1. Iseda haroro gaukara ai, edena dala ai Mataio 6:9-13 ita gaukaralaia diba?

TAUNIMANIMA momo be Lohiabada Ena Guriguri idia diba bona idia gwauraia diba. Ruma-ta-ruma-ta gaukara ai, nega momo ita ura unai guriguri amo ruma taudia dekenai ita hahedinaraia Dirava ena Basileia be gavamani korikori ta, bona unai gavamani ese tanobada ena noho dalana do ia hanamoa. Eiava guriguri ena noinoi ginigunana amo ita hahedinaraia Dirava be mai ena ladana, bona unai ladana ita hahelagaia be namo.—Mat. 6:9.

2. Iesu ia gwau ita guriguri neganai, gau tamona do ita gwauraia loulou, a?

² Iesu ia hahedinaraia unai guriguri ita gwauraia neganai, ena hereva do ita gwauraia loulou, Kerisendom taudia ese idia karaia bamona, a? Lasi. Iesu be unai guriguri ia do gwauraia lasi neganai, ia gwau: “Oi guriguri neganai, gau tamona oi herevalaia loulou lasi.” (Mat. 6:7) Bena nega ma ta ai, unai guriguri ia gwauraia lou, to edia hereva ia haidaua sisina. (Luka 11:1-4) Iesu ese unai guriguri amo ita ia hadibaia dahaka mai anina bada gaudia ita gurigurilaia.

3. Lohiabada ena Guriguri ita herevalaia neganai, edena henanadai do ita laloa?

 ³ Inai stadi bona stadi gabena ai, ita be Lohiabada Ena Guriguri do ita stadilaia. Unai ita karaia neganai, sibona oi nanadaia: ‘Edena dala ai Lohiabada Ena Guriguri ese egu guriguri dalana ia hanamoa diba? Bona, egu mauri lalonai lau hahedinaraia, unai guriguri lau laloa bada, a?’

4. Inai hereva “aiemai Tamana,” amo dahaka ita dibaia? Bona edena dala ai tanobada helarona idia abia Keristani taudia be Iehova dekenai idia gwau diba “Tamana”?

⁴ Iesu ese ia gwauraia guriguri be haheitalai sibona, unai dainai guriguri lalonai “Tamana” ita gwauraia neganai, ita hahedinaraia ita be “tadikaka oreana” ta bona ita lalokau heheni. (1 Pet. 2:17) Unai be hahenamo badana. Dirava ese ia horoa Keristani taudia—guba maurina do idia abia taudia—be Iehova dekenai idia gwau diba “Tamana.” (Roma 8:15-17) Tanobada helarona do idia abia Keristani taudia danu be Iehova dekenai idia gwau “Tamana.” Iehova be edia Mauri Henia Tauna, bona tomadiho momokani taudia dekenai mai lalokau ida edia ura gaudia ia henia. Tanobada helarona idia abia taudia be goevadae taudia ai idia lao bona hahetoho ginigabena idia hanaia neganai, idia be Dirava ena natudia ai do idia lao.—Roma 8:21; Apok. 20:7, 8.

5, 6. Tama sina ese edena dala ai, edia natudia idia durua diba? Bona natudia ta ta be dahaka idia karaia diba? (Laulau ginigunana herevalaia.)

⁵ Bema tama sina be edia natudia dekenai guriguri dalana idia hadibaia, bona idia durua Iehova be edia guba Tamana ai idia halaoa totona, idia be harihari gauna namona idia henia. South Africa ai sekit naria gaukara ia karaia tadikaka ta ia gwau: “Aiemai natudia kekeni idia vara neganai, hanuaboi ibounai lalonai idia ida lau guriguri, to bema gabu ta lau lao, unai negadia sibona ai ai guriguri hebou lasi. Aiemai natudia kekeni idia gwau unai hanuaboi ai lau gwauraia guriguri edia hereva idia laloatao lasi. To, idia laloatao gaudia be unai nega namodia, iseda Tamana Iehova ida herevahereva karana be helaga karana ta, bona idia mamia Dirava ese idia dekenai maino ia henia. Lau itaia idia hegeregere guriguri idia gwauraia neganai, idia lau hagoadaia mai gado bada ida idia guriguri totona, unai amo edia hemami be Iehova dekenai idia gwauraia neganai, lau kamonai diba. Unai be nega namona danu idia laloa gaudia lau dibaia totona. Bena idia lau durua diba Lohiabada Ena Guriguri ese ia hahedinaraia mai anina bada gaudia idia herevalaia totona. Unai amo edia guriguri be mai anina.”

