1-3. Engvângin nge unaunu pakhat chuan Jehova’n kan mamawh a hria tih a chian êm êm?

LANA-I chuan kum 2012 ṭhâl laia German rama thilthleng chu a theihnghilh thei ngai lo vang. Ani chuan a ṭawngṭaina pahnihte chhânna chu a dawng niin a inhria a. A ṭawngṭaina hmasa zâwk chu airport pana rêla a chuan laiin a hlân a. Jehova hnênah thu hrilh theihna kawng hawnsak tûrin a dîl a ni. A ṭawngṭaina hnuhnûng zâwk chu airport a thlen hnu a, a thlawhna chuan tûr chu a tûkah a thlâwk chhuak chauh dâwn tih a hriatin a ni a. Lana-i chuan Europe ram pawisa chu a hmang zo deuh thaw tawhin, thlenna tûr pawh a nei lo tih a chham tel a ni.

² A vawihnihna atâna a ṭawngṭai zawh veleh, tuemawin, “Chibai, hetah eng nge i tih a?” tia mi pakhat ṭawng ri chu a hria a. Chu chu hmâna a school kalpui tlangvâl a lo ni a. Chupa chu South Africa-a zin chhuak tûr a ni a, a nu leh a piin an rawn thlah a ni. A nu, Elke-i’n Lana-i dinhmun a hriat chuan, an hnêna thleng tûrin  a sâwm a. Elke-i leh a nu chuan Lana-i chu an lâwm thiam hle a, Lana-i rinna chungchâng leh hunbi kima a rawngbâwlna chungchângte an zâwt reng a ni.

³ A tûk zîng chaw tui tak an eikhamah, Lana-i chuan Bible ṭanchhan zawhna tam tak a chhân belh a, a ṭanpui zawm zêl theih nân a thlengtute address kim chang tak a la bawk a ni. Lana-i chu tluang takin a thleng a, regular pioneer a thawk zawm a. He thilthlengah hian “ṭawngṭaina Ngaithlatu” a inrawlh niin a hria a ni.—Sâm 65:2.

4. Kan mamawh engte nge kan sawiho vang?

⁴ Harsatna kan tawh thut hian, ṭanpuina dîla ṭawngṭai chu a harsa lo va, Jehova’n a mi rinawmte ṭawngṭaina ngaihthlâksak chu nuam a ti a ni. (Sâm 34:15; Thuf. 15:8) Mahse, lal ṭawngṭaina kan ngaihtuah chuan, kan hmuh hmaih mai theih thil pawimawh zâwk dangte chu kan hmu thei ang. Entîr nân, lal ṭawngṭainaa dîlna hnuhnûng pathumte hian kan thlarau lam mamawhte a târ lan dân hi han ngaihtuah teh. Tin, nî tin ei khawp tûr chaw chungchâng dîlna palina nêna inmila kan nun lehzual theih dân kawng a awm em?—Matthaia 6:11-13 chhiar rawh.

5, 6. Eiin tûr kan nei chung pawhin, engvângin nge nî tina ei khawp tûr chaw dîl chu a pawimawh?

⁵ He dîlnaah hian “ka” ei khawpin ti lo va, “kan” ei khawpin tih hman a ni hi chhinchhiah rawh. Africa rama bial kantu Victor-a chuan: “Ka nupui nêna kan chaw ei tûr leh in luah man pêk tûr kan ngaihtuah hah a ngaih loh avângin, Jehova chungah lâwmthu ka sawi ṭhîn. Kan unaute chuan nî tin min ngaihsak si a. Mahse, min enkawltute’n ei zawnna lama harsatna an tawhte ṭha taka hmachhawn thei tûrin ka ṭawngṭaisak ṭhîn,” tiin a sawi.

⁶ Ni tam tak daih ei tûr kan nei a nih chuan, kan unau rethei te, a nih loh leh leilung chhiatna tâwkte chu kan ngaihtuah thei a. An tâna ṭawngṭaisak mai lovin, kan ṭawngṭaina milin kan nung bawk tûr a ni. Entîr nân, kan unau retheite mamawh chu kan ṭanpui ve thei a. Khawvêl pum huap rawngbâwlna thawhlâwm chu ṭha taka hman a ni tih hriain, kan thawh reng thei bawk.—1 Joh. 3:17.

