Kristus​—e Aram Gelngin Got

“Kristus, . . . e aram gelngin Got.”​—1 KOR. 1:24.

RAYOG NI NGAM WELIY?

Mang boch i fel’ngin Jesus ni ke gagiyel u nap’an ni pilyeg e ran nge ngal’ ni wain u nap’an reb e madnom ko m’agpa’?

Mang e k’aring Jesus ni nge ngongliy fare maang’ang ni bay murung’agen ko Matthew 14:14-21?

Mang e ke dag Jesus u nap’an ni mocha’nag e nifeng nib gel?

1. Mang fan nrayog ni nge yog apostal Paul ni “Kristus, . . . e aram gelngin Got”?

 I DAG Jehovah gelngin u daken Jesus Kristus u boch e kanawo’ ni yira ngat ngay. Bay boch ban’en u murung’agen boch e maang’ang ni i ngongliy Kristus ni kan weliy ko fa aningeg i Gospel nra gelnag e michan’ rodad. Ma dariy e maruwar riy ni ku boor e maang’ang ni ki i ngongliy Jesus. (Matt. 9:35; Luke 9:11) Arrogon, i m’ug gelngin Got u daken Jesus. Aram fan nrayog ni nge yog apostal Paul ni gaar: “Kristus, . . . e aram gelngin Got.” (1 Kor. 1:24) Machane, mang e rayog ni nge rin’ e pi maang’ang ni i ngongliy Jesus ko yafas rodad?

2. Mang e rayog ni ngad filed ko pi maang’ang ni i ngongliy Jesus kakrom?

² I yog apostal Peter ni i ngongliy Jesus boch e maang’ang ara boch ban’en ni yira “ngat ngay.” (Acts 2:22) Pi maang’ang nem ni i ngongliy Jesus u nap’an ni immoy u fayleng e be dag ngodad e pi n’en nra rin’ ni fan ko girdi’ u nap’an nra gagiyegnag e fayleng boch nga m’on. Ku be dag yaan e pi maang’ang nra ngongliy u lan e bin nib beech e fayleng rok Got ni fan ko girdi’ u ga’ngin yang e fayleng. Pi maang’ang nem ni i ngongliy e ku be ayuwegdad ni ngad nanged rarogorow e Chitamangin. Ere, chiney e ngad weliyed dalip ko pi maang’ang nem ni i ngongliy, nge rogon nra yib angin ngodad e chiney i yan nga m’on.

 BA MAANG’ANG NI BE FIL NGODAD ROGON NI NGAUD GOLGAD

3. (a) Mu weliy boch ban’en ni buch ni ir e k’aring Jesus ni nge ngongliy e bin som’on e maang’ang rok. (b) Uw rogon ni gagiyel ni Jesus e ir be’ nib gol u nap’an ni immoy u Kana?

³ I ngongliy Jesus e bin som’on e maang’ang rok u nap’an reb e madnom ko m’agpa’ nni tay u Kana nreb e mach ni bay u lan yu Galile. Sana boor e girdi’ nra bad ko re madnom nem nga urngin ni un lemnag. Ma aram me m’ay e wain. Ma Maria ni chitiningin Jesus e ir bagayad e piin ni immoy u rom. Dariy e maruwar riy ni boor e duw ni i lemnag e pi n’en ni i yiiynag e profet ni bay rogon ngak Jesus, ya manang ni ir “Fak Got ni Th’abi Tolang.” (Luke 1:30-32; 2:52) Ere gur, manang ni bay gelngin Jesus ndawori dag ko girdi’? Ba tamilang nnap’an ni ur moyew Jesus u Kana, mar runguyew fa gali cha’ ni ngar mabgolgow ma dubrow ni nge buch ban’en nra k’aring e tamra’ ngorow. Ku manang Jesus nib milfan ngak fa gali cha’ ni yibe tay e madnom ko m’agpa’ rorow ni ngar ayuwegew e piin ni kar bad ko re madnom nem. Ere, pilyeg sogonap’an 100 e gallon e ran nge ngal’ ni tin “th’abi fel’ e wain.” (Mu beeg e John 2:3, 6-11.) Gur, ba milfan ngak Jesus ni nge ngongliy e re maang’ang ney? Danga’. I rin’ ni bochan e ba t’uf e girdi’ rok, maku be folwok ko Chitamangin ni bay u tharmiy ni ir be’ nib gol.

4, 5. (a) Mang e gad ra fil ko fa bin som’on e maang’ang ni ngongliy Jesus? (b) Mang e be dag fare maang’ang ni ngongliy Jesus ngodad u rarogon e par ko girdi’ boch nga m’on?

