1. Биз Матта 6:9—13-нҗи аятлара гөрә нәдип вагыз эдйәрис?

КӨП адамлар Иса пыгамбериң өвреден догасыны ятдан билйәрлер. Биз өйден-өе вагыз эденимизде, онуң эсасында адамлара Худайың Патышалыгының хакыкы хөкүметдигини ве онуң ер йүзүнде аҗайып өзгеришлери этҗекдигини дүшүндирйәрис. Шейле-де биз доганың илкинҗи сөзлерине гөрә, Худайың адының бардыгы ве мукаддес болмалыдыгы барада вагыз эдйәрис (Мат. 6:9).

2. Биз Исаның өвреден догасыны сөзме-сөз айтмалы дәлдигини ниреден билйәрис?

² Христиан дини Исаның өвреден догасыны сөзме-сөз гайталаяр. Эмма Иса доганы ят тутуп айтмалы дийдими? Ёк! Ол дога этмеги өвретсе-де: «Бош (шол бир, ТД) сөзлери гайталап дурмаң» дийди (Мат. 6:7). Онуң өзи-де өвреден догасыны сөзме-сөз гайталап дурмады (Лука 11:1—4). Ол шол дога аркалы Худайдан нәме дилемелидигимизи ве нәмәниң ваҗыпдыгыны өвретмек иследи.

3. Биз Исаның өвреден догасы бабатда өзүмизе нәхили сораглары берип билерис?

 ³ Биз шу ве индики макалаларда Исаның өвреден догасы барада гүррүң эдерис. Шейле-де өзүмизе: «Ол маңа манылы дога этмәге нәдип көмек эдйәр? Мен Исаның өвреден догасына гөрә яшаярынмы?» диен сораглары берип билерис.

4. «Атамыз» диймек нәмәни аңладяр ве месихчилер нәме үчин Ехова «Атамыз» диййәрлер?

⁴ Биз Худая «Атам» дәл-де, «Атамыз» дийип йүзленйәрис. Бу болса бири-бирини йүрекден сөййән бүтиндүнйә доганлыга дегишлидигимизи гөркезйәр (1 Пет. 2:17). Гөр, нәхили улы хормат! Худай тарапын огуллуга алнан ве гөкде яшамага умыт эдйән месх эдилен месихчилер Худая долы маныда «Атамыз» дийип йүзленйәрлер (Рим. 8:15—17). Ер йүзүнде яшамага умыт эдйән доган-уялар хем Ехова «Атамыз» дийип йүзленйәрлер. Себәби Ехова бизе яшайыш берди ве сөйги билен аладамызы эдйәр. Биз кәмиллиге етип, соңкы сынагда вепалы галсак, долы маныда Ехованың перзенди боларыс (Рим. 8:21; Ылх. 20:7, 8).

5, 6. Ата-энелер чагаларына нәхили совгат берйәрлер ве чагалар оңа нәхили гарамалы? (Макаланың башындакы сурата середиң).

⁵ Ата-энелер чагаларына Аллатагала дога этмеги өвредип, олара гымматлы совгады берйәрлер. Шонда чагалар Ехова аладачыл Ата хөкмүнде гараярлар. Гүнорта Африкада этрап гөзегчиси болуп гуллук эдйән бир доган шейле гүррүң берйәр: «Мен өйдекәм гызларым бәбеҗик болса-да, олар билен хер гүн агшам дога эдйәрдим. Гызларым маңа эден догаларымың сөзлери ядында дәлдигини айдярлар. Эмма Ехова Атамыз билен гүррүңдеш болмагың мукаддесдигини, калбында дөрейән рахатлыгы ве ховпсузлыгы мәхирли ятлаярлар. Гызларым дил ачан бадына, мен олары Ехова сесли дога этмәге хөвеслендирйәрдим. Шейдип, мен оларың дуйгуларыны ве пикирлерини беян эдишини диңләп билйәрдим. Бу болса маңа оларың ички дүнйәсини билмәге көмек эдйәрди. Мен олара Исаның өвреден догасының ваҗып тарапларыны дүшүндирип, манылы дога этмеги өвретдим».

⁶ Гызҗагазлар рухы тайдан өсдүлер ве хәзир янёлдашы билен Худая долы вагтлы гуллук эдип, багтлы яшаярлар. Ата-энелер чагаларына Ехова билен берк ве мәхирли достлашмага көмек эдип, гымматлы совгат берйәрлер. Элбетде, Худай билен достлугыны хер кимиң өзи беркитмели! Мунуң үчин Худайы сөймели ве адыны мукаддес этмели (Зеб. 5:11, 12; 91:14).

7. Худайың халкы нәхили хормата эе болды ве оларың нәхили җогапкәрчилиги бар?

