1-3. ?From wanem Lana i suagud se Jehova i save samting we hem i nidim?

LANA, we i wan fultaem paenia, bambae i neva fogetem samting we i hapen taem hem i go long Jemani long yia 2012. Hem i harem olsem se Jehova i ansa long 2 prea blong hem. Taem hem i stap ron long tren blong go long epot, hem i prea long Jehova blong i halpem hem blong faenem wan man we hem i save prij long hem. Taem hem i kasem epot, hem i faenemaot se oli muvum taem blong hem blong flae, i go long nekis dei. Lana i prea long Jehova blong i givhan long hem from we klosap hem i spenem ol mane blong hem finis, mo hem i nidim wan ples blong slip long naet.

² Jes afta we Lana i finisim prea blong hem, wan man i talem long hem se: “Halo Lana, ?yu stap mekem wanem long ples ya?” Man ya i wan yangfala we i bin skul wetem Lana. Yangfala ya i rere blong go long Saot Afrika, mo mama blong hem wetem bubu woman blong hem, tufala i kam talem tata long hem long epot. Lana i tokbaot wari blong hem long boe ya, nao taem mama mo bubu woman blong boe ya i harem, tufala i glad blong Lana i go stap wetem olgeta. Tufala i askem plante kwestin long Lana long saed  blong bilif blong hem mo wok blong hem olsem wan man blong talemaot gud nius fultaem.

³ Long nekis dei, afta we oli dring ti, Lana i ansa long sam moa kwestin blong tufala long saed blong Baebol. Lana i askem adres blong tufala, blong wan Witnes long ples ya i save kam visitim tufala. Lana i gobak long ples blong hem mo i gohed blong mekem wok blong paenia. Lana i suagud se Jehova nao i ansa long ol prea blong hem, i givim ol samting we hem i nidim, mo i givhan long hem.—Ol Sam 65:2.

4. ?Bambae yumi tokbaot wanem impoten samting?

⁴ Taem wan trabol i kasem yumi we yumi no tingbaot, i isi nomo blong prea long Jehova blong i givhan long yumi, mo Jehova i glad blong lesin long ol prea blong yumi. (Ol Sam 34:15; Ol Proveb 15:8) Be prea ya we Jisas i tijim long ol man blong hem, i soemaot long yumi se i gat sam samting we oli moa impoten we yumi mas prea from. Long stadi ya, bambae yumi tokbaot 4 laswan samting we i stap long Lodsprea, we oli save givhan long yumi blong holemstrong long Jehova.—Ridim Matiu 6:11-13.

5, 6. ?From wanem Jisas i talem blong yumi prea se “plis yu givim kakae long mifala” nating se yumi gat plante kakae finis?

⁵ I gud blong makem se long prea ya, Jisas i talem se: “Plis yu givim kakae long mifala,” be i no talem se “plis yu givim kakae long mi.” Victor we i wan eria elda long Afrika, i talem se: “Oltaem mi stap talem tangkiu long Jehova, blong mi mo woman blong mi, mitufala i no wari tumas se bambae mifala i kakae wanem long nekis dei. Mo blong mitufala i no wari tumas se hu bambae i pem haos we mitufala i rentem. Ol Kristin brata mo sista oli lukaotgud long mitufala evri dei. Be mi stap prea long Jehova from ol Kristin ya we oli stap givhan long mitufala, blong olgeta tu oli save gat inaf samting blong lukaot long famle blong olgeta.”

⁶ Maet yumi gat plante kakae, be plante narafala brata mo sista blong yumi oli pua. Mo samfala, ol disasta i spolem haos blong olgeta. I gud yumi prea from olgeta mo yumi mekem sam samting blong givhan long olgeta. Yumi save serem sam samting blong yumi long olgeta. Yumi save putum smol mane blong sapotem wok blong Kingdom long fulwol. Yumi save se mane we yumi putum i save givhan long ol brata mo sista blong yumi we oli nidim samting.—1 Jon 3:17.

7. ?Jisas i yusum wanem pijatok blong tijim yumi se yumi no mas “tingting tumas from ol samting blong tumora”?

