1. Kwa ki bokou dimoun i krwar i normal?

NOU viv dan en lemonn vreman imoral. Par egzanp, dan bokou pei omoseksyalite e fer sèks avek en dimoun ki ou pa’n marye avek i ganny konsidere konman normal. Bann film, liv, sanson ensi ki lavertisman i ranpli avek limoralite seksyel. (Ps. 12:8) Vi ki limoralite seksyel i partou dan lemonn, ou kapab demande, ‘Eski i vreman posib pour viv en lavi pir moralman?’ Nou kapab dir avek konfyans ki larepons i wi. Avek led Zeova, bann vre Kretyen i kapab reste pir moralman.—Lir 1 Tesalonisyen 4:3-5.

2, 3. (a) Akoz nou bezwen lalit kont nou bann move dezir? (b) Ki nou pou diskit lo la dan sa lartik?

² Me premyerman, nou bezwen rekonnet ki pour nou kapab viv en lavi pir moralman, nou bezwen rezet bann dezir imoral. Zis parey labwet lo en lanmson i atrakte pwason, bann panse ek dezir imoral ki pa ganny rezete deswit i kapab atrakte en Kretyen pour komet limoralite seksyel. Avek letan, sa move dezir i vin sitan for ki sa lanvi pour fer pese i ganny formen. Ler sa i arive, menm en serviter Zeova i  kapab pare pour satisfer son dezir ler i ganny sans. Wi, “dezir . . . i donn nesans pese.”—Lir Zak 1:14, 15.

³ I fer lapenn pour mazinen ki en move dezir i kapab fer nou komet en pese grav. Me i ankourazan pour konnen ki si nou anpes bann move dezir pran rasin dan nou leker, nou pa pou komet limoralite seksyel e sibir bann move konsekans. (Gal. 5:16) Annou diskit lo sa trwa pwen ki pou ed nou lalit kont bann move dezir: nou relasyon avek Zeova, konsey ki ganny trouve dan Labib e led bann Kretyen matir.

4. Akoz i enportan pour nou apros avek Zeova?

⁴ Labib i ankouraz bann dimoun ki anvi “apros avek Bondye” pour “lav zot lanmen . . . e pirifye zot leker.” (Zak 4:8) Ler Zeova i nou pli bon Zanmi, nou fer zefor pour fer sa ki fer li plezir dan tou laspe nou lavi, sa i osi enkli nou panse. Si nou mazin lo bann keksoz ki pir, ekselan e merit felisitasyon, nou pou annan “en leker pir.” (Ps. 24:3, 4; 51:6; Fili. 4:8) I vre ki Zeova i konpran ki nou enparfe e ki nou kapab konmans mazin bann keksoz imoral. Me nou rekonnet ki nou kapab sagrin li si nou kontinyen annan bann panse imoral olye fer tou sa ki nou kapab pour rezet zot. (Zen. 6:5, 6) Ler nou gard sa antet nou pou pli determinen pour gard nou bann panse, pir moralman.

5, 6. Ki mannyer lapriyer i kapab ed nou rezet bann dezir imoral?

⁵ En fason ki nou demontre ki nou depan totalman lo Zeova se ler nou koz avek li dan lapriyer konsernan nou bann panse imoral. Ler nou apros avek Zeova dan lapriyer, i apros avek nou an retour. I donn nou son lespri sen ki ranforsi nou determinasyon pour pa mazin bann keksoz imoral e donn nou lafors pour reste pir moralman. Alor, dan nou lapriyer annou dir Bondye ki nou vreman anvi ki nou panse i vin en keksoz agreab pour li. (Ps. 19:14) Eski nou demann li pour egzamin nou leker pour vwar si nou annan okenn “keksoz ki anmenn douler,” parey move dezir oubyen tandans ki kapab fer nou komet pese? (Ps. 139:23, 24) Eski nou fer li en labitid pour demann li pour ed nou gard nou lentegrite ler nou ganny tante pour komet pese?—Mat. 6:13.

⁶ I kapab ki lafason ki nou’n ganny elve oubyen sa ki nou’n fer dan lepase in fer nou kontan bann pratik ki Zeova i defann. Me, i kapab ed nou fer bann sanzman ki neseser pour ki nou kapab kontinyen servi li dan en fason ki akseptab. Menm Lerwa David ti rekonnet sa. Apre ki i ti’n komet adilter avek Bat-Seba, i ti priy Zeova e dir: “Kree dan mwan en leker pir e met dan mwan en nouvo lespri, enn ki ferm.” (Ps. 51:10, 12) Vi ki nou enparfe, nou ganny atire pour fer bann keksoz ki mal, me Zeova i kapab ed nou devlop en bon leta lespri ki anvi obei li. Menm si bann move dezir ki dan fon nou leker i tant pour anvair nou lespri e fer nou oubliy bann panse ki pir moralman, Zeova i kapab gid nou pour nou obeir son bann komannman e reisi met zot an pratik dan nou lavi. I kapab anpes nou bann move panse domin nou.—Ps. 119:133.

