အိၣ်မူလီၤပလိာ်ဒ် ကစၢ်အတၢ်ထုကဖၣ်အသိး အကူာ်ခံ
“တၢ်လၢသုန့ၢ်ဘၣ်အီၤ အလီၢ်အိၣ်တဖၣ်န့ၣ် သုပၢ်သ့ၣ်ညါဝဲလီၤ.”—မးသဲ ၆:၈.
၁–၃. ဘၣ်မနုၤအဃိ ဒီပုၢ်ဝဲၢ်မုၣ်တဂၤ နာ်ဝဲလၢယဟိဝၤယွၤ သ့ၣ်ညါအတၢ်လိၣ်ဘၣ်န့ၣ်လဲၣ်.
လၣ်နၣ် လၢအမ့ၢ် ပှၤလဲၤလၢညါတဂၤန့ၣ် လဲၤဟးဝဲဆူ ကီၢ်ကၠၢမနံၣ်ဖဲ ၂၀၁၂ နံၣ်န့ၣ်လီၤ. တၢ်လၢအဟဲကဲထီၣ်အသးဒီးအီၤ လၢကီၢ်ကၠၢမနံၣ်န့ၣ် အဝဲတသးပ့ၤနီၣ်ဝဲ နီတဘျီဘၣ်. အဝဲတူၢ်ဘၣ်ဝဲလၢ ယဟိဝၤယွၤ စံးဆၢအတၢ်ထုကဖၣ် ခံဘျီန့ၣ်လီၤ. ဖဲအလဲၤဝဲဆူ ကဘီယူၤသန့ လၢလ့ၣ်မ့ၣ်အူအခါန့ၣ် အဝဲဃ့ကစၢ် ယဟိဝၤယွၤ ဒ်သိးအကထံၣ် ပှၤတဂၤဂၤလၢ အကတဲဘၣ်အီၤ တၢ်သးခုကစီၣ်န့ၣ်လီၤ. ဖဲအဝဲလဲၤတုၤ လၢကဘီယူၤသန့အခါ သ့ၣ်ညါဘၣ်ဝဲလၢ အကဘီယူၤ ကစဲၤခံဝဲတသီန့ၣ်လီၤ. ဖဲန့ၣ်အဆၢကတီၢ် လၣ်နၣ် ဃ့တၢ်မၤစၢၤလၢ ယဟိဝၤယွၤမ့ၢ်လၢ အစ့ဘူးကလၢာ် ဒီးကမံအလီၢ်စ့ၢ်ကီး တအိၣ်ဘၣ်အဃိန့ၣ်လီၤ.
၂ ဖဲဃ့ဘါထုကဖၣ်ဝံၤအခါ အဝဲနၢ်ဟူပှၤကိးအီၤ “ဟ့, လၣ်နၣ် နဟဲမၤမနုၤဖဲအံၤလဲၣ်.” လၣ်နၣ် ကွၢ်ဃီၤဝဲဒီး ထံၣ်ဘၣ်ဝဲအသကိးပိာ်ခွါတဂၤလၢ အိၣ်ဘၣ်တ့ၢ်ကၠိ ဒီးအီၤန့ၣ်လီၤ. အမိဒီးအဖံ ဟဲဆှၢအီၤ မ့ၢ်လၢအဝဲကလဲၤဆူ ကီၢ်အၤဖြံၤကၤ ကလံၤထံးအဃိန့ၣ်လီၤ. ဖဲလၣ်နၣ်တဲဘၣ်အီၤ အတၢ်အိၣ်သးအခါ အသကိးခွါအမိဒီးအဖံ က့ၤကိးအီၤဆူအဟံၣ်လီၤ. အဝဲသ့ၣ်သံကွၢ် ဘၣ်ဃးလၣ်နၣ် အတၢ်စူၢ်တၢ်နာ် ဒီးပှၤလဲၤလၢညါ တၢ်မၤအဂ့ၢ်န့ၣ်လီၤ.
၃ လၢခံတဂီၤလၣ်နၣ် အီၣ်ဂီၤတၢ်အီၣ် ဝံၤအလီၢ်ခံ အဝဲစံးဆၢဝဲ အဝဲသ့ၣ် အတၢ်သံကွၢ်တဖၣ် ဘၣ်ဃးဒီး လံာ်စီဆှံအဂ့ၢ်န့ၣ်လီၤ. လၣ်နၣ် ဃ့အဝဲသ့ၣ် တၢ်ဆဲးကျိးနီၣ်ဂံၢ် ဒ်သိးပှၤတဂၤဂၤ ကဟဲစံးဆၢ အဝဲသ့ၣ် အတၢ်သံကွၢ် ကသ့အဂီၢ်န့ၣ်လီၤ. လၣ်နၣ် ဟဲက့ၤတုၤဆူအဟံၣ် ဂ့ၤဂ့ၤဘၣ်ဘၣ် ဒီးဆဲးမၤက့ၤဝဲ ပှၤလဲၤလၢညါတၢ်မၤန့ၣ်လီၤ. အဝဲတူၢ်ဘၣ်ဝဲလၢ ယဟိဝၤယွၤ နၢ်ဟူအတၢ်ထုကဖၣ်, သ့ၣ်ညါအတၢ်လိၣ်ဘၣ်, ဒီးမၤစၢၤအီၤန့ၣ်လီၤ.—စံးထီၣ်ပတြၢၤ ၆၅:၂.