⁶ Unai tadikaka ena natudia kekeni be hereva momokani lalonai idia goada idia lao. Hari idia headava, bona edia adavana ida ful-taim hesiai gaukara lalonai Dirava ena ura idia karaia noho. Tama sina be edia natudia idia durua Iehova be edia turana ai idia halaoa totona, unai be harihari gauna namona ta. Oibe, ta ta ese unai hetura karana idia hagoadaia noho be mai anina bada. Unai ena anina be Dirava ena ladana do ita lalokau henia, bona ita matauraia bada.—Sal. 5:11, 12; 91:14.

7. Dirava ena taunimanima ese idia abia hahenamo be dahaka? Bona dahaka ita karaia unai hahenamo ita abia totona?

⁷ Dirava ena ladana ita diba sibona lasi, to ‘iena ladana ita abia’ be hahenamo badana. (Kara 15:14; Isa. 43:10) Iseda guba Tamana ita guriguri henia: “Oiemu ladana do idia hahelagaia.” Unai bamona guriguri amo Iehova ita noia ita ia durua iena ladana hadikaia karana ta ita karaia lasi o iena  ladana hadikaia herevana ta ita gwauraia lasi. Aposetolo edia negai haida be unai bamona idia karaia dainai, Paulo ia gwau: “Umui dainai Dirava ena ladana be idau bese taudia huanai idia hadikaia.”—Roma 2:21-24.

8, 9. Edena dala ai Iehova ese iena ladana idia ura hahelagaia taudia ia hanamoa? Haheitalai ta gwauraia.

⁸ Ita ura Dirava ena ladana ita hanamoa. Norway dekenai, taihu ta ena adavana ia mase neganai, ia sibona be natuna merona ia naria, ena mauri lagani be 2. Ia gwau, “Unai be lalohekwarahi bada negana. Dina ta ta bona kahirakahira hora momo ai lalogoada lau abia totona lau guriguri, badina lau ura lasi disisen kererena lau karaia bena Satani ese Dirava do ia hadikaia. Lau ura Iehova ena ladana lau hahelagaia, bona lau ura egu natuna ese ena tamana be Paradaiso ai do ia itaia lou.”—Aon. 27:11.

⁹ Iehova be unai bamona guriguri ia haerelaia, a? Oibe. Unai taihu be hanaihanai tadikaka taihu ia bamoa dainai, idia ese ia idia durua. Lagani faiv murinai, elda ta ia adavaia. Hari iena natuna mero ena mauri lagani be 20 bona ia bapatiso vadaeni. Taihu ia gwau: “Lau moale bada badina egu adavana ese lau ia durua ia ai naria totona.”

10. Dirava ena ladana ita hahelagaia totona, Iehova be dahaka do ia karaia?

¹⁰ Iehova ese ena ladana idia matauraia lasi bona iena lohia siahuna idia dadaraia taudia ibounai ia haorea neganai, iena ladana do ia hahelagaia. (Esekiela 38:22, 23 duahia.) Bena tanobada taudia be goevadae taudia ai do idia lao. Unai nega ai, taunimanima ibounai ese Iehova do idia tomadiho henia bona ena ladana helagana do idia hanamoa! Bona iseda lalokau guba Tamana be “gau ibounai edia kwarana ai do ia lao.”—1 Kor. 15:28.

