1. Tipagine Pauro aya ti ni wẽ “Kristo nga ga Mbori tandu”?

YEKOVA ayugu gako ome rogo Yesu yo ngba iiriwo agene. Akitabu wene pangbanga na dungu apai rogoho nanyakasa gaani idapase tipa gu iˈiriwoapai Yesu amangihe. Si nawira wa ko aima manga kura dungu iˈiriwoapai. (Mt. 9:35; Rk. 9:11) Nirengo, ga Mbori ome adu ni yuguyuguhe rogo Yesu yo. Sidu, wene ndupai adu kinaho Pauro aya ti ni wẽ: “Kristo nga ga Mbori tandu.” (1 Kor. 1:24) Ono wa vura duhe wo, gini ome rengbe ga Yesu iˈiriwoapai kadu na ni kurii gaani raka?

2. Ginipai rengbe ani ka wirikaha ti ga Yesu iˈiriwoapai?

² Gu mokedi nangia Petero aya Yesu amangi “iiriwo apai.” (Amo. 2:22) Gu nyanyaki asunge nga ga tandu Yesu aamangaha angia kpia gu bakere apai ko nika mangaha ti regbo gako zogarago ni bakindo. Si aayugo gu iˈiriwoapai Yesu nika mangaha rogo vovo zegino na auru kpotosende dunduko! Gi gako iˈiriwoapai re naundo rani a tipa ani ini asinoko dũ gbiati ga Bako. Ani wisigingo bete ga Yesu iˈiriwoapai na ki bingo gini sangbanapai rengbehe kadu na ni kurii gaani raka na ku mbatayo.

3. (a) Oni sakingo gupai naasa Yesu ko mangi bambata iˈiriwopai. (b) Wai du ga Yesu gamahe adu ni yuguyuguhe Kana yo?

³ Ti regbo gu pumbo rogatise namangi Kana Gariraya yo, Yesu amangi gako bambata iˈiriwopai. Si nawira wa agu aboro naaye sa pumbo aima nge kisusi. Ka si vurangia kina ginipai namangi, imekakue aima nyasa beyo. Maria na Yesu adu kina dagba agu aboro naaye sa gu pumbo re. Tipa dungu agarã, ri aima berãkurii gu sangbaanebi naakido he tipa pa wiiri, ri aima inoho nga gu gude re nika ngia “Wiri Mbori nga Bahe.” (Rk. 1:30-32; 2:52) Ya mo ri aima du na ida nga tandu kina rogoko yo ko ata manganga sunge na ni ya? Gupai ini ani he nga, Kana yo, Maria na Yesu adu na nunga gu vovo arogotise re na ki idi ka undoyo ti gu gberãrago ka ziyo. Yesu aima inoho nga gamahe nga gupai si aida boro mangihe amanga. Sidu, ko amangi iˈiriwopai ki sa ime nga aritere 380 ku rogo wene “imekakue.” (Oni gedi Yoane 2:3, 6-11.) Ya mo Yesu adu ni zizi ko tipa ka manga gi iˈiriwopai re? Oó. Gupai naasa ko ko mangihe nga ko adu na nyemu agu aboro re na ko aˈasada ka wirika gu sino Bako nga ga gamahe.

4, 5. (a) Ginipai ani awirikaha ti ga Yesu bambata iˈiriwo mangapai? (b) Gu iiriwopai namangi Kana yo nayugo ginipai furani tipa raka ku mbatayo?

⁴ Yesu amangi iˈiriwopai tipa ka fu wene imekakue fu dungu aboro. Ya mo oni bi gupai gako iˈiriwopai ayugoho furani? Pa ida Yesu ka manga ngbatunga iˈiriwopai wa gere nayugo gupai furani nga ko na Bako nabipa ga aboro berãpai na kikiipaha. Ko na Bako nga airaringi te. Awere oni berẽnga kurii wai Yekova nika mangasunge na gako tandu ngba wene gene rogo vovo zegino tipa ka gamahe ni bakerehe “fu aboro dunduko” rogo zegino.​—Oni gedi Yesaya 25:6.

⁵ Oni berẽnga kurii gipai re! Regbo nika da nga gu ga aboro azingo na nyemuapai nika ringbisatihe, ngbatunga gu du wa wene riahe na wene akporo. Gaani nyemuse ni kiingo akio wa ani amaaberã rani tipa gu regbo Yekova nika gama riahe furani kpaima rogo Paradizo kpotosende.