⁷ Afta, Jisas i tijim yumi blong yumi no tingting tumas long ol samting blong bodi. Hem i talem se sipos Jehova i flasem gud ol flaoa, “?yufala i ting se bambae hem i no save givim klos long yufala? !Man, bilif blong yufala i smol tumas! Nao from samting ya, i nogud yufala i stap tingting tumas se . . . ‘?Bambae mifala i kasem klos blong mifala olsem wanem?’” Ale hem i finisim tok blong hem, taem hem i talem bakegen se: “I nogud yufala i stap tingting tumas from ol samting blong tumora.” (Matiu 6:30-34) Yumi no mas wari from ol samting we yumi nidim long fiuja. Be yumi mas glad long samting we yumi gat evri dei. Yumi save prea blong faenem wan ples blong stap long hem, no wan wok we i save givhan blong yumi lukaot long famle blong yumi. Mo tu, yumi save askem waes blong  God blong i lidim yumi blong mekem ol waes desisen long saed blong helt. Be i gat wan samting we i moa impoten we yumi save prea from, hemia ol samting we yumi nidim blong mekem bilif blong yumi i strong.

8. ?Tok ya “kakae” we Jisas i talem, i mekem yumi tingbaot wanem? (Yu luk pija long stat blong stadi.)

⁸ Taem Jisas i tokbaot “kakae,” hemia i mekem yumi tingbaot wan narafala samting bakegen. Hem i talem se: “Man i no save laef long kakae nomo. Evri tok we God i talem, hemia nao samting blong mekem man i laef.” (Matiu 4:4) Taswe, yumi mas prea blong Jehova i gohed blong tijim yumi mo i givim samting we yumi nidim blong stap klosap long hem oltaem.

9. ?From wanem ol sin blong yumi i olsem ol kaon?

⁹ Long olfala hanraet we oli raetem Baebol long hem fastaem, vas blong Matiu 6:12 i talem se: “Yu fogivim mifala from ol kaon blong mifala.” Mo long Luk 11:4 i talem se: “Yu fogivim mifala from ol sin blong mifala.” ?From wanem Jisas i yusum tufala tok ya? From we ol sin blong yumi i olsem ol kaon. Wajtaoa blong yia 1951 i eksplenem se taem yumi mekem sin, i olsem we yumi gat kaon long Jehova. Jehova i nidim we yumi lavem hem mo obei long hem. Taswe taem yumi mekem sin agensem God, yumi no stap givim samting we hem i nidim blong yumi givim long hem. Wajtaoa ya i talem se sipos Jehova i wantem, hem i save sakemaot yumi blong yumi no moa fren wetem hem.  Wajtaoa i gohed i se: “Taem man i mekem sin, hem i soemaot se hem i no lavem God.”—1 Jon 5:3.

10. ?Jehova i yusum wanem blong fogivim ol sin blong yumi? ?Mo samting ya i mas mekem wanem long yumi?

¹⁰ !Yumi glad tumas se Jehova i givim Jisas blong i ded olsem wan sakrefaes blong fogivim ol sin blong yumi! Yumi nidim we Jehova i fogivim yumi evri dei. Jisas i ded blong sevem yumi klosap 2,000 yia finis, be sakrefaes blong hem i mekem i gud long yumi tede yet. I gud we oltaem yumi talem tangkiu long Jehova from nambawan presen ya. I no gat wan long yumi we i naf blong givim laef blong hem olsem sakrefaes blong mekem yumi fri long sin mo ded. (Ridim Ol Sam 49:7-9; 1 Pita 1:18, 19.) Toktok ya long Lodsprea se: “Yu fogivim mifala from ol sin blong mifala” i mekem yumi tingbaot se i no yumi nomo we i nidim sakrefaes blong Jisas, be ol Kristin brata mo sista blong yumi tu. Jehova i wantem tu se yumi tingbaot ol brata mo sista ya mo fasin blong olgeta blong fren gud wetem hem. Yes yumi mas fogivim olgeta kwiktaem taem oli mekem sin agens long yumi. Plante taem, sin we oli mekem long yumi oli smol nomo, be taem yumi fogivim olgeta, yumi soemaot se yumi lavem olgeta. Mo yumi soemaot tu se yumi glad se Jehova i stap fogivim yumi.—Kolosi 3:13.