⁴ Boor e ran ni pilyeg Jesus nge ngal’ ni wain, ya ba gaman nrayog ni nge unum boor e girdi’. Ere, kam nang ko mang e gad ra fil ko re maang’ang ney? Gad be fil riy ni bochan nib m’agan’ Jesus ngay ni nge rin’ ban’en ni aray rogon ni fan ko girdi’, ma be dag ni kab ga’ fan laniyan’ e girdi’ u wan’row e Chitamangin. Yow l’agruw ndar siingow. Ere, chiney e ngam lemnag rogon nra fanay Jehovah gelngin u lan e bin nib beech e fayleng ni nge pi’ e ggan nib gaman ni nge kay girdien “gubin e nam” u fayleng.​—Mu beeg e Isaiah 25:6, BT.

⁵ Aygum lemnag! Ra taw nga ba ngiyal’ ma ra pi’ Jehovah e tin nib t’uf rok urngin e girdi’ ni bod rogon e ggan nib fel’ nge naun. Ere, ngad felfelan’gad nga urngin ban’en nrib manigil nra pi’ Jehovah ni fan ngodad u nap’an nra Paradisnag e re fayleng ney, ma aram e pi n’en ni gad be sonnag.

6. Mini’ e piin ni i fanay Jesus gelngin ni fan ngorad? Uw rogon nrayog ni ngad folwokgad rok?

⁶ Nap’an ni guy Moonyan’ rogon ni nge waliy Jesus ni nge pilyeg e malang nge ngal’ ni flowa, me siyeg Kristus ni nge fanay gelngin ni nge rin’ boch ban’en ni fan ngak. (Matt. 4:2-4) Machane, i fanay gelngin ni nge ayuweg e girdi’ ma be pi’ e tin nib t’uf rorad. Ere, uw rogon nrayog ni ngad folwokgad rok Jesus ni ir be’ ni ma lemnag e tin nib t’uf ko girdi’? I pi’ e athamgil nga laniyan’ e pi tapigpig rok Got ni ngaur “golgad ngak e girdi’.” (Luke 6:38) Ere gur, rayog ni ngad rin’ed e re n’ey ni aram e ngaud pininged boch e girdi’ nga tabinaw rodad ni ngad abichgad u taabang? Rayog ni ngad ted e tayim u tomuren e muulung ni ngad ayuweged be’ ni ke t’uf e ayuw rok, ni bod rogon ni ngad motoyilgad ngak reb e walag ni nge yan u daken e welthin rok, fa? Mang boch e ayuw nrayog ni ngad pied ngak e piin nib t’uf e ayuw rorad ko machib? Rayog ni nge m’ug ni gad be folwok rok Jesus u  nap’an ni gad ra athamgil ni ngad ayuweged boch e girdi’ u rogon nrayog rodad.

“URNGIN E GIRDI’ NRA KED NGAR FOSGAD NGAY”

7. Mang reb e magawon ndabi chuw u n’umngin nap’an ni ka bay e re m’ag nib kireb ney?

⁷ Gafgow ni ma tay e girdi’ e gathi reb e magawon ni ka fini tabab. I yog Jehovah ngak piyu Israel kakrom ni gubin ngiyal’ nra immoy e girdi’ u toobrad ni yad ba gafgow. (Deut. 15:11) Boch nga tomuren, me yog Jesus ni gaar: “Gubin ngiyal’ ma bay e piin ni gafgow romed.” (Matt. 26:11) Ere gur, be yip’ Jesus fan ni gubin ngiyal’ nra immoy e girdi’ u fayleng ni yad ba gafgow? Danga’, ya be yip’ fan ni n’umngin nap’an ni ka be par e re m’ag rok Satan ney, ma dabi tal e girdi’ ko gafgow. Ere, rib gel e felfelan’ ni gad ra tay u nap’an ni gad ra nang ni pi maang’ang ni i ngongliy Jesus kakrom e be dag e pi n’en nra buch u tan Gil’ilungun Got, ni aram e urngin e girdi’ ni yad ra gaman ko ggan ma yira pi’ e tin nib t’uf rorad!

8, 9. (a) Mang fan ni ngongliy Jesus e maang’ang nge pi’ gan bokum biyu’ e girdi’ ni kar muulunggad? (b) Uw rogon u wan’um e re maang’ang nem ni ngongliy Jesus?

