1. Hahalok saida mak ema haree hanesan baibain deʼit?

ITA moris iha mundu neʼebé hahalok moos ka santu komesa lakon ona. Porezemplu, iha rai barak, ema simu hahalok omoseksuál ka halo relasaun seksuál ho ema neʼebé laʼós sira-nia kaben hanesan hahalok baibain deʼit. Aat liután mak livru, filme, no múzika sira mós book ema atu halo hahalok sira hanesan neʼe. (Salmo [Mazmur] 12:8) Maski mundu mak hanesan neʼe, ita bele moos nafatin ho Jeová nia ajuda. Ita bele sai ema kristaun neʼebé moos ka santu nafatin iha mundu aat neʼe.—Lee 1 Tesalónika 4:3-5.

2, 3. (a) Tanbasá importante atu luta hasoru hakarak neʼebé foʼer? (b) Iha lisaun neʼe ita sei koʼalia kona-ba saida?

² Atu halo Jeová kontente, ita tenke hakribi buat neʼebé nia odi. Maibé tanba ita ema sala-naʼin, karik ita bele iha hanoin ka hakarak neʼebé foʼer. Hakarak neʼe bele sai hanesan iska ba ita. Se hakarak neʼe komesa mosu iha ita-nia laran, ita tenke halakon kedas nia, selae, hakarak neʼe bele sai makaʼas no se tentasaun mosu, fasil ba ita atu monu ba hahalok foʼer. Ida-neʼe mak buat neʼebé Bíblia hatete: “Kuandu hakarak neʼe sai buras ona, neʼe hamosu sala; no tuirmai, kuandu  halo ona sala, neʼe lori ba mate.”—Lee Tiago 1:14, 15.

³ Hakarak foʼer iha ita-nia laran bele lori ita ba sala, tan neʼe mak ita tenke kuidadu tebes hodi haree se hakarak foʼer komesa mosu iha ita-nia laran, labele husik hakarak neʼe sai abut. Se ita lakohi simu konsekuénsia aat husi ita-nia hahalok, bainhira hakarak atu halo sala-foʼer mosu, hamate kedas! (Galásia 5:16) Lisaun neʼe esplika kona-ba buat tolu neʼebé bele ajuda ita atu luta hasoru hakarak foʼer sira, neʼe mak: ita-nia relasaun ho Jeová, konsellu husi Bíblia, no ajuda husi ema kristaun sira neʼebé iha esperiénsia barak iha lia-loos.

4. Tanbasá mak importante atu hakbesik ba Jeová?

⁴ Bíblia hatete ba ema neʼebé hakarak “hakbesik ba Maromak” atu ‘hamoos sira-nia liman, no hamoos sira-nia laran’. (Tiago 4:8) Tanba ita hafolin ita-nia relasaun ho Jeová, ita hakarak hakaʼas an atu halo nia kontente liuhusi ita-nia hahalok, no mós liuhusi buat neʼebé ita hanoin. Se ita-nia hanoin mak moos no santu, ita-nia laran mós sai moos. (Salmo [Mazmur] 24:3, 4; 51:6; Filipe 4:8) Jeová komprende katak ita sala-naʼin, tan neʼe dala ruma ita iha hanoin neʼebé foʼer. Maibé ita rasik mós tenke komprende katak se ita husik hanoin neʼebé sala sai buras iha ita-nia neon, neʼe bele halo Jeová sai triste. (Gênesis [Kejadian] 6:5, 6) Tan neʼe mak ita hakarak hakaʼas an atu kontrola ita-nia neon hodi moos nafatin.

5, 6. Oinsá mak orasaun bele ajuda ita luta hasoru hakarak foʼer sira?