11. ?From wanem yumi mas fogivim ol narafala?

¹¹ From we yumi sinman, samtaem i had blong fogivim olgeta we oli mekem sin agens long yumi. (Levitikas 19:18) Sipos yumi stat blong tokbaot samting we oli mekem long yumi, maet ol narafala long kongregesen tu oli save joen long problem ya mo hemia i save mekem se ol brata mo sista oli no joen gud long kongregesen. Sipos yumi letem samting ya i gohed olsem, hemia i soemaot se yumi no tinghae long sakrefaes blong Jisas we Jehova i givim olsem wan presen long yumi. Nao bambae sakrefaes blong Jisas i no save givhan long yumi tu. (Matiu 18:35) Taem yumi no fogivim ol narafala, Jehova i no save fogivim yumi tu. (Ridim Matiu 6:14, 15.) Mo tu, sipos yumi wantem se Jehova i fogivim yumi, yumi no mas gohed blong mekem ol samting we hem i no laekem nating.—1 Jon 3:4, 6.

12, 13. (1) ?Wanem i hapen long Jisas afta we hem i baptaes? (2) ?From wanem yumi no mas blemem narafala taem yumi foldaon long sin? (3) ?Fasin blong Jisas blong stap tru long God i pruvum wanem?

¹² Toktok ya se, “yu no letem ol samting oli kam traem mifala,” i mekem yumi tingbaot samting we i hapen long Jisas, jes afta we hem i baptaes. Tabu spirit blong God i lidim hem i go long draeples “blong Setan i traem hem.” (Matiu 4:1; 6:13) ?From wanem Jehova i letem samting ya i hapen? Jehova i sanem Jisas i kamdaon long wol blong stretem trabol we i kamaot taem Adam mo Iv tufala i no wantem we Jehova i rul long tufala. Fasin blong tufala blong no obei i stanemap sam kwestin we i nidim ansa. ?Jehova i mestem wan samting taem hem i wokem man? ?Wan man we i stret gud olgeta, i save holemstrong long Jehova taem “Setan” i traem hem? ?Laef blong ol man bambae i gud moa sipos man i rul long olgeta? (Jenesis 3:4, 5) Long fiuja, taem Jehova i ansa long olgeta kwestin ya, bambae olgeta man evriwan  long heven mo long wol, bambae oli save se Jehova nomo i gat raet blong rulum ol man.

¹³ Jehova i tabu, taswe hem i neva traem wan man blong pulum hem blong i mekem samting we nogud. Setan nao i “man ya blong traem man.” (Matiu 4:3) Setan i yusum plante defren rod blong traem pulum yumi blong yumi mekem samting we i no stret. Be i stap long yumi wanwan blong jusum se bambae yumi letem ol samting blong traem yumi oli winim yumi no yumi blokem olgeta. (Ridim Jemes 1:13-15.) Taem Setan i traem Jisas, Jisas i yusum tok blong Baebol kwiktaem blong blokem Setan. Jisas i holemstrong long God. Be Setan i no lego hem. Hem i wet “blong bambae i kambak long [Jisas] samtaem” blong traem hem bakegen. (Luk 4:13) Be nomata wanem we Setan i mekem, Jisas i obei long God oltaem. Fasin blong Jisas i pruvum se wan man we i stret gud olgeta i save holemstrong long Jehova, nating se hem i stap long trabol. Tede yet, Setan i gohed blong traem ol man blong Jisas olsem yu, blong yu lego Jehova.

14. ?Yumi mas mekem wanem blong yumi save stanap strong taem Setan i traem yumi?

