1. Ki mannyer nou kapab servi sa lapriyer dan Matye 6:9-13 dan predikasyon?

I ANNAN en kantite dimoun ki konn lapriyer Notreper parker. Souvandfwa dan predikasyon nou servi sa lapriyer pour ed dimoun konpran ki Rwayonm Bondye i en vre gouvernman e ki i pou anmenn bann bon sanzman lo later. Nou osi servi premye demann sa lapriyer pour montre ki Bondye i annan en non personnel ki bezwen ganny sanktifye oubyen “ganny konsidere konman sen.”—Mat. 6:9, not dan NW.

2. Ki mannyer nou konnen ki Zezi pa ti oule ki lapriyer model i ganny repete mo pour mo sak fwa ki nou priye?

² Bokou dimoun dan bann larelizyon Kretyen i repet sa lapriyer mo pour mo ler zot priye. Eski sanmenm sa ki Zezi ti anvi nou fer sak fwa ki nou priye? Non. Zis avan ki Zezi ti donn sa lapriyer model i ti dir: “Kan zot priye, pa servi [oubyen “repet,” NW] en kantite parol.” (Mat. 6:7) En lot zour, Zezi ti repet sa lapriyer me safwasi i ti servi bann mo diferan. (Lik 11:1-4) Alor Zezi in ed nou pour konpran ki nou  devret demande dan lapriyer par konmans avek sa ki pli enportan. I fer sans alor ki sa lapriyer i ganny apele lapriyer model.

3. Ki kestyon nou kapab medit lo la anmezir ki nou egzamin sa lapriyer model?

³ Dan sa lartik ek sa enn swivan nou pou egzamin sa lapriyer model. Anmezir ki nou fer sa, demann ou lekor, ‘Ki mannyer sa lapriyer model i kapab ed mwan pour amelyor mon lapriyer? Pli enportan ankor, eski mon pe viv an armoni avek sa lapriyer?’

4. Ki sa lekspresyon “nou Papa” i fer nou rapel e dan ki sans Zeova i “Papa” bann Kretyen ki annan sa lespwar pour viv lo later?

⁴ Dan sa lapriyer Zezi ti servi sa lekspresyon “nou Papa,” non pa “mon Papa,” sa i fer nou rapel ki nou form parti en “lasosyasyon bann frer” ki vreman kontan kanmarad. (1 Pyer 2:17, NW) Pa sa i en gran privilez! Bann Kretyen swazir in ganny adopte konman bann garson Bondye e zot annan sa lespwar pour al viv dan lesyel, alor zot annan tou drwa pour apel Zeova zot “Papa.” (Rom. 8:15-17) Bann Kretyen ki annan sa lespwar pour viv lo later i osi kapab apel Zeova zot “Papa.” I sa Enn ki donn zot lavi e akoz i kontan tou son bann vre adorater i donn zot sa ki zot bezwen. Bann ki annan sa lespwar pour viv lo later pou vin parfe e apre ki zot in reste fidel dan sa dernyen tes, zot pou ganny konsidere konman vre zanfan Bondye.—Rom. 8:21; Rev. 20:7, 8.

5, 6. Ki pli bon kado bann paran i kapab donn zot zanfan e ki sak zanfan i devret fer avek sa kado? (Vwar portre lo paz 20.)

⁵ Ler bann paran i ansenny zot zanfan pour priye e ed zot pour vwar Zeova konman en bon Papa dan lesyel, zot pe donn zot zanfan en bon kado. En frer ki pe servi konman sirveyan rezyonal Sidafrik i rapel: “Depi ki nou bann fiy ti ne mon ti priy avek zot tou le swar, amwen ki mon pa ti dan lakour. Nou bann fiy i souvan dir ki zot pa rapel egzakteman kwa ki ti ganny dir dan sa bann lapriyer tou le swar. Me zot rapel sa latmosfer, lefet ki i ti sakre pour kominik avek nou Papa Zeova e santi anpe e an sekirite. Dek ki zot ti kapab priye mon ti ankouraz zot pour fer li aotvwa, koumsa mon ti kapab tann zot dir sa ki zot panse e eksprim zot santiman avek Zeova. Sa ti en zoli loportinite pour ganny en nide kwa ki ti dan zot leker. Apre, zantiman mon ti kapab ansenny zot pour enkli bann laspe enportan sorti dan sa model lapriyer pour ki zot lapriyer i annan en pli bon fondasyon.”

⁶ I pa drol alor ki bann pti fiy sa frer ti fer bann bon progre spirityel. Ozordi zot annan en lavi maryaz ere e ansanm avek zot msye zot pe fer lavolonte Bondye dan servis a plen tan. I napa en pli bon kado ki bann paran i kapab donn zot zanfan ki pour ed zot devlop en relasyon pros avek Zeova. Byensir, i depan lo sak zanfan pour gard sa bon relasyon. Pour fer sa, sa zanfan i bezwen aprann kontan non Bondye e tret li avek sa pli gran respe.—Ps 5:11, 12; 91:14.