၄. တၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၄ ဖဲပကွၢ်ဆၢၣ်မဲာ်ဒီး တၢ်ကီတၢ်ခဲလၢ အဟဲကဲထီၣ်အသး သတူၢ်ကလာ်အခါ ညီလၢပကဃ့ဘါထုကဖၣ်ဆူ ယဟိဝၤယွၤအအိၣ် ဒီးအဝဲသးခုလၢ ကမၤစၢၤပှၤအဂီၢ်လီၤ. (စံးထီၣ်ပတြၢၤ ၃၄:၁၅; ကတိၤဒိ ၁၅:၈) ဘၣ်ဆၣ် ယ့ၣ်ၡူး အတၢ်ထုကဖၣ် သိၣ်လိပှၤလၢ တၢ်ဂ့ၢ်လၢအရ့ဒိၣ်န့ၢ်ဒံး တၢ်သ့ၣ်တဖၣ်အံၤ အိၣ်ဝဲလီၤ. လၢတၢ်မၤလိအံၤအပူၤ ပကတဲသကိး ဘၣ်ဃးဒီး တၢ်ဂ့ၢ်အလီၢ်ခံကတၢၢ် လွံၢ်မံၤလၢ ကစၢ်အတၢ်ထုကဖၣ်အပူၤန့ၣ် မၤစၢၤပှၤဒ်သိးပကတီဒီး ယဟိဝၤယွၤအဂီၢ် ကသ့ဒ်လဲၣ်န့ၣ်လီၤ.—ဖး မးသဲ ၆:၁၁–၁၃ တက့ၢ်.
“ကိၣ်လၢတနံၤအဂီၢ် တနံၤအဂီၢ်န့ၣ် ဟ့ၣ်လီၤလၢ်ပှၤလၢ မုၢ်မဆါတနံၤအံၤတက့ၢ်”
၅, ၆. နတၢ်အီၣ် မ့ၢ်အိၣ်အါအါဂီၢ်ဂီၢ်သနာ်က့ ဘၣ်မနုၤအဃိ ယ့ၣ်ၡူးသိၣ်လိဝဲလၢ ပကဘၣ်ဃ့လၢ ကစၢ်ယွၤက “ဟ့ၣ်လီၤလၢ်ပှၤ” တၢ်အီၣ်န့ၣ်လဲၣ်.
၅ ဖဲယ့ၣ်ၡူး သိၣ်လိပှၤလၢ ပကဘၣ်ဃ့ ကိၣ်လၢတနံၤအဂီၢ် တနံၤအဂီၢ်အခါန့ၣ် အဝဲတမၢပဃ့ထဲလၢ ပဂီၢ်တဂၤဘၣ်. အဝဲစံးဝဲလၢ “ဟ့ၣ်လီၤလၢ်ပှၤ” လီၤ. ဝံၣ်တၢၤ, လၢအမ့ၢ် ကဝီၤအပှၤကွၢ်တၢ်တဂၤ လၢကီၢ်အၤဖြံၤကၤ စံးဝဲ “ယစံးဘျုး ယဟိဝၤယွၤဒိၣ်မးလီၤ. ယၤဒီးယမါအဂီၢ် ပကဘၣ်လဲၤအီၣ်တၢ်ဖဲလဲၣ် မ့တမ့ၢ် မ့ၢ်မတၤကဟ့ၣ်န့ၢ် ပဟံၣ်အလဲလဲၣ်န့ၣ် ပတဘၣ်ယိၣ်တၢ် ဒိၣ်ဒိၣ်ဘၣ်. ပဒီပုၢ်ဝဲၢ်တဖၣ် ကွၢ်ထွဲပှၤ ကိးနံၤဒဲးလီၤ. ဘၣ်ဆၣ် ယဃ့ထုကဖၣ်တၢ်လၢ ပှၤလၢမၤစၢၤပဝဲစ့ၢ်ကီး ဒ်သိးအသုတအိၣ်ဒီး တၢ်သူၣ်ကိၢ်သးဂီၤလၢ ကျိၣ်စ့အဂီၢ် တဂ့ၤန့ၣ်လီၤ.”
၆ ဘၣ်သ့ၣ်သ့ၣ် ပဝဲသ့ၣ်တဖၣ် ပအီၣ်ဘၣ်အီဘၣ် လၢလၢပှဲၤပှဲၤ ဘၣ်ဆၣ် ပဒီပုၢ်ဝဲၢ်အါမးန့ၣ် ဖှီၣ်ဝဲယာ်ဝဲလီၤ. တနီၤန့ၣ်ဘၣ်ဒိဘၣ်ထံး လၢန့ဆၢၣ် တၢ်ဟဲကဲထီၣ်အသးအဃိန့ၣ်လီၤ. တမ့ၢ်ထဲလၢ ပဃ့ဘါထုကဖၣ်တၢ်လၢ အဝဲသ့ၣ်အဂီၢ်ဘၣ်, ပမၤစၢၤအဝဲသ့ၣ် သ့စ့ၢ်ကီးလီၤ. အဒိ တၢ်လၢအိၣ်ဒီးပှၤန့ၣ် ပဟ့ၣ်လီၤအဝဲသ့ၣ် သ့စ့ၢ်ကီးလီၤ. ပဟ့ၣ်တၢ်မၤဘူၣ်လၢ ယဟိဝၤပှၤအုၣ်အသး အတၢ်မၤလၢ ဟီၣ်ခိၣ်ဒီဘ့ၣ်အဂီၢ်သ့န့ၣ်လီၤ. ပသ့ၣ်ညါလၢ ပတၢ်မၤဘူၣ်န့ၣ် ကမၤစၢၤ ပဒီပုၢ်ဝဲၢ်တဖၣ် အတၢ်လိၣ်ဘၣ်န့ၣ်လီၤ.—၁ ယိၤဟၣ် ၃:၁၇.