7. Isua’n a thurâwn pêk, ‘a tûk atân kan lungkham tûr a ni lo’ tih chu engtin nge a sawi fiah?

⁷ Isua’n nî tin ei khawp tûr chaw chungchâng a sawi hian, tûn la laa kan mamawhte a sawina a nih hmêl hle. Chuvângin, Isua chuan Pathianin ram hnim a chei dân a sawi hnuah: “Aw nangni rin tlêmte u, silhfên a pe zâwk êm êm dâwn lo che u em ni? Chutichuan,. . . ‘Eng sinin nge kan awm ang?’ emaw tih, lungkham suh u,” tiin a sawi belh a. He thurâwn pawimawh tak: “Atûk atân lungkham suh u,” tih hi sawi nawnin a thusawi a titâwp a ni. (Mt. 6:30-34) Hei hian hausak âtchilh aiin, nî tina kan mamawhte kan neih chuan kan lungâwi tâwk tûr a ni tih a târ lang. Chutiang mamawhte zîngah chênna in inâwm tâwk, kan chhûngkaw châwmna tûr hnathawh, leh hrisêlna lama harsatna hmachhawn tûra kan mamawh finna te a tel thei a. Mahse, chûng tîsa lam mamawhte chauh kan dîl chuan, chu chuan kan inbûktâwk lohzia a târ lang ang. A aia pawimawh zâwk thlarau lam mamawhte kan nei si a.

8. Isua sawi nî tin ei khawp tûr chaw dîlna chuan kan mamawh pawimawh tak eng nge min hriatchhuahtîr ang? (A thupui chunga milem en rawh.)

⁸ Isua sawi nî tin ei khawp tûr chaw dîlna chuan, thlarau lam chaw kan mamawhna pawh min hriatchhuahtîr tûr a ni a. Kan Pu ber chuan: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” tiin a sawi si a. (Mt. 4:4) Chuvângin, a hun a pianga thlarau lam chawa min châwm zêl tûrin Jehova hnênah kan ṭawngṭai reng tûr a ni.

9. Eng kawngin nge kan sualte chu ‘leibâ’ ang a nih?

⁹ Engvângin nge Isua chuan a hnuah “sualte” tih ṭawngkam a hman laiin, tûn ṭumah hian “bâte” tih ṭawngkam a hman? (Mt. 6:12; Lk. 11:4) Kum 60 kalta khân, he journal hian heti hian a hrilhfiah a: “Pathian dân kalha thil sual kan tih hian a chungah bat kan nei a. . . . Kan sualte avângin Pathianin kan nunna hi a la thei reng a ni. . . . Kan hnên ata a thlamuanna chu a lakîr theiin, amah nêna kan inlaichînna muanawm tak pawh a tichat thei a ni. . . . Thu âwihnaa târ lan hmangaihna kan bâ a; thil sual kan tih hian hmangaihna kan bat chu kan rûl lo a lo ni, sual chu Pathian hmangaih lohna a ni si a,” tiin.—1 Joh. 5:3.

10. Eng ṭanchhanin nge Jehova’n kan sualte a ngaihdam theih a, chu chu engtin nge kan ngaih ang?

¹⁰ Nî tina ngaihdam kan ngaihna chuan Pathianin dân ang taka min ngaihdam theihna awmchhun—Isua tlanna inthawinna—kan mamawhzia a târ lang a. He tlanna hi kum 2,000 dâwn lai kaltaa mi mah ni se, thilpêk vawiina kan dawn ang tlukin kan ngaihlu tûr a ni. Kan nunna tâna “tlanna” pe thei tûr chuan “thil nasa tak sên tûr” a nih avângin, mihring ṭha famkim lote tih theih engmahin a pe thei lo vang. (Sâm 49:7-9; 1 Petera 1:18, 19 chhiar rawh.) Dik tak chuan, he thilpêk ropui tak avâng hian Jehova hnêna lâwmthu sawi kan bâng ngai tûr a ni lo. Chu bâkah, “ka sual” tih ni lovin, “kan sual” tih ṭawngkam hian, biaknaa kan chhûngte zawng zawngin ngilnei taka pêk he ruahmanna hi an mamawh tih min hriatchhuahtîr tûr a ni. Jehova chuan mahni thlarau lam mamawh chauh ngaihtuah lovin, kan chunga thil tisualtute pawh tiamin, mi dangte kan ngaihtuah tel chu a duh tih a chiang hle. Chûng sualnate chu thil ho thamah a ni tlângpui a, chu chuan kan unaute kan hmangaih tak zet tih leh Pathianin ngilnei taka min ngaihdam ang bawkin kan ngaidam ve tih târ lan theihna hun remchâng min pe a ni.—Kol. 3:13.

