritual ku nan a duna mi.” Tuma nota tambe di e komentario di un ruman muhé soltero ku a sinti su mes hopi angustiá despues di mira e daño ku su kas a sufri debí na un tormenta. Ora el a haña yudansa di e rumannan, el a bisa: “Ta difísil pa mi deskribí mi sintimentunan, pero . . . danki, Yehova!” Nos ta masha kontentu ku nos ta forma parti di un hermandat ku realmente ta interesá den nos i den nos nesesidatnan. Pero nos ta mas kontentu ainda pasobra Yehova ku Hesukristu di bèrdat ta interesá den nos.

18. Kon e amor ku a motivá Hesus pa hasi milager ta laga bo sinti?

¹⁸ Hesus a duna prueba durante su sirbishi ku e ta e ‘demostrashon di e poder di Dios.’ Pero kiko a motiv’é pa hasi e milagernan ei? Nunka e no a usa su poder pa impreshoná hende ni pa saka probecho personal. El a hasi milager pasobra e tabata stima hende. Nos lo siña mas di esei den e siguiente artíkulo.