၇. ဘၣ်မနုၤအဃိ ယ့ၣ်ၡူးသိၣ်လိပှၤလၢ ပတကြၢး “ဘၣ်ယိၣ်တၢ်လၢ ခဲဂီၤအဂီၢ်တဂ့ၤ” န့ၣ်လဲၣ်.
၇ ယ့ၣ်ၡူးသိၣ်လိပှၤ တၢ်ထုကဖၣ်ဝံၤအလီၢ်ခံ အဝဲသိၣ်လိပှၤလၢ ပတဘၣ်သးစၢၢ်ဆၢ နီၢ်ခိအတၢ်လိၣ်ဘၣ် တဖၣ်န့ၣ်ဘၣ်. ယ့ၣ်ၡူးစံးဝဲလၢ ယဟိဝၤယွၤ မ့ၢ်အံးထွဲကွၢ်ထွဲဝဲ ဖီဒ့ၣ်ညါန့ၣ် “သုနာ်တၢ်စှၤသ့ၣ်ဧၢ, ယွၤ . . . ကဒုးကူဒုးသိးသု အါန့ၢ်အန့ၣ်တက့ၢ်, တမ့ၢ်ဘၣ်ဧါ. မၤသးဒ်န့ၣ်ဒီး . . . မ့ၢ်ပကကူဘၣ်သိးဘၣ် ဒ်လဲၣ်ဒ်လဲၣ်န့ၣ်, သုတစံးဒီး ဘၣ်ယိၣ်တၢ်တဂ့ၤ.” ဒီးစံးကဒီးဝဲ “ဘၣ်ယိၣ်တၢ်လၢ ခဲဂီၤအဂီၢ်တဂ့ၤ.” (မးသဲ ၆:၃၀-၃၄) ပတလိၣ်ဘၣ်ယိၣ်လၢ ပတၢ်အိၣ်မူခါဆူညါ အတၢ်လိၣ်ဘၣ်တဖၣ်န့ၣ်ဘၣ်. လၢတၢ်န့ၣ်အလီၢ် ပကဘၣ်သးမံလၢ တၢ်လၢအအိၣ်ဒီးပှၤ တနံၤဂီၢ်တနံၤဂီၢ်န့ၣ်လီၤ. အဒိ တၢ်လၢပဃ့သ့တဖၣ်မ့ၢ်ဝဲ တၢ်အိၣ်တၢ်ဆိးအလီၢ်, ပကဒိးန့ၢ်ဘၣ် တၢ်ဖံးတၢ်မၤလၢ ပကလုၢ်အီၣ်လုၢ်အီ ပဟံၣ်ဖိဃီဖိအဂီၢ်ဒီး ပကအိၣ်ဒီးတၢ်ကူၣ်သ့ လၢပတၢ်ဆၢတဲာ်တၢ်ဘၣ်ဃး ပတၢ်အိၣ်ဆူၣ်အိၣ်ချ့န့ၣ်လီၤ. ဘၣ်ဆၣ် ပကဘၣ်ဃ့ထုကဖၣ်လၢ တၢ်လၢအရ့ဒိၣ်န့ၢ်ဒံး တၢ်သ့ၣ်တဖၣ်အံၤန့ၣ် အိၣ်ဒံးတမံၤလီၤ.
၈. ယ့ၣ်ၡူးအတၢ်ကတိၤ ဘၣ်ဃးဒီး တၢ်အီၣ်လၢတနံၤအဂီၢ် တနံၤအဂီၢ်န့ၣ် ဒုးသ့ၣ်နီၣ်ထီၣ်က့ၤပှၤတၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိ အခီၣ်ထံးတက့ၢ်.)
၈ ယ့ၣ်ၡူးအတၢ်ကတိၤ လၢဘၣ်ဃးပတၢ်အီၣ်လၢ တနံၤအဂီၢ် တနံၤအဂီၢ်န့ၣ် ဒုးသ့ၣ်နီၣ်ထီၣ်က့ၤပှၤလၢ တၢ်ဂ့ၢ်အဂၤတမံၤလၢ ကစၢ်စံးဝဲလီၤ– “ပှၤကညီကမူထဲဝဲလၢ ကိၣ်န့ၣ်တမ့ၢ်ဘၣ်. မ့ၢ်လၢကယဲၢ် တၢ်ကတိၤလၢ အဟဲထီၣ်လၢယွၤအထးခိၣ်လီၤ.” (မးသဲ ၄:၄) လၢတၢ်န့ၣ်အဃိ ပကြၢးဃ့တၢ်လၢ ယဟိဝၤယွၤ ဒ်သိးကသိၣ်လိနဲၣ်လိပှၤ ဒီးဟ့ၣ်တၢ်လၢပလိၣ်ဘၣ် ဒ်သိးပကသုးဘူးပသး ဆူအအိၣ်အဂီၢ်န့ၣ်လီၤ.
“ပျၢ်လၢ်ပကမၢ်”
၉. ဘၣ်မနုၤအဃိ ပတၢ်ဒဲးဘးန့ၣ် လီၤဂာ်ဒ် ကမၢ်တဖၣ်လဲၣ်.
