1. Ni atail kin kalohk, ia duwen atail pahn doadoahngki sapwellimen Sises kapakapo me kileldi nan Madiu 6:9-13?

 ARAMAS tohto ese lepin lokaia kan nan kapakapo me kileldi nan Madiu 6:9-13. Ni atail kin kalohk, kitail kin doadoahngki lepin lokaia kan nan kapakap wet pwehn padahkihong aramas akan me Wehio uhdahn koperment ehu sang rehn Koht me pahn kawekila sampah ong paradais ehu. Kitail kin pil doadoahngki lepin lokaia kan “mwaromwi en sarawihla” pwehn kasalehda me mie mwaren Koht oh me kitail anahne kasarawihala.​—Mad. 6:9.

2. Ia duwen atail ese me Sises sohte ketin kupwurki kitail en ahnsou koaros kapwukapwurehiong lepin lokaia kohte ni atail kapakap?

² Ia duwe, Sises kupwurki kitail en ahnsou koaros kapwukapwurehiong lepin lokaia ko me e ketin doadoahngki ni atail kapakap, nin duwen me aramas tohto kin wia? Soh. Sises ketin mahsanih: “Ni amwail kin kapakap, dehr kin pwurepwurehng ndinda soangen lokaiaohte.” (Mad. 6:7, NW) Pil ehu ahnsou, ni  eh ketin padahkihong sapwellime tohnpadahk ko ia duwen arail en kapakap, e ketin kapwurehiong kapakapo ahpw e sohte ketin doadoahngki lepin lokaia kohte. (Luk 11:1-4) Eri Sises ketin kasalehiong kitail sapwellime kapakap pwehn padahkihong kitail soahng dah kan me kitail anahne kapakapki.

3. Peidek dah kan me ke kak pein idek rehmw ni omw onopki kapakapo me Sises ketin padahkihong kitail?

³ Nan iren onop wet oh iren onop en mwuhr, kitail pahn onopki mwahu duwen kapakapo me Sises ketin padahkihong kitail. Ni atail wia met, pein idek rehmw, ‘Ia duwen kapakap wet eh kak sewese ie en kamwahwihala ei kapakap?’ Oh kesempwal sang met, ‘I kin mour pahrekiong kapakapo?’

4. Dahme lepin lokaia “Samat” katamankihong kitail, oh ia duwen Siohwa eh ketin wia Samatail?

⁴ Sises ketin tepikihda kapakapo ni eh mahsanih, “Samat.” Met kin katamankihong kitail me Siohwa iei Sahm ong riatail Kristian kan koaros nin sampah. (1 Pit. 2:17) Irail kan me Siohwa ketin pilada en mi nanleng kin pwekipwekda nin duwen sapwellime seri kan, eri e ketin wia Samarail ni ahl tohrohr ehu. (Rom 8:15-17) Irail kan me pahn mour kohkohlahte nin sampah pil kak ekerkin ih “Samat.” Siohwa ketikihong irail mour oh ni limpoak ketikihda dahme re anahne. Irail pahn adaneki “sapwellimen Koht seri kan” mwurin arail unsekla oh kolokolte arail lelepek ong Siohwa ni kaimwiseklahn kasongosongo.​—Rom 8:21; Kaud. 20:7, 8.

5, 6. Mehnia kisakis me keieu mwahu me pahpa nohno kan kak kihong neirail seri kan? Dahme emenemen seri anahne wiahiong kisakis wet? (Menlau kilang tepin kilel.)

⁵ Pahpa nohno kan kin kihong neirail seri kan kisakis ehu ni arail kin sewese irail en wehwehki me Siohwa iei Samarail nanleng oh padahkihong irail en kapakapohng ih. Emen sounapwalih me kin seiloak nan Palieir en Aperika (South Africa) nda: “Sangete rahn me nait serepein ko ipwidi, I kin iang ira kapakap nipwong koaros, ihte ma I seiloak. Nait serepein ko kin kalapw nda me ira sohte taman soahng koaros me se kapakapki nipwong ko. Ahpw, ira kin taman pepehm en ahnsowo, kesempwalpen kapakapohng Samatail, Siohwa, oh pepehm en meleilei oh nsenamwahu. Ni ahnsou me ira kakehr kapakap, I kin kangoangehkin ira en kapakap ni ngihl laud pwe I en kak rong ara kasalehda ara madamadau oh pepehm ong Siohwa. Met kin wia ahnsou mwahu en esehda dahme mi nan mohngiongara. Eri I kakehr ni kamantik sewese ira en kapatahiong ire kesempwal kan sang kapakapo me Sises ketin padahkihong kitail pwe en mie wehwehn ara kapakap ko.”

⁶ Nah serepein ko pousehlahte karanihala Siohwa pil ni ahnsou me ira laudla. Met ira pwopwoudidahr oh kin iang ara pwoud ko doadoahngki pali laud en arail ahnsou ong papah Siohwa. Kisakis me keieu mwahu me pahpa nohno kan kak kihong neirail seri kan iei en padahkihong irail me Siohwa uhdahn ketin mie oh me irail kak wiahla kompoakepah keren men. Ahpw pein serio anahne kolokol nanpwungmwahu keren wet rehn Siohwa.—Mel. 5:11, 12; 91:14.

