1. Muze twakwambujola, kuchi mutuhasa kuzachisa kulemba cha Yesu chize chili ha Mateu 6:9-13?

ATU anji kananyingika maliji waze ali mu mukanda wa Mateu 6:9-13. Muze twakuya ni kwambujola sango lipema, twakuzachisa maliji akulemba chino hanga tulongese atu ngwetu Wanangana uli umwe unguvulu wamwenemwene wa Zambi uze mukalumuna hashi heswe paraisu. Yetu nawa twakuzachisa maliji “jina lienu lipwe lisandu” hanga twasolwele ngwetu Zambi kali ni jina nawa yetu twatamba kulipwisa lisandu.—Mateu 6:9.

2. Kuchi tunanyingika ngwetu Yesu kakazangile yetu tupwe ni kufunyina mashimbu eswe maliji wowene ha kulemba?

² Shina Yesu kazangile ngwenyi muze mutulemba twatamba kufunyina mashimbu eswe maliji waze iye azachishile? Ka. Yesu kambile ngwenyi: “Hakulemba kanda nukokojola chamokomoko.” (Mateu 6:7) Ha shimbu limwe, muze iye te analongesa tumbaji twenyi chize malemba, iye katongwele  kulemba chochene alioze kazachishile maliji eka. (Luka 11:1-4) Ha chino, Yesu kahichikile chilweza cha kulemba hanga tunyingike yuma yize twatamba kuhanjika ha kulemba chetu.

3. Yihula yika mutuhasa kulihula muze tunalilongesa chileza cha kulemba cha Yesu?

³ Mu mutwe uno ni uze muusalaho, mutulilongesa malongeso a chilweza cha kulemba cha Yesu. Muze mutulilongesa, twatamba kulihula chino: ‘Kuchi chilweza cha kulemba chino muchihasa kungukwasa kulemba? Nawa chikuma chilemu, shina ngunatwame nikulita ni kulemba cha chilweza cha Yesu nyi?

4. Yika liji “Tata” linatwiwulula, nawa kuchi Yehova ali Tata yetu?

⁴ Yesu kaputukile ni kulemba ngwenyi, “Tata.” Chinatwiwulula ngwetu Yehova kali Tata wa mandumbu jetu eswe hano hashi. (1Petulu 2:17) Waze anasakula kuli Yehova hanga akatwame mu malilu ni kwaapwisa ana jenyi, o kakuvuluka Yehova ngwo Tato mu jila yeka. (A-Roma 8:15-17) Atu waze makatwama hano hashi no mahasa kusanyika Yehova ngwo “Tata.” Mumu, Yehova kakwaaha mwono nawa ni zango lieswe kakwaaha yuma yize yakufupiwa ku mwono wo. Ayo makaavuluka ngwo “ana ja Zambi” muze hapwa angunu ni kushishika kuli Yehova ku cheseko chakasula.—A-Roma 8:21; Usolwelo 20:7, 8.

5, 6. Chawana chika chipema chize yisemi mahasa kuhana kuli ana jo, nawa yika mwana ni mwana atamba kulinga ni chawana chacho? (Tala chizulie cha uputukilo.)

⁵ Yisemi mahasa kuhana chawana kuli ana jo muze ayo maakwasa kunyingika ngwo Yehova kali Tato wa mu malilu nawa muze maalongesa chize atamba kulemba kuli iye. Umwe kalayi wa mbonge mu África do Sul yamba ngwenyi: “Chize muze ana jetu a mapwo asemukine, te nakulemba hamwe no ha ufuku weswe nyi nguli ku zuwo. Ana jetu a mapwo kanji-kanji kakwamba ngwo ayo keshi kwiwuluka maliji eswe waze te nakuzachisa ha kulemba cha ufuku. Alioze ayo kakwiwuluka mashimbu apema waze te twakuhanjika ni Tata yetu Yehova ni kwivwa kuwaha ku mbunge ni sambukila. Muze namwene ngwami no mahasa kulemba yingwakolweza hanga alembe ni liji mwilu hanga ngupanjike maliji ni manyonga jo waze analweze Yehova. Wano kapwile mashimbu apema chinji ha kunyingika kanawa manyonga a mu mbunge jo. Ami napwile ni kwaakwasa hanga ayo ahase kuzachisa maliji alita a chilweza cha kulemba cha Yesu hanga kulemba cho chipwe ni ulemu.”

⁶ Ana jenyi yanunga ni kukundama kuli Yehova, chipwe muze te hakola. Haliapwila ayo ku malo jo ali nawa kanalingila Yehova mu mulimo wa mashimbu eswe hamwe ni malunga jo. Chawana chipema chize yisemi atamba kuhana kuli ana jo chili kwaalongesa ngwo Yehova kali Mutu wamwenemwene nawa ngwo mahasa kupwa sepa lio mupema. Alioze mwana ni mwana katamba kufunga mwene usepa wenyi upema ni Yehova.—Masamu 5:11, 12; 91:14.