၉ ယ့ၣ်ၡူးစံးဝဲ– “ပျၢ်လၢ်ပကမၢ် . . . တက့ၢ်.” လၢအဂၤတဘျီန့ၣ် ယ့ၣ်ၡူးစံးဝဲ– “ပျၢ်ကွံာ်ပတၢ်ဒဲးဘး” န့ၣ်လီၤ. (မးသဲ ၆:၁၂; လူၤကၣ် ၁၁:၄) ယ့ၣ်ၡူးစံးဝဲဒ်အံၤ မ့ၢ်လၢပတၢ်ဒဲးဘးန့ၣ် လီၤဂာ်လၢ တၢ်ဒ့ၣ်ကမၢ်အဃိလီၤ. ၁၉၅၁ တၢးထီခိးတၢ် တဲဖျါထီၣ်ဝဲလၢ ဖဲပမၤတၢ်ဒဲးဘးအခါ လီၤဂာ်ဒ်ပကမၢ် ထီၣ်ဒီးယဟိဝၤယွၤလီၤ. ယဟိဝၤယွၤ ကြၢးဒိးန့ၢ် ပတၢ်အဲၣ်ဒီး ပတၢ်ဒိကနၣ်လီၤ. ဖဲပမၤတၢ်ကမၣ်အခါ တၢ်လၢယဟိဝၤယွၤ ကြၢးဒိးန့ၢ်တဖၣ် တန့ၢ်ဘၣ်ဝဲဘၣ်. တၢးထီခိးတၢ် တဲဖျါထီၣ်ဝဲလၢ ယဟိဝၤယွၤ မ့ၢ်အဲၣ်ဒိးမၤပတုာ် အတၢ်ရ့လိာ်သးဒီးပှၤန့ၣ် မၤဝဲသ့လီၤ. တၢးထီခိးတၢ် တဲကဒီးဝဲလၢ “တၢ်မၤတၢ်ဒဲးဘးန့ၣ် မ့ၢ်တၢ်တအဲၣ် ကစၢ်ယွၤဘၣ်လီၤ.”—၁ ယိၤဟၣ် ၅:၃.
၁၀. ဘၣ်မနုၤအဃိ ယဟိဝၤယွၤ ပျၢ်ကွံာ်ပတၢ်ဒဲးဘးလဲၣ် ဒီးပကြၢးတူၢ်ဘၣ်ဒ်လဲၣ်.
၁၀ ယဟိဝၤယွၤ ကတဲာ်ကတီၤဝဲ ယ့ၣ်ၡူးအတၢ်ပှ့ၤက့ၤ လၢကပျၢ်ပတၢ်ဒဲးဘးအဃိ ပကြၢးစံးဘျုးအီၤထဲလဲၣ်. ပလိၣ်ဘၣ်လၢ ကစၢ်ယဟိဝၤယွၤ ကပျၢ်ပတၢ်ဒဲးဘး ကိးနံၤဒဲးလီၤ. ယ့ၣ်ၡူး တူၢ်သံအသးလၢပဂီၢ်လၢ အပူၤကွံာ်အနံၣ် ၂၀၀၀ ဃၣ်ဃၣ်လံ ဘၣ်ဆၣ် မုၢ်မဆါတနံၤညါအံၤ ကဲဘျုးဒံးလၢပဂီၢ်လီၤ. လၢတၢ်ဟ့ၣ် လုၢ်ဒိၣ်ပှ့ၤဒိၣ်အံၤအဃိ ပကြၢးစံးဘျုး ယဟိဝၤယွၤထီဘိန့ၣ်လီၤ. တၢ်ပှ့ၤက့ၤလၢ ကမၤထူၣ်ဖျဲးပှၤလၢ တၢ်ဒဲးဘးဒီးတၢ်သံန့ၣ် ပဟ့ၣ်ထီၣ်တသ့ နီတဂၤဘၣ်. (ဖး စံးထီၣ်ပတြၢၤ ၄၉:၇–၉; ၁ ပ့းတရူး ၁:၁၈, ၁၉ တက့ၢ်.) တၢ်ကတိၤလၢ ကစၢ်အတၢ်ထုကဖၣ်အပူၤ “ပျၢ်ကွံာ်ပတၢ်ဒဲးဘး” န့ၣ် ဒုးသ့ၣ်နီၣ်ထီၣ်က့ၤပှၤလၢ ပလိၣ်ဘၣ်တၢ်ပှ့ၤက့ၤ ဒ်ပဒီပုၢ်ဝဲၢ်တဖၣ်လိၣ်ဘၣ် တၢ်ပှ့ၤက့ၤအသိးန့ၣ်လီၤ. ယဟိဝၤယွၤ အဲၣ်ဒိးလၢ ပကသ့ၣ်နီၣ်ထီၣ်က့ၤ ပဒီပုၢ်ဝဲၢ်တဖၣ်အံၤ ဒီးအဝဲသ့ၣ် အတၢ်ရ့လိာ်သးဒီး ယဟိဝၤယွၤန့ၣ်လီၤ. တၢ်အံၤ ပမၤသ့ခီဖျိလၢ ပပျၢ်ကွံာ် ပဒီပုၢ်ဝဲၢ် အတၢ်ကမၣ် တဘျီဃီန့ၣ်လီၤ. ပမ့ၢ်ပျၢ်ပဒီပုၢ်ဝဲၢ်အတၢ်ကမၣ် ဆံးဆံးဖိဒၣ်လဲာ် တၢ်အံၤမ့ၢ် ပပာ်ဖျါထီၣ်လၢ ပအဲၣ်အဝဲသ့ၣ်န့ၣ်လီၤ. လၢန့ၣ်အမဲာ်ညါ ပပာ်ဖျါထီၣ် ပတၢ်စံးဘျုးစံးဖှိၣ် ယဟိဝၤယွၤ လၢပျၢ်ကွံာ် ပတၢ်ကမၣ်အဃိန့ၣ်လီၤ.—ကလီးစဲ ၃:၁၃.
နမ့ၢ်အဲၣ်ဒိးလၢ ကစၢ်ယွၤပျၢ်နတၢ်ကမၣ်န့ၣ် နကဘၣ်ပျၢ်ပှၤဂၤအတၢ်ကမၣ်စ့ၢ်ကီးလီၤ (ကွၢ်လံာ်အဆၢ ၁၁)
၁၁. ဘၣ်မနုၤအဃိ အရ့ဒိၣ်လၢ ပကဘၣ်ပျၢ်ပှၤဂၤ အတၢ်ကမၣ်လဲၣ်.
