1-3. Mwomwo ika ndumbwetu umwe wapwevo ashinganyekele ngwenyi Yehova atachikijile vyuma apwile nakusaka?

LANA uze apwa payiniya washimbu yosena keshi kukavulyama vyuma vyasolokele omu apwile nakuya kulifuchi lyaGermany mumwaka wa 2012 koko. Eji kushinganyekanga ngwenyi Yehova akumbulwile kulomba chenyi chivali. Omu apwile mumasuwa nakuya kuchivaza chandeke, alombele Yehova amukafwe awane mutu uze mwambulila mujimbu. Omu ahetele kuchivaza chandeke, awanyine ndeke yize apwile nakuvandamina kanda yizenga palanga nakulikumbi lyakavangijileho. Lana alombele Yehova amukafwe mwomwo jimbongo apwile najo josena jakumine kaha nawa asakile kwakusavala.

² Omu Lana akumishile kulomba, evwile mutu mwahanjika ngwenyi, “Lana uli nakulinga ika kuno?” Mutu kana apwile mukweze walunga uze muvatangilile kushikola. Uze mukweze walunga vapwile nakumushinjikiza kuli naye nakaka yenyi wapwevo omu apwile nakuya kuSouth Africa. Omu Lana avalwezele ukalu apwile nawo, naye yauze mukweze nakaka yenyi valwezele  Lana ayenga akasavale kuzuvo yavo. Vamuhulishile vihula vyavivulu vyakupandama kuvyuma afwelela nakumulimo wenyi waupayiniya.

³ Omu kwachele nachimene hanyima yakulyaula, Lana akumbulwile vihula vyavo kuzachisa Mbimbiliya, kaha avalombele jikeyala javo mangana ndumbwetu weka akavatambukilenga nge vali navihula. Lana ahetele kanawa kwimbo lyenyi, kaha noholyapwa achili nakuzata upayiniya. Eji kushinganyekanga ngwenyi Yehova evwile kulomba chenyi nakutachikiza vyuma apwile nakusaka, kaha amukafwile.—Samu 65:2.

4. Vyuma muka natushimutwila?

⁴ Omu tweji kupwanga naukalu uze uneza mukukasumuka, chapwa chachashi kulomba Kalunga atukafwe, ngachize, eji kwivwanga kuwaha kwivwa kulomba chavangamba jenyi vakwononoka. (Samu 34:15; Vishi. 15:8) Oloze kulomba chaYesu chakutalilaho chatunangula nge kwatwama vyuma vyeka vyavilemu chikuma vize twatela kulomba. Muchihande chino natushimutwila omu vyuma viwana vyamakumishilo vyamukulomba chaYesu chakutalilaho vinahase kutukafwa tupwenga vakwononoka kuli Yehova.—Tangenu Mateu 6:11-13.

5, 6. Mwomwo ika Yesu atunangwile tulombenga vatuhane kulya chetu numba tuhu tuli navyakulya vyavivulu?

⁵ Yesu atunangwile tulombenga vatuhane kulya “chetu,” keshi kulya “chami” kahako. Victor uze apwa kalama wakujinguluka mulitungu lyaAfrica, ambile ngwenyi: “Ngweji kusakwililanga Yehova mwomwo eji kutukafwanga napuwami tuhone kulizakamina chikuma okwo nakufuma vyakulya vyetu chipwe kulizakamina ngwetu iya mwatuhana jimbongo jakufwetela zuvo tweji kusavalanga. Vandumbwetu veji kutuzakamanga hakumbi hakumbi. Oloze ngweji kulombanga ngwami Yehova atwaleho lika kukafwa vandumbwetu vaze vali nakutukafwa mangana vawane jimbongo jakulikafwa najo.”

⁶ Tunahase kupwa navyakulya vyavivulu, oloze vandumbwetu vavavulu vapwa vakuhutwa kaha veka vali muukalu wakulijila wakufwana nge mundende chipwe vyeka vyakufwana ngana. Katwatela kaha kuvalombelangako, oloze twatela nawa kuvakafwa. Chakutalilaho, tunahase kuvahanako vyuma tuli navyo. Tunahase nawa kuhana wana wakukundwiza mulimo wavatu jaYehova wamukaye kosena.—Yowa. 1, 3:17.