7. Ki privilez pep Bondye i annan, me ki nou bezwen fer?

⁷ I en gran privilez pour nou konn non Bondye e osi pour vin “en pep pour son non.” (Akt 15:14; Iza. 43:10) Nou sipliy nou Papa dan lesyel: “Ki ou non i ganny sanktifye.” Ler ou fer sa demann sa i kapab pous ou pour demann Zeova led pour ou evite fer oubyen dir okenn  keksoz ki kapab anmenn repros lo son non sen. Nou pa anvi vin parey serten dan premye syek ki pa ti pratik sa ki zot ti prese. Konsernan zot, zapot Pol ti ekrir: “Se akoz zot menm . . . ki lezot pep i koz kont Bondye.”—Rom. 2:21-24.

8, 9. Donn en legzanp lo ki mannyer Zeova i beni bann ki anvi sanktifye son non.

⁸ Nou anvi sanktifye non Bondye. En ser Lanorvez ki ti trouv li tousel avek son pti garson de-z-an apre lanmor son msye, ti dir: “I ti en moman vreman difisil dan mon lavi. Mon ti priye tou le zour, preski tou le erdtan. Mon ti demann lafors pour reste stab emosyonnelman, pour ki mon pa donn Satan en rezon pour provok Zeova akoz en move swa ki mon’n fer oubyen akoz mon’n vin enfidel. Mon ti anvi sanktifye non Zeova e mon ti anvi ki mon garson i revwar son papa dan Paradi.”—Prov. 27:11.

⁹ Eski Zeova ti reponn son bann lapriyer? Wi. Sa ser ti asosye regilyerman avek bann frer ek ser ki kontan li e zot ti donn li sipor. Senk an pli tar, i ti marye avek en ansyen. Aprezan son garson i annan 20 an e i en frer batize. Sa ser i dir: “Mon vreman kontan ki mon msye ti ed mwan pour elve li.”

10. Kwa ki neseser pour ki non Bondye i ganny sanktifye konpletman?

¹⁰ Kwa ki neseser pour ki non Bondye i ganny sanktifye konpletman e tou repros i ganny tire? Pour sa arive, Zeova i bezwen azir pour detri tou bann ki volonterman rezet son souvrennte. (Lir Ezekyel 38:22, 23. *) Limanite pou vin parfe ptitapti. Pa nou vreman enpasyan pour viv dan sa letan kot tou imen ensi ki lanz pou tret non Zeova konman sen! Apre sa, finalman nou Papa ki dan lesyel ki kontan nou “i ava tou pour tou dimoun.”—1 Kor. 15:28.

11, 12. Ver lafen diznevyenm syek, ki leksplikasyon bann vre Kretyen ti gannyen?

¹¹ Avan ki Zezi ti retourn dan lesyel son bann zapot ti demann li: “Senyer, eski la aprezan, ou pou retabli rwayonm Izrael?” Larepons ki Zezi ti donn zot ti montre ki i pa ti ankor ler pour zot konnen kan ki Rwayonm Bondye ti pou konmans rennyen. I ti demann son bann disip pour konsantre lo pres sa bon nouvel ki ti sa travay enportan ki zot ti bezwen fer. (Lir Akt 1:6-8.) Toutfwa, Zezi ti ansenny son bann disip pour esper avek enpasyans larive Rwayonm Bondye. Alor bann Kretyen depi letan bann zapot pe priye pour ki sa Rwayonm i vini.

¹² Ler Rwayonm Bondye dirize par Kris ti pros pour konmans rennyen dan lesyel, Zeova ti ed son pep pour konpran ki lannen sa ti pou arive. An 1876, en lartik ki Charles Russell ti ekrir ti ganny pibliye dan sa magazin Bible Examiner. Sa lartik “Gentile Times: When Do They End?” (Kan ki letan bann nasyon etranze i fini?) ti fer resorti ki 1914 ti en lannen enportan. Sa lartik ti relye sa “set letan” dan profesi Danyel avek “letan bann nasyon etranze” ki Zezi ti koz lo la. *—Dan. 4:16; Lik 21:24.