7. Soangen pai kaselel dahieu me kitail ahneki, ahpw dahme kitail anahne wia?

⁷ Kitail ahneki pai kaselel en ese mwaren Koht oh wia “aramas kei ong mwareo.” (Wiewia  15:14, NW; Ais. 43:10) Kitail kin kapakapki, “Mwaromwi en sarawihla.” Kitail kin pil peki rehn Siohwa en ketin sewese kitail en dehr wia de nda mehkot me kakete kasalehda me kitail sohte wauneki ih. Kitail sohte men duwehte ekei tepin Kristian ko me sohte kin wia dahme re padahkihong meteikan en wia. Pohl ntingwohng irail: “Pwehki kumwail mehn Suhs akan me mwaren Koht wiemwahlkilahr rehn mehn liki kan.”​—Rom 2:21-24.

8, 9. Menlau kihda ehu karasaras ong ia duwen Siohwa eh kin ketin sewese irail kan me men kasarawihala mware.

⁸ Kitail kin wia soahng koaros me kitail kak pwehn kawauwihala mwaren Siohwa. Emen sister nan Norway me ih oh nah pwutako me sounpar riau kelehpwla mwurin eh pwoudo mehla nda: “E wia ahnsou ehu me inenen apwal nan ei mour. Rahn koaros, kereniong awa koaros, I kapakapki kehl en kolokol ei pepehm kan en toupahrek pwe I en dehr kihong Sehdan kahrepe ehu en kauwe Siohwa pwehki ei pilipil sapwung de ei salelepek. I men kasarawihala mwaren Siohwa, oh I men nei pwutako en pwurehng kilang eh pahpao nan Paradais.”​—Lep. Pad. 27:11.

⁹ Ia duwe, Siohwa ketin sapengala eh kapakap kan? Ei. Sistero kin ale kangoang sang ni eh kin kaukaule iang rie Kristian kan. Sounpar limau mwuri, e pwoudikihda elder men. Nah pwutako, me met sounpar 20, papidaislahr. E nda: “I inenen perenki me ei pwoudo sewese ie apwalihada nei pwutako.”

10. Ia duwen Koht eh pahn ketin kasarawihala mwareo ni unsek?

¹⁰ Siohwa pahn ketin kasarawihala mwareo ni unsek ahnsou me e pahn ketikihsang irail koaros me sohte kin wauneki ih oh soikala ih nin duwen arail Kaun. (Wadek Esekiel 38:22, 23.) Ni ahnsowo, aramas pahn unsekla, oh koaros nanleng oh nin sampah pahn kaudokiong Siohwa oh kawauwih mware me sarawi. Eri, Samatail me limpoak pahn “ketin kakaun mehkoaruhsie.”​—1 Kor. 15:28.

11, 12. Nan pahr 1876, dahme Siohwa ketin sewesehki sapwellime aramas akan en wehwehki?

¹¹ Mwohn Sises ketidahla nanleng, sapwellime tohnpadahk ko patohwan kalelapak: “Maing, ia duwe, ih ahnsou kiset me komw pahn ketin kapwurehda Wehin Israel?” Sises ketin sapeng me kaidehn ahnsowo me irail en ese iahd me Wehin Koht pahn tepida kaunda. E ketin padahkihong sapwellime tohnpadahk ko ren nsenohkihte doadoahk kesempwalo en kalohk. (Wadek Wiewia 1:6-8.) Ahpw e pil ketin padahkihong irail en kapakapki Wehin Koht en ketido oh en kasikasik ahnsowo. Ihme kahrehda kitail kin kapakapkihte Wehin Koht en ketido.

¹² Ni eh kerenlahng ahnsowo me Sises en ketin tepida kakaun nanleng, Siohwa ketin sewese sapwellime aramas akan ren wehwehki mehnia pahr me met pahn wiawi. Nan pahr 1876, Charles Taze Russell ntingihada oaralap ehu me nda “Ahnsoun Mehn Liki kan: Iahd me E Pahn Imwisekla?” E kawehwehda me “sounpar isuh” me Daniel kohpada duwe iei me duwehte ahn wehin liki kan “ar ahnsou” me Sises ketin kohpada. Oaralapo kawehwehda me ahnsou ko pahn imwisekla nan pahr 1914. *—Dan. 4:16; Luk 21:24.