⁸ I weliy fare psalmist murung’agen Jehovah ni gaar: “Ba gaman urngin ni be pi’ ngorad nge yan i aw ni ke fel’ u wun’rad ni yad gubin e tin ni ke yog ngorad.” (Ps. 145:16) Bochan ni “Kristus, . . . e aram gelngin Got,” ma boor yay ni i m’ug rarogon e Chitamangin rok, ma i pi’ e tin nib t’uf rok pi gachalpen. Gathi kemus ni i rin’ e re n’em ni bochan e nge dag ko girdi’ nib gel gelngin. I rin’ ni bochan e ri ma lemnag e girdi’. Chiney e ngad weliyed e thin ni bay ko Matthew 14:14-21. (Mu beeg.) I yib pi gachalpen Jesus nga rogned ngak ndariy e ggan ni nge kay e girdi’ ni kar muulunggad. Gathi kemus ni ke yim’ pi gachalpen Jesus ko bilig, ya ki magafan’rad ko fapi girdi’ ni yad be un ngak Jesus ni bochan e yad manang ni kur m’ad ko bilig ma ke aw parowrad. (Matt. 14:13) Ere, mang e nge rin’ Jesus?

⁹ I duruw’iy 5,000 e pumoon, ni kub muun ngay e ppin nge bitir nga lal yal’ i flowa nge l’agruw i nig. Nap’an ni gad ra lemnag rogon ni fanay Jesus gelngin ni nge ayuweg e pi girdi’ nem, ni kub muun e bitir ngay, ma gathi ra pi’ e athamgil nga lanin’dad? Ere, kay fapi girdi’ ni aram urngirad fapi ggan “ngar fosgad ngay.” Re n’ey e be dag ni boor e ggan ni pi’ Jesus ni nge kay fapi girdi’. Gathi kemus ni pi’ boch yang i flowa ni ngar teled e fan rorad ngay, ya pi’ e ggan nib gaman ni ngar ked nra pi’ gelngirad ko milekag ni yad ra tay u nap’an ni yad ra sul nga taferad. (Luke 9:10-17) Ma nap’an nra abichgad ngar mu’gad, ma aram mi nib ni kunkunuy e tin ni ke aw nde m’ay i kay me gaman 12 e dug riy!

10. Mang e ra rin’ Got ni fan ngak e piin ni yad ba gafgow ndab ki n’uw nap’an?

¹⁰ Bochan ni ke gel e chogow nge sasalap ko piin ni yad be gagiyeg e ngiyal’ ney, ma bokum miriay e milyon e girdi’ nib gafgow e par rorad. Ku bay boch i walagdad nder gaman e ggan ni ngar ked ngar “fosgad” ngay. Machane, ke chugur nga nap’an ni yira chuweg e sasalap ko am nge gafgow ni be tay e girdi’. Faan gomanga rayog rom, ma gathi ga ra pi’ e tin nib t’uf ko girdi’? Got ni Gubin Ma Rayog Rok e bay gelngin ni nge rin’ e re n’ey, maku baadag ni nge rin’. Ma gad manang ndab ki n’uw nap’an ma bayi rin’ e re n’ey. Arrogon, kari chugur ni ngad chuwgad u fithik’ e gafgow!​—Mu beeg e Psalm 72:16.

11. Mang fan ni ke mich u wan’um ndab ki n’uw nap’an me fanay Kristus gelngin ni nge ayuweg e girdi’ u ga’ngin yang e fayleng? Mang e ga baadag ni ngam rin’ ni bochan e re n’ey?

¹¹ Nap’an ni immoy Jesus u fayleng, mab achig yang e gin ni i machib riy, ma kemus ni dalip nge baley e duw nap’an ni i machib. (Matt. 15:24) Machane, nap’an nra tabab e Gagiyeg Rok u Lan Fare Biyu’ i Duw, ma ra ayuweg urngin e girdi’ ko tin nib t’uf rorad. (Ps. 72:8) Pi maang’ang ni i ngongliy Jesus e be ayuwegdad ni nge pagan’dad nrayog rok maku baadag ni nge fanay mat’awun ni nge ayuwegdad ngay. Yugu aram rogon ndabiyog ni ngad ngongliyed boch e maang’ang ni bod rogon Jesus, machane rayog ni ngad ayuweged e girdi’ ni ngar adaged ni ngar nanged e n’en ni bay ko  Thin rok Got. Be micheg e pi yiiy u Bible ndab ki n’uw nap’an me fel’ rogon e par ko girdi’. Bochan ni gadad e Pi Mich Rok Jehovah ni kad ognaged e yafas rodad ngak, ma gad manang nib milfan ngodad ni ngad ayuweged e girdi’. (Rom. 1:14, 15) Ere, nap’an ni gad ra fal’eg i lemnag e pi n’en ni bayi rin’ Kristus ndab ki n’uw nap’an, ma ra k’aringdad ni ngad adaged ni ngad weliyed ngak boch e girdi’.​—Ps. 45:1; 49:3.

