1-3. Uzye nkazi umwi wasininkizye uli ukuti Yeova wamanyile vino walondanga?

LANA ataliilila ivyacitiike umu 2012 lino wali uku Germany. Wasininkizye ukuti amapepo yano wapepanga yaaswikwe. Apa kutandika wapefile ukuti Yeova amwazwe ukusimikila ala ali mwisitima ilyayanga uku ciwansa ca ndeke. Nupya lino wafisile apa ciwansa ca ndeke wapefile ipepo lyakwe ciili pano wizile amanya ukuti yaali nu kutandika ulendo apa wanda walondelelapo. Lana wapefile ukuti Yeova angamwazwa pa mulandu wakuti wamazile impiya zyonsi zino wakweti nupya ataakweti nu kwakuti angikala.

² Lino Lana wamazile sile ukupepa, paapo kwene uvwile umwi wa mulamuka ati, “Mwapola Lana, ukucita cani paa?” Fwandi ala u mulumendo wino yaasambililanga nawe uku sukulu. Umulumendo wii wali na ya nyina na nyinakulu aamusukiliile uku kukwela indeke aye uku South Africa. Lino Lana wayalondolwelile intazi ino waali nayo, ya nyina ya mulumendo na nyinakulu yasenzile Lana uku ng’anda. Yuzyanga Lana amauzyo  aingi pali vino wasambilila icumi na pali upainiya uno akaomba.

³ Apa wanda walondeliilepo apa cisila ca cakulya ca katondo, Lana waswike amauzyo aingi yano yuzizye pali vino Baibo ikalanda. Lana wayanenyile ukuti angayalondela umwi uwakuti angaiza kuli aliyo pakuti aayazwa ukwasuka mauzyo aamuli Baibo. Nkazi wii wasininkizye ukuti Yeova waswike amapepo yakwe, Yeova wamanyile vino walondanga nupya wamwavwile.—Masa. 65:2.

4. I vyani ivikalondekwa vino tumasambililapo?

⁴ Ndi twaponelwa ni ntazi umu kupumikizya, limwi citanga citutalile ukupepa kuli Yeova, nupya Yeova akaitemelwa ukwasuka mapepo ya antu aaya na ucisinka kuli aaliwe. (Masa. 34:15; Mapi. 15:8) Ndi tukwelenganya sana api pepo lino Yesu wasambilizye, tungazana ukuti limwi kuli vimwi ivicindame vino tusilumbula umu mapepo itu. Elenganyini pa vintu vitatu ivikalanda pali ucuza witu na Yeova ivyalumbulwa umwi pepo lino Yesu wasambilizye asambi. Alino, uzye kwaya na vyuze vino tungacita pakuti vino tukacita vyauvwana na vino tukapepa ukuti Leza aatupeela ivya kulya cila wanda?—Welengini Mateo 6:11-13.

5, 6. U mulandu ci uno Yesu watusambilizye ukuti twapepa kuli Leza tuti “tupeele ivyakulya” nanti icakuti tukweti ivingi?

⁵ Yesu watusambilizye ukuti twapepa kuli Leza ituti, “tupeele ivyakulya,” tutapepa sile tuti “umpele ivyakulya.” Umwangalizi umwi uwa ciputulwa umu Africa walanzile ati: “Lyonsi nkataizya Yeova pano mamane naani tusisakamala kuno tulafumya ivyakulya mutondo, nanti sile ukusakamala ukuti a weni aalatulipilila ing’anda umwakwikala. Aina na ya nkazi yakatusakamala cila wanda. Lelo cino tukapepa kuli Yeova i cakuti aazwa aina yaa na ya nkazi ukusipikizya amezyo yano yakakwata.”

⁶ Ndi cakuti twakwata ivyakulya ivingi, tufwile ukwelenganya apa ina na ya nkazi aaya umu mpanga umwaya ivipowe nanti yano yakaponelwa nu uzanzo. Tutafwile sile ukuyapepelako, lelo tulinzile nu kuyapeelako ivikulondekwa. Wakwe ukuyapeelako vino tukweti, nu kutungilila mulimo wa mu nsi yonsi uwa Nte Zyakwe Yeova ukupitila umu kusangwilako impiya. Pano twamanya ukuti imisangulo kwene ii iika-azwilizya aina na ya nkazi aakulondekwa uwazwilizyo.—1 Yoa. 3:17.