၁၁ ခီဖျိလၢ ပတလၢတပှဲၤဘၣ်အဃိ တဘျီတခီၣ် ဖဲပှၤမၤကမၣ်ပဝဲအခါ တညီလၢ ပကပျၢ်အဝဲသ့ၣ် အတၢ်ကမၣ်ဘၣ်. (၃ မိၤၡ့ ၁၉:၁၈) ပမ့ၢ်စးထီၣ်တဲ ဘၣ်ဃးဒီပုၢ်ဝဲၢ်လၢ အမၤကမၣ်ဘၣ်ပှၤအဂ့ၢ်န့ၣ် ပှၤဂၤလၢ တၢ်အိၣ်ဖှိၣ်ပူၤတဖၣ်စ့ၢ်ကီး ကအိၣ်ဃူဒီးပှၤဒီး ကဘၣ်ဒိတၢ်အိၣ်ဖှိၣ် အတၢ်ဃူတၢ်ဖိးလီၤ. ပမ့ၢ်မၤဒ်အံၤန့ၣ် မ့ၢ်ဒၣ်ပပာ်ဖျါထီၣ်လၢ ပတပာ်လုၢ်ပာ်ပှ့ၤ တၢ်ပှ့ၤက့ၤလၢအမ့ၢ် ယွၤအတၢ်ဟ့ၣ် ဒီးပတဒိးန့ၢ်စ့ၢ်ကီး တၢ်ဆိၣ်ဂ့ၤဘၣ်. (မးသဲ ၁၈:၃၅) ဖဲပတပျၢ်ပှၤဂၤ အတၢ်ကမၣ်အခါ ယဟိဝၤတပျၢ် ပတၢ်ကမၣ်ဘၣ်. (ဖး မးသဲ ၆:၁၄, ၁၅ တက့ၢ်.) ပမ့ၢ်အဲၣ်ဒိးလၢ ယဟိဝၤယွၤ ကပျၢ်ပတၢ်ကမၣ်န့ၣ် ပတဘၣ်ဆဲးမၤ တၢ်လၢကစၢ်သးဟ့ဝဲန့ၣ်ဘၣ်.—၁ ယိၤဟၣ် ၃:၄, ၆.
“သုတဒုးလဲၤနုာ်ပှၤဆူ တၢ်လ့ပစီအပူၤတဂ့ၤ”
၁၂, ၁၃. (က) ဖဲယ့ၣ်ၡူး ဘျၢထံဝံၤအခါ တၢ်မနုၤ ကဲထီၣ်အသးဒီးအီၤလဲၣ်. (ခ) ပမ့ၢ်လီၤဃံၤလၢ တၢ်လ့ပစီပူၤန့ၣ် ဘၣ်မနုၤအဃိ ပတကြၢး ပာ်တၢ်ကမၣ်လၢ ပှၤဂၤအလိၤလဲၣ်. (ဂ) ယ့ၣ်ၡူးတီတုၤလၢ အသံတစုအဃိ ပာ်ဖျါထီၣ်ဝဲ တၢ်မနုၤလဲၣ်.
၁၂ ကစၢ်အတၢ်ထုကဖၣ်အပူၤ တၢ်ကတိၤလၢအမ့ၢ် “သုတဒုးလဲၤနုာ်ပှၤဆူ တၢ်လ့ပစီအပူၤတဂ့ၤ” န့ၣ်ဒုးသ့ၣ်နီၣ်ထီၣ်က့ၤပှၤလၢ တၢ်မၤအသးဒီးယ့ၣ်ၡူး ဖဲအဝဲဘျၢထံဝံၤ တယံာ်ဘၣ်အလီၢ်ခံန့ၣ်လီၤ. ကစၢ်ယွၤအသးစီဆှံ ဆှၢထီၣ်အီၤဆူ ပှၢ်မုၢ်ကနၢ “ဒ်သိး အကဘၣ်တၢ်လ့ပစီလၢ မုၣ်ကီၤလံၢ်လီၤ.” (မးသဲ ၄:၁; ၆:၁၃) ဘၣ်မနုၤအဃိ ယဟိဝၤယွၤ ပျဲဝဲတၢ်အံၤလဲၣ်. ယဟိဝၤယွၤ ဆှၢလီၤယ့ၣ်ၡူး ဆူဟီၣ်ခိၣ်ချၢ ဒ်သိးကမၤဘၣ်လိာ်က့ၤ တၢ်ဂ့ၢ်လၢ အဟဲအိၣ်ထီၣ်ဝဲဖဲ စီၤအၤဒၣ်ဒီးနီၢ်အံၣ်အု ဂ့ၢ်လိာ်ဝဲယဟိဝၤယွၤ အတၢ်ပၢတၢ်ပြး အခါန့ၣ်လီၤ. အဝဲသ့ၣ် အတၢ်ပူထီၣ်န့ၣ် ဒုးအိၣ်ထီၣ်တၢ်သံကွၢ်တဖၣ်လၢ လိၣ်ဘၣ်တၢ်ဆၢကတီၢ်ဒ်သိး တၢ်ကစံးဆၢက့ၤအီၤအဂီၢ်န့ၣ်လီၤ. အဒိ ဖဲယဟိဝၤယွၤ တ့လီၤပှၤကညီအခါ မ့ၢ်ကမၣ်ဝဲတမံၤမံၤဧါ. “တၢ်အၢတၢ်သီတဂၤ” မ့ၢ်လ့ပစီဝဲ ပှၤလၢအလၢအပှဲၤတဂၤန့ၣ် မ့ၢ်အဝဲတီဒီး ယဟိဝၤယွၤ ကသ့စ့ၢ်ကီးဧါ. ဒီးပှၤဟီၣ်ခိၣ်ဖိ မ့ၢ်ပၢလီၤက့ၤအသးန့ၣ် ကဂ့ၤဒိၣ်စ့ၢ်ကီးဧါ. (၁ မိၤၡ့ ၃:၄, ၅) ခါဆူညါ ဖဲတၢ်သံကွၢ်တဖၣ်အံၤ ဘၣ်တၢ်စံးဆၢက့ၤအီၤ လၢလၢပှဲၤပှဲၤအခါန့ၣ် ကယဲၢ်ပှၤအိၣ်လၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ ကသ့ၣ်ညါဝဲလၢ ယဟိဝၤယွၤ အတၢ်ပၢန့ၣ် မ့ၢ်အဂ့ၤကတၢၢ်လီၤ.