7. Yesu atunangwile ngachilihi ngwenyi katwatela ‘kulizakamina vyalikumbi lyahameneko’?

⁷ Omu Yesu akumishile kutunangula kulomba chenyi chakutalilaho, atunangwile nawa tuhonenga kuhaka chikuma mangana kuvyuma vyakumujimba. Ambile ngwenyi nge Yehova eji kuzakamanga jitemo jamumusenge, kaha “kutala keshi kuhambakana chikuma kumivwika enuko nyi? Shikaho kanda namulizakaminako nakwamba ngwenu, . . . ‘Natuvwala ika?’” Akukulwile hakushindakanya chishina chino ngwenyi: “Kanda namulizakamina vyalikumbi lyahameneko.” (Mateu 6:30-34) Echi chasolola nge katwatela kufwila chikuma vyuma vyakumujimbako, oloze twatela kusuuluka navyuma vyavilemu tuli navyo. Vyuma kana vyapwa zuvo yakutwamamo, milimo yakutukafwa tuwane jimbongo jakuzakama tanga yetu, namangana akutukafwa tulipike namisongo. Oloze kuli vyuma vyeka vyavilemu vize twatela kulombanga.

8. Mazu ahanjikile Yesu akutalisa kukulya chetu chahakumbi hakumbi atwanukisa vyuma muka? (Talenu muvwimbimbi wakulivanga.)

⁸ Mazu ahanjikile Yesu akutalisa kukulya chetu chahakumbi hakumbi atwanukisa vyuma vyeka vize ahanjikile ngwenyi: “Mutu keshi kuyoyela hambolo kahako, oloze nahamazu akufuma mukanwa kaYehova osena.” (Mateu 4:4) Ngachize, twatela kulombanga Yehova atwaleho lika kutuhana kulya chakushipilitu halwola lwakutamo.

9. Mwomwo ika jishili jetu japwila nge mikuli?

⁹ Yesu ambile ngwenyi, “tukonekele mikuli yetu.” Kaha lwola lweka ambile ngwenyi “tukonekele jishili jetu.” (Mateu 6:12; Luka 11:4) Ambile ngocho mwomwo jishili jetu japwa nge mikuli. Mumwaka wa 1951 Kaposhi Kakutalila ahanjikile ngwenyi, nge tunavulumuna shili, cheji kupwanga nge tunakongola mukuli kuli Yehova. Tweji kusakiwanga kuzanga Yehova nakumwononoka. Ngocho, nge tunalingi shili kuli Yehova, kaha katweshi nakumufweta mukuli wenyiko. Yehova nge nasake nahase kujiha usoko wenyi nayetu. Ou Kaposhi ahanjikile nawa ngwenyi: “Kulinga shili chasolola nge katwazanga Kalungako.”—Yowa. 1, 5:3.

10. Mwomwo ika Yehova nahase kutukonekela jishili jetu, kaha twatela kwivwa ngachilihi hachuma kana?

¹⁰ Twapwa vakutokwa chikuma hakuwana nge Yehova atuhanyine ndando yakusokola yaYesu mangana atukonekele jishili jetu. Hakumbi hakumbi twasakiwa kutukonekela kuli Yehova. Numba tuhu Yesu atufwililile myaka kafwe 2,000 yinahichimo, oloze tuchili nakunganyala kundando yenyi yakusokola namakumbi ano. Lwola lwosena twatela kusakwilila Yehova hakutuhana wana kanou wakukupuka. Naumwe wauchi nahase kufweta ndando kana mangana vatusokole kushili nakukufwa. (Tangenu Samu 49:7-9; WaPetulu 1, 1:18, 19.) Mazu amukulomba chaYesu chakutalilaho akwamba ngwavo, “tukonekele jishili jetu” atwanukisa nge, ngana muze etu twasaka ndando yakusokola, navandumbwetu mukiko vasaka. Yehova asaka tushinganyekenga hali ava vandumbwetu nahausoko wavo naikiye. Echi chasaka kuvakonekelanga washi nge vanatuvulumuna. Kakavulu milonga kaneyi yapwa yayindende, oloze nge natukonekelanga vandumbwetu, kaha nachisolola nge twavazanga. Kaha natusolola nawa nge twasakwilila Yehova hakuwana nge eji kutukonekelanga.—Kolo. 3:13.