⁵ Dalan importante ida atu luta hasoru hanoin neʼebé foʼer mak halo orasaun beibeik ba Jeová. Se ita halo orasaun beibeik, Jeová mós sei hakbesik ita. Liuhusi ita-nia orasaun, Jeová sei fó ninia espíritu santu mai ita hodi ita iha forsa atu luta hasoru hanoin foʼer no sai moos nafatin. Tan neʼe mak diʼak atu fó-hatene ba Jeová katak ita hakarak tebes atu serbí nia ho neon no laran neʼebé moos. (Salmo [Mazmur] 19:14) Ho haraik-an, husu Jeová atu hatudu sai hakarak sira neʼebé perigu iha ita-nia laran neʼebé bele lori ita ba sala. (Salmo [Mazmur] 139:23, 24) Husu beibeik ba Jeová atu ajuda ita bainhira tentasaun ruma mosu hodi ita bele hadook an husi hahalok sala-foʼer.—Mateus 6:13.

⁶ Karik antes hatene Jeová, ita iha ona toman atu halo buat sira neʼebé nia odi, no karik agora ita sei luta hela hasoru hakarak aat sira uluk nian. Se nuneʼe, Jeová bele ajuda ita atu halo mudansa iha ita-nia moris hodi halo buat neʼebé nia gosta. Porezemplu, Liurai David halo tiha sala-foʼer ho Batseba, nia husu perdua husi Jeová no nia husu favór ba Jeová atu fó “laran neʼebé moos” ba nia atu ajuda nia halo tuir nafatin Jeová. (Salmo [Mazmur] 51:10, 12) Entaun, se ita mak luta hela hasoru hakarak foʼer husi uluk nian, Jeová bele ajuda ita atu iha hakarak neʼebé forte hodi halo tuir ninia hakarak no halo buat neʼebé loos. Jeová bele fó forsa mai ita atu kontrola ita ema sala-naʼin nia hanoin sira.—Salmo (Mazmur) 119:133.

7. Oinsá mak Maromak nia Liafuan bele proteje ita husi hanoin foʼer sira?

⁷ Jeová bele hatán ita-nia orasaun sira liuhusi ninia Liafuan, Bíblia. Maromak nia Liafuan nakonu ho matenek neʼebé  moos. (Tiago 3:17) Se ita lee Bíblia loroloron no hanoin didiʼak ba buat sira neʼebé ita lee, neʼe bele ajuda ita proteje ita-nia neon husi hanoin foʼer sira. (Salmo [Mazmur] 19:7, 11; 119:9, 11) Ita mós bele halo tuir ezemplu ka konsellu sira neʼebé hakerek iha Bíblia laran neʼebé ajuda ita atu la bele monu ba hakarak foʼer sira.

8, 9. (a) Saida mak halo mane joven ida monu ba sala-foʼer? (b) Ohin loron, situasaun saida mak bele kompara ho Provérbios kapítulu 7 neʼebé ita tenke kuidadu?

⁸ Maromak nia Liafuan iha Provérbios (Amsal) 5:8 fó avizu katak ita tenkesér hasees an husi sala-foʼer. Iha Provérbios kapítulu 7 konta kona-ba mane joven ida laʼo besik ba feto-aat ida nia uma iha kalan. Feto neʼe hamriik hela iha estrada nia kurva ida, no nia hatais hanesan feto-aat ida. Feto neʼe laʼo besik ba joven neʼe no kaer metin nia hodi reʼi nia. Feto neʼe koʼalia liafuan sira neʼebé halo joven neʼe hamosu hakarak foʼer nian, tuirmai nia toba ho feto neʼe. Tuir loloos joven neʼe la iha planu atu bá halo hahalok foʼer, maibé tanba nia matenek latoʼo atu tetu didiʼak situasaun, nia monu ba sala-foʼer. Ikusmai nia tenke moris ho konsekuénsia husi ninia hahalok neʼe. Se nia mak hanoin uluk kona-ba perigu, karik nia sei la  hakbesik ba feto neʼe.—Provérbios (Amsal) 7:6-27.

⁹ Se ita la tetu didiʼak situasaun ho matenek, ita mós bele monu ba situasaun neʼebé halo ita hamosu hakarak foʼer hanesan mane joven neʼe. Porezemplu, iha kalan, dala barak televizaun hatudu programa la morál sira. Se ita mak buka tun-saʼe programa sira iha kalan, karik neʼe sei lori perigu ba ita. Dala ruma uza internét mós bele lori perigu ba ita. Se ita uza sítiu sira neʼebé atu koʼalia ba ema seluk, sítiu sira-neʼe bele iha iklan neʼebé liga ho pornografia. Iha situasaun hanesan neʼe karik bele lori tentasaun ba ita atu hamosu hakarak foʼer no halo fraku ita-nia hakarak atu bele sai moos nafatin.

