A Kristus a Klisichel a Dios

“A Kristus a klisichel a Dios.”​—1 KO. 1:24.

NGSEBECHEM EL MESAOD?

Ngera el blekeradel a lulechotii a Jesus er a lerellii a kot el mengasireng el tekoi?

Ngera uchul me a Jesus a mirruul er a ongasireng el llechukl er a Mateus 14:14-21?

Ngolechotel a ngerang a omerellel a Jesus el milengellakl er a meses el eolt?

1. Ngera uchul me a Paulus a dilu el kmo: “A Kristus a klisichel a Dios”?

 A JEHOVAH a ulechotii a klisichel el okiu a Jesus er sel taem el lurruul a meklou el tekoi. Sera lengar er a chutem a Jesus e ngmirruul a mengasireng el tekoi. Me ngsebeched el menguiu a bebil er a tekoi el lurruul el ngar er a Biblia el ngii a sebechel el melisiich a klaumerang er kid. (Mt. 9:35; Lk. 9:11) Me a Jehovah a milsang a klou el klisiich a Jesus, sei a uchul me a Paulus a mle sebechel el dmu el kmo: “A Kristus a klisichel a Dios.” (1 Ko. 1:24) Engdi ngera ngrullii er kid a mengasireng el tekoi el lurruul a Jesus?

2. Ngera sebeched el suub er a mengasireng el tekoi el lurruul a Jesus?

² A apostol el Petrus a milsaod er a Jesus el kmo ngmirruul a “ongasireng ma meklou el tekoi.” (Rel. 2:22) Me ngera ngrullii er kid aika el tekoi? Ngosisecheklid er aike el bo loruul a Jesus er a chelsel a Ta el Telael el Rak el Omengederederel. Seikid el taem e ngmo meruul a mengasireng el tekoi el mo uchul a klungiolir a rechad el rokui. Me aika el omerellel a dirrek el ngosukid el mo medengei a betok el blekerdelel ngii me a Demal. Me ngar tia el suobel e kede mo mesaod a edei el mengasireng el tekoi el lurruul a Jesus me a belkul el kired er chelechang me a ngar medad el klebesei.

 A MENGASIRENG EL TEKOI EL OLECHOTEL A BLEKURURAU

3. (a) Ngera uchul me a Jesus a mirruul er a kot el mengasireng el tekoi? (b) E milekerang e ochotii a blekururau er a lengar er a Kana?

³ A Jesus a rirellii a kot el mengasireng el tekoi er a chebechiil el mla er ngii er a beluu er a Kana. Ngdiak dodengelii a uchul, engdi a bilong a mle ngesonges er a rechad el mlei. Tiang a mle sebechel el mo uchul e tirka el obekel a mo merur, e le ngmle ngerechelir el kutmokl a kall me a ilumel el kirir a rechad el rokui. A Maria el delal a Jesus a dirrek el mlei er tia el chebechiil. Me ngikang nguluumerang el kmo ngar er ngii a klisichel a Jesus el olengeseu? Nglocha uaisei, e le ngmle kerekikl el omtab a ulaoch el kirel a ngelekel e dirrek el mle medengei el kmo ngmo okedongall el “Ngelekel a Kot el Ngarbab el Dios.” (Lk. 1:30-32; 2:52) Ngbleketakl el kmo a Maria me a Jesus a mle sorir el olengeseu er tirka el obekel. Me a Jesus a milult a bekord el 100 el gallon el ralm el mo “kot el ungil bilong.” (Monguiu er a Johanes 2:3, 6-11.) Me ngikang ngkmal mle kirel el meruul er tia el tekoi? Ngdiak, ngdi mirruul er ngii e le ngmle betik a rengul er a rechad e dirrek el uluukerebai er a blekerdelel a Demal el bekururau.

4, 5. (a) Ngera kede suubii er sel kot el ongasireng el lerirellii a Jesus? (b) E ngera ngmeketeklii el kirel a ngar medad el klebesei?

⁴ Me ngulekiu a mengasireng el rolel e a Jesus a riruul a betok el ungil el bilong el kirir a rebetok el chad. Ngsebechem el nguu a klubelem er tiang? A Jehovah me a Jesus a kmal diak el mekreos e te bai kmal bekururau. Me tia el mengasireng el tekoi a oterekokl a rengud el kmo tirka el terung a kmal betik a rengrir er a rechad. Ngdirrek el ochotii el kmo, ngar er a chelsel a beches el beluulechad e a Jehovah a mo ousbech er a klisichel el mesterir a rokui el chad a betok el kall.​—Monguiu er a Isaia 25:6.

