1. ¿Imamandata apóstol Pabloca nirca, Cristoca ‘Taita Dios ninan ushaita charijtami ricuchijun’ nishpa?

JESÚS cai Alpapi cashpaca ashtaca milagrocunatami rurarca. Chai milagrocunata Bibliapi liishpaca ñucanchi fetami ashtahuan shinlliyachishun (Mat. 9:35; Luc. 9:11). Jesusca Jehová Diospa ushaihuanmi milagrocunataca rurarca. Chaimandami apóstol Pabloca cashna nirca: ‘Taita Dios ninan ushaita charijtami Cristoca ricuchijun’ nishpa (1 Cor. 1:24). Shinaca Jesús rurashca milagrocunamandaca ¿imatata yachajunchi?

2. Jesuspa milagrocunaca ¿imatata ricuchirca?

² Apóstol Pedropash nircami, Jesusmi ‘jatun manllarinacunata’ o milagrocunata rurarca nishpa (Hech. 2:22). Milagrocunata rurashpami Jesusca, huaranga huatacunata pai mandashpa tucuilla gentecunata imashina bendicianata ricuchirca. Shinallata, milagrocunata rurashpami Jesusca paillata imashina cashcata, Jehová Dios imashina cashcatapash ricuchirca. Chaimandami cai temapica, Jesuspa quimsa milagrocunamandapash, chai milagrocuna cunan punllacunapi, shamuj  punllacunapi ñucanchita imashina ayudajtapash yachajushun.

3. a) Jesusca ¿maipita punda milagrotaca rurarca? b) ¿Imamandata Jesusca chai milagrota rurarca?

³ Jesuspa punllacunapica Caná nishca llactapimi shuj cazamiento boda tiarca. Chaipimi Jesusca punda milagrota rurarca. Chai cazamientopi tucuilla invitashca gentecunata ali atindingapaj, ama pingai tucungapami noviocunaca ashtaca vinota charina carca. Shinapash vinoca tucurishcarcami. Chaimandami Jesuspa mama Mariaca Jesustaca noviocunata ayudapai nirca. ¿Imamandata shina nirca? Mariaca profeciacuna pactarijpi Jesusta ‘Taita Diospa Churimi cangui’ ninataca alimi yacharca (Luc. 1:30-32; 2:52). Profeciacunamandami Mariaca gentecunata Jesús ayudanataca crishcanga. Mariapash Jesuspash noviocunataca llaquishpami ayudangapaj munarca. Chaimandami Jesusca shuj milagrota rurashpa ashtaca litro yacutaca ali vinoman tigrachirca (Juan 2:3, 6-11, liingui). Jesusca milagrota rurana obligaciondaca na charircachu. Shinapash gentecunapi preocuparimanda, Jehová Diospa ejemplota catishpa imatapash na mitsashpa carangapaj munaimandami chai milagrotaca rurarca.

4, 5. a) Jesuspa punda milagromandaca ¿imatata yachajupanchi? b) Yacuta ali vinoman tigrachishpaca ¿shamuj punllacunapi imashina causai tianatata Jesusca yachachirca?

⁴ Jesusca ashtaca gentecunaman carangapami ashtaca yacuta ali vinoman tigrachirca. Shinaca ¿imatata yachajunchi? Jesuspash Jehová Diospash gentecunata llaquijta, na mitsashpa caranata gushtajtami yachajunchi. Shinallata, shamuj punllacunapi ‘tucui gentecunaman’ Jehová Dios ashtaca ali micunaguta caranatami yachajunchi (Isaías 25:6, liingui).

⁵ Pensaripai, ñallami Jehová Diosca tucui ñucanchi imata minishtishcata caranga. Tucuillacunamanmi shuj juyailla huasiguta, mishqui micunaguta caranga. ¿Nachu chashna punllacunapi pensarishpaca tucui shunguhuan Jehovataca agradicinchi?

6. a) Jehová Dios carashca ushaitaca ¿imapallata Jesusca ocuparca? b) Jesuspa ejemplota catijushcata ricuchingapaca ¿imacunatata rurai ushapanchi?

⁶ Jesusca milagrocunata rurangapaj ushaita charishpapash na paipa munaita rurangapachu milagrocunataca ruran carca. Shuj punlla ima pasashcata ricupashun. Diabloca Jesustaca nircami, cai rumicunata tandaman tigrachi nishpa. Shinapash Jesusca Diablo nishcataca na rurarcachu (Mat. 4:2-4). Jesusca gentecunata ayudangapallami Jehová Dios carashca ushaitaca ocuparca. Shinaca ¿imashinata Jesuspa ejemplota cati ushanchi? Paipa ejemplota catichunmi Jesusca cashna nirca: “Shujcunaman caraichi” nishpa (Luc. 6:38). Shinaca pensaripai: ¿Pitapash huasiman invitashpa  micunaguta carai ushanchichu? Tandanajui jipa shuj huauqui discursota repasangapaj ayudahuai nijpica ¿tiempota llujchinchichu? ¿Ashtahuan aliguta villachingapaj shuj huauqui ayudai nijpica ayudanchichu? Na mitsashpa imagutapash carashpa, ima ruranacunapipash shujcunata ayudashpami Jesuspa ejemplota catinajushcata ricuchishun.

