1. Testigo de Jehovacunaca ¿imashinata padrenuestro oracionmanda parlashpa villachinchi?

CUNANBICA ashtaca gentecunami padrenuestro oracionda rijsin. Testigo de Jehovacunacarin, padrenuestro oracionmanda parlashpami villachinchi. Diospa Reino shamuchun nishpaca Jehová Dios mandanata, Diospa Reino mandashpa cai Alpata shuj juyailla paraíso Alpaguta ruranatami villachinajunchi. Cutin, Taita Diospa shuti ‘alicachi tucushca cachun’ o santificado cachun nishpaca Taita Diosca shutita charinmi, paipa jucha illaj shutitaca respetanami can nishpami villachinajunchi (Mat. 6:9).

2. ¿Padrenuestro oracionda cutin cutin tigrashpa mañanajuchunllu Jesusca padrenuestro oraciondaca yachachirca?

² Ashtaca gentecunaca, Jesusmi yachachirca nishpami padrenuestro oraciondaca cutin cutin tigrashpa mañan. Shinapash ¿chai oraciondallata cutin cutin tigrashpa ninajuchunllu yachachirca? Na. Jesusca cashnami nirca: “Diosta mañanajushpaca, ama chai shimicunatallata cutin cutin tigrashpa mañanguichu” nishpa (Mat. 6:7). Ashtahuangarin shuj punllaca cutinmi padrenuestro  oracionda nirca. Shinapash shuj shimicunapimi nirca (Luc. 11:1-4). Jesusca imata mañanata yachachun, mañajushpa imata pundapi churashpa mañana cashcata yachachunmi padrenuestro oraciondaca yachachishpa saquirca.

3. Padrenuestro oracionmanda yachajunajushpaca ¿imacunapita pensarina capanchi?

³ Cai temapipash shamuj temapipash padrenuestro oracionmandami yachajugrinajunchi. Cai temacunata yachajunajushpaca pensaripashunchi: “Padrenuestro oracionbi shimicunaca ¿imashinata ashtahuan ali oraciongunata rurachun ayudahuanga? ¿Padrenuestro oracionbi shimicunata pactachishpachu causajuni?” nishpa.

4. a) “Jahua pachapi tiajuj ñuca Taitalla” nishca shimicunaca ¿imatata yarichin? b) ¿Imamandata cai Alpapi causanacunapash Jehová Diostaca ñucanchi Taita nita ushan?

⁴ Padrenuestro oracionga “jahua pachapi tiajuj ñucanchi Taitalla” nishpami callarin. Ñucanchi Taitalla nishca shimicunaca mundo enteropi huauquipanicunapa Jehová Dios Taita cashcatami yarichijun (1 Ped. 2:17). Ungidocunamanda parlashpaca, Jehová Dios paicunata agllashpa, paipa huahuacunatashna chasquijpimi paicunaca “Taita” nishpa Jehová Diostaca mañai ushan (Rom. 8:15-17). Cutin cai Alpapi causanacunaca, Jehová Dios causaita carashcamanda, tucui minishtirishcacunata carashcamandami Jehová Diostaca “Taita” nishpa mañaita ushan. Shinapash huaranga huatacunata Jesús mandajpi jucha illaj tucushpa, ultimocaman Jehovata tucuipi cazushpallami paicunaca Jehová Diospa huahuacuna tucuita ushanga (Rom. 8:21; Apoc. 20:7, 8).

5, 6. a) Jesusta catij taitamamacunaca ¿imatata shuj ninan valishca regalota carajunshna huahuacunamanga yachachita ushan? b) Huahuacunapash ¿imapita cada uno preocuparita ushan? (Callari dibujota ricupangui.)

