1. ¿Kasa saainjaka maʼin wayuu maaʼulu?

MAAʼULU YAA, watta naalii na wayuu mojutkana amüin tü nümakat Maleiwa. Aainjiraashii naya nakuwaʼipa sümaa nnojoluin kasaalüin naya, eesü jierü aainjiraaka sukuwaʼipa sümaa wanee jierü, wanee toolo nümaa wanee toolo. Jaʼyasü maʼin tia suluʼu peliikula, karaloukta, muusika jee tü publicidad münakat (Sal. 12:8). Mayaapejeʼe müin tü mmapaʼakat, nükaaliinjeena waya Jeʼwaa süpüla ayatüinjatüin wulein wakuwaʼipa (paashajeʼera 1 Tesalónica 4:3-5).

2, 3. (1) ¿Jamüsü wasünneʼeramaatüinjatka suluʼujee wekii tü kasa yarüttüsükat? (2) ¿Kasa wekirajaainjatka anain sünain ekirajaayakat tüü?

² Sutuma joʼuujiraain waya sümaa kaainjalaa, kamalainsü wamüin aaʼinraa tü kasa mojusü suchuntaakat waaʼin. Müshii aka saaʼin tü jime oʼunakat sünainmüin tü shimeeyakat. Süntajaale wanee kasa yarüttüsü wekiiruʼumüin, wasünneʼeramaatüinjatü shia suluʼujee wekii. Nnojorüle müin shia watuma, suchuntaʼaleejeeria waaʼin shia, shiasaʼa wamüiwaʼapa waya, waainjeerü tia kasa mojusükat (paashajeʼera Santiago 1:14, 15). Süpüla talatüinjatüin naaʼin Jeʼwaa wamaa, wayuʼlüinjatü suluʼujee wekii tü kasa yarüttüsükat.

³ Eejashaatainjatü waaʼin suulia jülüjakuʼu müin waaʼin kasa yarüttüsü. Nnojoleena waya aainjiraain wakuwaʼipa  sümaa wanee wayuu nnojotkat waʼwayuusein müleka wayouktajaale sümaa tü kasa mojusükat. Nnojoleena waya süsalain waainjala (Gal. 5:16). Süpüla eejiraain waya sümaa tü kasa mojusü antajaʼawaikat suluʼu wekii, ekirajüneena waya sünain apünüinsü kasa sünain ekirajaayakat tüü: aleewainjana waya nümaa Jeʼwaa, oonooinjana waya sümaa tü sümakat tü Wiwüliakat jee nakaaliinjeena waya na laülaashiikana.

4. ¿Jamüsü anaka aleewale wanee wayuu nümaa Maleiwa?

⁴ «Juuʼulaa suulia jaainjala [...] juuʼulaa suulia yarüttaa aaʼin», müsü tü Wiwüliakat namüin na aleeweekana nümaa Maleiwa (Sant. 4:8). Aleeweere waya nümaa Maleiwa, waaʼinrüinjatü tü anakat nümüin otta jülüjüinjatü waaʼin tü jülüjakat naaʼin. Jülüjüsü waaʼin aaʼinraa tü kasa anasükat suulia mojuin naaʼin Maleiwa watuma (Sal. 24:3, 4; 51:6; Filip. 4:8). Nütüjaa aaʼu Jeʼwaa suchuntaʼawalin waaʼin kasa mojusü, wasünneʼeramaatüinjatpajaʼa tia suluʼujee wekii suulia mojujain naaʼin Jeʼwaa watuma (Gén. 6:5, 6).

5, 6. ¿Jamüsü choʼujaaka woʼuraajüin nümüin Maleiwa?

⁵ Woʼuraajüle waneepia nümüin Jeʼwaa, nükaaliinjeena waya süpüla wasünneʼerüin suluʼujee waaʼin tü kasa mojusükat. Naapeerü wamüin tü nütsüinkat süpüla eejiraain waya sümaa tia. «Pükaaliinja taya süpüla jülüjüin taaʼin weinshi tü kasa püchekakat tapüleerua», meesü wanüiki nümüin Jeʼwaa woʼuraajapa nümüin (Sal. 19:14). «Piʼrüle suluʼu taaʼin wanee kasa yarüttüsü, pükaaliinja taya süpüla anainjatüin takuwaʼipa», eeshii süpüla wamüin nümüin Jeʼwaa (Sal. 139:23, 24). «Suchuntaale taaʼin aainjirawaa takuwaʼipa sümaa wayuu yalapünaa, kaaliin taya püpüla suulia taainjüin tia», eeshii süpüla wamüin nümüin Jeʼwaa (Mat. 6:13).

