1. Павлус ресул нәме үчин «Худайың гудраты... Месихдир» дийди?

ЕХОВА Иса Месих аркалы көп гудратлары гөркезйәрди. Инҗил китабының дөрт саны Хош хабарында беян эдилйән Исаның гудратлары бизиң иманымызы беркидйәр. Элбетде, Иса башга-да көп гудратлары гөркезди (Мат. 9:35; Лука 9:11). Шейдип, Худайың гүйҗи Иса аркалы аян болды. Шол себәпли Павлус ресул: «Худайың гудраты... Месихдир» дийип язды (1 Кор. 1:24). Исаның гөркезен гудратлары бизе нәхили тәсир эдйәр?

2. Биз Исаның гөркезен гудратларындан нәме өвренйәрис?

² Петрус ресул Исаның көп гудратлары, ягны «мугҗызалары» гөркезендигини айдяр (Рес. иш. 2:22). Бу гудратлар Исаның гелеҗекде Патыша хөкмүнде берҗек берекетлерини аян эдйәр. Олары Исаның тәзе дүнйәде улы мөчберде этҗек ишлериниң көлегесине меңзетсе боляр. Исаның гудратлары бизе өзүни ве Атасыны хас говы танамага көмек эдйәр. Гелиң, Исаның гөркезен кәбир гудратларының бизе хәзир хем гелеҗекде нәхили тәсир этҗекдиги барада гүррүң эделиң.

3. a) Иса нәме үчин гудрат гөркезди? б) Иса тойда җомартлыгыны нәдип гөркезди?

³ Иса Җелиләниң Кана шәхеринде болан тойда илкинҗи сапар гудрат гөркезди. Тоя көп мыхманың гелендиги себәпли шерап гутарды. Исаның эҗеси Меръемем тоя гелипди. Ол Иса дегишли пыгамберликлер ве онуң «хеммелерден бейик Худайың Оглудыгы» хакында көп ойланандыр (Лука 1:30—32; 2:52). Меръем Исада улы гүйҗүң бардыгына ынанярмыды? Иса билен эҗеси яш чатынҗалара чыкалгасыз ягдайда көмек этмек иследилер. Иса мыхмансөер болмагың ваҗыпдыгыны билйәрди. Шол себәпли ол 380 литр сувы «говы шераба» өвүрйәр (Яхя 2:3, 6—11-нҗи аятлары окаң). Иса муны этмәге борчлумыды? Ёк. Эмма ол адамларың йүрекден аладасыны эдип, гөкдәки җомарт Атасының гөрелдесине эерди.

4, 5. a) Исаның гөркезен илкинҗи гудратындан нәме өвренйәрис? б) Бу гудрат гелеҗек барада нәмәни аян эдйәр?

⁴ Иса тоя гелен мыхманлар үчин сувы шераба өвүрйәр. Биз мундан нәме өвренйәрис? Иса той эелерине көмек этмек билен өзүниң ве Атасының адамларың дуйгуларына дүшүнйәндигини гөркезди. Гөкдәки Атамыз ве Оглы җомарт болмакда говы гөрелде гөркезйәр. Тәзе дүнйәде Ехованың «әхли адамлар үчин» той сачагыны гиңден язҗакдыгыны гөз өңүне гетириң! (Ишая 25:6-ны окаң) *.

⁵ Тизден хер бир адамың ислег-арзувлары хасыл болар. Олар ёкумлы иймит ве овадан җай билен үпҗүн эдилер. Ехова Җеннетде әхли оңат затлары эчер. Биз муңа йүрекден бегенмейәрисми нәме?!

6. Иса гүйҗүни нәмә сарп эдйәрди ве биз онуң гөрелдесине нәдип эерип билерис?

⁶ Иса Месих Иблисиң дашлары чөреге өвүр диен теклибини инкәр этди ве гүйҗүни өз бәхбиди үчин уланмады (Мат. 4:2—4). Ол гүйҗүни адамлара көмек этмек үчин уланярды. Биз нәдип адамларың аладасыны эдип билерис? Иса месихчилере җомарт болмагы өвредйәрди (Лука 6:38). Шол себәпли биз адамлары мыхманчылыга чагырып, рухландырыҗы гүррүңлер эдип билерисми? Йыгнак душушыгындан соң көмеге мәтәч доган-уялары голдап я-да доганың тайярлан юмшуны диңләп билерисми? Доган-уялардан бири вагза гелмедик ягдайында, оңа дерек вагза гидип билерисми? Биз мүмкинчилигимизе гөрә, адамлара мадды көмеги берсек ве рухландырыҗы гүррүңлер этсек, Исаның гөрелдесине эерерис.

7. Мукаддес Язгыларда гарыплык барада нәме дийилйәр?