7. Uwahililo uka tuli nawo, nawa yika twatamba kulinga?

⁷ Tunawahilila ha kunyingika jina lia Zambi ni kupwa “munyachi ha jina lienyi.” (Yilinga 15:14; Izaia 43:10) Etu twakulemba  ngwetu “Jina lienu lipwe lisandu,” chino chinalumbunuka ngwo, jina lienyi hanga lipwe kupemesa. Twakulemba nawa kuli Yehova hanga atukwase kwehuka kulinga hanji kwamba chuma chize muchihasa kupihisa jina lienyi lisandu. Twatambile kupwa ngwe amwe aku sekulu yitangu waze te keshi kulinga yuma yize te atamba kulinga. Paulu kasonekene hali ayo ngwenyi: “Jina lia Zambi kakulishililika hakachi ka akwa mavungu, mumu hali yenu.”—A-Roma 2:21-24.

8, 9. Hana chilweza cha chize Yehova akukwasa waze akuzanga kupwisa jina lienyi lisandu.

⁸ Twakulinga yeswe yize mutuhasa hanga tulemese jina lia Yehova. Umwe ndumbu wa ku Noruega yoze wasalile ni mwana wa miaka yaali, muze lunga lienyi afwile iye yamba ngwenyi: “Wano kapwile amwe mashimbu akalu chinji ku mwono wami. Te nakulemba mashimbu eswe, ni kufunga manyonga jami hanga nguchine kuhona ushishiko hanji kukwata chiyulo chipi chize muchihana Satana uhashi wa kuchoka Yehova. Nazangile kupwisa jina lia Yehova lisandu, nawa nazangile hanga mwanami akamone nawa tato mu Paraisu.”—Yishima 27:11.

⁹ Shina Yehova kakumbulwile kulemba chenyi? Mba. Ha kupwa mashimbu eswe hamwe ni mandumbu, iye yawana ukolwezo. Ha kupalika cha miaka yitano, iye yalimbata ni umwe mukulwana wa mu chikungulwila. Mwanenyi haliapwila kali miaka 20, hanamupapachisa. Iye yamba ngwenyi: “Ngunawahilila chinji mumu lunga liami kakungukwasa kulela mwanami.”

10. Kuchi Zambi makapwisa pundu jina lienyi lisandu?

¹⁰ Yehova makapwisa pundu jina lienyi lisandu muze makachiza waze eswe akumuhona vumbi ni kwehuka chiyulo chenyi. (Tanga Ezekiele 38:22, 23.) Ha shimbu liacho, atu makapwa angunu, nawa mu malilu ni hashi, eswe makawayila Yehova ni kuhalisa jina lienyi lisandu. Ha chino, Tata yetu ya zango makapwa “yuma yeswe muli eswe.”—1 A-Korindu 15:28.

11, 12. Ha mwaka 1876, yika Yehova akwashile atu jenyi kunyingika?

¹¹ Muze Yesu te kanda achifuna mu malilu, tumbaji twenyi amuhulile ngwo: “Mwene, haliapwila muhilwisa wanangana kuli A-Izalele, nyi?” Yesu yakumbulula ngwenyi, waze te hi mashimbu ko o kunyingika muze te Wanangana wa Zambi muuputuka kuyula. Iye yamba kuli tumbaji twenyi hanga alinge mulimo uze ulemu chinji. (Tanga Yilinga 1:6-8.) Alioze iye nawa yaalongesa hanga alembe hanga Wanangana wa Zambi wize ni kushimbwila shimbu liacho. Kashika yetu mutuchinunga ni kulemba hanga Wanangana wa Zambi wize.

¹² Muze mashimbu te hakundama hanga Yesu aputuke kuyula mu malilu, Yehova yakwasa atu jenyi hanga anyingike shimbu lika te iye maputuka kuyula. Ha mwaka 1876, Charles Taze Russell yasoneka ngwenyi, “Mashimbu a akwa-Mavungu: Shina Haheta Kusongo Nyi?” Iye yalumbununa ngwo “tungonde shimbiali” uprofeto uze uli mu mukanda wa Daniele uze “unatondekeza mashimbu a akwa-mavungu” unalite ni uprofeto wa Yesu. Mukanda wacho yiulumbununa  ngwo mashimbu jacho te maputuka ha mwaka 1914. *—Daniele 4:16; Luka 21:24.