10. Tanbasá mak halimar ho ema nia sentimentu perigu tebes? (Haree foto iha pájina 13.)

¹⁰ Bíblia mós fó konsellu ba feto no mane oinsá mak sira tenke haree malu iha dalan neʼebé loos. (Lee 1 Timóteo 5:2.) Bíblia fó konsellu ba ema kristaun katak labele halimar ho ema seluk nia sentimentu arbiru se la iha hakarak atu kaben ho ema neʼe. Ema balu hanoin katak piska matan, hatudu hahalok maña ba feto ka mane ida, neʼe la iha buat ida, importante mak la bele kaer malu. Maibé hahalok hanesan neʼe bele hamosu hanoin foʼer, no ikusmai bele lori ba hahalok sala-foʼer nian. Ida-neʼe uluk akontese tiha ona ba ema, no agora mós bele akontese, se ita la kuidadu.

11. Ezemplu diʼak saida mak José hatudu mai ita?

¹¹ José mak ezemplu diʼak tebes mai ita. Bainhira Potifar nia feen tenta atu halo relasaun seksuál ho nia, José hapara kedas nia. Maibé ninia naʼi nia feen la rende an, loroloron nia sempre tenta José atu toba hamutuk ho nia. (Gênesis [Kejadian] 39:7, 8, 10) Tuir ema matenek kona-ba Bíblia ida hatete katak Potifar nia feen hanoin se sira naʼin-rua mak mesamesak, karik José sei hakarak nia. Maibé José la husik Potifar nia feen halimar ho ninia sentimentu ka simu deʼit ninia hahalok neʼe. Tan neʼe mak hanoin foʼer nunka sai abut iha José nia laran. No ikusmai bainhira Potifar nia feen obriga José atu toba ho nia, José halai kedas no “husik hela ninia faru iha feto neʼe nia liman no halai-sai ba liʼur”.—Gênesis (Kejadian) 39:12.

12. Oinsá mak ita hatene katak buat neʼebé ita haree liuhusi matan bele book ita-nia laran?

¹² Iha Bíblia, Jesus fó avizu katak buat neʼebé ita haree liuhusi matan bele book ita-nia laran hodi hamosu hakarak seksuál neʼebé sala. Nia hatete: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran.” (Mateus 5:28) Ida-neʼe mak akontese ba Liurai David. “Husi uma leten nia haree feto ida hariis hela.” (2 Samuel 11:2) Duké halai-sees husi situasaun neʼe, nia hateke beibeik ba nia toʼo ninia hanoin nakonu deʼit ho feto neʼe. Maski feto neʼe ema nia feen, maibé nia husik ninia hakarak ba feto neʼe sai buras toʼo ikusmai nia halo sala-foʼer ho nia.

13. Tanbasá mak ita tenke halo aliansa ho ita-nia matan, no oinsá mak ita bele halo nuneʼe?

¹³ Atu la bele iha hanoin foʼer, diʼak atu halo tuir Job nia ezemplu hodi ‘halo aliansa ho ita-nia matan’. (Jó [Ayub] 31:1, 7, 9) Ita tenke kontrola ita-nia matan hodi la bele haree ba ema ida ho hanoin neʼebé foʼer. Se ita mak haree foto aat ruma iha komputadór, iha didin lolon, livru nia kulit sira, ka iha neʼebé deʼit, ita tenke hateke sees kedas husi foto sira-neʼe.

14. Ita tenke halo saida hodi bele sai moos nafatin?

 ¹⁴ Bainhira ita hanoin didiʼak kona-ba pontu sira neʼebé ita foin koʼalia, karik Ita sente katak Ita presiza hakaʼas an liután atu luta hasoru hakarak aat sira. Se nuneʼe, la bele demora, foti desizaun kedas agora. Halo tuir Bíblia nia konsellu ho laran, neʼe bele ajuda Ita sees husi hahalok sala-foʼer no sai moos nafatin.—Lee Tiago 1:21-25.