11. Mwomwo ika chapwila chachilemu kukonekela vakwetu?

¹¹ Hakuwana nge katwakupuka mwosenako, ngachize lwola lumwe chinahase kupwa chachikalu kukonekela vaze vanatuvulumuna. (Levi 19:18) Nge natuputuka kuhanjika vyuma vize vanatuvulumuna, kaha vandumbwetu veka muchikungulwilo vanahase kwingila muchihande kana, kaha echi chinahase kulingisa chikungulwilo chihone  kulinunga. Nge natwechelela ukalu kana utwalilile, kaha nachisolola nge katwamona wana waKalunga wandando yakutusokola kupwa waulemuko, kaha nawa wana kana kaweshi kutunganyalisako. Nge katweshi kukonekelanga vakwetuko, kaha naYehova keshi kutukonekelako. (Tangenu Mateu 6:14, 15; Mateu 18:35) Nge tunakusaka Yehova atukonekele, kaha twatela kulihenda kukuvulumuna milonga yayinene.—Yowa. 1, 3:4, 6.

12, 13. (a) Vyuma muka vyasolokele kuli Yesu hanyima yakumumbapachisa? (b) Mwomwo ika katwatela kuhana vakwetu mulonga nge tunahono kufungulula chesekoko? (c) Vyuma muka asolwele Yesu hakupwa wakushishika palanga nakukufwa chenyi?

¹² Mazu amukulomba chaYesu chakutalilaho akwamba ngwenyi “kanda nautwingisa muchesekoko” eji kutwanukisanga vyuma vyasolokele kuli Yesu hanyima yakumumbapachisa. Shipilitu yaKalunga yamutwalile mupambo “mangana vakamweseke kuli Liyavolo.” (Mateu 4:1; 6:13) Mwomwo ika Yehova echelelele chuma kana chisoloke? Alama naEve vakanyine chiyulo chaYehova. Satana akatwile chihande chize chasakiwa kuchikumbulula halwola lwalusuku. Chakutalilaho, kutala Yehova katengele kanawa vatuko tahi? Kutala mutu wakukupuka mwosena nahase kwononoka kuli Yehova nge vanamweseka “kuli uze wakuhuka” nyi? Kutala vyuma vinahase kupwa kanawa kachi nge vatu navatwalaho lika kuliyula vavene tahi? (Kupu. 3:4, 5) Muchima waYesu wakwononoka Kalunga wasolwele nge Liyavolo apwa muka-makuli. Kukumbulula vihula kana nachikafwa vatu navangelo vatachikize nge Yehova eji kuyulanga mujila yize nayitunganyalisa.

¹³ Yehova apwa wakujila, ngachize, keshi kweseka kala mutu navyuma vyavipiko. Satana ikiye apwa “muka-kweseka.” (Mateu 4:3) Satana eji kutwesekanga mujijila jajivulu, oloze chili kuli etu vavene kusakula mwakulingila. Etu mutu himutu tunahase kusakulaho kulihenda kuvyeseko kana chipwe nduma. (Tangenu WaYakova 1:13-15.) Omu Yesu vamwesekele kuli Satana, hahaze vene amukanyine kuzachisa Mazu aKalunga. Yesu ononokele kuli Kalunga. Oloze Satana kalitwaminyine kweseka Yesuko. Avandaminyine “lwola lweka lwamwaza” amweseke cheka. (Luka 4:13) Chamokomoko navyuma vize alingilenga Satana, Yesu atwalilileho lika kwononoka Kalunga kupwa ikiye Muka-kumuyula. Asolwele nge mutu wakukupuka mwosena nahase kwononoka Yehova namuukalu waunene chikuma. Satana eji kwesekanga navaka-kukavangiza Yesu, kuhakilako vene nayenu mangana mulikange kuli Yehova.