6. Ada Yesu amangisunge na gu gako tandu nga ga manga iˈiriwopai fuyo, na wai rengbe ani ka wirikako?

⁶ Si nafu ngbarago furani ka bi gupai nga ho Satana aˈasadi Yesu ni ko sa mbia ni kpakuto, Yesu aima ka ka mangasunge na tandu nga ga manga iiriwopai tipa ka manga kina gupai nangba ti boroko. (Mt. 4:2-4) Ono ko amangisunge na gako tandu tipa ka karagapai fu Satana na ki mbiisi gu nyemupai nga ga kura aboro. Wai rengbe ani ka wirika gi ga Yesu nyemuse tipa aboro re? Ko angarasi ga Mbori amoyambu i wiriki ka “fu he.” (Rk. 6:38) Ya mo ani rengbe ka yugo gu wene sino nga ga gamahe fu kura aboro ni yamba ani yo i ye ka ri riahe na ani watadu tipa gu pumbo nga ga toro? Ya mo ani rengbe ka fu bete gaani regbo fuyo fuo dunguratise, ka undo agu aboro du na zingo, wa degatue fu gu wirina naida i undo ni ti gani gumbapai? Gini ngbatunga undo rengbe ani ka fuhe fu agu aboro naida na undo  gene tungusapai yo? Ani nayugoho nga ani ima wirika ga Yesu sino nga ga gamahe ho ani agama ahe ni fu aboro na kini undo yo rogo toro yo wa rengbe omerani na ni.

7. Ginipai nika duadu wa gi sino raka re nikaa ndu kindi ku mbatayo?

⁷ Rungo nga vovopai te. Yekova aya fu aYisaraere wẽ rungorungo aboro ahenga du rogo gayo ringara te. (Pa Rug. 15:11) Fuo kama agarã kusa, Yesu aya: “Rungorungo aboro du na oni waragoagira.” (Mt. 26:11) Ya mo Yesu aaida ka ya rungorungo aboro nika du ti aregbo dunduko auru kpotosende ane? Oó, ko aaida ka ya rungorungo aboro nika duadu wa gi sino raka re nikaa ndu ku mbatayo kindi. Sidu, nangba wai ini ani gupai nga ga Yesu iˈiriwopai nayugopa gu wene apai nika manga rogo ga Mbori Kindo, nga aboro nika du na bakere riahe beyo tipa ka rihe na kini mbiki!

8, 9. (a) Ginihe naasa Yesu ko mangi iˈiriwopai tipa ka riga akutu aboro? (b) Ginihe ngba tiro nibipa riga aboro nga akutu?

⁸ Bake papara Atambuahe aya fu Yekova wẽ: “Mo naza bero, ki nimbisi gu nyemuhe nga ga unga ahe dunduko.” (Tam. 145:16) “Kristo nga ga Mbori tandu” ayugu sino Bako ni zaka ko beko na ki mbiisi gu nyemuapai nga ga apefuoko. Anga gupai ko amangihe re angia yugo ome gbua te. Berãpa aboro naasa ko ko mangihe wo. Ani wisigingo Matayo 14:14-​21. (Oni gedihe.) Ga Yesu abawiriki aye fuoko ka pe pa riahe. Anga kina yo gomoro aamanga yo te, ono i aabaka bangiriyo tipa gu gomoro na mbugo naadu tigu rimbasa aboro naapefuo Yesu nindu yo ku rogo gu gbata re. (Mt. 14:13) Ginipai ka ko amangihe?

⁹ Yesu arigi akumba 5,000 kodihe na adee gbiati agude na atĩo ue gbiati kpakuto bisue! Ya mo kiki azionga rani ka berãpa gu gene Yesu amangisunge na gako tandu nga ga iˈiriwoapai ka ngerafuo aboro gbiati rukutu agude te? Gu rimbasa aboro re “ki riki he dunduko, ki mbiki.” Agi afugo re nayugo gupai nga riahe aima du kpaima. Anga Yesu asayo i hia kina hiahia kpakuto te, ono ko afu riahe fuyo si undo yo wa i ka ga ngba gbanga nunguro ku rogo akpuyo. (Rk. 9:10-​17) Yangada riahe anye nga abaga 12!