⁵ Jesusta catij taitamamacunaca ¿imatata shuj ninan valishca regalota carajunshna huahuacunamanga yachachita ushan? Huahuacunamanga Jehovata mañanata, Jehová Dios paicunata shuj taita cuenda juyashpa ricuriajujtami shuj ninan valishca regalotashna yachachita ushan. Sudáfrica llactapi shuj superintendente huauquica ninmi: “Ñuca ushicuna nacirishca punllamandami cada tuta paicunahuan Jehová Diosta mañan carcani. Huasipi na cashpallami paicunahuanga na mañan carcani. Ñuca ushicunaca ninmi, imata nijushcata na yarishpapash mañanataca tucui shunguhuanmi alicachin carcanchi. Chai ratopica tranquilo, alimi sintirin carcanchi nishpa. Ña paicunallata oracionda rurai ushajpica ñuca uyajta oraciondaca ruraichilla nishpami animarcani. Shinami paicuna imata Jehová Diosman parlajta, imata pensajta, imashina sintirijta yachashpa imashina ashtahuan aliguta mañanata, padrenuestro oracionbi yuyaicunata imashina pundapi churashpa mañanata yachachi ushaparcani” nishpa.

⁶ Cunanbica chai huauquigupa ushicunaca alimi Jehovata sirvinajun. Cazarashpa cushillami causanajun. Cusacunandimi tiempo completopi sirvinajun. Imashinami paicunapa ejemplopi ricupanchi, oracionda rurashpa Jehovaman quimirinata yachachishpami taitamamacunaca shuj ninan valishca regalota carajuj cuenda can. Shinapash cada unomi huahuacunaca Jehovaman ashtahuan quimirishpa, paipa ñaupajpi ali ricurinataca preocuparina can (Sal. 5:11, 12; 91:14).

7. a) Testigo de Jehovacunaca ¿ima bendiciondata charipanchi? b) ¿Imashinata Jehovapa shuti santificado cachun munashcata ricuchipanchi?

⁷ Ñucanchicunaca Taita Diospa shutita rijsina, paipa shutita apaj organizacionbi cana bendiciondami charinchi (Is. 43:10; Hech. 15:14, NM). Jesusca nircami, Taita Diostaca ‘canba  jucha illaj shutiguca alicachi tucushca cachun’ o santificado cachun nishpa mañanguichi nishpa. Santificado cachun nishpaca Taita Diospa shutita ama imapash mapayachichun nishpami mañanajunchi. Chaimandami imatapash nishpa o imatapash rurashpa Jehová Diospa shutita mapayachingapaca na munanchi. Jesusta punda catijcunashnaca na canachu canchi. Paicunaca ali villaicunata villashpapash nalicunatami ruran carca. Chaimandami apóstol Pabloca paicunataca nirca: “Cangunamandami na israelcunaca, Taita Diospaj shutita nali shimicunata rimanajun” nishpa (Rom. 2:21-24).

8, 9. Jehová Diosca ¿imashinata paipa shutita santificangapaj munajcunataca bendician? Shuj ejemplota nipai.

⁸ Tucuicunami Jehová Diospa shutita santificangapaj munanchi. Noruega llactamanda panigupa ejemplota ricupashun. Paica ishcai huata jari huahuaguhuanmi viuda quedarca. Paica ninmi: “Chai punllacunaca shinlli shinllimi carca. Tucui punllacuna casi cada horasmi Jehová Diostaca shinlli tucungapaj ayudahuangui, ama yapata llaquirijungapaj ayudahuangui nishpa mañajurcani. Imapash nali decisionda ñuca rurajpi Jehová Diosmanda Diablo burlarichunga na munarcanichu. Jehovata tucuipi cazungapami munarcani. Shinallata Jehovapa shutita santificangapaj, ñuca churigu paipa taitata Paraisopi cutin ricuchunmi munarcani” nishpa (Prov. 27:11).

⁹ Shina nishpa mañajujpica ¿Jehová Diosca uyarcachu? Ari uyarcami. Chai paniguca congregacionbi huauquipanicuna cumbashpa animajpimi shinlli tucurca. Picha huatacuna jipacarin anciano huauquihuanmi cazararca. Cunanbica paipa churica ñami 20 huatacunata charin, testigo de Jehovami can. Chai paniguca ninbashmi: “Ñuca cusa, ñuca churita aliguta viñachingapaj ayudashcamandaca tucui shunguhuanmi agradicini” nishpa.

