1-3. Ungi mukwetu mukashi bapushishe shi Yehowa auku byatudi nabyo lukalo naminyi?

UNGI mbala-mashinda a myeshi yooso abetamina bu Lana t’anaalube bibaadi bikitshikye dingi efuku mwishipo mu Allemagne mu kipwa kya 2012. Bapetele myaluulo ku nteko yaaye ibidi ibatekyele. Batekyele bwa musango wa kumpala pabaadi mu mashuwa ende ku kipalwe kya ndekye. Baadi mutekye Yehowa bwadya kumupa mushindo wadya kulambukisha. Bwa musango wa kabidi, batekyele nsaa ibafikile ku kipalwe abo nkumulungula shi ndekye t’ende lelo. Mukwetu Lana batekyele Yehowa bukwashi mwanda makuta aaye abapwile aku namu baadi na lukalo lwa mbalo ya kulaala dyadya efuku.

² Kunyima kwa kupudisha luteko lwaye, bapushishe muntu akula shi: “Nakwimuna Lana, okwete kukita kinyi pano?” Yawa nsogwalume baadi mwina kalasa naaye. Baadi na nyina’ye mpa na nyina’aye kulu babafikile mu kumushindikila bwa kwenda ku Afrique du Sud. Pabaadi Lana mwibalungule mwanda waye, babaadi bamwitamine bwadya nkashaala ku nshibo yaabo. Babaadi bamwipushe nkonko  ibungi pabitale lulangwilo lwaye na mudimo waye wa bu mbala-mashinda.

³ Namashika, kunyima kwa kumupa ka kudya, baadi mwibaluule ku ingi nkonko ya mu Bible, akupu, aye nkwibepusha bwa kuuka su kwi kwikala muntu e bya kutungunuka na kwibaluula nkonko yaabo. Lana bakafikile kwabo na mbidi bukome aye nkutunguka na mudimo waye wa bu mbala-mashinda. Baadi mupushe‘shi Yawa “apusha ntenko” baadi auku bibaadi nabyo lukalo na kumukwasha.—Mis. 65:2.

4. Myanda kinyi yatudi nayo lukalo yatukyebe kutaluula?

⁴ Tabitukalakashanga bwa kuteka apetufikila mwanda mu kabasamushi, mwanda Yehowa apushaa nteko ya bafubi baaye basha lulamato. (Mis. 34:15; Mye. 15:8) Byabya, su atunangusheena ku luteko lwa kileshesho, atumono shi ingi nsaa, kwi myanda ikata yatudi bakumbeene kwilankana. Bu kileshesho, banda kutala mushindo wabadi baleeshe nkalo yeetu ya mu kikudi mu myanda isatu ya nfudiilo i mu luteko lwa kileshesho. Na dingi kwi myanda ibungi ayitungu kukita bwa kwikala na nshalelo mwipusheene na mwanda wa kananka watutekye, utale kya-kudya kyetu kya kwifuku.—Badika Mateo 6:11-13.

5, 6. Bwakinyi Yesu etunyingisha bwa kuteka kya-kudya kyetu sunga twekala na bidibwa bibungi?

⁵ Tulamineyi’shi uno mwanda ngutale kuteka kya-kudya “kyetu” kushi kya-kudya “kyande” kya leelo. Victor, ungi mukunkushi a kifunda akula’shi: “Misango ibungi natumbula Yehowa mwanda ami na mukash’ande tatwitatshishaa bwa kuuka akufiki kya-kudya kyetu, sunga kukimba bwa kuuka muntu etufutshila nshibo. Bakwetu abetulombeshaa nkalo yeetu na kalolo efuku dyooso. Nyi bwakinyi natekaa bwa’shi baaba abetukwasha bekale na mushindo wa kupeta makuta sunga kwekala nkalakasho.”

⁶ Su twi na bya-kudya bibungi, twi bya kutentekyesha namu bakwetu be mu bulanda sunga bakwatshikye na masaku. Tatwi balombeene nka penda kwibatekyela kadi abitungu twibakitshine myanda ipusheene na nteko yeetu. Bu kileshesho, twi bya kukwasha bakwetu be mu lukalo na bintu . Twi kutuusha dingi bya buntu byetu bwa kukwatshisheena mudimo mu nsenga ishima, bashinkamishe shi byabya byabuntu abafubu nabyo kalolo.—1 Yo. 3:17.