7. Diablo mandajuj mundopica ¿imata siempre tianga?

⁷ Pobre gentecunaca israelitacunapa punllacunamandapachami tiarca. Chaimandami Jehová Diosca nirca, pobre gentecunaca tiashpa catingami nishpa (Deut. 15:11). Jipa huatacunamanbash Jesusca nircami: “Imagutapash na charijcunaca tiangallami” nishpa (Mat. 26:11). Shinaca ¿pobre gentecuna nunca na tucurinatachu Jesusca nijurca? Na. Diablo mandajuj mundopica siempremi pobre gentecunaca tianga. Cutin Diospa Reino cai Alpata mandajpica shuj pobre gentellapash na tiangachu. Tucuicunami ashtaca micunaguta charinga, cushilla causanga.

8, 9. a) ¿Imamandata Jesusca ashtaca ashtaca gentecunaman micuchirca? b) Jesuspa milagropi pensarishpaca ¿imashinata sintiripangui?

⁸ Bibliapica Taita Diostaca ninmi: “Cambaj maquita pascashpami, causaita charijcunatapash, tucuicunata ninanda bendiciajungui” nishpa (Sal. 145:16). Jesuspash Taita Dios carashca ushaihuanmi milagrocunata rurashpa gentecuna imata minishtijushcata tauca viaje cararca. Shinapash ashtaca ushaita charishcata ricuchingapaca na munarcachu. Mateo 14:14-21pi nishca shinaca, gentecunata juyaimandami Jesusca milagrocunata rurarca (chai textocunata liipangui). Shuj punllaca ladolla llactamanda gentecunami Jesustaca chaquilla catishpa rirca (Mat. 14:13). Ña chishajpica Jesuspa catijcunaca Jesustaca nircami, chai gentecunaca yarjachinajunmi, imagutapash randigrichun cachanguimanga nishpa. Paipa catijcuna shina nijpica ¿imatata Jesusca rurarca?

⁹ Jesusca picha tandaguta, ishcai pescadoguta japishpami casi 5 mil jaricunaman, huarmicunaman, huahuacunamanbash micuchirca. Bibliapi nishca shinaca, tucuillami na munangacaman amijta micurca. Ashtahuangarin 12 canasta micunapash puchurcarami. Imashinami ricunchi, Jesusca chai gentecuna ali micushpa huasiman tigrai ushachunmi micunatapash llashajllaguta cararca (Luc. 9:10-17). ¿Nachu chaipi pensarishpaca gentecunata Jesús tucui shunguhuan llaquishcata cuenta japinchi?

10. ¿Siemprechu pobre gentecuna tianga?

¹⁰ Cunan punllacunapica, gobiernocuna na aliguta mandai ushajpimi ashtaca millón gentecunaca pobre pobre can. Huaquin llactacunapica, ñucanchi huauquipanicunapashmi micunagu faltajlla causanajun. Shinapash Jehová Diosca gentecuna minishtishcaguta carangapami munan. Ashtahuangarin, gentecuna imata minishtijushcata carangapami ushaita charin. Paica pobre gentecuna tiachunga na saquishachu ninmi (Salmo 72:16, liingui). Jehovata cazuj gentecunaca ñallami nali gobiernocunapash, yarjaipash tucurishca punllacunapi cushilla causanga.

11. a) ¿Imashinata yachanchi Jesusca gentecunata ñalla ayudanata? b) Testigo de Jehovacunaca ¿imata ruranatata yaria causana capanchi?

¹¹ Jesús cai Alpapi cashpaca quimsa huata  chaupitalla, huaquin llactacunapillami milagrocunata rurarca (Mat. 15:24). Shinapash huaranga huatacunata mandashpaca muyundi Alpapi gentecunata ayudangapami milagrocunata ruranga (Sal. 72:8). Jesusca milagrocunata rurashpami ñucanchicunatapash ayudangapaj ushaita charishcata ricuchirca. Shinaca Jesús ayudanataca seguromi cana canchi. Chaimandami ñucanchicunapash tucui ñucanchi fuerzahuan, tiempohuan shujcunata ayudana canchi (Sal. 45:1; 49:3). Milagrocunata na rurai ushashpapash ali causai tianata Bibliapi yachachishpami gentecunataca ayudana canchi (Rom. 1:14, 15). Bibliamanda villachinataca nimamanda na saquinachu canchi.

12. ¿Imamandata Jesusca cai Alpa imashina cajtaca ali yachan?

¹² Jehová Dios tucuita rurajujpica Jesusmi tucuita rurashpa ayudajurca (Prov. 8:22, 30, NM, 31; Col. 1:15-17). Chaimandami cai Alpa imashina cajtaca ali yachan. Ama yapata huairachun, yacucuna ama jatarichun imata ruranatapash Jesusca alimi yachan.