13. Yika yalingiwile ha mwaka 1914, nawa shindakenyo yika yinahane yuma yize yinalingiwa hashi kukatuka ha mwaka 1914?

¹³ Ha mwaka 1914 jita yaputukile mu Europa, mba hi yilitanda hashi heswe. Ha mukunda wa jita, kwapwile kapunga munji wa zala. Mba muze jita yahwile ha mwaka 1918, yikupwa kapunga yoze washihile atu anji mu chifuchi kuhiana waze afwile mu jita. Yuma yeswe ai te yinasolola “chilayi” chize Yesu ambile. Chilayi chacho chasolwele ngwo Yesu hapwa Mwanangana mu malilu ha mwaka 1914. (Mateu 24:3-8; Luka 21:10, 11) Ha mwaka wacho “Iye watuhukile nikukumba, hanga akakumbe.” (Usolwelo 6:2) Yesu kanyashine Satana ni andemoniu jenyi hashi. Mba muze yino yalingiwile uprofeto yiuputuka kumanunuka uze unambe ngwo: “Lamba kuli akwa hashi ni ku kalunga-lwiji, mumu Ndiapu hanahulumuka kuli yenu, kali ni ufwatulo wunji mumu kananyingika mwaka ukepe wika ali nawo.”— Usolwelo 12:7-12.

14. (a) Mumu liaka nihindu mutuchinunga ni kulemba hanga Wanangana wa Zambi wize? (b) Mulimo uka ulemu uze twatamba kulinga haliapwila?

¹⁴ Uprofeto uze uli mu mukanda wa Usolwelo 12 unatukwase kunyingika mumu liaka yuma yipi yaputukile kulingiwa hano hashi ha shimbu lize Yesu  amupwishile Mwanangana mu Wanangana wa Zambi. Chipwe ngwe Yesu kanayulu mu malilu nihindu Satana kanayulu hano hashi. Alioze kwasala hakehe “hanga akakumbe” ha kuchiza eswe waze ali api hano hashi. Muze tunashimbwila yuma yacho, twatamba kununga ni kulemba hanga Wanangana wa Zambi wize, nawa twatamba kununga ni kwambujola chinji Wanangana wacho. Mulimo wetu wa kwambujola unamanununa uprofeto wa Yesu wakwamba ngwo: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.”—Mateu 24:14.

15, 16. Shina twatamba kulemba wika hanga upale wa Zambi ulingiwe hano hashi? Lumbununa.

¹⁵ Hakupalika cha miaka 6,000, upale wa Zambi te wakulingiwa hano hashi. Ha chino kashika Yehova ambile ngwenyi yuma yeswe alingile ‘yapemene chikolo.’ (Uputukilo 1:31) Kukatuka ha shimbu lize Satana alimikine ni Zambi, atu anji keshi kulinga nawa upale wa Zambi. Alioze musono tununu a tununu nake twa atu kakuwayila Yehova. Ayo kakulemba hanga upale wa Zambi ulingiwe hano hashi, o nawa kakulinga upale wa Zambi. O kakutwama nikulita ni shimbi ja Zambi nawa kakwambujola Wanangana wa Zambi kuli akwo ni zango lieswe.

¹⁶ Chakutalilaho, umwe mishionaliu uli ni miaka 80 mu África, yoze apapachishile ha mwaka 1948, yamba ngwenyi: “Yami nakulemba mashimbu eswe hanga tufupe atu eswe waze ali ngwe mapanga ni kwaakwasa hanga anyingike Yehova amu kuchili shimbu. Nawa, nyi ngunambujola kuli umwe mutu, nakwita mana kuli Yehova hanga nguhete ku mbunge ya mutu wacho. Ni kumumona ngwe panga yoze hinawana, nakulemba Yehova awahise tachi jami hanga ngumufunge kanawa.” Kashinakaji yono wa pwo kakukwasa atu anji hanga anyingike Yehova. Shina unanyingika umwe kashinakaji yoze wakulinga ni zango lieswe upale wa Zambi?—Tanga A-Fwilipu 2:17.

17. Kuchi tunevu hakutwala ku yize Yehova makalinga hali atu ni hashi?

¹⁷ Twatamba kununga ni kulemba hanga upale wa Yehova ulingiwe ndo muze iye machiza akwa-kole jenyi hano hashi. Ha shimbu liacho, hashi heswe muhakapwa paraisu, nawa atu anji waze hanafu makaahindwisa. Yesu ngwenyi, “ola muyiza, muze waze eswe ali mu mafuka makevwa liji lienyi, makatuhuka.” (Yoano 5:28, 29) Achinyonga kama tangwa liacho, muze mutukatambula asoko a zango waze hanafu! Zambi “makakusumuna masoji eswe ku meso jo.” (Usolwelo 21:4) Anji akuli ayo kali “yihenge” waze kanda achililongesa kama umwenemwene hakutwala kuli Yehova ni Yesu. Mutukawahilila chinji hakwaalongesa hakutwala ku upale wa Yehova hanga akahase kupwa ni “mwono wa mutolo.”—Yilinga 24:15; Yoano 17:3.

18. Yika atu anafupu chinji?

¹⁸ Muze Wanangana wa Zambi muwiza, muukapwisa jina lienyi lisandu, nawa eswe makalinunga mu uwayilo wa Yehova. Ewa Zambi makahana kuli atu yize anafupu, chipi-chipi kwita chitatu chize chili ha chilweza cha kulemba cha Yesu. Ha mutwe uze muusulaho, mutulilongesa yuma yikwo yilemu yize Yesu alongesele ha chilweza cha kulemba chenyi.