၁၃ ယဟိဝၤယွၤ စီဆှံဝဲအဃိ အဝဲတလ့ပစီပှၤလၢ တၢ်အၢတၢ်သီ နီတဘျီဘၣ်. “ပှၤလ့ပစီတၢ်” န့ၣ်မ့ၢ်မုၣ်ကီၤလံၢ်လီၤ. (မးသဲ ၄:၃) မုၣ်ကီၤလံၢ် ဂုာ်ကျဲးစၢး လ့ပစီပှၤလၢ ကျဲအါဘိလီၤ. ဘၣ်ဆၣ် ပအိၣ်ဒီးတၢ်ဃုထၢလီၤ. ပကဂ့ၢ်လိာ် မုၣ်ကီၤလံၢ် အတၢ်လ့ပစီဧါ, တဂ့ၢ်လိာ်ဘၣ်ဧါန့ၣ် ပဝဲတဂၤစုာ်စုာ် ပဆၢတဲာ်လီၤပသးသ့လီၤ. (ဖး ယၤကိာ် ၁:၁၃–၁၅ တက့ၢ်.) ဖဲမုၣ်ကီၤလံၢ် လ့ပစီယ့ၣ်ၡူးအခါ အဝဲဂ့ၢ်လိာ်ဝဲတဘျီဃီ ခီဖျိသူဝဲ လံာ်စီဆှံလီၤ. ယ့ၣ်ၡူးအသးတီဒီး ကစၢ်ယွၤလီၤ. ဘၣ်ဆၣ်မုၣ်ကီၤလံၢ် တတူၢ်ဃၣ်အသးဘၣ်. အဝဲဟးဖးဒီးအီၤ “တစိၢ်” ဖိလီၤ. (လူၤကၣ် ၄:၁၃) ဘၣ်ဆၣ် မုၣ်ကီၤလံၢ် မ့ၢ်မၤဒ်လဲၣ်ဂ့ၤ ဒ်လဲၣ်ဂ့ၤ ထီဘိယ့ၣ်ၡူး ဒိကနၣ်အပၢ်အကလုၢ် ဒ်အတၢ်ပၢကစၢ်အသိးန့ၣ်လီၤ. ယ့ၣ်ၡူးပာ်ဖျါထီၣ် အဒိအတဲာ်လၢ ပှၤလၢအလၢအပှဲၤတဂၤန့ၣ် ဖဲအဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအခါဒၣ်လဲာ် တီဒီးယဟိဝၤယွၤ သ့န့ၣ်လီၤ. ဘၣ်ဆၣ် မုၣ်ကီၤလံၢ် ဂုာ်ကျဲးစၢးလ့ပစီ ယ့ၣ်ၡူးအပျဲၢ်အဘီၣ်တဖၣ်လၢ အပၣ်ဃုာ်ဒီး နၤစ့ၢ်ကီးလီၤ.
၁၄. ပကတြီဆၢ တၢ်လ့ပစီအဂီၢ် ပကဘၣ်မၤ တၢ်မနုၤလဲၣ်.
၁၄ တၢ်သံကွၢ်တဖၣ်လၢ ဘၣ်ဃးဒီး ယဟိဝၤယွၤ အတၢ်ပၢတၢ်ပြးအဂ့ၢ်န့ၣ် လိၣ်လၢကဘၣ် တၢ်စံးဆၢအီၤဒံးလီၤ. မ့မ့ၢ်ခဲကနံၣ်အံၤ ယဟိဝၤယွၤ ပျဲဒံးမုၣ်ကီၤလံၢ် လၢကလ့ပစီပှၤလီၤ. ယဟိဝၤယွၤ “တဒုးလဲၤနုာ်ပှၤဆူ တၢ်လ့ပစီအပူၤ” ဘၣ်. နီၢ်နီၢ်န့ၣ် ကစၢ်ယွၤနာ်ဝဲလၢ ပကတီဒီးအီၤ ဒီးကစၢ်ယွၤ အဲၣ်ဒိးမၤစၢၤပှၤလီၤ. ဘၣ်ဆၣ် ယဟိဝၤယွၤ တမၤန့ၢ်ဆူၣ်ပှၤလၢ ပကမၤတၢ်လၢ အဘၣ်န့ၣ်ဘၣ်. ကစၢ်ယွၤပာ်ကဲ ပတၢ်ခွဲးတၢ်ယာ်လၢ ပကဃုထၢတၢ်လၢ ပနီၢ်ကစၢ်န့ၣ်လီၤ. လၢတၢ်န့ၣ်အဃိ ယဟိဝၤယွၤ ပျဲဝဲလၢ ပကဆၢတဲာ်တၢ်လၢ ပနီၢ်ကစၢ် လၢပကတီဒီးအီၤဧါ, တတီဒီးအီၤဧါန့ၣ်လီၤ. ပတြီဆၢတၢ်လ့ပစီ ကန့ၢ်အဂီၢ် ပကဘၣ်မၤ တၢ်ခံမံၤလၢအမ့ၢ် ပကဘၣ်သုးဘူးပသးဆူ ယဟိဝၤယွၤအအိၣ် ဒီးဃ့ဘါထုကဖၣ်လၢ ကစၢ်ကဟ့ၣ်ပှၤ တၢ်မၤစၢၤအဂီၢ်န့ၣ်လီၤ. ပကထီဒါ တၢ်လ့ပစီအဂီၢ် ယဟိဝၤယွၤစံးဆၢ ပတၢ်ထုကဖၣ်ဒ်လဲၣ်.