RAYOG NI NGAR GAGIYEGNAGEW E YAFANG

12. Mang fan nrayog ni nga dogned nri manang Jesus rarogon e woldug, nge gamanman, nge day, nge yafang, nge ku boch ban’en u fayleng nrib fel’ rogon?

¹² Nap’an ni sunmiy Got e fayleng nge urngin ban’en ni bay riy, ma immoy Fak ni kari maagirag rok u tooben ni “bod be’ nib salap i maruweliy ban’en.” (Prov. 8:22, 30, 31; Kol. 1:15-17) Ere, ri manang Jesus rarogon e woldug, nge gamanman, nge day, nge yafang, nge ku boch ban’en u fayleng nrib fel’ rogon. Manang rogon ni nge maruwel ko pi n’em me gagiyegnag nib fel’ rogon.

13, 14. Mu weliy ban’en ni buch ni be dag nrayog rok Kristus ni nge gagiyegnag e yafang.

¹³ Nap’an ni immoy Jesus u fayleng ma i dag ni ir “gelngin Got” ni bochan e i yag rok ni nge gagiyegnag e yafang nge ku boch ban’en u fayleng. Am lemnag e n’en ni rin’ u nap’an ni yib bangi nifeng nrib gel u nap’an ni yad bay pi gachalpen u maday. (Mu beeg e Mark 4:37-39.) I yog be’ ni boor ban’en u murung’agen e Bible ni manang ni gaar: “Fare bugithin ni Greek [ni kan pilyeg ni “nifeng nrib gel” ko Mark 4:37] e kan fanay ni nge yip’ fan bangi lang ara bangi yoko’ nrib gel. Der yip’ fan ba wuchuth i nifeng ni yib taab yay . . . ya be yip’ fan bangi lang ni yib nrib gel e nifeng riy, ma be chub chub e dirra’, ma be aw e n’uw nrib gel. Ma nap’an ni thumur ma boor ban’en ni ke kirebnag.”

¹⁴ Am susunnag u lanin’um e n’en ni buch: Kari aw parawon Jesus ko machib ni ka i tay. Ma fare bowoch ni yad bay u langgin e be aw e nifeng nib gel ngay, ma be ma’tang e day nga langgin. Yugu aram rogon, ma bay Jesus u lan e bowoch ni be mol, ya ke t’uf ni nge toffan. Ma aram me yib pi gachalpen ra puged ya kar rusgad, me lungurad: “Ere ngad m’ad!” (Matt. 8:25) Me suwon Jesus u but’ nga lang, me gaar ko nifeng nge day: “Mmocha’!” ma aram me aw e cho’. (Mark 4:39) Ere, ke yog Jesus ko nifeng nge day ni nge mocha’. Ma mang e buch nga tomuren? Ke “aw e cho’.” Ere, riyul’ nrib gel gelngin Jesus!

15. Uw rogon ni ke dag Got ni Gubin Ma Rayog Rok nrayog ni nge gagiyegnag e yafang?

¹⁵ Gad manang ni Jehovah e ir e pi’ gelngin Kristus ni nge rin’ e pi n’ey. Ere, aram fan ni gad manang nrayog rok Got ni Gubin Ma Rayog Rok ni nge gagiyegnag e yafang. Am lemnag boch e kanawo’ ni ke rin’ e re n’ey riy. U m’on ni nge yib fare Ran ni Tharey e Fayleng, me yog Jehovah ni gaar: “Ka medlip e rran mu gu pi’ e n’uw nge yib nga daken e fayleng ni bayi par ni nge aw ni 40 e rran nge nep’.” (Gen. 7:4) Be yog e Exodus 14:21 ni gaar: “Me pi’ Somol e nifeng nib gel u lan e ngek nge thow ni reb e nep’.” Ma be yog e Jonah 1:4 ni gaar: “Me pi’ Somol bangi nifeng nib gel nge yan nga rigur; me cham e lang ngorad nib gel nge yan i par ni be chugur ni nge pil fare barkow.” Bochan ni kad nanged nrayog rok Jehovah ni nge gagiyegnag rogon ni ma mithmith boch ban’en u fayleng, ma be pi’ e athamgil nga lanin’dad. Ere, ba tamilang nrayog rok ni nge gagiyegnag e pi n’en ni bay u fayleng boch nga m’on.