⁷ Дүнйәде гарып адамлар хемише-де барды. Ехова гадымы Ысрайылда мәтәч адамларың болҗакдыгыны айдыпды (Кан. таг. 15:11). Иса: «Гарыплар хемише сизиң яныңызда... болар» дийипди (Мат. 26:11). Ер йүзүнде хемише мәтәч адамлар болармы? Ёк! Йөне Иса дүнйәниң соңы гелйәнчә гарыплыгың болҗакдыгыны айтды. Себәби онуң гудратлары гелеҗекде аҗайып дурмушың болҗакдыгыны аян эдйәр. Ол Патыша боланда бизиң әхли зерурлыкларымызы канагатландырар, иймит хем бол болар.

8, 9. a) Иса мәрекәни нәме үчин доюрды? б) Исаның гөркезен гудраты сизе нәхили тәсир эдйәр?

⁸ Мезмурчы Ехованың «элини ачып, әхли дирилери ислеглери боюнча доюрҗакдыгы» барада пыгамберлик этди (Зеб. 145:16). Месих Худайың гүйҗи аркалы шәгиртлериниң зерурлыкларыны канагатландырып, Атасының җомартлыгындан гөрелде алды. Иса өзүни шөхратландырмак үчин дәл-де, адамларың аладасыны этмек үчин гудрат гөркезйәрди. Гелиң, Матта 14:14—21-нҗи аятлара (окаң) середелиң. Исаның шәгиртлери ве пай-пыяда гелйән улы мәреке ядав хем ачды. Шол себәпли шәгиртлер Исадан нәме этмелидигини сорадылар (Мат. 14:13). Иса нәме этди?

⁹ Ол барҗа бәш чөрекдир ики балыгы бөлүшдирип, бәш мүң эркек адама, аяллара ве чагалара пайламагы буюрды. Исаның адамлара, чагалара билдирен рехимдарлыгы ве гөркезен гудраты хайран галдырса герек! «Хеммелер ийип доянларындан» соңра артып галан чөрек дөвүмлеринден 12 себет долды. Хава, иймит болды! Иса адамлары дойруп, саг-аман өйүне бармакларының аладасыны этди (Лука 9:10—17).

10. Гарыплыга нәме болар?

¹⁰ Шу гүнлер адалатсыз ынсан хөкүмети адамларың зерурлыкларыны канагатландырып билмейәр. Кәбир доган-уялар ве 100 миллионларча адамлар зордан гүнүни гөрйәрлер. Эмма догручыл адамлар парахорлугың ве гарыплыгың тизден ёк эдилҗекдигине умыт эдйәрлер. Эгер сизде эрк-ыгтыярыңыз болса, адамзадың аладасыны этмезмидиңиз?! Гудратыгүйчли Аллатагаланың муны этмәге гүйҗи-де бар, ислеги-де. Тизден муны гөзүңиз билен гөрерсиңиз! (Зебур 72:16-ны окаң).

11. Сиз Месихиң тизден берекет берҗекдигине нәме үчин ынанярысыңыз ве бу сизи нәме этмәге хөвеслендирйәр?

¹¹ Иса үч ярым йыллап бирнәче ерлерде гуллук эдйәр (Мат. 15:24). Тизден ол Патыша хөкмүнде бүтин ер йүзүниң үстүнден хөкүм сүрер (Зеб. 72:8). Исаның гөркезен гудратлары әхли зада гүйҗүниң етйәндигини ве бизиң аладамызы этмек ислейәндигини субут эдйәр. Биз гудрат гөркезип билмесек-де, адамлара Худайың хош хабарыны гүррүң берип билйәрис. Мукаддес Язгыларда аҗайып гелеҗек барада айдыляр. Өзүни Ехова багыш эдип, онуң Шаяды болан адамлар гелеҗек барада гүррүң бермәге борчлудырлар (Рим. 1:14, 15). Бу хорматлы иш барада ойлансаңыз, Худайың  Патышалыгыны хөвес билен вагыз эдерсиңиз (Зеб. 45:1; 49:3).

12. Иса тебигатың канунына нәме үчин говы дүшүнйәр?

¹² Худай Ери ве ондакы әхли затлары яраданда, илкинҗи Оглы «усса» кимин Онуң янындады (Сүл. тым. 8:22, 30, 31; Кол. 1:15—17). Шол себәпли Иса тебигатың канунларына говы дүшүнйәр ве тебигы байлыкларың әхли ерде дең-дереҗеде болмагының аладасыны эдер.

13, 14. Исаның тебигата эрк-ыгтыярлыдыгыны гөркезйән ваканы гүррүң бериң.

¹³ Иса ер йүзүнде яшанда «Худайың гудраты» билен тебигата эрк-ыгтыярының етйәндигини субут этди. Меселем, Иса шәгиртлерини гүйчли тупандан халас эдйәр (Маркус 4:37—39-нҗы аятлары окаң). Бир алым шейле диййәр: «Маркус 4:37-де „гүйчли ел“ дийип терҗиме эдилен грек җүмлеси тупаны я-да гайы аңладяр. Ол диңе бир гүйчли ели дәл-де... апы-тупан турян ве гөк гүммүрдәп, йылдырым чакян хадысаны суратландыряр. Шонда гүйчли чабга ягяр ве әхли зат агдар-дүңдер боляр». Матта китабында хем «бир улы тупаның турандыгы» айдыляр (Мат. 8:24).

