Ngsebeched el Melemolem el Klikiid
Ngsebeched el Melemolem el Klikiid
“Mrisu a chimomiu, . . . [e] mongikiid a rengmiu.”—JAK. 4:8.
NGMEKERANG AIKA EL BADES E NGOSUKID EL MELEMOLEM EL KLIKIID?
1. Ngua ngerang a uldesuir a rebetok el chad er chelechang?
KEDE kiei er a chelsel a kmal mekngit a blekeradel er ngii el beluulechad. A rebetok el chad a omdasu el kmo ngdi ungil a desechal el bechil a sechal me a lechub e kede mechiuaiu el obengkel a chad el diak el bechid. A mubi me a babier me a chelitakl me a dirrek el advertisement a di melisiich a tekoi er a deleboes. (Psa. 12:8) Engdi a Jehovah a sebechel el ngosukid me kede kiei el klengar er kid a odeuir a rengul. Me ngsebeched el melemolem el klikiid e kiei er a chelsel tia el mekngit el beluulechad.—Monguiu er a 1 Thesalonika 4:3-5.
2, 3. (a) Ngera uchul me ngkired el torob a mekngit el uldesued? (b) Ngera kede mo mesaod er tia el suobel?
2 Me a lsoad el oldeu er a rengul a Jehovah e ngkmal kired el oltngakl a ngii di el tekoi el ngii a ouketui. Engdi kid el diak demecherrungel a uchul me ngsebeched el mekesuseu el mo meruul a deleboes, el uai a ngikel el soal el mo menga er a uaol. Me a lsekum kede mocha omuchel el melatk aika el tekoi, e ngkmal kired el mereched el torebengii a uldesued. E le lsekum e ngdiak e tia el uldesued a sebechel el mo mesisiich me sel lebo er ngii a techall e kede mo ruebet er a klengit. Me ngua ledung a Biblia: “A ikel mekngit el soal a rengul a be le dubech e ng mo mechellii a klengit.”—Monguiu er a Jakobus 1:14, 15.
3 Ngsebechel el omuchel a mekngit el uldasu er a rengud. Tiaikid a uchul me ngkmal kired el kerekikl a tekoi el dolatk. Me sel deterob a mekngit el uldesued e ngsebeched el oibngid er a deleboes el omeruul me aike el telemellel. (Gal. 5:16) Me ngar tia el suobel e kede mo mesaod a edei el tekoi el sebechel el ngosukid me ngdiak bo doureng a mekngit el tekoi. Aikang a deleuill er kid me a Jehovah me a ulekrael el ngar er a Tekingel me a dirrek el ngeso er a rudam me a rudos er kid.
“MOLEKEED ER KEMIU ER A DIOS”
4. Ngera me ngklou a ultutelel el kired el olekeed er kid er a Jehovah?
4 A Biblia a mengelechel er tirke el sorir el ‘olekeed er tir er a Dios’ el kmo: “Mrisu a chimomiu,” e “mongikiid a rengmiu.” (Jak. 4:8) Me a lsekum a Jehovah a kot el kmeed el Sechelid, e ngkmal soad a rokui el uldesued me a omerelled a bo loldeu er a rengul. E le sel leklikiid a uldesued e a rengud me ngdirrek el mo klikiid. (Psa. 24:3, 4; 51:6; Fil. 4:8) A Jehovah a ungil medengei el kmo ngdiak demecherrungel me ngsebeched el mo melatk a mekngit el tekoi. Engdi kid el soad el oldeu er a rengul a uchul me ngblak a rengud el merrob a mekngit el uldesued, e mo er a tkurrebab el sebeched me lolemolem el klikiid a uldesued.—Gen. 6:5, 6.
5, 6. Ngmekerang a nglunguuch e ngosukid el merrob a mekngit el uldesued?