13, 14. Shuj ejemplomanda parlashpa ricuchipai Jesusca huairatapash, yacucunatapash casilla quedachijta.

¹³ Jesusca huairata, tamiata jarcashpami Taita Diospa ushaita charishcata ricuchirca. Chaimandami shuj punllaca, ‘ninan huaira ñapash jatarishpa’ paipa catijcunata llaquichichunga na saquirca (Marcos 4:37-39, liingui).

¹⁴ Chai punllaca, ninanda ocuparijushca cashpami Jesusca canoapi sumajta puñushpa quedashcarca. Manllanaita huairashpa, yacu jatarishpa canoapi huactamujujpipash, canoata caiman chaiman shinllita cuyuchijujpipash Jesusca na imatapash sintircachu. Chaimandami paipa catijcunaca ninanda manllarishpa Jesustaca cashna nirca: “¡Apunchi Jesús, quishpichihuai, huashajushpa huañugrinchimari!” nishpa (Mat. 8:25). Shina nijpimi Jesusca jatarishpa huairata, yacutaca nirca: “Upalla, casilla caichi” nishpa (Mar. 4:39). Shina nishcandimi huairapash, yacucunapash casilla quedarca. Imashinami ricunchi, Jesusca ashtaca ushaitami charin.

15. ¿Imashinata Jehová Diosca huairata, tamiata mandai ushashcata ricuchirca?

¹⁵ Jesusca Jehová Dios ushaita carajpimi huairatapash yacucunatapash mandai usharca. Shinaca, Jehová Diosca Tucui Ushaitami charin. Huaquin ejemplocunata ricupashun. Noepa punllacunapica Jatun Manllanai Tamiata nara cachamushpallatami Jehová Diosca cashna nirca: “Canchis punlla yalishca jipami, chuscu chunga punllata, chuscu chunga tutata, cai pachaman tamiachimusha” nishpa (Gén. 7:4). Israelitacunapa punllacunapipash ‘indi llujshimuj ladomanda, shinlli huairahuanmi’ Jehová Diosca ‘mama cuchata chaupirca’ (Éx. 14:21). Jonaspa punllacunapipash Jehová Diosca ‘ninan huairatami mama cuchaman cacharca. Shinamandami cuchapica, barcopash faquirishpa tucurinashna ninan huairahuan tamiajurca’ (Jon. 1:4). Huairatapash, tamiatapash Jehová Dios mandai ushashcata yachashpami, Paraisopi na imapash llaqui tianataca seguro canchi.

16. ¿Imamandata Jehová Diospash Jesuspash ashtaca ushaita charishcata yachashpaca cushijunchi?

¹⁶ Imashinami yachajunajupanchi, Jehová Diospash Jesuspash ashtaca ushaitami charin. Huaranga huatacunata paicuna mandajpica tranquilomi causanajushun. Chai punllacunapica shinlli huairahuan  tamiacuna, acapanacuna, terremotocuna, urcu tujyaicunaca ñana tiangachu. Jehová Dios tucuicunata cuidajujpimi ninanda huairashpa tamianata, terremoto tianata, urcu tujyanataca na manllashpa causanajushun (Apoc. 21:3, 4). Jesusca Jehová Dios carashca ushaihuanmi imapash llaquicuna gentecunata llaquichichunga na saquinga.

17. ¿Imashinata Jehová Diospa, Jesuspa ejemplota cati ushapanchi?

¹⁷ Ñucanchicunaca huairata, tamiata, terremotocunata na jarcai ushashpapash Proverbios 3:27pi shimicunataca pactachi ushanchimi (chai textota liingui). Chaimandami ñucanchi huauquicuna, panicuna llaqui apanajujpica ayudana, animana canchi (Prov. 17:17). Shuj jatun acapana huasita huaglichishca jipaca shuj viuda paniguca nircami: “Tucui shunguhuanbachami Jehová Diostapash paipa organizaciondapash ayudashcamanda agradicini” nishpa. Shuj soltera panigupa huasipash huairahuan ninanda tamiajpimi huaglirca. Huauquicuna ayudashca jipaca chai panigupash nircami: “Imashina agradicitaca na ushapanichu. ¡Pagui Jehová Dioslla!” nishpa. Ñucanchi huauquipanicuna ñucanchimanda llaquirishpa, ñucanchi imata minishtijushcapi ayudajpica tucui shunguhuanmi agradicinchi. Shinapash ashtahuanbachaca, Jehová Diosta, Jesustami ñucanchimanda preocuparijushcamandaca agradicinchi.

18. Jesuspa milagrocunapi pensarishpaca ¿imatata ashtahuanga alicachipanchi?

¹⁸ Jesús cai Alpapi cashpaca milagrocunata rurashpami Jehová Diospa ushaita charishcata ricuchirca. Shinapash milagrocunata rurashcamanda gentecuna alicachishpa ricuchun, o paipa alipallata milagrocunata rurangapaca na munarcachu. Paica gentecunata juyaimanda, paicunata ayudangapaj munaimandami milagrocunataca rurarca. Chai yuyaitami shamuj temapipash yachajushun.