10. ¿Imashinata Jehová Diosca paipa shutita santificanga?

¹⁰ Jehová Diosca tucuilla paita na ricunayachijcunatapash pai na mandachun munajcunatapash tucuchishpami paipa shutitaca santificanga (Ezequiel 38:22, 23, liingui). Paraisopi cashpami gentecunaca asha asha jucha illajcuna tucushun. Chai punllacunapimi jahua pachapi causaj angelcunapash, cai Alpapi causaj gentecunapash Jehová Diosta adorashpa paipa shutitaca tucuipi respetohuan tratashun. Ashtahuangarin, chai punllacunapimi Jehová Diosca jahua pachatapash mandashpa, cai Alpatapash mandashpa ‘tucui imatapash tucuipi cazuchinga’ (1 Cor. 15:28).

11, 12. Jehovata sirvijcunaca ¿imatata 1876 huatapica intindi usharca?

¹¹ Jesús nara jahua cieloman tigrajpica paipa apostolcunaca tapurcami ¿ima horata mandagringui? nishpa. Shina tapujpimi Jesusca chaitaca nara yachai ushanguichichu. Villachinapimi ashtahuanga preocuparina canguichi nirca (Hech. 1:6-8, liingui). Ashtahuangarin, Diospa Reino shamuchun mañanguichi nishpami paicunataca Diospa Reino ima hora mandanataca chapariami causana canguichi nishpa yachachirca. Chai punllacunamandami Jesusta catijcunaca Diospa Reino shamuchun nishpa mañanchi.

¹² Jehová Diosca 1914 huatapi Jesús mandai callarinata intindichunmi paita sirvijcunataca ayudarca. ¿Imashinata ayudarca? Huauqui Charles Taze Russellmi 1876 huatapica “¿Cuándo terminan los tiempos de los gentiles?” nishca temata escribirca. Chaipica profeta Daniel parlashca canchis tiempocunamanda parlaj profeciamanda, shinallata na israelitacuna ima horacaman Jehová Dios mandachun saquinamanda Jesús parlashca  profeciamandapashmi yachachirca (Dan. 4:16; Luc. 21:24). Ishcai profecía cashpapash shujlla yuyaimanda parlajushcata intindichishpami, huauqui Russellca na israelitacuna mandana punllacunaca 1914 * huatapimi tucurina can nishpa escribirca.

13. a) ¿Imata 1914 huatapica pasarca? b) 1914 huatamanda caicaman tiashca llaquicunaca ¿imatata ricuchin?

¹³ 1914 huatapica Europa nishca jatun llactapimi guerra callarirca. Jipamanga mundo enteropi ashtaca ashtaca llactacunami guerrapi yaicurca. Ashtacacunami yarjaimanda huañurca. 1918 huatapicarin, gripe española nishca japishpami guerrapi huañushca gentecunatapash yali ashtaca gentecunata huañuchirca. Chai tucuilla llaquicunami 1914 huatapi Jesús ña mandai callarishcata ricuchirca (Mat. 24:3-8; Luc. 21:10, 11). Bibliapi intindichishca shinaca, chai huatapimi Jesusca mandangapaj coronata chasquishpa shujcunata ‘mishangapaj llujshirca’ (Apoc. 6:2). Mishashpami Jesusca Diablotapash paipa ayacunatapash cai Alpaman shitamurca. Chaipimi cai shimicunaca pactari callarirca: “Alpapi causajcuna, mama cuchapi causajcunapash, ¡aij imachari tucunguichi! Diabloca, punllacuna tucurijujta yachashpami, ninanda fiñarishpa cangunapajman uriajumurca” (Apoc. 12:7-12).

14. a) ¿Imamandata Diospa Reino shamuchun nishpa mañashpa catina capanchi? b) ¿Imapita ashtahuanga preocuparina capanchi?