5 A Jehovah a mo ngosukid el merrob a mekngit el uldesued sel dolemolem el meluluuch el olengit er a ngelsuil. Ngmeskid a chedaol reng er ngii me ngsebechel el melemolem el klikiid a uldesued. Me sel doluluuch e ngungil a douchais er Ngii el kmo ngsoad a rokui el uldesued a bo lodeuir a rengul. (Psa. 19:14) Kede olengit er ngii me lorriter a rengud, e lengesukid el mo medengei a chelitechetud el sebechel el rullid me kede ruebet er a klengit. (Psa. 139:23, 24) Mada dolemolem el olengit er a Jehovah me lengesukid el mo oltngakl a deleboes el omeruul e bai bo doruul a llemalt alta ngmeringel er kid el meruul el uaisei.—Mt. 6:13.
6 A uchei er a bo dodengelii a Jehovah e nglocha kmal mle soad el meruul a klengit me chelechang e kede locha dirk oldechelakl aika el mekngit el uldesued. Engdi Ngii a sebechel el ngosukid el ngmodech a blekerdeled e bai mo meruul a soal. El ua tiang, a uriul er a lerebet er a klengit a King el David el obengkel a Bathseba, e nguluuchel er a rengul e ullengit er a Jehovah me ‘llia beches e blak a rengul reng er a chelsel.’ (Psa. 51:10, 12) Me a lsekum ngdirk ngar er ngii a mekngit el uldasu el dolab e dirk kired el mengoit, e lak dobes el kmo a Jehovah a sebechel el ngosukid el mo soad el oldeu er a rengul e mo meruul a llemalt. Ngkmal sebechel el ngosukid el mo omtebechel a mekngit el uldesued.—Psa. 119:133.
BO MOLTAUT A TEKINGEL A DIOS
7. Ngmekerang a Tekingel a Dios e ngosukid el merrob a mekngit el uldesued?
7 A Jehovah a sebechel el onger a nglunguched el okiu a Tekingel el Biblia, el ngar er ngii a klikiid el llemesel a rengul er a chelsel. (Jak. 3:17) Me sel donguiu er a Biblia er a bek el sils e kede omekeek er a rengud er a klikiid el uldasu. (Psa. 19:7, 11; 119:9, 11) Ngdirrek el ngar er a chelsel e ngar er ngii a ungil el kerebai me a uleklatk el ngosukid el mo merrob a mekngit el uldesued.
8, 9. (a) Ngera uchul me a ta el chad a mlo bad el obengkel a dengerenger el redil? (b) Ngera kede suubii er a mekngit el kerebai el medung er a 7 el bliongel er a Osisechakl?
8 Ngar er a Osisechakl 5:8, e a Tekingel a Dios a mengelechel er kid el mo mengeroid er kid er a deleboes el omeruul. Ngar er a 7 el bliongel er a Osisechakl e kede menguiu el kirel a kekerei el chad el mlo merael er bita er a blil a dengerenger el redil. Ngika el redil a mla er a rael el “bliull el ua oteruul redil.” Ngmlo er ngika el chad e mdechemii e turengur a medal e mesaod a deleboes el tekoi el mo er ngii el mechelii a mekngit el uldesuel. Me ngdimlak leterebengii a mekngit el uldesuel, e bai kilengei el mo bad el obengkel ngii el redil. Me alta e ngdimlak lolatk el mo meruul a klengit engdi ngmlo rullii. Me tiang a mlo uchul a chelebulel. Oleko ngmle medengelii a telemellel tia el tekoi e nglocha kmal dimlak bo lekeed er ngii!—Osi. 7:6-27.
9 Me kid a di ua ngika el chad el sebeched el mo mekngit el melilt a tekoi e le ngdiak a ungil el klemedengei er kid. El ua tiang, sel leklebesei e a bebil er a channel er a TV a di olecholt a deleboes el omeruul me ngkired el kerekikl me ngdiak di de change a channel el di soad el mo medengei el kmo ngera el show a ngar er ngii. Ngdirrek el kdekudel el tekoi a lsekum kede mo soiseb er a diak dodengelii el Internet link, me a lechub e kede soiseb er a chat room me a Web site el ngar er ngii a link me a advertisement er ngii el kirel a siasing er a remeau. A lsekum kede mo omes aika el mekngit el tekoi e ngsebechel el muchel a mekngit el uldesued, e tiang a sebechel el mo uchul e ngmo diak dolengesenges er a Jehovah.