11. Engvângin nge ngaihdam duhna rilru put hmang neih chu a pawimawh?

¹¹ Mihring ṭha famkim lote kan nih angin, mi dangte huatna pai châng kan nei ṭhîn hi a lungchhiatthlâk hle. (Lev. 19:18) Mi dang hnêna kan hrilh chuan, kan lamah an ṭang ang a, chu chuan kohhhranah inṭhen darhna a awmtîr thei a ni. Chutiang dinhmun chu a  awm zêl chuan, Pathian ngilneihna leh tlanna kan ngaihhlut lohzia kan târ lang a ni ang. Ngaihdam duh lohna rilru put hmang kan lantîr chuan, kan Pain a Fapa inthawina hlutna chu kan tân a hmang tawh lo vang. (Mt. 18:35) Isua chuan lal ṭawngṭaina a hrilh hnuah, hei hi a sawi zawm nghâl a ni. (Matthaia 6:14, 15 chhiar rawh.) A tâwp berah, Pathian ngaihdamna dawng tûr chuan, thil sual pawi takte tih zêl chu pumpelh kan tum tûr a ni a. Thil sual tih pumpelh kan duhna chuan a dawta dîlnaah hian min hruai thleng a ni.—1 Joh. 3:4, 6.

12, 13. (a) Isua’n baptisma a chan hnu lawkah eng thil nge thleng? (b) Thlêmna kan tâwk a nih chuan, engvângin nge a mawh kan phurh ang? (c) A thih thlenga rinawmin, Isua’n eng nge a hlen chhuah?

¹² Isua’n baptisma a chan hnu lawka thilthleng ngaihtuahna chuan he dîlna: “Sual tûra thlêmnaah min hruai lût suh la,” tih hi hre thiam tûrin min ṭanpui thei a. Isua chu Pathian thlarauvin thlalêrah a hruai a. Eng atân nge? “Diabola thlêma awm tûrin” a ni. (Mt. 4:1; 6:13) Chu chu mak kan ti tûr a ni em? Pathianin a Fapa leia a rawn tirh chhan kan hriatthiam chuan mak kan ti lo vang. Chu chu Adam leh Evi’n Pathian lalchungnunna an dodâlna thu buai chinfel nân a ni a. Chu mi chingfel tûr chuan hun a ngai a ni. Entîr nân, Pathianin mihring a siamah hian thil fel lo engemaw a awm em? Mihring ṭha famkim tân “mi sual” nêksâwrna tam tak a tâwk chung pawhin Pathian lalchungnunna chu vawn tlat theih a ni em? Setana sawi angin, Pathian rorêlna ata inlâk hran chu mihringte tân a ṭha zâwk ang em? (Gen. 3:4, 5) Hêng zawhnate chhâng tûr hian hun a ngai a; mahse, finna nei thil siam zawng zawng hmaah Jehova’n a lalchungnunna chu a ṭha zâwngin a hmang tih a târ lang ang.

¹³ Jehova chu a thianghlim avângin, thil sual ti tûrin tumah a thlêm ngai lo. Chu thil titu chu, Diabola, “Thlemtu” zâwk hi a ni. (Mt. 4:3) Diabola chuan thlêmna awmtîr thei dinhmunte a siam thei a. Mahse, thlêmna tawh leh tawh loh chu mi mal tinte chungah a innghat a ni. (Jakoba 1:13-15 chhiar rawh.) Isua chuan thlêmna a tawh apiangin Pathian Thu ṭanchhanin a chhâng lêt nghâl a. Chuvângin, Isua’n Pathian lalchungnunna chu a ṭan tlat a ni. Mahse, Setana chu a beidawng mai lo. “A remchân hun” dang nghâkin a kalsan zâwk a ni. (Lk. 4:13) Isua chuan a rinawmna vawng lo tûra Setana thlêmna zawng zawng chu a do zawm zêl a. Krista chuan Jehova lalchungnunna chu a ṭan tlat a, mihring ṭha famkim tân fiahna nasa ber hnuaiah pawh rinawmna vawn theih a nihzia a târ lang bawk. Mahse, Setana chuan nang pawh tiamin, Isua hnungzuite chu awh tumin a thlêm a ni.