13. Dahme wiawi nan pahr 1914? Dahme mwekid kan nin sampah sangete pahr 1914 kadehdehda?

 ¹³ Nan pahr 1914, mahwen tepida nan Iurop oh mwadangete kohpeseng nan sampah pwon. Pwehki mahwen wet, mie lehk lapalap me wiawi. Oh ni kaimwiseklahn mahwen wet, nan pahr 1918, soumwahu lusulus laud ehu kemehla aramas tohtohsang me mahweno kemehla. Soahng pwukat koaros wia kisehn “kilel” me Sises ketikihda. Kilelo kadehdehda me Sises ketin wiahla Nanmwarki nanleng nan pahr 1914. (Mad. 24:3-8; Luk 21:10, 11) Nan pahro, e ketin “kolahng kalowehdi eh imwintihti kan.” (Kaud. 6:2) Sises ketin kesepwekehsang nanleng Sehdan oh nah ngehn saut akan ong sampah. Mwurin mwo, kokohpo tepida pweida: “Meid suwediong sampah oh madau! Pwe Tepilo leledohr rehmwa, oh e inenen lingeringer kowahlap pwehki eh ese me eh ahnsou mwotomwotalahr.”​—Kaud. 12:7-12.

14. (a) Dahme kahrehda kitail kin kapakapkihte me Wehin Koht en ketido? (b) Doadoahk kesempwal dahieu me kitail anahne wia met?

¹⁴ Kokohp wet nan Kaudiahl irelaud 12 kin sewese kitail en wehwehki dahme kahrehda soahng suwed kan tepida wiawi sampah mpen ahnsowo me Sises ketin wiahla Nanmwarki en Wehin Koht. Mendahki Sises ketin wie kakaun nanleng, Sehdan kin kakaunte nin sampah. Ahpw ahnsou keren Sises pahn ketin “kalowehdi eh imwintihti kan” sang ni eh ketikihsang soahng suwed  koaros nin sampah. Lao lel ahnsowo, kitail en doulahte kapakapki Wehin Koht en ketido oh doulahte soupisengki kalohki duwen Wehio. Atail doadoahk kin kapwaiada dahme Sises ketin kohpada: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”​—Mad. 24:14.

15, 16. Ia duwe, e itar en ihte kapakapki kupwuren Koht en pweida nin sampah? Menlau kawehwehda.

¹⁵ Mpen sounpar 6,000 samwalahro, kupwuren Koht wiawiher nin sampah. Ihme kahrehda Siohwa ketin mahsanih me e “inenen kupwurperenkihda wiepen nin lime pwukat koaros.” (Sen. 1:31) Mwuhr Sehdan uhwongada, oh sangete ni ahnsowo, pali laud en aramas akan sohla wia kupwuren Koht. Ahpw rahnwet mie mpen aramas welirar me kin papah Siohwa. Re kin kapakapki me kupwuren Koht en pweida nin sampah, oh re kin pil kapwaiada kupwuren Koht. Re kin mour ni ahl ehu me kin kaperenda Koht oh ngoangki padahkihong meteikan duwen sapwellime Wehi.

¹⁶ Karasepe, emen misineri sang Aperika me sounpar welihsek me papidaisla nan pahr 1948, nda: “I kin kalapw kapakapki me aramas koaros me rasehng sihpw pahn kak rong oh ale sawas en esehla Siohwa mwohn eh pwandala. Pil ni ahnsou me I pahn kalohk ong emen, I kin peki erpit en sair eh mohngiong. Oh me pid irail me rasehng sihpw kan me kitail diaradahr, I kapakapki me Siohwa en ketin kapaiahda atail nannanti en sewese irail.” Sister mah menet sewesehier me tohto en sukuhlki duwen Siohwa. Ke kak medewehla irail me mah teikan me kin ngoangki wiewia kupwuren Siohwa?​—Wadek Pilipai 2:17.

17. Ia omw pepehm me pid duwen dahme Siohwa pahn ketin wia ni ahnsou kohkohdo ong sampah oh aramas akan?

¹⁷ Kitail pahn doulahte kapakapki kupwure en pweida lao Siohwa ketikihsang sapwellime imwintihti kan sang sampah. Mwuhr sampah wet pahn wiahla paradais oh aramas lik lik kei pahn iasada. Sises ketin mahsanih me “ahnsou ehu pahn kohdo me irail koaros me mihmi nan sousou kan pahn rong kapitie, oh re pahn pedoisang nan arail sousou kan.” (Sohn 5:28, 29) Medewehla ia uwen kaperen en kasamwo irail kan me kitail poakohng! Koht pahn ketin “limwihasang pilen masarail koaros.” (Kaud. 21:4) Pali laud en irail kan me iasada iei irail kan me “suwed,” me saikinte sukuhlki duwen padahk mehlel me pid duwen Siohwa oh Sises. Kitail pahn perenki kasukuhliong irail duwen kupwuren Koht pwe ren kak ahneki mour soutuk.​—Wiewia 24:15; Sohn 17:3.

18. Dahme tohnsampah keieu anahne?

¹⁸ Ni ahnsou me Wehin Koht ketido, e pahn kasarawihla mwaren Koht, oh koaros nan sampah oh nanleng pahn miniminpene kaudokiong ih. Ei, Koht pahn ketikihong tohnsampah mehkan me re keieu anahne ni eh ketin sapengala tepin pekipek siluh ko nan kapakapo me Sises ketin padahkihong kitail. Nan iren onop en mwuhr, kitail pahn koasoiapene anahn kesempwal teikan me Sises ketin padahkihong kitail en kapakapki.