အိၣ်ဘူးဒီး ယဟိဝၤယွၤ ဒီးသးဆူၣ်လၢ တၢ်သးခုကစီၣ်တၢ်မၤအပူၤတက့ၢ် (ကွၢ်လံာ်အဆၢ ၁၅)
၁၅, ၁၆. (က) ပကဘၣ်ထီဒါ တၢ်လ့ပစီ မနုၤတဖၣ်လဲၣ်. (ခ) ပမ့ၢ်လီၤဘၣ်ဆူ တၢ်လ့ပစီအပူၤ ဒီးပမ့ၢ် တဂ့ၢ်လိာ်အီၤဘၣ်န့ၣ် ပကဘၣ်ပာ် တၢ်ကမၣ်လၢ မတၤအလိၤလဲၣ်.
၁၅ ယဟိဝၤယွၤ ဟ့ၣ်လီၤပှၤ အသးစီဆှံ ဒ်သိးပထီဒါ မုၣ်ကီၤလံၢ် အတၢ်လ့ပစီတဖၣ် ကန့ၢ်အဂီၢ်လီၤ. ယဟိဝၤယွၤ ဟ့ၣ်ပှၤ လံာ်စီဆှံဒီး တၢ်အိၣ်ဖှိၣ် ဒ်သိးကဟ့ၣ်ပလီၢ်ပှၤ ဘၣ်ဃးဒီး တၢ်လၢအလီၤဘၣ်ယိၣ်တဖၣ်န့ၣ်လီၤ. အဒိ ကစၢ်ယွၤ ဟ့ၣ်ပလီၢ်ပှၤလၢ ပတဘၣ်သူ ပတၢ်ဆၢကတီၢ်, ကျိၣ်စ့, ဒီးတၢ်ဂံၢ်တၢ်ဘါ လၢတၢ်လၢပတလိၣ်ဘၣ်အီၤ နီၢ်နီၢ်အဂီၢ်န့ၣ်ဘၣ်. အဲးစ်ဖဲ ဒီးကၠဲနံ အိၣ်ဝဲလၢ ထံကီၢ်လၢအထူးအတီၤ လၢကီၢ်ယူရပၤအပူၤလီၤ. အဝဲသ့ၣ်မၤ ပှၤလဲၤလၢညါတၢ်မၤ လၢတၢ်လီၢ်လၢ ပှၤစံၣ်တဲၤတဲလီၤတၢ်ဖိ လိၣ်ဝဲအလီၢ် တဘျုးနံၣ်ညါလီၤ. ဖဲအဝဲသ့ၣ် အဖိအိၣ်တဂၤအခါ ဘၣ်ပတုာ်ကွံာ်ဝဲ ပှၤလဲၤလၢညါတၢ်မၤဒီး ခဲကနံၣ်အံၤ အဖိအိၣ်ဝဲခံဂၤလီၤ. အဲးစ်ဖဲစံးဝဲ– “ပတသူတၢ်ဆၢကတီၢ်လၢ ဘီမုၢ်အတၢ်မၤ ဒ်လၢညါအသိးန့ၣ်ဘၣ်. လၢတၢ်န့ၣ်အဃိ ညီနုၢ်ပဃ့ဘါထုကဖၣ်ဆူ ယဟိဝၤယွၤအအိၣ် ဒ်သိးပသုတလီၤဘၣ်ဆူ တၢ်လ့ပစီအပူၤတဂ့ၤ. ပဃ့ယဟိဝၤယွၤလၢ ကမၤစၢၤပှၤ ဒ်သိးပကပၢၤဃာ် ပတၢ်ဂံၢ်တၢ်ဘါလၢ နီၢ်သးတခီဒီး ပတၢ်သးဆူၣ်လၢ တၢ်စံၣ်တဲၤတဲလီၤ တၢ်မၤအဂီၢ်န့ၣ်လီၤ.”
၁၆ တၢ်လ့ပစီ အဂၤတမံၤလၢ ပကဘၣ်တြီဆၢန့ၣ် မ့ၢ်တၢ်ကွၢ် တၢ်ဂီၤဘ့ၣ်ဆ့န့ၣ်လီၤ. ပမ့ၢ်လီၤဘၣ်ဆူ တၢ်လ့ပစီအံၤအပူၤန့ၣ် ပပာ်တၢ်ကမၣ်လၢ မုၣ်ကီၤလံၢ်အဖီခိၣ် တသ့ဘၣ်. ဘၣ်မနုၤအဃိလဲၣ်. ခီဖျိလၢမုၣ်ကီၤလံၢ်ဒီး ဟီၣ်ခိၣ်လၢအဝဲပၢအံၤ မၢဆူၣ်ပှၤလၢ ပကမၤတၢ်ကမၣ် တမံၤမံၤ တသ့ဘၣ်အဃိန့ၣ်လီၤ. ပှၤတနီၤကွၢ်ဝဲ တၢ်ဂီၤဘ့ၣ်ဆ့ မ့ၢ်လၢတဂ့ၢ်လိာ်ဝဲ တၢ်ဆိကမိၣ်လၢ အကမၣ်တဖၣ် အဃိန့ၣ်လီၤ. ဘၣ်ဆၣ် ပဒီပုၢ်ဝဲၢ်အါမးန့ၣ် တြီဆၢဝဲ တၢ်လ့ပစီတခါအံၤန့ၢ်ဝဲအဃိ ပဝဲစ့ၢ်ကီး ပတြီဆၢအီၤသ့ဝဲလီၤ.—၁ ကရံၣ်သူး ၁၀:၁၂, ၁၃.