16. Mang fan ni gad ba felfelan’ ni kad nanged ni bay gelngin e En Tasunmiy nge Fak ni kari maagirag rok ni ngar gagiyegnagew e yafang nge ku boch ban’en u fayleng?

¹⁶ Gad ba felfelan’ ni kad nanged ni bay gelngin e En Tasunmiy nge faen nib “salap i maruweliy ban’en” ni ngar gagiyegnagew e yafang nge ku boch ban’en u fayleng. Nap’an nra Gagiyeg Jesus u Lan Fare Biyu’ i Duw, ma gubin e girdi’ ni yad ra par u fithik’ e pagan’ ndab ki buch ban’en rorad. Ra taw ko ngiyal’ nem ma dab ki yib boch ban’en ni ma gafgow e girdi’ riy ni bod rogon e yoko’, ara tsunami, ara volcanoe, ara durru’. Rib gel e felfelan’ riy ni ngad lemnaged rarogon e par ko girdi’ e ngiyal’ nem ndakuriy e yoko’, ara durru’, ara boch ban’en ni ma yib ni yima gafgow riy. Ya ngiyal’ nem e ra yib i “par tafen Got nga fithik’ e girdi’”! (Rev.  21:3, 4) Rayog ni nge pagan’dad nra pi’ Got gelngin ngak Kristus ni nge gagiyegnag e yafang nge ku boch ban’en u lan Fare Biyu’ i Duw.

MU FOLWOK ROK GOT NGE KRISTUS E NGIYAL’ NEY

17. Mang reb e kanawo’ nrayog ni ngad folwokgad rok Got nge Kristus riy e ngiyal’ ney?

¹⁷ Gad manang ndabiyog ni ngad taleged e yoko’, ara durru’, ara ku boch ban’en ni ma yib ni yima gafgow riy ni bod rogon Jehovah nge Jesus. Machane, ku bay gelngidad nrayog ni ngad rin’ed boch ban’en. Ere, uw rogon ni gad ma maruwel ko re gelngin ney ni kan pi’ ngodad? Reb e kanawo’ nrayog ni ngad maruwelgad ngay e aram e ngad folgad ko n’en ni bay ko Proverbs 3:27. (Mu beeg.) Nap’an nra gafgow boch i walagdad, ma rayog ni ngad ayuweged yad ko tin nib t’uf ko par rorad, ara da fal’eged lanin’rad, ara da ayuweged yad ko tirok Got ban’en. (Prov. 17:17) Bod nrayog ni ngad ayuweged yad u tomuren reb e yoko’, ara durru’, ara ku boch ban’en ni ma yib ni yima gafgow riy. Baaray e n’en ni yog reb e ppin ni ke yim’ figirngin u tomuren ni yib reb e yoko’ ko gin ni ma par riy, me kirebnag e naun rok. I yog ni gaar: “Ri gu be felfelan’ ni gu bay u lan e ulung rok Jehovah ni bochan e gathi kemus ni kan ayuwegeg ko tin nib t’uf ko par rog, ya kun ayuwegeg ko tirok Got ban’en.” Ku bay reb e walag nib pin nib muchugbil nri kireban’ nib gel u tomuren ni kireb e naun rok u nap’an ni yib e yoko’ ko gin ni ma par riy. Tomuren ni yib boch e walag ra ayuweged, me yog ni gaar: “Dabiyog ni nggu weliy gelngin e felfelan’ ni kug tay . . . Jehovah, karim magar!” Gad ba felfelan’ ngay ni gad bang u ba ulung i walag ni yad bay u ga’ngin yang e fayleng ni yad ma lemnag e tin nib t’uf rok boch e girdi’. Ku reb e ban’en ni ku ma gelnag e felfelan’ rodad e gad manang ni ma lemnag Jehovah nge Jesus Kristus e pi tapigpig rok Got.

18. Mang e ga baadag u rogon e pi maang’ang ni i ngongliy Jesus kakrom?

¹⁸ Nap’an ni i machib Jesus u fayleng, ma i micheg ni ir “gelngin Got.” Machane, mang fan ni i rin’ Jesus e re n’em? Dariy ba ngiyal’ ni fanay gelngin ni nge rin’ boch ban’en ni nge yog e girdi’ e sorok riy ngak ara nge rin’ boch ban’en ni fan ngak. I fal’eg e pi maang’ang nem ni bochan e ba t’uf e girdi’ rok. Ma ireray e n’en ni gad ra weliy ko bin migid e article.

[Deer ni ngan pi’ e fulweg riy]