7. Ki mannyer Parol Bondye i kapab protez nou kont bann move panse?

⁷ Ler nou demann Zeova pour son led dan lapriyer, i kapab reponn nou  atraver son Parol, Labib. Sa lasazes ki ganny trouve dan Parol Bondye i “premyerman pir.” (Zak 3:17) Si nou lir Labib tou le zour e medit lo sa ki nou aprann, sa pou ed nou protez nou lespri kont bann panse imoral. (Ps. 19:7, 11; 119:9, 11) Deplis, dan Labib i annan bann legzanp ek konsey spesifik ki kapab ed nou rezet bann move dezir ek panse.

8, 9. (a) Kwa ki ti fer en zenn onm komet limoralite seksyel? (b) Dan ki sityasyon dan nou letan nou kapab aplik Proverb sapit 7?

⁸ Proverb 5:8 i dir: “Reste byen lwen avek [sa fanm imoral], pa bezwen al o bor larantre son lakaz.” Dan Proverb sapit 7, nou vwar ki danze i annan si nou pa pran sa konsey aker. Nou lir konsernan en zenn onm ki al marse o bor lakaz en fanm imoral. Fernwanr pe fer. Sa madanm ki’n sanz dan en fason endesan i apros li dan kwen semen. I tyonbo li e anbras li. I dir li bann parol ki eksit son bann move dezir ki i pa kapab kontrole. Zot komet limoralite seksyel. I paret ki sa zenn onm pa ti’n plàn pour komet limoralite seksyel. I napa leksperyans, ni bon zizman. Kantmenm sa, i bezwen sibir move konsekans son aksyon. Si zis selman i  ti’n reste byen lwen avek sa madanm!—Prov. 7:6-27.

⁹ Eski i kapab arive ki nou osi nou fer bann move desizyon e met nou lekor dan bann sityasyon ki eksit bann move dezir akoz nou napa bon zizman? Par egzanp, aswar serten channel lo televizyon i zwe bann progranm ki imoral, alor i kapab danzere pour zis sanz channel lo televizyon zis pour gete kwa ki pe zwe. I kapab osi danzere zis pour klik lo bann link lo Enternet san konnen kwa ki nou pe ouver, swa servi bann chat rooms e al lo bann sit web ki envit nou pour get pornografi oubyen ofer bann lezot servis seksyel. Eski i kapab ki dan sa bann sityasyon nou pou rankontre en keksoz ki eksit bann move dezir e fer li pli difisil pour nou reste pir moralman?

10. Akoz i danzere pour rod latraksyon? (Vwar portre lo paz 13.)

¹⁰ En lot fason ki Labib i ed nou se ki i donn nou konsey lo ki mannyer pour tret en dimoun lot sèks. (Lir 1 Timote 5:2.) Bann prensip Labib i montre nou klerman ki nou pa devret rod latraksyon avek lezot. Serten i kapab krwar ki zot konportman, zes ek bann fason gete romantik i pa mal dan li menm parski i pa enplik kontak fizik. Me rod latraksyon ouswa les en dimoun fer lapros i kapab fer en dimoun devlop bann move panse ki kapab fer li komet limoralite seksyel. I’n deza arive avan e i kapab ariv ankor.

11. Ki bon legzanp Zozef in kite?

¹¹ Zozef ti azir dan en fason saz dan sa domenn. Ler madanm son met Potifar, ti esey sedwir li, Zozef ti rezet son bann lapros. Me i pa ti arete. Zour apre zour i ti demann li pour reste avek li. (Zen. 39:7, 8, 10) En spesyalis Labib ti dir ki dan en sans madanm Potifar ti pe dir: “‘Annou reste nou tousel pour en pti pe letan,’ an krwayan ki [Zozef] ti pou pran sa premye pa.” Par kont, Zozef ti determinen pour pa zanmen ankouraz oubyen toler son bann lapros seksyel. I ti rezet son bann lapros e i pa ti rod latraksyon avek li. Sa ti anpes okenn move dezir pran rasin dan son leker. Ler i ti esey fors li pour fer sèks avek li, Zozef ti azir deswit. “I ti kit son lenz dan son lanmen, taye e al deor.”—Zen. 39:12.

12. Ki mannyer nou konnen ki sa ki nou gete i kapab afekte nou leker?

¹² Labib i osi averti nou ki sa ki nou gete i kapab tronp nou leker. I kapab eksit bann dezir imoral oubyen fer li vin pli for. Zezi ti averti son bann disip ki tou “dimoun ki get madanm en lot zonm avek dezir in deza komet adilter avek li dan son leker.” (Mat. 5:28) Rapel ki ti arive dan ka Lerwa David. “Depi lo twa [David] ti vwar en madanm pe bennyen.” (2 Sam. 11:2) I pa ti aret gete pour mazin en lot keksoz. Sa ti fer ki i ti an dezir en madanm marye e i ti pran bann pa neseser pour komet adilter avek li.