10. Ngera uchul me ngkdekudel el tekoi a klaiuengamech? (Momes er a siasing er a uchelel a suobel.)
10 A Biblia a dirrek el msang a sechal me a redil a ulekrael el kirel a loruul a tekoi el bedul a ta me a tang. (Monguiu er a 1 Timothy 5:2.) Ngdiak el kirel a Kristiano el olengamech er a diak el bechil me a lechub e ngchad el diak lolatk el mo bechil. A rebebil a omdasu el kmo ngdiak a kngtil a lolengamech er a chad a lsekum ngdiak lekerutech a klekedellel a bedengir. Engdi a lsekum a reteru el chad a omuchel el kaiuengamech e ngsebechel el duubech a mekngit el uldesuir el uchul e te mo ruebet er a deleboes el omeruul. Tiang a mla duubech el tekoi e kmal sebechel el lmuut el mo er ngii.
11. Ngera klubeled el denguu er a omerellel a Josef?
11 A Josef a kmal ungil el kerebai el kired. A bechil a Potifar a millasem el mengesuseu er ngii el mo bad el obengkel. Me a Josef a ultngeklii engdi ngii el redil a dimlak lemeterob el mengesuseu er ngii, me ngmle bek el sils el lolekoi er ngii el mo bad el obengkel, engdi ngii a “dimlak lorrenges er ngii.” (Gen. 39:7, 8, 10) A ta el chellimosk a mesaod er a blekerdelel a bechil a Potifar el kmo ngmillatk el kmo a di bo lengii me a Josef e ngsebechel a Josef el mo soal ngii. Engdi a Josef a tilbir el kmal diak bo lolengamech me a lechub e lekengei er a ulengemechel ngii el redil. Me ngdimlak lebecherei a mekngit el uldasu me lemukeroul er a chelsel a rengul. Me ngii el redil er a lebesngii a ikrel a bilel a Josef el millasem el orrimel er ngii el mo bad el obengkel, e ngdi mle mereched a Josef el ‘remurt el mor rikl e milechere ikrel a bilel me ng beldoel er ngii.’—Gen. 39:12.
12. Kede mekerang e medengei el kmo a mekngit el uldesued a ngar er ngii a letemellii er kid?
12 A Jesus a mengelechel er kid el kmo a tekoi el domes a ngar er ngii a letemellii er a rengud e dirrek el sebechel el mekeroul a mekngit el uldesued. Ngdilu el kmo: “A chad el omes er a redil e mo nguibes er ngii a mla mor a laokreng er a chelsel a rengul.” (Mt. 5:28) Tia el tekoi a dilubech el mo er a King el David. “Ng mirrerorael er a chado [er a blil] e milsa redil el melechong,” e dimlak lochebir a medal e leterebengii a mekngit el uldesuel. (2 Sa. 11:2) Me alta ngikang a mle bechil a ta er a chad, engdi a David a ulemuchel el oureng er ngii e mlo bad el obengkel.
13. Ngera uchul me ngkired el tibir er a rengud el diak dongidokel a osenged, e mekerang a doruul el uaisei?
13 Me a lsekum ngsoad el merrob a mekngit el uldesued e ngkired el otireklii a kerebil a Job. Ngdilu el kmo: “Ak mla rullii a mesisiich el telbilek el kmal diak bo kngibes a kumes er a tar a ekebil.” (Job 31:1, 7, 9) Ngsoad el mo uai ngii el tibir er a rengud el diak bo domes er a chad e doureng el meruul a deleboes el obengkel. Me a lsekum kede mesang a mekngit el siasing er a computer me a babier me a lechub a advertisement, e ngkmal kired el mereched el ochebir a osenged er ngii.
14. Ngera kired el meruul me dolemolem el klikiid?
14 Ngokiu aika el tekoi el bla desaod e ke locha melechesuar el kmo nglmuut el ngar er ngii a bebil el tekoi el kirem el meruul me bo el sebechem el torebengii a mekngit el uldesuem. Me a lsekum ngar er ngii a kirem el melodech e mereched el ngodechii! E le sel molengesenges a tekingel a Jehovah e ngsebechem el oleiub er kau er a deleboes el omeruul e melemolem el klikiid.—Monguiu er a Jakobus 1:21-25.