7. Uzye Yesu watusambilizye uli ukuti tutafwile ‘ukusakamala pa vintu vya mutondo’?

⁷ Lino Yesu wasambilizye asambi ipepo lii, walanzile na pakukana londesya ivyuma. Walanzile ati ndi cakuti Yeova akasakamala utunyi, “uzye wene atalalusya ukuzwika mwemwe mwe yautailo unono, caleka mutaasakamala muti . . . ‘tumazwala cani’” Nupya walanzile nu kuti: “Mutaasakamala pa vintu vya mutondo.” (Mate. 6:30-34) Fwandi tutafwile ukusakamala pa vintu vya ku nkoleelo. Lelo tulinzile sile ukwika amano uku vintu vino tukweti apa wanda kwene uwo. Tungapepa kuli Yeova ukuti atwavwe ukuzana umwakwikala, incito iyakutwavwa kuti twasunga ningo ulupwa alino nu kulenga mano pakuti twasakamala umi witu ningo. Nomba kuli na cuze icicindame sana cino tufwile ukupepelapo.

8. Uzye amazwi yano Yesu walanzile aakuti ivyakulya vya cila wanda, yakatwiusya cani? (Lolini icikope ca kutandikilako.)

⁸ Amazwi yano Yesu waomvizye aakuti ivyakulya vitu ivya cila wanda, yakatwiusya apa cintu na cuze cino walanzilepo icakuti: “Umuntu atangaya nu umi mu cakulya citupu, lelo pa kuyela mazwi yonsi yano Leza wavwanga.” (Mate. 4:4) Acino tufwile ukupepa pakuti Yeova atwalilile ukutupeela amasunde yano tulinzile ukulondela.

9. U mulandu ci uno tungalandila ukuti amaifyo itu yaaya wa nkongole?

⁹ Yesu walanzile ukuti: “Utwelele maifyo itu.” (Mateo 6:12; Luka 11:4) Amaifyo itu yaaya wa nkongole. Lupungu Lwa Mulinzi lwa mu 1951, lwalondolwile ukuti, ndi twayembuka, cikaaya kwati twakongola kuli Yeova. Inkongole zino Yeova watukongwesya i zyakumutemwa nu kumuvwila. Fwandi ndi twayembukila Leza, ala twafilwa ukuwezya inkongole, kulikuti ukumutemwa. Yeova nga akulonda atanga aye cuza witu. Nupya Lupungu Lwa Mulinzi lwalanzile nu kuti: “Ukuyembuka cikalanga sile ukuti tutatemwa Yeova.”—1 Yoa. 5:3.

10. U munzila ci muno Yeova watwelela amaifyo, nupya tukauvwa uli pali ci?

¹⁰ Twaya nu luzango cuze ukuti Yeova watutumiile Yesu ukwiza tufwila pakuti amaifyo itu yelelwe! Cila wanda tukalondeka ukuti Yeova atwelela pali vino tukamuluvyanya. Ukufuma pano Yesu watufwilile, iipapita ni myaka apiipi na 2,000, lelo imfwa yakwe icili ikatwazwa. Acino tufwile ukutaizya sana Leza apa wila uu. Kutaaya umuntu wino aangatupeela uwila wa musango uu uwalondekwanga pakuti tukululwe ukwi ifyo ni mfwa. (Welengini Masamu 49:7-9; 1 Pet. 1:18, 19.) Amazwi aakuti, “utwelele maifyo itu” aaya umwipepo lino Yesu wasambilizye asambi, likatwiusyako ukuti aina na ya nkazi nayo kwene yakalondeka ukukululwa ndi vino naswe tukalondeka. Yeova akaalonda ukuti twaelenganya pa ina itu na pali ucuza wao na Yeova. Cii cikupiliula ukuti ndi yatuluvyanya tulinzile ukuyelela zuwa. Ilingi aina itu yakatuluvyanya umu tuntu tunono, lelo ndi tukuyelela ala tukulanga ukuti twayatemwa. Nakupya tukalanga nu kuti tukataizya pali vino Yeova akatwelela ndi twamuluvyanya.—Kolo. 3:13.