⁶ Süpülapünaa paala waküjüliin pütchi nüchiki Jeʼwaa, eesüjaʼa kamalainpuʼule wamüin aaʼinraa kasa mojusü. Eesü suchuntaale shia waaʼin maaʼulu yaa. Nükaaliinjeechipajaʼa pia Jeʼwaa süpüla anain pukuwaʼipa. Majatüinka nukuwaʼipa David, aainjiraashi nukuwaʼipa sümaa wanee jierü nnojotkat nuʼwayuusein. Ooʼulaapejeʼe David suulia naaʼinrüin tia. Nuchuntüin nümüin Jeʼwaa wuleinjatüin naaʼin jee noonooinjachin sümaa nünüiki (Sal. 51:10, 12). Eejiraale pia sümaa tü kasa mojusü suchuntaakat paaʼin, anashi puchuntüle kaaliinwaa nümüin Jeʼwaa. Nükaaliinjeechi pia süpüla keeʼireeinjatüin paaʼin oonowaa sümaa nünüiki jee süpüla anainjatüin tü jülüjakat paaʼin jee tü paaʼinrüinjatkat (Sal. 119:133).

7. ¿Kasa waaʼinrüinjatka süka tü Wiwüliakat?

⁷ Wachuntüle paala nümüin Jeʼwaa wuleinjatüin waaʼin, nüküjeerü wamüin tü waaʼinrüinjatkat sükajee tü Wiwüliakat. Anashaatasü maʼin tü kasa eekat suluʼu tü Wiwüliakat (Sant. 3:17). Wuleerü tü suluʼukat waaʼin müleka waashajeʼerüle tü Wiwüliakat weinshi (Sal. 19:7, 11; 119:9, 11). Suluʼu tü Wiwüliakat, ashajünüsü süchiki tü naaʼinrakat waneeinnua wayuu anakana akuwaʼipa jee müsia eesü pütchi anaka süpüla weʼitaain suluʼu wakuwaʼipa. Waashajeʼerüle tia, wasünneʼereerü suluʼujee waaʼin tü kasa mojusü suchuntaakat waaʼin.

8, 9. (1) ¿Kasa alataka nümüin wanee jimaʼai saashin Proverbios kapiitulo 7? (2) ¿Kasa eeka süpüla mojuin atuma wakuwaʼipa?

⁸ Saashin tü Wiwüliakat, nnojoishii  waya aainjiraainjanain wakuwaʼipa sümaa wayuu nnojotkat waʼwayuusein (Prov. 5:8). Saashin Proverbios kapiitulo 7, eejachi wanee jimaʼai ojuʼitakai saʼwai sünain apasiajawaa yalapünaa, kepiasü pejepünaa nünain wanee jierü maaʼin aaʼinrü. Joʼuucheʼechon maʼin süsheʼin otta ichechonsü sünain. Shiʼrüttataiwaʼaya nia, arütkaachonsü shia nünainmüin, sutuʼlaka nia, kemeʼeriasü maʼin sünüiki nümüin chi jimaʼaikai süpüla suchuntaainjatüin maʼin naaʼin shia. Naainjiraaka nukuwaʼipa mapa sümaa tü jietkat sutuma nnojoluin niyouktajaain sümaa tü kasa mojusü suchuntaakat naaʼin. «Mojeerü takuwaʼipa müleka chapünaale taya» nümayüireje, nnojotsüje müin nukuwaʼipa (Prov. 7:6-27).

⁹ Eesü süpüla mojuin wakuwaʼipa müleka nnojorüle wayaawajaain suulia tü kasa eekat süpüla mojuin atuma wakuwaʼipa. Jamüshijaʼa pünajataale telewisoot pümüiwaʼa saʼwai sümaa pülatira pülatira pümüin wanee canal, eesü süpüla sujuʼinajaain wanee kasa yarüttüsü maʼaka saaʼin tü aainjirawaakat akuwaʼipa. Püchajaale wanee kasa suluʼu Internet shiasaʼa piʼitaale clic sünain wanee página nnojotka pütüjaain aaʼu kasain suluʼuin, eesü süpüla sujuʼinajaain sünain tü computadorkot wanee ayaakuaa eere maichein wayuu sümaa sümaʼüjiraain sukuwaʼipa. Mojeerü wakuwaʼipa wanajüle tia jee nnojoleena waya oonooin nümaa Jeʼwaa sutuma.

10. Nnojorüle waaʼinrüin tü sümakat 1 Timoteo 5:2, ¿kasa eeka süpüla sülatüin wamüin? (Piirakaa sümüin tü ayaakuaa suluʼukat süpana 18.)