⁵ Ka di molatk, ngdi kmedung e a Jehovah a mo meskid aike el rokui el dousbech. Me a rokui el chad a mo er ngii a ungil el blirir me a ungil el kelir. Me ngkmal dmeu a rengud sel dolatk aike el rokui el ungil el tekoi el bo lomeskid a Jehovah er a chelsel a Baradis el chutem.

6. Ngmle ua ngerang a usbechellel a Jesus er a klisiich el lulebang, e kede mekerang e oukerebai er ngii?

⁶ A Jesus a dimlak a ta el bo lemekngit el ousbech er a klisichel. Ka molatk er sel taem el Diabelong a uleldurech er ngii el mo omult a bad el mo blauang. A Jesus a dimlak lekengei el ousbech er a klisichel el di mo uchul a klungiolel. (Mt. 4:2-4) Engdi ngbai kilengei el ousbech er a klisichel el mo uchul a klungiolir a rechad. Kede mekerang e oukerebai er ngii? Ngdilu el kmo: “Bo bekerurau el mor a re chad.” (Lk. 6:38) Ngsebeched el meruul er tiang sel dongemedaol er a rechad el me omengur er a blid. Ngdirrek el sebeched el chemoit a sesei el temed el ngosuterir a rebebil er a uriul er a miting, el ua sel dorrenges er a  odam el melasem er a cheldechedechal. Me a lechub e kede kuk olisechakl er a rebebil sel doldingel a obliil el obengterir. Sel doruul el uaisei e kede oukerebai er a omerellel a Jesus el bekururau.

“TE ROKUI EL MILENGA EL MO MEDINGES”

7. Ngera el mondai a melemolem el ngar er ngii er a beluulechad er a Satan?

⁷ A chelebuul a diak el beches el tekoi. A Jehovah a dilu er a rechad er a Israel el kmo: “Ng diak bo lak a re mechebuul er a beluu.” (Dut. 15:11) E a betok el rak er a uriul e a Jesus a dilu el kmo: “A re mechebuul a di blechoel el obengkemiu.” (Mt. 26:11) Me a tekingel ngbelkul a kmo, ngdi mo blechoel el ngar er ngii a remechebuul el ngar er a beluulechad? Ngdiak, ngbai belkul a kmo ngdi blechoel el ngar er ngii a remechebuul er tia el beluulechad er a Satan. E tiang a kmal ngodech er sel taem el bo dekiei er a chelsel a beches el beluulechad! Seikid e ngmo diak a chelebuul me a rechad el rokui a mo dmeu a rengrir er a betok el kelir!

8, 9. (a) Ngera uchul me a Jesus a ulemekang er a seked? (b) Ngua ngera uldesuem el kirel tia el mengasireng el tekoi?

⁸ A ta er a milluches er a psalm a milsaod er a Jehovah el kmo: “Ng mesterir a ungil a ildisel; ng mesterir a rokui a ikel lousbech.” (Psa. 145:16) Me a Jesus er a lengar er a chutem e ngmle ungil el oukerebai er a Demal el ulemesterir a rechad aike el lousbech. Ngdimlak loruul el uaisei el di ullecholt er a klisichel. Ngbai mera el ulemekerreu er a rechad. Me bo dosaod er a Mateus 14:14-21. (Monguiu.) Me a rebetok el chad a tilobed er a rekebelurir el okiuellel a Jesus. (Mt. 14:13) Me a bocha lekebesengei e a redisaiplo er a Jesus a sobeka rengrir er a rechad e le te songerengerang e mesula bedengir. Me te ullengit er a Jesus me lolmesumech er a rechad me bo el sebechir el mo smiik a kelir. Me ngmilekerang a Jesus?

⁹ A Jesus a uluusbech a 5 el blauang me a 2 el ngikel el omeka er a 5,000 el sechal me a dirrek el betok el redil me a rengalek. Ngera uchul me a Jesus a mirruul er tia el mengasireng el tekoi? E le ngmera el mle betik a rengul e omekerreu er a rechad. A Jesus a ulterekokl el milsterir a kmal betok el kall e le “te rokui el milenga el mo medinges.” Me a kall el lulengang a milsterir a klisichel a bedengir me bo el sebechir el merael er a kemanget el omerael el mo remei. (Lk. 9:10-17) Me a lemerekong el omengur e a redisaiplo a milekeek a 12 el sualo el derengel a kall!