10. Gini ariapai nika manga barambeda nibipa arungo?

¹⁰ Areme, kama amirioni aboro gayo azingo aringbisanga tihe ya mbiko gu gbegberẽ zogarago nga ga aboro. Zavura agu awirinarani duadu na bete ahe nga gu rengbe ka ngerafuo gayo zingo, si ‘ambisanga’ gayo nyemuapai dunduko te. Ono tie, regbo ima mbeda nga gu aboro giasangba nika gbia ngbarago rogo zegino zanga irairapai na rungo. Ani ya nga ka mo nidu na ome, ya mo ka mo mbisinga agu azingo du aboro na ni te? Gu Mbori Duna Tanduapai Dũ na kina ome beko gbiati nyemu ka manga gupai re, na si nga gupai ko nika mangaha. Nirengo, undo nika daada barambeda!​—Oni gedi Atambuahe 72:16.

11. Tipagine du oni ti ni na kido nga Kristo nika mangasunge na gako tandu tipa zegino dunduko, na ginipai si afõngbaduroniyo oni mangihe?

¹¹ Ho Yesu adu ni auru kpotosende ane, ko amangisunge rogo wiri tooni dagbarago tipa wiri guru regbo nga agarã biata na beberehe. (Mt. 15:24) Wa du ko awere ni Bakindo, gako dagbarago nika du rogo atukpu kpotosende dunduko biama. (Tam. 72:8) Ga Yesu iˈiriwo mangaapai nakido rani tipa gu tandu du ko na ni gbiati gu nyemupai du ko na ni ka mangasunge na gako pagbia ka ye na wenepai fu aboro. Wa vura duhe nga ka ani mangingo iiriwoapai te, ani ima rengba ka gbeberã aboro kuti Fugo Mbori. Gu sangbaanebi du rogo Ziazia Kekeapai na kidohe tipa gu weneapai du ku mbatayo. Wangia  ani aDezire Yekova du na wene inohe tipa ku raka mbatayo, ya mo ani abingo ho nga ani na bape kure aboro kurirani te? (Rom. 1:14, 15) Berãkurii gipai re fõnga ngbaduraniyo afõ ani tungusi wene pangbanga nga ga ga Mbori Kindo fu kura aboro.​—Tam. 45:1; 49:3.

12. Tipagine du ani ti ni na kido nga Yesu ima rugatiko na pa kpotosende wenengai?

¹² Nidu bangisa wiri Mbori patiko “wa bangbasia boro sunge,” ko aundo Mbori ko kusi kpotosende na agu ahe du rogoho. (Snz. 8:22, 30, 31; Koro. 1:15-​17) Rogo gi gene re, Yesu ima rugatiko na aũ kpotosende wenengai. Ko ima ino wai ka mangasunge na agu ahe du auru kpotosende na ki kparakaha ti aboro rengbe arengba.

13, 14. Oni funga gu kpiapai nayugo wai rengbe Kristo ka za ayuge na abazigizo.

¹³ Ho Yesu adu ni auru kpotosende, ko ayuguhe nga ko nga “ga Mbori tandu” ni zako ayuge na abazigizo. Oni bingo gupai Yesu amangihe tigu regbo ime aasungburo na gu raka nga ga gako abawiriki kidu ngbapai. (Oni gedi Marako 4:37-​39.) Wene bawirikipai tipa Ziazia Kekeapai sa aya: “Gu pa-Giriki nga [“nisungbura” du rogo Marako 4:37] i asaha re, i namangasunge a na ni tipa kere bavugumo. Anga si angia kungbo wege te, ono gu kere wege naadu na agumba rogoho, bakere na mai, na kini bafu ahe dunduko kusande.” Gu pangbanga Matayo akehe nayambaha nga “bakere bayuge.”​—Mt. 8:24.

¹⁴ Oni bingo gi kpiapai re: Kristo ima mbu be sunge tungusapai. Ngiri-baime tona ka foka kurungba na ime kini sungburo ku rogoho. Ono wa vura duhe nga bavugumo namanga na kurungba kini fuko tihe, Yesu nara ara gako. Kpotoko ima mbu na si naida ko ongodi. Gu gunde du ti gako abawiriki sayo i zingisi ko niya: “Gbia mo bátasi rani; ani nakpi.” (Mt. 8:25) Fuo ko tumba tiko, ko za gu yuge re na ime re na agu afugo nga: “Mo zéredi, ki ru zaa!” na gu bavugumo re ki ru nibasa. (Mk. 4:39) Ni sangbana gipai re, Yesu aza wege na ime si ru zaa, na si ki mangi kinawo. Sangbanaha angia gine? “Rago ki zeredi azereda.” Nairiwo gu tandu Yesu ayuguhe re!