¹⁰ Saashin tü Wiwüliakat, kojutüinjana wamüin na wawalayuu anoujiraakana  wanaa wamaa (paashajeʼera 1 Timoteo 5:2). Chi wawala kasaatkai, shiainjatü aichonka nüpüla nuʼwayuuse jee chi wawala nnojoiyüikai kasaalüin, shiainjatü aichonka nüpüla tü wawala kasaalüinjachikai amaa nia. Anajüle soʼu wanee jiet nümüin wanee toolo, alaayaachonle shia suluʼu sukuwaʼipa jee niale alaayaachoin chi toolokoi suluʼu nukuwaʼipa, kooʼomüin kooʼomüin meerü tü kasa mojusü suchuntaakat naaʼin. Sutumajee tia, eeshii süpüla naainjiraain nakuwaʼipa sümaa nnojoluin kasaalüin naya. Alatüirü tia namüin waneeinnua wawalayuu müsüjeseʼe eejüinjatüin waaʼin suulia sülatüin wamüin tia.

11. ¿Kasa shikirajaka anain waya tü naainjakat José?

¹¹ Shiainjaʼa anain washatüle nukuwaʼipa José. Wanaa sümaa «painkaa tamaa» sümüin nuʼwayuuse chi nülaamainkai nümüin, niyoukta achikit tü sümakat. Süpüleerua aaʼinchi maʼin nia weinshi süpüla makatüinjachin nia sümaa (Gén. 39:7, 8, 10). Makaʼa sümaweein nümüiwaʼa José tia jietkat shia süpüla nnojolinjachin nüchecherüin naaʼin saaʼu naapaainjatüin shia. Tia makat nüküjala wanee wayuu ekirajaakai süchiki tü sümakat tü Wiwüliakat. Nnojoishi aʼalaajaachoin José sümüin, laülaa aaʼinchi nia, müshijeseʼe nnojolin nüinkaain sümaa tia jietkat. Soʼu wanee kaʼi, saapaain nia süka nüsheʼin süpüla nüinkaainjachin sümaa, apattajaashijeseʼe nia sümaʼanajee sünain nüpütapünaain nüsheʼin sajapuluʼu (Gén. 39:12).

12. ¿Kasa tü eekat süpüla sülatüin nümüin wanee wayuu sutuma tü niirakaakalü amüin?

¹² Eesü suchuntaale waaʼin waaʼinrüin wanee kasa eekai weʼrüin. Naashin Jesuu, «chi eekai niirakaain sümüin wane jierü sümaa keeʼireein naaʼin amaʼüjirawaa sümaa, shiimüin sünain kaainjalain nia wanaa nümaa eekai nümaʼüjaain sümaa wayuu nnojotkat nuʼwayuusein» (Mat. 5:28). Eejatüinka wanee jierü oʼoojoʼoloosüinka, niʼrajaʼalaataain shia David sujuuna. Wayuu kaʼwayuusesü tia makat (2 Sam. 11:2). Nnojotsü joo chajaayaain noʼu David suulia, chüntüsü neʼe noʼu sünain. Jülüjaa mataasü shia naaʼin mapa, nüsaajirüinjeseʼe joo shia süpüla nüinkaainjachin sümaa.

13. (1) ¿Jamüsü anaka washatüle tia naainjakat Job? (2) «Nnojotsü shiiʼireeinjatüin taaʼin wanee jierü teirakaapa sümüin», ¿jamaluʼuleesü nünüiki Job süka tia?

¹³ Aniitaa joo wanee wayuu washatüinjachikai akuwaʼipa, Job nünülia. «Nnojotsü shiiʼireeinjatüin taaʼin wanee jierü teirakaapa sümüin», müsüinka nünüiki (Job 31:1, 7, 9, TNM). Anasiaʼaya maʼin washatüle tia naainjakat Job suulia keeʼireejüin waaʼin waaʼinrüin wanee kasa mojusü suchuntaakat waaʼin. «Nnojotsü shiiʼireeinjatüin taaʼin wanee jierü teirakaapa sümüin», ¿jamaluʼuleesü nünüiki Job süka tia? Eekajasaʼa tü nümakat Job shia weirakaʼalaainjatüin amüin wayuu sümaa nnojoluinjatüin eein kasa yarüttüsü wekiiruʼu nachiki. Weʼrüle ayaakuaa eekai yarüttüin, chajaainjatü woʼu suulia, nnojotsü chüntüinjatüin woʼu sünain.

14. ¿Kasa waaʼinrüinjatka woonoweere nümaa Jeʼwaa?

¹⁴ Sünainjee tü wekirajaaitpakalü anain, eesüjaʼa piyaawajaale saaʼu punoukteʼerüinjatüin pukuwaʼipa. Eerejeʼeya tü punoukteʼerüinjatkat, anasü paainjüle shia jooluʼuleʼeya. Woonoole nümaa Jeʼwaa, nnojoleena waya aainjiraain wakuwaʼipa sümaa wanee wayuu nnojotkat waʼwayuusein (paashajeʼera Santiago 1:21-25).

15. ¿Jamüsü choʼujaaka puchuntüinjachin kaaliinwaa?