⁷ Биз Худайың адыны билмеги ве онуң адыны гөтерйән «халк» болмагы улы хормат сайярыс (Рес. иш. 15:14; Иш. 43:10). Биз гөкдәки Атамызың «адының мукаддес болмагыны» ислейәрис. Шол себәпли биз Еховадан көмек сорап, мукаддес адына ыснат гетирйән сөзлерден ве ишлерден гача дурмага җан эдйәрис. I асырда яшан кәбир месихчилер вагыз эдйән затларыны өзлери ерине етирмейәрдилер. Элбетде, биз олара меңземек ислемейәрис. Павлус ресул олара: «Миллетлер арасында Худайың адына сиз зерарлы дил етирилйәр» дийди (Рим. 2:21—24).

8, 9. Ехова адыны мукаддес эдйән гуллукчыларыны нәдип голдаяр?

⁸ Биз Худайың адыны мукаддес этмек ислейәрис. Норвегияда яшаян бир уяның янёлдашы бивагт арадан чыкяр. Ол ики яшлы огулҗыгы билен еке галяр. Ол шейле ятлаяр: «Мениң дурмушымда иң агыр гүнлер башланды. Мен дуйгуларыма эрк этмек үчин хер гүн ве хер сагат диен ялы Худайдан гүйч сораярдым. Мен Худая бивепалык эдип я-да нәдогры гелен карарым себәпли Шейтаның Ехова гыҗалат бермегини ислемейәрдим. Мен Ехованың адыны мукаддес этмәге җан эдйәрин ве Җеннетде оглумың какасы билен гөрүшмегини арзув эдйәрин» (Сүл. тым. 27:11).

⁹ Ехова онуң догаларына җогап бердими? Хава! Уя доган-уяларың эдйән аладасыны гөрүп рухланярды. Ол бәш йыл геченден соңра йыгнакда яшулы болуп гуллук эдйән догана дурмуша чыкяр. Онуң оглы сувда чокундырылды ве хәзир ол йигрими яшында. Уя: «Оглумы тербиелемәге янёлдашымың көмек эдендигине өрән миннетдар» диййәр.

10. Худай адының мукаддес болмагы үчин нәме эдер?

¹⁰ Худай адының долы мукаддес болмагы үчин нәме эдер? Ехова хөкүмдарлыгына гаршы чыкянларың әхлисини ёк эдер (Эзекиел 38:22, 23-нҗи аятлары окаң) *. Шондан соңра адамзат юваш-ювашдан кәмиллиге етер. Перишделерем, адамларам хемише Ехованың адыны мукаддес эдерлер! Биз шол дөвре сабырсызлык билен гарашярыс! Шонда сөйгүден долы гөкдәки Атамыз «әхли затда хөкүм сүрер» (1 Кор. 15:28).

11, 12. XIX асырда месихчилер нәмә дүшүндилер?

¹¹ Ресуллар Иса гөге галмазындан өң: «Я Реб, Ысрайыл үчин патышалыгы гайтадан шу вагт беркарар этҗекми?» дийип сораярлар. Иса олара Патышалыгың хачан хөкүм сүрүп башлаҗакдыгыны айтмады. Эмма шәгиртлериниң вагыз этмелидигини ныгтап гечди (Ресулларың ишлери 1:6—8-нҗи аятлары окаң). Шейле-де Иса олара Худайың Патышалыгына гарашмалыдыгыны айтды. Шонуң үчин I асырдан башлап месихчилериң әхлиси Худайың Патышалыгының гелмеги барада дога эдйәрлер.

¹² Ехова халкына Исаның хачан гөкде хөкүм сүрүп башлаҗакдыгына гөз етирмәге көмек этди. 1876-нҗы йылда «Мукаддес Язгылары барлаг гечириҗи» диен журналда Чарлз Тейз Расселлиң «Миллетлериң мөвритлери хачан долар?» диен макаласы чап эдилди. Онда 1914-нҗи йылың ваҗып дөвүрдиги барада айдыляр. Шейле-де Даныелиң «еди пасыл» диен пыгамберлиги Исаның «миллетлериң мөвритлери» диен сөзлери билен багланышдырылып дүшүндирилйәр * (Дан. 4:16; Лука 21:24).

13. 1914-нҗи йылда нәме болды ве муны хайсы вакалар субут эдйәр?

 ¹³ 1914-нҗи йылда Европада уруш туруп, бүтин ер йүзүне яйрады. 1918-нҗи йылда уруш тамамлананда, ачлык хөкүм сүрүп башлады. Урушда вепат боланлардан мерги кеселинден өлен адамларың саны хас көпди. Шейлеликде, Исаның айдан «аламаты» ерине етип башлады. Бу аламатлар онуң Патыша хөкмүнде ер йүзүне гелендигини аян эдйәр (Мат. 24:3—8; Лука 21:10, 11). 1914-нҗи йылда Иса Месихе «бир тәҗиң берлендигини» ве «еңсин дийип, еңип чыкандыгыны» көп вакалар субут эдйәр (Ылх. 6:2). Гөкде уруш болды ве Иса Шейтаны, җынлары ер йүзүне зыңды. Шондан бәри адамлар «Ер ве деңиз, вай сизиң халыңыза! Чүнки иблис вагтының азлыгыны билип, гахар-газаба мүнүп, сизиң үстүңизе гелди» диен пыгамберлигиң ерине етйәндигине гөз етирйәрлер (Ылх. 12:7—12).