‘MOMEKEDONG ER A RE MECHUODEL’
15. Ngera uchul me ngklou a ultutelel el kirem el olengit a ngeso a lsekum e ngmeringel er kau el merrob a mekngit el uldesuem?
15 A lsekum ke melechesuar el kmo ngmeringel er kau el merrob a mekngit el uldesuem, e mongedecheduch er a ta er a chad er a ongdibel el mla mesiou er a Jehovah el betok el rak e dirrek el sebechel el ngosukau el ousbech a ulekrael er a Biblia. Alta ngmeringel er kau el mesaod a mondai er kau el mo er a rechad engdi ngkmal klou a ultutelel el molengit a ngeso. (Osi. 18:1; Heb. 3:12, 13) A reuaisei el Kristiano a sebechir el ngosukau el mo melodech aike el tekoi el kirem el melodech. Mada, molodech aika el blekerdelem me lsebechel a Jehovah el melemolem el Sechelim.
16, 17. (a) Te mekerang a remechuodel e ngosuterir tirke el meringel er tir el merrob a mekngit el uldesuir? Mosaod. (b) Ngera uchul me ngkmal kirir tirke el omes a siasing er a remeau el mereched el olengit a ngeso?
16 A remechuodel er a ongdibel er kid a kmal rredemelel a olengeseu er kid. (Monguiu er a Jakobus 5:13-15.) A ta el kekerei el chad er a Brazil a mle betok el rak el oldechelakl er a mekngit el uldesuel. Ngdmu el kmo: “Ak mle medengei el kmo a uldesuek a diak loldeu er a rengul a Jehovah, engdi ak kmal mle merur el ouchais er a rechad el kirel.” A ta er a remechuodel a mlo medengei el kmo ngika el chad a ousbech a ngeso me ngmillisiich er ngii el mo mengedecheduch er a remechuodel. Me ngika el chad a dilu el kmo: “Ngkmal mle mechas a renguk er a ungil el omerellir a remechuodel el bedul ngak, el mle ungil el mengedecheduch er ngak, e blak a rengrir el rongesak. Te dirrek el uluusbech er a Biblia el mesaod er a bltkil a rengul a Jehovah el kirek e milluluuch el obengkek. Tiang a ngilsukak el mo kongei a uleklatk er a Biblia el lebilskak.” Me sera lluut el smisichii a delongelel ngii me a Jehovah e ngdilu el kmo: “Ak mocha medengei el kmo ngkmal klou a ultutelel el kired el olengit a ngeso el kirel a mondai er kid er a bai di lekid el mengisemuk er kid.”
17 A lsekum ke blechoel el omes a siasing er a remeau e ngkirem el mereched el olengit a ngeso. E le klteketel a taem el mongiil e ngklou a techellem el mo ruebet er a deleboes el omeruul. Seikid e ke mo tomall a rengrir a rebebil e dirrek el mo uchul a otuub el mo er a ngklel a Jehovah. Te ngar er ngii a rebetok el mla olengit a ngeso er a remechuodel e kongei a uleklatk el lengilai e le tir el sorir el oldeu er a rengul a Jehovah e melemolem el ngar er a chelsel a ongdibel er ngii.—Psa. 141:5; Heb. 12:5, 6; Jak. 1:15.
MOLEMOLEM EL KLIKIID!
18. Ke mla tibir er a rengum el mo mekerang?
18 Tia el beluulechad er a Satan a kmal di merael el mo mekngit. Engdi a rechedal a Jehovah a blak a rengrir el mengikiid a uldesuir me a rengrir. Me a Jehovah a kmal dmeu a rengul el kirir tirka el chedal. Mada dolemolem el olekeed er kid er a Jehovah e doltirakl a ulekrael el lomeskid el okiu a Tekingel me a ongdibel er ngii. Sel doruul el uaisei, e ngmelemolem el dmeu a rengud e klikiid a ukltked. (Psa. 119:5, 6) Me a ngar medad el klebesei e ngmo nguemed a Satan e kid a mo kiei el diak a ulebengelel er a chelsel a klikiid el beluulechad er a Dios.
[Aike el Ker er a Suobel]