¹⁵ Isale püchiki eejiraain pia sümaa tü kasa mojusü suchuntaakat paaʼin, acheküshi puchuntüinjachin kaaliinwaa nümüin wanee wawala kakaliaichikai sünain anoujaa jee laülaakai aaʼin. Nükaaliinjeechi pia süka tü pütchi eekat suluʼu tü Wiwüliakat. Shiimain kapüleein pümüin paashajaale süchiki tia, choʼujaapajaʼa paaʼinrüin tia süpüla nakaaliinjain pia na wawalayuukana sünain ayaawataa saaʼu tü sümakat tü Wiwüliakat süpüla paaʼinrüin shia (Prov. 18:1; Heb. 3:12, 13). Paaʼinrüle shia, ayateechia naʼaleewain pia Jeʼwaa.

16, 17. (1) ¿Kasa naainjaka na laülaashiikana süpüla nakaaliinjain wanee jimaʼai? (2) ¿Jamüsü choʼujaaka maʼin nachuntamaatüinjanain kaaliinwaa na anajakana shiyaakua wayuu maichesat?

¹⁶ Naya puchuntajanakana amüin kaaliinwaa na laülaashiikana süka nayain eʼitaanüin süpüla tia (paashajeʼera Santiago 5:13-15). Eejachinka wanee jimaʼai, isasü nüchiki eejiraain nia sümaa tü kasa mojusü suchuntaakat naaʼin, chejeʼewai nia Brasil. Anuu nünüiki: «Watta saalii tü kasa mojusü suchuntaakat taaʼin, mojushaatasü nümüin Jeʼwaa tü taainjakat. Japüitaashi joo taya süpüla taashajaainjatüin shia sümaa wayuu». Jaʼyasü naaʼu chia jimaʼaikai mojuin nukuwaʼipa, niʼrüinjeseʼe nia wanee laülaashi. «Anashi puchuntüle kaaliinwaa namüin na laülaashiikana», nümünaka amüin nutuma chia laülaashikai. «Kamaneeshii maʼin tamüin na laülaashiikana, kaaliinshi taya napüla. Naʼülüjayaainjachi amüin taya taaʼinruʼu, nnojotpejeʼe müin shia. Jülüüjachonsü naaʼin tü tanüikikat, neeʼiyatüin tamüin süka tü Wiwüliakat alin taya nüpüla Jeʼwaa, oʼuraajüshii naya tamaʼaya. Taapaa amaalü tü nanüikikat süka kamaneein naya tamüin», müsü nünüiki chi jimaʼaikai. Maaʼulu yaa, aleewashaataichipa chi jimaʼaikai nümaa Jeʼwaa. «Anasüleʼe maʼin achuntaa kaaliinwaa suulia wounjulakuʼu wamüin wanee kasa mojusü suchuntaaka waaʼin», müsü nünüiki.

¹⁷ Kiʼraichire pia sünain anajaa shiyaakua wayuu maichesat sümaa sümaʼüjiraain sukuwaʼipa, acheküshi puchuntüin kaaliinwaa jooluʼuleʼeya suulia kaainjalajüin pia. Paainjüle tia kasa mojusükat, mojeerü maʼin naaʼin na püpüshikana jee na paʼaleewainkana. Jee müsia mojeerü pütchi nüchiki Maleiwa. Watta naalin na wawalayuu anakana akuwaʼipa sutuma nachuntüin kaaliinwaa namüin na laülaashiikana sümaa noonooin sümaa nanüiki. Maaʼulu yaa, aleewashii naya nümaa Jeʼwaa jee kottiraashii naya namaa na wawalayuukana (Sal. 141:5; Heb. 12:5, 6; Sant. 1:15).

18. ¿Kasa ayatüinjatka waaʼinrüin?

¹⁸ Tü wayuu nuluwataakalü aaʼu Satanaa, watta saalii kasa mojusü saaʼinraka. Aluʼujasaʼa na wayuu nuluwataakana aaʼu Jeʼwaa, eejiraashii maʼin naya sümaa tü kasa mojusü suchuntaakat naaʼin. Müsüjeseʼe talatüin naaʼin Jeʼwaa namaa. Weʼitaa suluʼu wakuwaʼipa tü apünüinsükat kasa wekirajaaitpaka anain: aleewainjana waya nümaa Jeʼwaa, oonooinjana waya sümaa tü sümakat tü Wiwüliakat jee nakaaliinjeena waya na laülaashiikana. Waaʼinrüle tia, talateerü waaʼin jee wuleerü tü suluʼukat waaʼin (Sal. 119:5, 6). Oʼutüneechi aaʼin Satanaa soʼu palit kaʼi, aluʼujasaʼa wayakana, kepieena waya saaʼu tü mmakat sümaa paʼaraiisüin shia.