“ထုးထီၣ်ကွံာ်လၢ်ပှၤလၢ တၢ်အၢတၢ်သီအပူၤတက့ၢ်”
၁၇. (က) ပအဲၣ်ဒိးလၢ ယဟိဝၤယွၤက “ထုးထီၣ်ကွံာ်လၢ်ပှၤလၢ တၢ်အၢတၢ်သီအပူၤ” န့ၣ်ပပာ်ဖျါထီၣ် ကသ့ဒ်လဲၣ်. (ခ) တယံာ်လၢၤဘၣ် ပကဒိးန့ၢ်ဘၣ် တၢ်မုာ်တၢ်ခုၣ်ဒ်လဲၣ်.
၁၇ ပအဲၣ်ဒိးလၢ ယဟိဝၤယွၤက “ထုးထီၣ်ကွံာ်လၢ်ပှၤလၢ တၢ်အၢတၢ်သီအပူၤ” န့ၣ်ပပာ်ဖျါထီၣ် ကသ့ဒ်လဲၣ်. ပ “တဘၣ်ဃးဘၣ်ဒီး ဟီၣ်ခိၣ်” ဒီးပတဘၣ် “အဲၣ်ဟီၣ်ခိၣ်ဒီး တၢ်အိၣ်လၢအပူၤတဂ့ၤ.” (ယိၤဟၣ် ၁၅:၁၉; ၁ ယိၤဟၣ် ၂:၁၅-၁၇) ဖဲယဟိဝၤယွၤ သုးကွံာ်မုၣ်ကီၤလံၢ် ဒီးမၤဟးဂီၤကွံာ် ပှၤအၢပှၤသီအခါ တၢ်ကမုာ်ကခုၣ်ထဲလဲၣ်. ဘၣ်ဆၣ် တချုးကစၢ်ယွၤ မၤဟးဂီၤမုၣ်ကီၤလံၢ်ဒံးဘၣ်န့ၣ် ပကဘၣ် သ့ၣ်နီၣ်ထီၣ်က့ၤလၢ မုၣ်ကီၤလံၢ် “သ့ၣ်ညါလၢ အဆၢအကတီၢ်အိၣ်ထဲ တစိၢ်ဖိသးတးဒီး, . . . အိၣ်ဒီးအသးဒိၣ်ထီၣ် ဒိၣ်မးလီၤ.” တသ့ဖဲအသ့ အဝဲကဂုာ်ကျဲးစၢးဆူၣ်ဆူၣ် ဒ်သိး ပသုတမၤယွၤအတၢ်မၤလၢၤတဂ့ၤ အဂီၢ်န့ၣ်လီၤ. လၢတၢ်န့ၣ်အဃိ ထီဘိန့ၣ် ပကဘၣ်ဃ့ဘါထုကဖၣ်ဆူ ယဟိဝၤယွၤအအိၣ် ဒ်သိး ကစၢ်ကဒီသဒၢပှၤလၢ တၢ်အၢတၢ်သီအဂီၢ်န့ၣ်လီၤ.—လီၣ်ဖျါ ၁၂:၁၂, ၁၇.
၁၈. ဒ်သိး ပတတုၤလၢ တၢ်ဟးဂီၤဃုာ်ဒီး ဟီၣ်ခိၣ်လၢမုၣ်ကီၤလံၢ် ပၢဝဲအံၤအဂီၢ် ပကဘၣ်မၤ တၢ်မနုၤလဲၣ်
၁၈ မ့ၢ်နအဲၣ်ဒိး အိၣ်မူလၢ ဟီၣ်ခိၣ်လၢ မုၣ်ကီၤလံၢ် တအိၣ်ဘၣ်န့ၣ်ဧါ. နမ့ၢ်အဲၣ်ဒိးန့ၣ် ဆဲးဃ့ဒ်သိး ယွၤအဘီမုၢ်ကဟဲ, ကစၢ်ယွၤအမံၤကဘၣ် တၢ်ပာ်စီဆှံအီၤဒီး အတၢ်ဘၣ်သး ကလၢထီၣ်ပှဲၤထီၣ်လၢ ဟီၣ်ခိၣ်အဂီၢ်န့ၣ်တက့ၢ်. ထီဘိန့ၣ် သန့ၤနသးလၢ ယဟိဝၤယွၤ ဒ်သိး ကအံးထွဲကွၢ်ထွဲနၤတက့ၢ်. ဒီးအဝဲကဟ့ၣ်နၤ တၢ်ဂံၢ်တၢ်ဘါ ဒ်သိး နကတီဒီးအီၤအဂီၢ်န့ၣ်လီၤ. နတၢ်အိၣ်မူ ကလီၤပလိာ်ဒီး ကစၢ်အတၢ်ထုကဖၣ်အဂီၢ် ဂုာ်ကျဲးစၢးမၤ တၢ်ခဲလၢာ်လၢ နမၤသ့န့ၣ်တက့ၢ်.