11, 12. Lagani 1800 ena dokonai, Keristani taudia be dahaka idia lalopararalaia?

¹¹ Iesu be guba dekenai ia do daekau lasi neganai, ena aposetolo taudia idia henanadai: “Lohiabada e, inai nega ai oi ese Israela dekenai basileia do oi henia lou, a?” Iesu ena haere ese ia hahedinaraia unai be nega namona lasi Dirava ena Basileia do ia lohia matamaia negana idia diba totona. Ena hahediba taudia ia hamaoroa do idia karaia haroro gaukara idia laloa bada be namo. (Kara 1:6-8 duahia.) To Iesu ese ena murinai idia raka taudia ia hadibaia, mai moale ida Dirava ena Basileia ena mai idia naria totona. Unai dainai, aposetolo edia nega amo ema bona hari Keristani taudia be unai Basileia ena mai totona idia guriguri.

¹² Unai negai Iesu ese guba amo Dirava ena Basileia ia lohia matamaia neganai, Iehova ese ena taunimanima ia durua idia vara gaudia idia lalopararalaia totona. Lagani 1876 ai, Bible Examiner magasin dekenai Charles Taze Russell ese ia torea atikol ta ladana, “Idau Bese Edia Nega: Ia Ore Negana?,” ese ia hahedinaraia 1914 be mai anina bada laganina ta. Unai atikol ia hahedinaraia Daniela ese ia perovetalaia lagani 7 be Iesu ese ia herevalaia “idau bese edia nega ia ore” negana ida ia hegeregere. *—Dan. 4:16; Luka 21:24.

13. Lagani 1914 ai, dahaka ia vara, bona tanobada dekenai idia vara gaudia ese dahaka ia hamomokania?

¹³ Lagani 1914 ai, Europe besedia huanai tuari ia vara—unai tuari be tanobada ibounai dekenai ia lao. Lagani 1918 ai, tuari ia ore neganai, hitolo bada ia vara bona udu  kurukuru gorere dikana ese taunimanima momo ia hamasea. Unai be Iesu ese ia gwauraia “toana,” bona unai ese Iesu ena “noho” ia hahedinaraia, unai nega ai ia be tanobada ena King matamata ai ia lao. (Mat. 24:3-8; Luka 21:10, 11) Hamomokania gaudia momo ese idia hahedinaraia lagani 1914 ai, Dirava ese Lohiabada Iesu Keriso dekenai ‘korona ta ia henia, bona ia lao bona ena inai taudia ia hadarerea, bena ia kwalimu.’ (Apok. 6:2) Guba ia hagoevaia bona Satani bona ena demoni be tanobada dekenai ia negedia diho. Unai nega amo taunimanima ese inai hereva idia laloatao: “Tanobada bona davara, madi o, badina Diabolo be umui dekenai ia diho mai vadaeni, bona ia badu dikadika, badina ia diba iena nega be ia kwadogi.”—Apok. 12:7-12.

14. (a) Dahaka dainai Dirava ena Basileia do ia mai totona ita guriguri be mai anina bada? (b) Ita be dahaka do ita karaia?

¹⁴ Apokalupo 12:7-12 ai ia noho peroveta herevana ese ia hahedinaraia Dirava ena Basileia ia lohia matamaia neganai, taunimanima dekenai idia vara hisihisi badadia idia matamaia danu. Iesu be Dirava ena Basileia ena King ai ia lao neganai, ia be ena inai taudia huanai ia lohia matamaia. Hari, namona be Dirava ena Basileia do ia mai totona ita guriguri noho, unai bamona do ita karaia ela bona Iesu ese tanobada ai ena gaukara ia karaia guguru bona gwau-edeede kara dikadia ibounai do ia haorea. Danu, iseda guriguri hegeregerena namona be haroro gaukara ita karaia, unai be nega dokona “ena toana” ta. Iesu ia gwau:  “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mat. 24:14.