¹⁴ Apocalipsis 12:7-12pica intindichinmi, Jesús mandai callarishca punllacunapica gentecunaca jatun llaquicunatami gentecunaca  charinga nishpa. ¿Imamanda shina cana carca? Jahua cielopi Jesús ña mandai callarishca cajpipash Diablomi cai Alpataca mandajun. Chaimandami ashtaca llaquicuna tian. Shinapash ñallami Jesusca tucuilla nalicunata tucuchishpa tucuita mishanga. Chai punlla chayamungacamanmi ñucanchicunaca Diospa Reino shamuchun nishpa mañanajushun. Ashtahuangarin Jesús mandashca shinami villachinapi ashtahuanga preocuparishun. Villachishpami cai shimicuna pactarichun ayudanajunchi: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nishpa (Mat. 24:14).

15, 16. Jehovapa munai cai Alpapi pactarichun nishpa mañashpaca ¿imashinata causana capanchi?

¹⁵ Gentecunaca 6 mil huatacuna huashamanga jucha illajmi carca. Jehová Dios munashcatami ruran carca. Chaimandami Jehová Diosca tucuimi ‘aligupacha can’ nirca (Gén. 1:31). Shinapash Diabloca Jehovata cazungapaca na munarcachu. Chai punllacunapica huaquin gentecunallami Jehová munashcataca ruran carian. Shinapash cunan punllacunapica 8 millón yali testigo de Jehovacunami canchi. Ñucanchicunaca Jehová Diospa munai pactarichun nishpami mañanchi. Shinapash na mañashpallachu saquirinchi. Ñucanchica Jehová Diospa munaita pactachishpa causangapaj munashpami, Jehovatapash cushichingapaj, Diospa Reinomanda cushijushpa parlangapapash esforzarinchi.

¹⁶ Cunanga África llactapi misionera panigupa ejemplota ricupashun. Paica 1948 huatapimi bautizarirca. Ñami 80 huatacunata charin. Paica ninmi: “Ñucaca cutin cutinmi Jehová Diostaca mañani, tiempo tiajpillata ali shungu gentegucunata taringapaj ayudahuangui nishpa. Villachijushpaca Jehovataca mañanimi, paipa shunguman chayajta parlangapaj ali yuyaita carahuangui nishpa. Cutin villachijpi ali chasquijpica paicunata aliguta atindingapaj ñucanchita ayudahuangui nishpami mañani” nin. Congregacionbi huauquipanicunapa ayudahuanga cai paniguca ashtaca gentecunatami Jehovata sirvichun ayudai ushashca. ¿Nachu quiquinbash shina mayorlla huauquipanigucuna cushijushpa villachijta rijsipangui? (Filipenses 2:17, liingui.)

17. Jehová Dios paipa munaita pactachinata yachashpaca ¿imashinata sintiripangui?

¹⁷ Jehová Diosta sirvijcunaca paipa tucuilla contracuna tucuchi tucungacamanmi Jehovapa munai cai Alpapi pactarichun nishpa mañanajushun. Chai shimicuna pactarijpica cai Alpaca shuj juyailla paraisomi canga, huañushcacunapash causaringami. Jesusca nircami: ‘Huañushpa pambai tucushcacunaca ñuca rimajta uyangami’ nishpa (Juan 5:28, 29). Ñucanchi huañushca familiacuna causarijta ricushpaca cushijushcapachami cashun. ‘Taita Diosmi ñavimandaca tucuilla viquita fichanga’ (Apoc. 21:4). Ashtacacunaca Jehovata na rijsi ushashpa huañushcacunami causaringa. Chaimandami paicuna causarijpica, paicunapash para siempre causai ushachun Jehovamanda yachachina bendicionda charishun (Hech. 24:15; Juan 17:3).

18. ¿Imatata gentecunaca ninanda minishtinajunchi?

¹⁸ Padrenuestro oracionbi yachachishca shinaca ñallami Diospa Reinoca shamunga, Paipa shutita santificanga, Taita Diospa munaitapash cai Alpapi pactachinga. Chai quimsa yuyaicunata Jehová Dios pactachijpimi gentecunaca imata minishtishcata charinga. Shinapash padrenuestro oracionmandaca shuj chuscu yuyaicunatapash yachajunarami capanchi. Chaitaca shamuj temapimi yachajupashun.