¹⁴ Исаның узаклы гүн вагыз эдип, гаты ядандыгыны гөз өңүне гетириң! Ол сүйҗи ука гидйәр. Бирденкә тупан туруп, толкунлар гайыгы эйләк-бейләк чайкаяр ве гайык сувдан долуп башлаяр. Иса не елиң сесини эшидйәр, не-де гайыгың ыраң атышыны дуйяр. Шәгиртлери горкудан яңа: «Бизи халас эт, я Реб, хеләкленип барярыс» дийип, Исаны укудан оярярлар (Мат. 8:25). Ол еринден туряр-да, еле кәйәп, көле: «Сем бол, дек отур!» диййәр (Мар. 4:39). Хава, Иса еле ве көле буйрук берйәр! Соңра нәме боляр? Мукаддес Язгыларда «ими-салалык» боландыгы барада айдыляр. Гөр, нәхили гудрат!

15. Гудратыгүйчли Худайың тебигатың Эесидигини нәме гөркезйәр?

¹⁵ Иса Ехованың берен гүйҗи аркалы гудрат гөркезйәрди. Хава, Гүдратыгүйчли Худай тебигатың үстүнден хөкүмдарлык эдйәр. Муны гечмишде болан бирнәче вакадан гөрсе боляр. Ехова Нух пыгамбере: «Еди гүнден соң, Мен кырк гиҗе-гүндизләп ере ягыш ягдырарын» дийип, тупаның болҗакдыгыны айтды (Гел. чык. 7:4). Мүсүрден чыкыш 14:21-де: «Реб... гүйчли гүндогар шемалы билен деңзиң сувуны ковды» дийилйәр. Юнус 1:4-де: «Реб деңзе гүйчли ел иберди; деңизде элхенч гай турды ве гәми чагшара гелди» дийилйәр. Биз Ехованың тебигатың Эесидигине бегенйәрис ве гелеҗеге ынамлы гараярыс.

16. Ярадыҗының ве Уссаның тебигата эрк-ыгтыярлыдыгы нәме үчин теселли берйәр?

¹⁶ Биз Ярадыҗының ве «Уссаның» тебигатың үстүнден эрк-ыгтыярлыдыгына бегенйәрис. Олар 1 000 йылың довамында ериң аладасыны эдер ве адамлара ховпсуз дурмушы совгат берер. Горкунч тебигы бетбагтчылыклар гечмишде галар. Тәзе дүнйәде тупандан, әгирт толкунлардан, вулканың атылмагындан ве ер титремеден хич ким горкмаз. Инди хич хачан адамлар тебигы хадысалар себәпли эҗир чекмез я-да арадан чыкмаз, себәби «Худайың чадыры... ынсанларың арасында» болар.  Шол дөври гөз өңүңизе гетириң! (Ылх. 21:3, 4). Месих Ехованың гүйҗи аркалы Мүңйыллыкда тебигатың үстүнден долы хөкүм сүрер.

17. Биз Худайың ве Иса Месихиң гөрелдесине нәдип эерип билерис?

¹⁷ Элбетде, биз Ехова ве Иса ялы тебигы бетбагтчылыкларың өңүни алып билмесек-де, кәбир затлары этмәге гүйҗүмиз етйәр. Биз нәме эдип билйәрис? Сүлейманың тымсаллары 3:27-де (окаң) говы маслахат берилйәр. Биз кынчылыга учран доган-уялара мадды ве рухы тайдан көмек эдип, теселли бермели (Сүл. тым. 17:17). Шейле-де биз тебигы бетбагтчылыга учранлары голдамак үчин элимизде барыны этмели. Меселем, тупан себәпли өйсүз галан дул аял: «Мен Ехованың гурамасының агзасыдыгыма ве онуң берйән мадды хем рухы көмегине өрән бегенйәрин» дийип миннетдарлык билдирйәр. Дурмуша чыкмадык уя тупаның өйүне етирен зыяныны гөрүп, рухдан дүшйәр. Ол доган-уяларың берен көмеги барада шейле диййәр: «Мен хайран галдым! Шатлыгымы сөз билен беян эдип билмейәрин... Ехова, көп саг бол!» Биз адамларың йүрекден аладасыны эдйән Ехова Худайымызың, Иса Месихиң ве бүтиндүнйә доганлыгымызың бардыгына өрән бегенйәрис.

18. Иса нәме үчин гудрат этди?

¹⁸ Иса «Худайың гудраты» билен ер йүзүнде гуллук этди. Ол гүйҗүни адамларда тәсир галдырмак я-да өз бәхбиди үчин уландымы? Элбетде, ёк! Биз индики макалада Исаның гөркезен гудратларының адамлара болан сөйгүсини аян эдйәндиги барада гүррүң эдерис.