15, 16. Edena dala ai Dirava ena ura gauna be tanobada ai do ia vara noinoi be eda mauri ai ita laloa bada?

¹⁵ Lagani 6,000 gunanai, Dirava ena ura be tanobada ai idia badinaia namonamo. Unai dainai Iehova be taunimanima ia havaraia negana ia itaia neganai, ia gwau: “Gaudia ibounai . . . be namo herea.” (Gen. 1:31) Bena Satani ia gwau-edeede, bona unai nega amo taunimanima haida sibona be tanobada ai Dirava ena ura idia karaia. Hari ita moale bada, badina Witnes taudia 8 milioni mai kahana bamona be Dirava ena ura ia guguru totona idia guriguri sibona lasi, to idia ura edia mauri lalonai idia gurigurilaia gauna idia laloa bada. Danu, hahediba taudia halaoa gaukara idia karaia goadagoada.

¹⁶ Hegeregere, lagani 1948 ai ia bapatiso taihu ta be Africa ai misinari gaukara ia karaia neganai, ia gwau: “Lohiabada Ena Guriguri hegeregerena, hanaihanai lau guriguri mamoe bamona taudia do ita davaria bona ita durua Iehova idia diba totona, dokona ia do ginidae lasi neganai. Danu, lau ura ta lau haroro henia neganai, aonega totona lau noinoi, unai amo egu hereva amo unai tauna ena kudouna lau hamarerea diba. Bona mamoe bamona taudia ai davaria bona idia ai durua totona, lau guriguri Iehova ese emai gaukara do ia hanamoa.” Unai mauri lagani 80 taihu be unai bamona ia karaia dainai, ena haroro gaukara ai anina namona ia davaria, bona haida edia heduru amo momo ia durua Iehova ena Witnes taudia ai idia lao totona. Reana oi be unai bamona haheitalai namodia haida oi diba, ena be idia buruka to idia gaukara goada Dirava ena ura idia karaia totona.—Filipi 2:17 duahia.

17. Iseda guriguri hegeregerena, Iehova be ena ura tanobada totona ia hagugurua neganai, emu hemami be edena bamona?

¹⁷ Dirava ena Basileia idia inai henia taudia be tanobada ai idia do noho dainai, do ita guriguri noho Dirava ena ura gauna be tanobada ai do ia vara totona. Bena tanobada ai taunimanima bilioni momo be mase amo idia toreisi lou neganai, do ita itaia Dirava ena ura ia guguru. Iesu ia gwau: “Inai kara dekenai umui hoa lasi, badina nega ia mai noho, guria gabuna lalonai idia noho taudia ibounai ese ena gadona do idia kamonai, bona do idia raka-lasi.” (Ioa. 5:28, 29) Ita noho bona toreisi lou taudia ita welkam henia, unai be nega namona. Dirava ese “mata ranu ibounai be edia matana amo do ia dahua oho.” (Apok. 21:4) Do idia toreisi lou taudia momo be “kara maoromaoro lasi taudia,” idia mauri neganai idia be Iehova Dirava bona iena Natuna ena hereva momokani idia diba lasi bona idia mase. Idia dekenai Dirava ena ura mase taudia idia toreisi lou totona do ita hadibaia, unai amo idia ita durua “mauri hanaihanai” idia abia totona.—Kara 24:15; Ioa. 17:3.

18. Taunimanima edia mauri lalonai, mai anina bada gaudia be dahaka?

¹⁸ Dirava ena Basileia be Iehova ena ladana ia hahelagaia neganai, tanobada hegegemadai maino bona lalotamona do ia vara. Lohiabada Ena Guriguri lalonai idia noho noinoi ginigunadia toi be mai anina bada taunimanima dekenai, bona Iehova ese unai noinoi do ia hagugurua. To, eda mauri lalonai mai anina bada gaudia foa be Lohiabada Ena Guriguri lalonai idia gwauraia danu. Unai be stadi gabena ai do ita herevalaia.