13. Ki ti arive lannen 1914 e ki sa bann levennman ki’n arive depi sa letan i montre?

 ¹³ An 1914 lager ti deklare ant bann nasyon Lerop e i ti propaz partou dan lemonn. Ler sa lager ti’n fini an 1918 ti annan bann lafamin terib ek en lepidemi lafyev ki ti touy plis dimoun dan lemonn ki sa lager li menm. Sa “siny” ki Zezi ti donnen pour idantifye son prezans envizib konman nouvo Lerwa later ti konmans ganny akonplir. (Mat. 24:3-8; Lik 21:10, 11) I annan en kantite levidans ki montre ki lannen 1914 ti sa letan kot “en kouronn” ti ganny donnen avek Senyer Zezi Kri. I “ti ale konman en venker e pour ganny laviktwar.” (Rev. 6:2) I ti lager kont Satan ek son bann demon e i ti zet zot lo later. Depi ki sa ti arive, sa profesi ti konmans ganny akonplir: “Maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.”—Rev. 12:7-12.

14. (a) Akoz i ankor enportan pour priye ki Rwayonm Bondye i vini? (b) Ki privilez nou annan?

¹⁴ Sa profesi dan Revelasyon 12:7-12 i eksplike akoz bann move levennman ki pe trouble limanite ti konmans an menm tan ki Rwayonm Bondye ti ganny etablir. Zezi, Lerwa Rwayonm Bondye ti konmans rennyen parmi son bann lennmi. Nou pou kontinyen priye ki Rwayonm Bondye i vini ziska ki Zezi i ganny laviktwar e met en lafen avek mesanste lo later. An menm tan, nou bezwen viv  an armoni avek sa lapriyer par partisip dan lakonplisman laspe pli ekstraordiner sa “siny.” Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Mat. 24:14.

15, 16. Ki mannyer nou kapab viv an armoni avek sa demann ki lavolonte Bondye i ganny akonplir lo later?

¹⁵ Apepre 6,000 an pase, lavolonte Bondye ti pe ganny fer lo later. Se pour sa ki Zeova ti kapab get sa bon konmansman ki i ti’n donn limanite e dir: “I ti tre bon.” (Zen. 1:31) Apre sa, Satan ti rebel e depi sa letan, zis en ptigin dimoun lo later ki’n fer lavolonte Bondye. Me ozordi nou annan sa privilez pour viv dan en letan kot i annan apepre wit milyon Temwen ki pa zis pe priye ki lavolonte Bondye i ganny akonplir lo later me osi pe fer zefor pour viv an armoni avek sa lapriyer. Zot fer sa par zot fason viv e ler zot partisip avek devouman dan sa travay pour fer disip.

¹⁶ Par egzanp, en ser ki ti batize an 1948 e ki ti servi konman en misyonner Lafrik i dir: “Anliny avek sa parti dan sa lapriyer model, souvandfwa mon priye ki tou bann ki resanble mouton pou ganny kontakte e ganny led pour aprann konn Zeova avan ki i tro tar. Deplis, avan ki mon pres avek en dimoun mon demann lasazes pour kapab tous son leker. Mon priy Zeova pour beni nou zefor pour pran swen avek bann dimoun ki nou’n deza trouve ki resanble mouton.” I pa drol alor ki sa ser ki annan 80 an in reisi dan son minister e ansanm avek led lezot i’n ed plizyer dimoun pour vin Temwen Zeova. San dout, ou kapab mazin lezot dimoun ki en bon legzanp ki’n fer tou pour fer lavolonte Bondye malgre ki zot avanse dan laz.—Lir Filipyen 2:17. *

17. Ki mannyer ou santi konsernan lafason ki Zeova pou reponn nou lapriyer ki son lavolonte i ganny akonplir lo later?

¹⁷ Nou pou kontinyen priye ki lavolonte Bondye i ganny akonplir lo later ziska ki tou bann lennmi Rwayonm Bondye i ganny detrir. Apre sa, later pou vin en paradi e plizyer bilyon dimoun pou resisite. Zezi ti dir: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa.” (Zan 5:28, 29) Pa i pou gou pour revwar tou bann dimoun ki nou ti’n perdi dan lanmor! Bondye “pou eswiy tou larm dan [nou] lizye.” (Rev. 21:4) Laplipar dimoun ki pou resisite pou bann “move” dimoun ki ti mor avan ki zot aprann laverite lo Zeova ek son Garson. I pou en gran privilez pour ansenny zot lavolonte ek plan Bondye e sa pou ed zot kalifye pour ganny “lavi eternel.”—Akt 24:15; Zan 17:2, 3.

18. Ki limanite i pli bezwen?

¹⁸ Lape ek larmoni iniversel i depan lo sanktifikasyon non Zeova atraver Rwayonm Bondye. Alor Bondye pou donn limanite bann keksoz ki zot pli bezwen ler i reponn sa trwa premye demann dan sa lapriyer model. Antretan, nou annan lezot bezwen enportan ki ganny mansyonnen dan sa kat lezot demann dan sa lapriyer model Zezi. Nou pou diskit lo la dan sa lartik swivan.