13. Akoz nou bezwen ‘fer en lalyans avek nou lizye’ e ki sa i enplike?

¹³ Pour nou kapab lalit kont bann panse imoral, nou bezwen ‘fer en lalyans avek nou lizye’ parey Zob. (Zob 31:1, 7, 9) Nou bezwen fer en lagreman avek nou lekor e deside pour kontrol nou lizye pour pa get en lot dimoun avek en dezir imoral. Sa i enkli pa get bann portre ki eksit bann dezir seksyel, ki swa zot lo en konpiter, poster, magazin oubyen okenn lezot landrwa.

14. Ki nou kapab fer pour reste pir moralman?

 ¹⁴ Si okenn keksoz ki nou’n diskite ziska aprezan in fer ou remark bann sanzman ki ou bezwen fer pour lalit pli byen kont bann move dezir, pa tarde pour azir. Pare pour aksepte konsey Labib ki kapab ed ou pour pa komet pese, koumsa ou pou reste pir moralman.—Lir Zak 1:21-25.

15. Si nou pe lalit avek bann move dezir seksyel, akoz i enportan pour rod led?

¹⁵ Si nou pe lalit avek bann move dezir seksyel, nou osi kapab rod led avek bann frer ek ser Kretyen. Byensir i pa fasil pour diskit sa bann problenm personnel avek lezot. Me ler nou annan kouraz pour rod led avek en Kretyen matir e aksepte son konsey, sa i kapab anpes nou zistifye okenn move dezir. (Prov. 18:1; Ebr. 3:12, 13) Ler nou koz konsernan nou bann febles avek en Kretyen matir ki kalifye, sa i kapab ed nou pour rekonnet serten keksoz ki nou pa ti’n realize. I osi kapab ed nou fer bann sanzman ki neseser pour ki nou reste dan lanmour Bondye.

16, 17. (a) Ki mannyer bann ansyen i kapab ed bann ki pe lalit avek bann move dezir? Donn en legzanp. (b) Akoz i bon pour bann ki get pornografi rod led deswit?

¹⁶ Se bann ansyen ki sirtou kalifye pour ed nou. (Lir Zak 5:13-15.) En zenn onm Brezil ti lalit avek bann move dezir pour plizyer lannen. I dir: “Mon ti konnen ki Zeova pa ti kontan sa ki mon ti pe mazin lo la, me mon ti tro kanmi pour dir lezot ki mannyer mon ti pe santi.” Erezman, en ansyen dan son kongregasyon ki ti enkyet pour li, ti ankouraz li pour rod led. Sa zenn onm i dir: “Mon ti sirprann ki mannyer bann ansyen ti sitan zantiy avek mwan, zot ti bokou pli zantiy e konpran mwan plis ki mon santi mon ti merite. Zot ti ekout mon bann problenm atantivman. Zot ti servi Labib pour fer mwan rapel ki Zeova i kontan mwan e zot ti priy avek mwan. Sa ti fer li pli fasil pour mwan aksepte sa konsey Labib ki zot ti donn mwan.” Plizyer lannen pli tar apre ki sa frer in fer bann bon progre spirityel i dir: “Mon realize ki kantite i enportan pour rod led dan plas esey anmenn nou bann fardo nou tousel.”

¹⁷ Si ou annan bann dezir imoral akoz ou pe get pornografi, ou napa swa ki pour al rod led. Pli ou tarde pour rod led, pli i annan sa danze ki ou bann move dezir i ‘formen e donn nesans pese.’ Si sa i arive, ou pou bles lezot e anmenn repros lo non Zeova. Bokou bann serviter Zeova in aksepte led akoz zot anvi fer Zeova plezir e reste dan kongregasyon Kretyen.—Zak 1:15; Ps. 141:5; Ebr. 12:5, 6.

18. Ki ou determinen pour fer?

¹⁸ Lemonn Satan pe vin deplizanpli imoral, alor nou kapab asire ki Zeova i fyer ler i vwar son bann serviter pe fer zefor pour gard zot panse pir e pour swiv son bann bon standar moral. Alor, nou tou annou reste determinen pour reste pros avek Zeova e aksepte gidans ki i donn nou atraver son Parol ek kongregasyon Kretyen. Ler nou reste pir moralman nou pou annan satisfaksyon ek lape lespri la konmela. (Ps. 119:5, 6) Dan lavenir, apre ki Satan pou’n ganny detrir, nou pou annan sa privilez pour viv pour touzour dan en lemonn san son move lenfliyans.