¹⁴ Ol kwestin we Setan i stanemap oli mas gat ansa. Taswe, Jehova i letem Setan i traem yumi. Jehova i no save ‘letem ol samting oli kam traem yumi tumas.’ Hem i save se yumi naf blong holemstrong long hem, mo hem i wantem givhan long yumi. Be Jehova i neva fosem yumi blong mekem samting we i stret. Hem i respektem yumi se yumi fri blong jusum samting. Taswe hem i letem yumi jusum sipos yumi wantem holemstrong long hem no nogat. Be blong givhan long yumi blong no foldaon long ol trap, yumi mas mekem tufala samting ya: Yumi mas stap  klosap long Jehova mo yumi mas gohed blong prea long hem blong i givhan long yumi. ?Olsem wanem Jehova i ansa long ol prea blong yumi blong no foldaon long trap blong Setan?

15, 16. (1) ?Wanem sam samting we yumi mas blokem? (2) ?Taem yumi foldaon long trap, yumi no save blemem hu?

¹⁵ Jehova i givim tabu spirit long yumi blong yumi save stanap strong taem Setan i traem yumi. Mo tu, Jehova i givim Baebol mo kongregesen blong wonem yumi long ol trap blong Setan. Hem i givim woning long yumi se yumi no mas spenem taem blong yumi, mane, mo paoa blong yumi, long ol samting we yumi no rili nidim. Espen mo Janne tufala i stap long Yurop, long wan kantri we i rij. Blong plante yia, tufala i mekem wok blong fultaem paenia long wan ples long kantri ya we i nidim moa pablisa. Taem tufala i gat fas bebi, tufala i no moa paenia mo naoia tufala i gat tu pikinini. Espen i talem se: “Plante taem, mitufala i prea long Jehova blong i givhan long mitufala blong mitufala i no foldaon long trap, from we mitufala i no moa save spenem moa taem olsem we mitufala i mekem bifo long wok blong paenia. Mitufala i askem long Jehova blong i givhan long mitufala blong mitufala i stap strong long bilif, mo gohed blong wok strong long wok blong prij.”

¹⁶ Wan narafala trap we yumi mas blokem hemia blong lukluk ol rabis pija. Sipos yumi foldaon long trap ya, yumi no save blemem Setan. ?From wanem? From we Setan mo ol man blong hem oli no save fosem yumi blong mekem eni samting we i no stret. Samfala oli lukluk ol rabis pija from we oli no wantem sakemaot ol rabis tingting. Be plante Kristin brata mo sista oli no foldaon long trap ya, mo yumi tu yumi save mekem olsem.—1 Korin 10:12, 13.

17. (1) ?Yumi soemaot olsem wanem se yumi wantem we Jehova i ‘blokem Setan i no kam spolem yumi’? (2) ?I no longtaem, Jehova bambae i mekem wanem?

¹⁷ ?Yumi soemaot olsem wanem se yumi wantem we Jehova i ‘blokem Setan i no kam spolem yumi’? Yumi no mas “man blong wol ya,” mo yumi no mas “laekem ol fasin blong wol mo ol samting we oli stap long hem.” (Jon 15:19; 1 Jon 2:15-17) !Bambae yumi glad tumas taem Jehova i finisim Setan mo ol rabis man! Be go kasem taem ya, yumi mas tingbaot se Setan i “kros tumas, from we hem i save se i gat smol taem nomo blong hem i stap yet.” Bambae hem i traehad blong mekem eni samting blong blokem yumi blong yumi no moa mekem wok blong Jehova. Taswe yumi mas gohed blong prea se Jehova bambae i protektem yumi long Setan.—Revelesen 12:12, 17.

18. ?Sipos yumi wantem laef long wol taem i no moa gat Setan, yumi mas mekem wanem?

¹⁸ ?Yu yu wantem laef long wan wol we i no moa gat Setan? Sipos yes, yu mas gohed blong prea blong Kingdom i kam, blong nem blong God i stap tabu, mo blong God i mekem samting we hem i wantem i kamtru long wol. Oltaem yu mas dipen long Jehova blong i lukaot long yu, mo blong i givim evri samting we yu nidim blong yu holemstrong long hem. Yes, yu mas mekem evri samting we Lodsprea i talem.