14. a) Худайың Патышалыгы барада дога этмек нәме үчин ваҗып? б) Биз нәхили хормата эе болдук?

¹⁴ Ылхам 12:7—12-нҗи аятларда Худайың Патышалыгы беркарар эдиленде, адамзада бетбагтчылыгың нәме үчин инендиги дүшүндирилйәр. Худайың Патышалыгының Патышасы Иса душманларының арасында хөкүм сүрүп башлады. Ол ер йүзүнден эрбетлиги айырып, долы еңиш газанянча, биз Худайың Патышалыгының гелмеги барада дога этмели. Биз эдйән догамыза гөрә яшап, Исаның айдан шу пыгамберлигине гатнашярыс: «Патышалык барадакы бу Хош Хабар хемме миллетлере гүвәлик хөкмүнде дүнйәниң әхли еринде вагыз эдилер; ахырзамана шонда гелер» (Мат. 24:14).

15, 16. Худайың ислеги ерде амала ашсын диен дилегимизе гөрә нәдип яшамалы?

¹⁵ Алты мүң йыл мундан озал перишделерем, адамларам Худайың ислегини долы ерине етирйәрдилер. Ехова адамлары яраданда: «Җуда говы» дийди (Гел. чык. 1:31). Эмма Шейтан питне турзандан соңра санлыҗа адам Худайың ислегини ерине етирйәрди. Шу гүнлер болса такмынан 8 миллион Ехованың Шаятлары Худайың ислегиниң ерде амала ашмагы барада дога эдйәрлер ве эден догасына гөрә яшамага чалышярлар. Шейле-де олар дурмушыны өзгердйәрлер ве шәгирт тайярламак ишине ыхласлы гатнашярлар. Биз муңа дийсең бегенйәрис!

¹⁶ 1948-нҗи йылда сувда чокундырылан ве Африкада миссионер болуп гуллук эдйән уя шейле гүррүң берйәр: «Мен Исаның өвреден догасына гөрә, гоюн кимин адамларың Ехованы танап, онуң халкына гошулмагы барада хемише дога эдйәрин. Мен вагызда адамың йүрегине тәсир этмек үчин Еховадан акылдарлык дилейәрин. Шейле-де сүрә дегишли гоюнлар барада эдйән аладамыза Ехованың ак пата бермегини сораярын». 80 яшлы уя имандашларының голдавы билен, көп адамлара Ехованың Шаяды болмага көмек эдендиги гең галдырмаса герек. Элбетде, сиз хем Алланың ислегини ерине етирмәге җан эдйән гарры доган-уялары танаянсыңыз (Филипилилер 2:17-ни окаң).

17. Ехованың ислегиниң ерде амала ашмагы сизе нәхили тәсир эдйәр?

¹⁷ Биз Патышалыгың душманлары ёк эдилйәнчә, Худайың ислегиниң амала ашмагы барада дога этмели. Биз миллиардларча өлен адамларың Җеннетде дирелишини гөрүп, Худайың ислегиниң долы амала ашмагының шаяды боларыс. Иса шейле дийди: «Муңа гең галмаң, чүнки габырдакыларың хеммесиниң Онуң сесини эшитҗек вагтлары гелйәр. Ягшылык эденлер яшамак үчин дирелер ве шер иш эденлер хөкүм үчин дирелер» (Яхя 5:28, 29). Арадан чыкан доган-гарындашларымызы гуҗак ачып гаршыламак нәхили толгундырыҗы болар! Худай бизиң «гөзлеримизден әхли яшлары сүпүрер» (Ылх. 21:4). Диреленлериң арасында «эгрилер», ягны Ехова Худайы ве онуң Оглуны танаман арадан чыкан адамлар хем болар. Биз олара Худайың ислеги ве ниети барада айдып, эбеди яшайша мынасып болмага көмек эдип билерис. Гөр, нәхили хормат! (Рес. иш. 24:15; Яхя 17:3).

18. Биз нәмә сабырсызлык билен гарашярыс?

¹⁸ Худайың Патышалыгы аркалы Ехованың ады мукаддес эдилер ве әлем-җаханда парахатлык, агзыбирлик хөкүм сүрер. Шонда Исаның өвреден догасындакы илкинҗи үч дилег ерине етер. Биз муңа сабырсызлык билен гарашярыс. Эмма Исаның догасында башга-да дөрт дилег барада айдыляр. Биз бу барада индики макалада гүррүң эдерис.