15. Se ita sente susar nafatin atu luta hasoru hakarak foʼer, tanbasá mak diʼak atu husu ajuda?

¹⁵ Se ita sente susar nafatin atu bele luta hasoru hakarak foʼer, koʼalia ba ema ida iha kongregasaun laran. Dala ruma susar tebes atu koʼalia ba ema seluk kona-ba problema sira hanesan neʼe, maibé diʼak atu husu ajuda husi sira. (Provérbios [Amsal] 18:1; Ebreu 3:12, 13) Koʼalia kona-ba ita-nia problema ho ema maduru, ka ema neʼebé iha esperiénsia barak iha lia-loos, tanba neʼe bele ajuda ita atu buka-hatene ita-nia fraku iha neʼebé. Halo nuneʼe bele ajuda ita troka ita-nia hahalok hodi bele hela nafatin iha Jeová nia domin.

16, 17. (a) Oinsá mak katuas sira ajuda ema neʼebé luta hela hasoru hakarak foʼer? Fó toʼok ezemplu ida. (b) Tanbasá mak diʼak ba sira neʼebé iha toman haree pornografia atu husu ajuda kedas?

¹⁶ Katuas sira iha kongregasaun hatene duni oinsá atu ajuda ita. (Lee Tiago 5:13-15.) Iha rai-Brazíl, mane joven ida luta hasoru hakarak foʼer ba tinan barak ona. Nia hatete: “Haʼu hatene katak Jeová la gosta haʼu-nia hanoin aat sira-neʼe, maibé haʼu moe atu koʼalia sai ba ema ida.” Katuas ida mak nota katak joven neʼe presiza ajuda, entaun nia haruka joven neʼe atu buka ajuda lalais. Joven mane neʼe dehan: “Haʼu hakfodak katuas sira-neʼe diʼak tebes mai haʼu no komprende haʼu. Haʼu sente haʼu la merese atu sira hatudu laran-diʼak mai haʼu. Sira rona didiʼak bainhira haʼu konta haʼu-nia problema ba sira. Sira uza Bíblia hodi ajuda haʼu haree katak Jeová hadomi nafatin haʼu, no sira mós halo orasaun ba haʼu. Neʼe halo fasil mai haʼu atu halo tuir Bíblia nia konsellu sira neʼebé sira hatudu mai haʼu.” Tinan hirak liutiha nia hatete: “Agora mak haʼu foin hatene katak diʼak liu husu ajuda duké koko atu lori problema sira mesamesak deʼit.”

¹⁷ Se Ita mak iha toman atu haree pornografia, labele demora atu husu ajuda kedas. Tanba se Ita husik deʼit, toman neʼe bele lori Ita monu ba halo hahalok sala-foʼer. Hahalok neʼe bele hakanek ema seluk no hafoʼer Jeová nia naran. Ema barak neʼebé uluk iha toman hanesan neʼe, bá buka ona ajuda husi katuas no halo tuir konsellu neʼebé katuas sira fó. Sira buka ajuda tanba hakarak halo buat neʼebé Jeová gosta no atu hela nafatin iha kongregasaun.—Tiago 1:15; Salmo (Mazmur) 141:5; Ebreu 12:5, 6.

18. Ita hakaʼas an atu halo saida?

¹⁸ Morál iha Satanás nia mundu sai aat ba beibeik, maibé Jeová nia atan sira hakaʼas an hodi proteje sira-nia neon ka hanoin atu moos nafatin tuir Jeová nia morál. Jeová sente kontente tebes ho ema kristaun hanesan neʼe. Tan neʼe, mai ita hakaʼas an atu hakbesik nafatin ba Jeová hodi halo tuir ninia konsellu sira husi ninia Liafuan no liuhusi kongregasaun kristaun. Se ita halo tuir, neʼe sei lori ksolok no fó konxiénsia neʼebé moos mai ita. (Salmo [Mazmur] 119:5, 6) Bainhira Satanás nia mundu lakon ona iha futuru, ita sei moris iha mundu neʼebé moos ba nafatin.