14. Vyuma muka twatela kulinga hakusaka tufungulule vyeseko?

¹⁴ Chihande chakutalisa kuchiyulo chaKalunga kuchili lika noholili. Ngachize, noholyapwa Yehova nechelela Satana atweseke. Yehova keshi kutwingisa muchesekoko. Chipwe ngocho, afwelela ngwenyi tunahase kumwononoka, kaha asaka kutukafwa. Oloze keshi kutushinjila tulingenga vyuma vyakwolokako. Asaka tulisakwile etu vavene vyakulinga. Ngocho, eji kutwechelelanga tumwononoke chipwe nduma. Hakusaka tufungulule cheseko, twatela kulinga vyuma vino vivali. Vyuma kana shina kupandama kuli Yehova nakulombanga atukafwe. Yehova eji kukumbululanga ngachilihi kulomba chenu chakufungulula vyeseko?

15, 16. (a) Vyeseko muka vize twatela kufungulula? (b) Iya twatela kuhana mulonga nge tunahono kufungulula vyeseko?

¹⁵ Yehova eji kutuhananga shipilitu yenyi yajila mangana yitukafwe tufungulule vyeseko vyaSatana. Yehova atuhana nawa Mbimbiliya nachikungulwilo mangana atukafwe kuchina natwingila muponde. Chakutalilaho, atuhuhumuna tulihende kukuzachisa lwola lwetu, najimbongo jetu, nangolo jetu kuvyuma vize katweshi nakusaka chikumako.  Espen napuwenyi Janne vatwama mulifuchi limwe lyamuEurope lyaluheto chikuma. Vanazatenga upayiniya washimbu yosena hamyaka yayivulu mulifuchi muze mwapwile nakusakiwa vaka-kwambulula. Omu vapwile namwana, vechele mulimo waupayiniya. Oholyapwa vali jino navana vavali. Espen ambile ngwenyi: “Tweji kulombanga kuli Yehova atukafwe tuhone kwingila mucheseko hakuwana nge oholyapwa katweshi nakuzata jola jajivulu muwande ngana muze twalingilenga kunyimako. Tweji kulombanga Yehova atukafwe tutwaleho lika kupwa vakuhya kushipilitu nakuzata mulimo wamuwande natwima.”

¹⁶ Cheseko chikwavo chize twatela kufungulula shina kutala chipwe kutanga vyavatu vali uselesele. Nge natuhona kufungulula cheseko kana, kaha katwatela kuhana mulonga Satanako. Mwomwo ika? Mwomwo Satana nakaye kenyi kaveshi kuhasa kutushinjila tulinge vyuma vize katweshi nakusaka kulingako. Vatu vamwe veji kutalanga vyauselesele mwomwo kaveshi kukana vishinganyeka vyakuhengako. Oloze vandumbwetu vavavulu vanafungululanga cheseko kana, kaha nayetu tunahase kuchifungulula.—Koli. 1, 10:12, 13.

17. (a) Tunahase kusolola ngachilihi ngwetu tuli nakusaka Yehova ‘atuyovole kuli uze wakuhuka’? (b) Vyuma muka vyamwaza navisoloka kalinwomu?

¹⁷ Tunahase kusolola ngachilihi ngwetu tuli nakusaka Yehova ‘atuyovole kuli uze wakuhuka’? Katwatela ‘kupwa tuvaka-kaye kaSatana’ chipwe ‘kuzanga kaye chipwe vyuma vyamukaye kaSatanako.’ (Yowa. 15:19; Yowa. 1, 2:15-17) Ocho kuwaha kana natukevwa omu Yehova mwakafumisako Satana nakano kaye kakapi! Oloze oholyapwa twatela kutachikiza ngwetu Satana “ali namatoto amanene, mwomwo natachikiza ngwenyi ali kaha nakashimbu kakandende.” Ngocho, mwazata nangolo mangana atuhonese kuzachila Yehova. Twatela kutwalaho lika kulombanga kuli Yehova atukinge kuli Satana.—Kuso. 12:12, 17.

18. Vyuma muka twatela kulinga hakusaka tukayovoke omu nakakakuma kano kaye kaSatana?

¹⁸ Uno munakusaka kukatwama mukaye kakuzeneka Satana tahi? Nge mukiko, kaha twalenuho lika kulombanga Wangana waKalunga wizenga, lijina lyenyi valijilike, kaha nawa mwaya muchima wenyi valingemo hano hamavu. Pendaminenunga hali Yehova mangana amizakame nakumihana vyuma vize navimikafwa mumwononoke. Enga, zatenunga nangolo mangana muyoyenga kweseka nakulomba chaYesu chakutalilaho.