10. Ngera mo duubech el mo er a chelebuul?

¹⁰ A rechorecherreng me a chelebirukel el omerellir a remengeteklel a beluu a uchul me a rebetok el dart el miliol el chad a kmal chebuul. Me a rebebil el rudam er kid a dirrek el chebuul. Engdi ngdi kmedung e tirke el rokui el olengesenges er a Jehovah a mo kiei er a beluulechad el diak a chelebirukel me a chelebuul er a chelsel. A Jehovah a Dios el Olab a Bek el Klisiich, me ngar er ngii a klisichel me a urungulel el mo mesterir a rokui el chad aike el lousbech. Me ngmla tibir el kmo ngdi kmedu el mo okngemed a ringel me a chelebuul!​—Monguiu er a Psalm 72:16.

11. Ngera me ke oumerang el kmo ngdi kmedu Kristus el mo ousbech er a klisichel el olengeseu er a rokui el chad? Me ngsoam el mo mekerang?

¹¹ A Jesus er a dirk lengar er a chutem e ngmirruul a mengasireng el tekoi er a chelsel a di telkib el basio el di mle 3 me a tedobech el rak. (Mt. 15:24) Engdi ngii el King a uchul me ngmo ngosuterir a rechad el rokui er a chelsel a 1,000 el rak er a omengederederel. (Psa. 72:8) Me a meklou el tekoi el lurruul a Jesus a ochotii el kmo ngkmal soal el ousbech er  a klisichel el mo uchul a klungioled. Engdi kid a diak a klisiched el ua Jesus. Me ngera kuk sebeched el meruul? Ngsebeched el ousbech a temed me a klisiched el ouchais er a rechad el kirel a mengasireng el telbiil el medung er a Biblia. Tiaikid a ngerecheled kid el Sioning er a Jehovah. (Rom 1:14, 15) Me sel dolebedebek aike el tekoi el Jesus a di kmedu el mo meruul e kede kmal mo semeriar el ouchais er a rechad el kirel.​—Psa. 45:1; 49:3.

NGSEBECHIR EL MTEBECHEL A EOLT ME A DAOB ME A CHUTEM

12. Kede mekerang e medengei el kmo a Jesus a cherrungel el medengelii a beluulechad me a eltel?

¹² A Dios er sera lomeob er a chutem me aike el rokui el ngar er a chelsel, e a Jesus a “mlar bita er ngii el di ua chad er omelib el blai.” (Osi. 8:22, 30, 31; Kol. 1:15-17) Me a Jesus a kmal ungil el medengelii a rolel a loureor a beluulechad me a eltel. Me ngmeduch el ousbech e omtebechel a eltel me a debel me a chetemel.

13, 14. Ka mosaod er a rolel e a Kristus a mle sebechel el ousbech er a klisichel.

¹³ Sera dirk lengar er a chutem a Jesus e ngulechotii el kmo ngmla er ngii a klisichel a Dios el lulebang el okiu sel lomtebechel er a eltel me a debel a beluulechad. Ka di molatk er sel taem er a longellakl er a mesisiich el oiu. (Monguiu er a Markus 4:37-39.) A ta el chellimosk a mesaod el kirel a tekoi er a Grik el moiuid el “oiu” el ngar er a babier er a Markus el kmo ngmillutk el kirel a mesisiich el eolt me a lechub e ng typhoon. Tiang a mesaod el kirel a eolt el mei el obengkel a chetau me a derumk me a klou el chull. Me sel lengelakl el merael e a rokui el tekoi a di telemall. Me a apostol el Mateus a mesaod er ngii el ua “mesisiich el eolt.”​—Mt. 8:24.

¹⁴ Ka di molatk er tiang. A chedesaoch a di meluil el me soiseb er a bilsengir. Me nguaisei el mesisiich el eolt a uchul me a bilas a di omteuitech, engdi a Jesus a di milechiuaiu e le ngkmal mle mesaul a bedengel. Engdi a redisaiplo a kmal medektang me te mocha olekiis er a Jesus e kmo: “Kede medkung!” (Mt. 8:25) Me ngmilekerang a Jesus? Ngmilekiis e dmu el kmo: “Eolt, bo mchelellakl; chedesaoch, bo meiusech!” (Mk. 4:39) Me “ng di mlo diak a eolt e mo meiusech.” Tiang a mera el klou el olechotel a klisichel a Jesus!