15. Wai du gu Mbori Duna Tanduapai Dũ nayuguhe nga ko ima rengba ka nyasariipa ayuge na abazigizo?

¹⁵ Yekova du nga mburu gu tandu du ti Yesu, si du ani na ndupai berani ka ida kuti gupai nga Mbori Duna Tanduapai Dũ na kina ome beko tipa rugusa ayuge na abazigizo. Ani bingo bete akpiapai. Mbata fu Ime Akangbii, Yekova aya: “Fuo rame saba mi akéda mai si na ana ku auru kpotosende tipa uru 40 na yuru 40 a.” (Bam. P. 7:4) Wa kina gure a, ani nagedapai rogo Gate 14:21 naya: “Yekova ki gbisi baime ku sa yo ni gugugu yuge naya uroyo.” Na ani nagedapai rogo Yona 1:4 nga: “Yekova akedi bavugumo yuge ku bangiri baime, baime ki nisungbura asungbura bakere gbe, si du bakurungba ki du wa si nikakua akua dũ.” Si ni pangbarago ka ino gupai nga Yekova rengbe arengba ka rugusa gi ahe re. Si ziazia tie nga, gu zegino nika du ku mbatayo, wene boro du nika ngera fuani.

16. Tipagine duhe ti ni furani ni wenepai ka ino gupai nga Bakusirani na bambata Wiriko na ome kurii ayuge na abazigizo?

¹⁶ Nairiwo wai ngbaha nga ani berẽkurii gu ome du Bakusiahe na ni gbiati gako “bangbasia boro sunge.” Ho i nika maaberã yo ni fuo kpotosende tipa agarã 1,000, aboro dunduko bayo nika du ni wenehe. Gu kere agberãngo naye be abavugumo adunga ti ni berewe te. Ndupai adunga ho boro gunde be kere bavugumo, sungburosungburo  aime, gu fofoi aime we nagba ti ambia watadu abazigizo rogo vovo zegino te. Nairiwo wai ngbaha ka berãkurii gu regbo agi ahe re nika imongo boro watadu ka imisa ni ya mbiko “ga Mbori banye [nika] du na aboro”! (Yugo. 21:3, 4) Ani rengbe kadu na kido nga gu ga Mbori ome du Yesu na ni re nika za agi apai re vuru Agarã Kutu yo.

17. Gini gene rengbe ani ka wirika Mbori na Yesu ngbaha awere?

¹⁷ Rengo ngaha nga, ani arengbanga ka za ayuge na abazigizo wa Yekova na Yesu te, ono bete ome kina tirani. Wai du ani amangasunge na gu ome re? Gene sa nga manga gupai du rogo Asanza 3:27. (Oni gedihe.) Ho kerepai agbia awirinarani ni, ani rengbe ka fu wasa fuyo na ki undo yo rogo borose, nunga, na rogo toro yo. (Snz. 17:17) Ni kpiapai, ani rengbe ka undo yo rogo borose na rogo toro yo fuo manga gberãngo yo. Oni degenga turoni kuti agu afugo tambuahe wirinarani ni dekurugbo apehe fuo bakere bavugumo gbarasi kpuri, ri aya: “Mi na bakere tambuahe tipa ka du rogo ga Yekova riigbu, anginga tipa kina agu aundo nga ga borose ya ono tipa gu nga ga toro.” Oni bingo afugo kura wirinarani ata dianga kumba ya naabi tiri nga sunge tiri te fuo ri bi wai bavugumo agbarasi gari bambu. Fuo ri gbia undo, ri aya: “Mi ainongo gupai rengbe mi ka gumbaha te! Mi arengbanga ka pe pa gu ngbarago du mi na ni a te . . . Tambuahe foro Yekova!” Ani na ngbarago nga ani nga papara gu ndikidi awirina du rogo zegino dunduko na berãpa agu azingo nga ga kura aboro. Gu bakere ngbarago ani agbiaha nga Yekova na Yesu naberãpa ga Mbori aboro aberã.

18. Ginipai rago angba tirani na ni nibipa gu ndupai nanaasa Yesu ko nimangi iˈiriwoapai?

¹⁸ Ti regbo ga Yesu tungusapai, ko ayugu gupai nga ko nga “ga Mbori tandu.” Ono gako ndu mangapai angia gine? Pai ho nayugo na ni nga ko anaamangasunge na gako ome tipa ka ba iriwoko ti aboro watadu ka fu undo fu tiko te. Nirengo, gu iˈiriwoapai Yesu amangihe nayugo gu nyemuse du ko na ni tipa aboro. Ani nika bipai tipa gipai re rogo gu kekeapai nika ngbefuo gere.