14. Thlêmnaa lût lo tûrin eng nge kan tih ngai?

¹⁴ Pathian lalchungnunna thu buai kal zêl avângin, Jehova chuan Thlêmtuin he khawvêl hmanga min thlêm a phal a. Pathianin thlêmnaah min hruai lût lo. Chu ai mahin, min ring a, min ṭanpui a duh zâwk a ni. Mahse, zalên taka duhthlan theihna kan neih min zahsak avângin, Jehova chuan thlêmnaa lût lo tûrin min vêng nghâl mai ṭhîn lo. Thil pahnih tih tûr kan nei a ni—thlarau lama harhvâng renga awm leh ṭawngṭai reng chu. Chuti chu, engtin nge Jehova’n kan ṭawngṭainate chu a chhân?

15, 16. (a) Thlêmna ṭhenkhat kan do ngaite chu eng nge ni? (b) Mi chu thlêmnaa a tlûk luh chuan tu nge mawhpuh tûr ni ang?

¹⁵ Jehova chuan min tichak a, thlêmna do tûra min ṭanpui thei a thlarau thianghlim thiltithei tak chu min pe a. Pathian chuan a Thu leh a kohhran hmangin, thil pawimawh lo tîsa lam thilte atâna hun tam tak hmanna te, sum tam tak hmanna te, leh tha leh zung tam tak hmanna te lakah min vaukhân lâwk a. Espen-a leh Janne-i chu Europe-a ram hausa tak pakhatah  an chêng a. An rama mamawh zualna hmunah kum tam tak chhûng regular pioneer an thawk a ni. Fa hmasa ber an neihin, an pioneer thawh an chawlhsan a, tûnah chuan a pahnihna an nei leh tawh a ni. Espen-a chuan: “Tûn hmaa theocratic thiltiha hun tam tak kan hman ang khân tûnah kan hmang thei tawh lo va, thlêmnaa lût lo tûrin Jehova hnênah kan ṭawngṭai ṭhîn. Thlarau lama hma sâwn reng thei tûr leh rawngbâwlnaa ṭhahnem ngai taka tel reng thei tûrin Jehova hnênah ṭanpuina kan dîl a ni,” tiin a sawi.

¹⁶ Tûn lai huna thlêmna dang hluar tak chu saruak lem leh thuziakte en hi a ni a. Chutiang thlêmnaa kan tlu lût a nih chuan, Setana kan mawhpuh thei lo. Engvângin maw? Setana leh a khawvêl chuan kan duhzâwng kalha thil ti tûrin min tihluih theih loh avângin. Thil sual lam an ngaihtuah reng avângin ṭhenkhat chu he thlêmnaah hian an tlu lût a. Mahse, kan unau a sâng têlte ang bawkin kan do hneh thei a ni.—1 Kor. 10:12, 13.

17. (a) Mi sual laka min chhandam tûra dîlna nêna inmilin engtin nge kan nun theih? (b) Eng thil thawventhlâk tak nge lo thleng thuai dâwn?

¹⁷ “Mi sual lakah chuan min chhandam zâwk ang che,” tih dîlna nêna inmila nung tûr chuan ‘Setana khawvêla mi nih loh’ kan tum tlat tûr a ni a. ‘Setana khawvêl hi hmangaih lo va, khawvêla thil awmte pawh hmangaih hek loh’ kan tum tlat bawk tûr a ni. (Joh. 15:19; 1 Joh. 2:15-17) Chutianga tih chu thiltih chhunzawm reng ngai a ni a. Setana leh a khawvêl suaksual tihboralna hmanga Jehova’n he dîlna a chhân hunah chuan a va thawventhlâk dâwn tak êm! Mahse, Setana chu vân aṭang leiah paihthlâk a nih khân, hun tlêm tê chauh a neih tawhzia a inhria tih hi kan hre reng tûr a ni. A thinur êm avângin, kan rinawmna tihchhiat tumin theih tâwp a chhuah a. Chuvângin, a kut ata chhandamna dîlin Pathian Jehova hnênah kan ṭawngṭai zawm zêl tûr a ni.—Thup. 12:12, 17.

18. Setana khawvêl tâwpnaa dam khawchhuak tûrin eng nge kan tih zawm zêl ang?

¹⁸ Chutiang hun hlimawm tak lo awm tûr chu i duh em? I duh chuan, Pathian hming tihthianghlim ni tûr leh a duhzâwng leiah tih ni tûrin Pathian Ram tân ṭawngṭai zawm zêl rawh. Jehova’n thlarau lam leh tîsa lama i mamawhte a pe ang che tih hi ring tlat rawh. Tin, lal ṭawngṭaina nêna inmila nun chu tum tlat bawk ang che. (w15-E 06/15)