11. U mulandu ci uno cacindamila ukwelela aatuluvyanya?

¹¹ Nomba insita zimwi cingatutalila ukwelela yaayo aatuluvyanya, pa mulandu wakuti tutamalilika. (Levi. 19:18) Ndi cakuti twatandika ukulanda kuli yauze apa viipe vino yamwi yaatucitiile, umu cilongano mutanga muye ukuvwana. Alino ngi cakuti tusikulonda ukwelela, cilalanga paswe ukuti tusitaizya apa wila wakwe Leza uwa kutukulula ukwi-ifyo nupya tutanga twize tuye  nu umi uwa manda pe. Twaiusya ukuti, ndi tusikwelela yauze, ala naswe kwene Yeova atalatwelela. (Mate. 18:35) Yesu walanzile icisinka cii umwi pepo lino wasambilizye asambi yakwe. (Welengini Mateo 6:14, 15.) Nakupya ndi tukulonda Yeova ukutwelela, tutafwile ukwifya.—1 Yoa. 3:4, 6.

12, 13. (a) I vyani vyacitikile Yesu lino wawatiziwe sile? (b) U mulandu ci uno tutalinzile ukupeelela yauze umulandu ndi twaya nu wezyo? (c) Uzye Yesu wasininkizye cani apa kutwalilila uwa cisinka ukufika lino wafwile?

¹² Amazwi aakuti: “Utaleka tuponele mukweziwa,” aalumbulwa umwi pepo lino Yesu wasambilizye asambi, yakatwiusya ivyacitikile Yesu lino wawatiziwe. Umupasi wakwe Yeova watungulwile Yesu uku lwanga kuti “akatunkwe na Ciwa.” (Mate. 4:1; 6:13) U mulandu ci uno Yeova wazumilizye cii ukucitika? Adamu na Eva yakanyile ukuteekwa na Yeova. Satana wakatwisye amauzyo alondekwanga ukupitapo insita pakuti yaasukwe. Yamwi pa mauzyo yaayo, aakuti: Uzye Leza ataumvile ningo antu? Uzye antunze yangatwalila acumi kuli Yeova ndi cakuti yatunkwa na “Ciwa”? Uzye i cisuma ukuti antu yaiteeka aeneco? (Utan. 3:4, 5) Vino Yesu watwalilile ukuya uwa cumi kuli Leza vyasininkizye ukuti Ciwa wali u waufi. Fwandi uku nkoleelo, lino amauzyo yonsi yaa yalasukwa uku kucindika Yeova, iviumbwa vya kwiyulu na antu yonsi pano nsi yalamanya ukuti ukuteeka kwakwe Yeova aali kwa mpomvu.

¹³ Yeova u wamuzilo, acino fwandi asitunka umuntu aali wensi ukucita iviipe. Satana aakatunka antu, fwandi aali mulandu kwene uno aka-amilwa ukuti “Katunka.” (Mate. 4:3, Cimambwe New Testament) Satana akaomvya inzila izipusane-pusane apa kututunka. Nomba tukaisolwela sweineco ukutaluka itunko lilyo nanti foo. (Welengini Yakobo 1:13-15.) Yesu ataalengelanga ukwasuka Satana ukuomvya amalembelo. Yesu watwalilile ukuya uwa cisinka kuli Yeova. Nomba Satana ataatiile ukwezya Yesu. Fwandi watalanga “amusya” awela apa nsita yuze. (Luka 4:13) Lelo nanti Satana wezyanga vii, Yesu watwalilile ukuvwila Ukateeka Wakwe Leza. Acino Yesu walangilile ukuti antu yonsi yangatwalilila ukuya acisinka kuli Yeova nanti yali ni ntazi. Nupya Satana wezyanga ukutunka alondezi yakwe Yesu, namwe kwene akaezya ukumutunka pakuti mutauvwila Yeova.