15. Ngoeak a ngera el rolel e a Jehovah a mla ochotii a klisichel?

¹⁵ A Kristus a nguu a klisichel er a Jehovah, me kede medengei el kmo a Dios el Olab a Bek el Klisiich a sebechel el meruul a chouaika el mengasireng el tekoi. El ua tiang, a uchei er a lebo er ngii a Ieleb e a Jehovah a dilu el kmo: “Ng di medechel ku euid el sils e ak mo oietii a chull el mer a beluulchad el 40 el llomes ma 40 el klebesei.” (Gen. 7:4) Me a Exodus 14:21 a kmo: “Ma RUBAK a ullutii a daob el oba mesisiich el eltel ongos.” E ngar er a Jona 1:4 e ngkmo: A “RUBAK a uldureklii a mesisiich el eolt el mor a daob; ng kmal mlo meringel oiu me kilo ng metemall a diall.” Ngkmal dmeu a rengud sel dodengei el kmo ngar er a chelsel a beches el beluulechad e a Jehovah a di mo blechoel el omtebechel a eolt me a daob me a chutem.

16. Ngera me ngmengelaod a rengud sel dodengei el kmo a Jehovah me a Jesus a kmal klou a klisichir?

¹⁶ Me ngkmal mengelaod a rengud sel dodengei el kmo a Jehovah me a Jesus a kmal klou a klisichir. Me ngar er a chelsel a Ta el Telael el Rak el Omengederederel a Kristus, e a rokui el ngar er a beluulechad a mo kiei el ulekerreu. Ngmo diak a rechad el metemall me a lechub e te mad er a typhoon me a tsunami me a volcano me a desiu. Ngmo diak demedakt a chouaika el tekoi e le “blil a Dios a ngar  a delongelir a re chad!” (Och. 21:3, 4) Me ngulterekokl a rengud el kmo a Jehovah a mo msang a klisichel a Jesus el omtebechel aika el tekoi er a chelsel a Ta el Telael el Rak.

MOUKEREBAI ER A DIOS ME A KRISTUS ER CHELECHANG

17. Ngerang a ta er a rolel e kede oukerebai er a Dios me a Kristus er chelechang?

¹⁷ Me nguaisei, engdi kid a diak el sebeched el omtebechel a eolt me a daob me a chutem. Ngdi ta el Jehovah me a Jesus a sebechir. Engdi ngkuk ngar er ngii a sebeched el rullii. Ngsebeched el oltirakl er a tekoi el medung er a Osisechakl 3:27. (Monguiu.) Ngsebeched el ngosuterir a rudam me a rudos er kid sel lousbech a ngeso el kirel a bedengir me a uldesuir, e dirrek el sebeched el mengelaod er tir. (Osi. 17:17) Ngsebeched el olengeseu er tir er a uriul er a klou el telemellel a beluu. A ta el melakl dil el miltemall a blil er a typhoon a dilu el kmo: “Ngkmal imis el dmeu a renguk el mlo chedal a cheldebechelel a Jehovah, e le ngdiak di lolengeseu er kid er a klechad e ngdirrek el melisiich er a deleuill er kid me a Dios.” A kuk ta er a mesobil el odos er kid a kmal mlo mekngit a rengul er a lemetemall a blil er a eolt. Me a uriul er a lengesuir a rudam el rullii a blil e ngdilu el kmo: “Ngkmal diak a tekoi el sebechel el smodii a deuil a renguk el kirel tia el omeruul.” Ngdirrek el dilu el kmo: “Jehovah ke kmal mesulang!” Me ngkmal dmeu a rengud e le rudam me a rudos er kid a mera el omekerreu e sorir el olengeseu er a rebebil. E a ngaruchei, e kede mera el mereng a sulel a Jehovah me a Kristus el tir a kmal omekerreu er kid.

18. Ngera sel kot el soam el tekoi el kirel a ongasireng el lurruul a Jesus?

¹⁸ Ngar er a taem er a omesiungel e a Jesus a ulechotii el kmo ngii a “klisichel a Dios.” Engdi ngdimlak a ta el ousbech er ngii el klisiich el mengas a rengrir a rechad me a lechub e di loruul a mo klungiolel. Ngbai uluusbech er ngii el meruul a ongasireng e ulechotii el kmo ngkmal betik a rengul er a rechad. Kede mo mesuub a lmuut el bebil er sel ongingil el suobel.

[Aike el Ker er a Suobel]