14. I vyani vino tulinzile ukucita pakuti twacimvya uwezyo?

¹⁴ Amauzyo yano Satana wakatwisye apa kuteeka kwakwe Yeova, yacili yakulondekwa ukwasukwa. Acino, Yeova akaleka Satana ukuti aatutunka. Yeova asi aaliwe akalenga “tuponele mukweziwa.” Wene wataila ukuti tungatwalilila ukuya acisinka kuli aaliwe, nupya akalondesya ukuti aatwavwa pakuti twatwalilila acisinka. Lelo asitupatikizya ukucita ivisuma. Wacindika sana insambu ino twakwata iyakuisolwela, fwandi akatuleka ukuti tuisolwele sweineco ukuya acisinka kuli aaliwe nanti foo. Ivintu viili ivingatwavwa ukucimvya uwezyo, aevi: Ukuya sana cuza wakwe Yeova nu kupepa kuli aliwe pakuti aatwavwa. Uzye Yeova akatwasuka uli lino tukupepa kuli aliwe ukuti atwavwe ukucimvya uwezyo?

15, 16. (a) U wezyo ci umwi uno tulinzile ukutalukako? (b) A weni wino tulinzile ukupeela umulandu ndi uwezyo watucimvya?

¹⁵ Yeova akatupeela umupasi wakwe uwa muzilo apakutwazwilizya ukucimvya amezyo yakwe Satana. Nupya Yeova watupela Baibo ni cilongano cakwe ivikatwavwa ukumanya vino tungataluka uku vintu viipe. Ukupitila muli vii, amuno Yeova akatunena ukuti tutafwile ukusumba sana insita itu, impiya na maka itu uku vintu vino  vitatukwatile ni ncito. Espen na Janne akaikala umu mpanga iyakwata ivyuma uku Ulaya, apa myaka iingi yakaomba upainiya wa nsita yonsi umu mpanga muno mukalondekwa ya kasimikila aingi. Lino yaakweti umwana wakutandikilapo, yatiile upainiya, pali ndakai yali na ana yaili. Espen walanzile ati: “Lyonsi tukapepa kuli Yeova pakuti aatwavwa ivyakucimvya intazi maka-maka pa nsita ii lino tusikusumba insita ikulu umu mulimo wakwe Leza ndi vino caali mpiti. Tukapepa kuli Yeova apakuti aatwazwa ukutwalilila ukumuombela nu kwika sana mano uku mulimo wa kusimikila.”

¹⁶ Uwezyo uze uno tulinzile ukusenkako, u kutamba ivikope vya uzelele. Ndi cakuti twaponela umuwezyo uu nu kucita iviipe, tutanga tupeele Satana umulandu. I cani cino twalandila vii? Pano Satana na antu yakwe yatanga yatupatikizye ukucita vino tusikulonda. Antu yamwi yakatamba ivikope vya uzelele pa mulandu wakuti yasikanya amelenganyo yao aipe. Lelo aina na ya nkazi aingi yacimvya uwezyo uu, nafwe kwene tungacimvya.—1 Kol. 10:12, 13.

17. (a) Uzye tungalanga uli ukuti tukalonda Yeova ‘ukututuula uku mwipe’? (b) I vyani vino Yeova alacita uku nkoleelo?

¹⁷ Uzye tungalanga uli ukuti tukalonda Yeova ‘ukututuula uku mwipe’? Tutafwile ukuya “amu nsi [yakwe Satana].” Nupya tutalinzile “ukutemwa insi [yakwe Satana] nanti cintu cili consi ica mu nsi.” (Yoa. 15:19; 1 Yoa. 2:15-17) Ala cilaziipa wakwe cimwi lino Yeova alasisya Satana pano nsi nu konona ya kacita ya viipe! Lelo, twaiusya ukuti ndakai Satana “ali nukali cuze, pano amanyile ukuti watasyala sile ni nsita inono.” Fwandi Satana akuombesya sana pakuti atulesye ukuombela Yeova. Acino tufwile ukutwalilila ukupepa kuli Yeova pakuti aatucingilila kuli Satana.—Umbw. 12:12, 17.

18. Uzye pakuti mukikale umu nsi umutalaya Satana, mulinzile ukucita vyani?

¹⁸ Uzye mukalondesya ukwiza ikala umu nsi umutalaya Satana? Fwandi twalililini ukupepa ukuti Uwene Wakwe Leza wize, izina lyakwe licindikwe, nu kuti ukulonda kwakwe kukacitike pano nsi. Nupya lyonsi mwataila Yeova pakuti amusakamala nu ku mupeela vyonsi ivikalondekwa pakuti mwatwalilila ukuya acisinka kuli aaliwe. Nakupya twalililini ukuombesya pakuti mwacita ivyaya umwi pepo lino Yesu wasambilizye asambi yakwe.