7. Mushindo kinyi ubaadi Yesu mulongyeshe’shi ‘tatwikalanga na katshim’a-munda bwa malooba’?

⁷ Pabaadi akwila pabitale kya-kudya kya lelo, Yesu baadi akyebe kuleesha bwa nkalo yeetu ya dyadya efuku. Byabya, baadi mutungunukye na kuleesha mushindo aufwadikaa Efile Mukulu bilongo, kunyima bambile’shi: “Tee kwinukitshina bikile paapa, bantu ba lukumiino lupeelayi! Byabya tanwikalanga mashimba kwiyilu pa kwiyipusha’shi: . . . ‘Atukafwala kinyi?’” Baadi mufudiishe pa kwambuula dino elango dya muulo: “Tanwikalanga na katshim’a-munda bwa malooba.” (Mat. 6:30-34) Bino abileesha’shi pamutwe pa kwikala na lwabi lwa bintu bya kumbidi, abitungu tusankye na bintu byatudi nabyo lukalo bwa lelo. Mu bino bintu twi kwakula nshibo ibuwa, mufubo bwa kukwasha kifuko, na kinangu kya kwata bitshibilo bya kwibukisha kalolo. Su atutekye nka penda bwa myanda ya ku mbidi, abileesha’shi tatwi na nkatshinkatshi. Mwanda twi na ingi nkalo ya mukikudi i na muulo ukata.

8. Nkinyi akitutentekyesha mayi a Yesu pabitale kya-kudya kya lelo? (Tala kifwatulo ki kumbangilo)

⁸ Bibaadi Yesu mwakule bwa kya-kudya kyetu kya lelo abitutentekyesha lukalo lwetu lwa kya-kudya kya mu kikudi. Mwanda bambile’shi: “T’anka penda ku bya-kudya kwikeele muntu na muwa nya, nku bishima byooso abituuku mukanwa mwa Yehowa.” (Mat. 4:4) Nyi bwakinyi abitungu tutungunukye na kuteka bwa’shi Yehowa  ayididiile na kwitudiisha mu kikudi pa nsaa ilombane.

9. Mushindo kinyi wikale milwisho yeetu bu “mabaasa”?

⁹ Bwakinyi Yesu bakwile “mabaasa” kunyima akakula dingi “milwisho”? (Mat. 6:12, Kilombeno kipya 2014; Luk. 11:4) Kitenta kya Mulami kya mu 1951 kibambile shi: “Mulwisho wa kukutwa kukookyela mwiya w’Efile Mukulu ngwitutweshe mwibaasa. . . . Efile Mukulu baadya kushimisha myuwa yeetu pa mwanda wa mulwisho. . . . Baadya kukatusha butaale mwatudi na kutshiba kipwano kyooso neetu. . . . Ta kwi kintu kikumbeene kupyana kifulo kyatuleesha pa kumukookyela, na su tubakitshi mulwisho, atukutwa kufuta ebaasa dyetu dya kumufula, mwanda mulwisho nkukutwa kwa kifulo kwadi.”—1 Yo. 5:3.

10. Yehowa e kwitufwila lusa ku bukwashi bwa kinyi, na atupusha naminyi bwa byabya?

¹⁰ Lukalo lwetu lwa kwitufwila lusa efuku dyooso, ndwimeene pa mwanda umune bwashi Efile Mukulu ashimishe milwisho yeetu—ku bukwashi bwa mulambu wa nkuulo wa Yesu. Sunga mbyaudi utushiibwe takudi bipwa bikile ku 2000, abitungu twiwate na muulo nka bu kya buntu kibatuushibwa lelo. “Muulo wa kukuula” myuwa yeetu “ngukile bukopo,” takwi kintu su nkimune kilombeene muntu shi mupwidikye kwitukitshina bwa kwiukuula. (Badika Misambo 49:7-9; 1 Mpyeele 1:18, 19.) Byabya, tatwi bakumbeene kwimika lutumbu lwetu kwi Yehowa bwa kino kya buntu kikata. Akupu, kishima “milwisho yeetu” kushi “milwisho yande,” akitutentekyesha shi muntu ooso a mu kifuko kyetu kya balangwidi e na lukalo lwa’shi bamufwile lusa. Kushi mpaka, Yehowa t’akyebe shi tutale penda lukalo lwetu lwa kwikala bibuwa mu kikudi nya, kadi bwashi tulombashe dingi lwa bangi mpa na lwa baaba abetulwishisha. Misango ibungi, yaaya milwisho ayikalaa tu bilema tupeela tukumbeene kwitupa mushindo wa kuleesha shi twi bafule bakwetu na kukumiina kwibafwila lusa bu bikwete kwitufwila Efile Mukulu lusa.—Kol. 3:13.

11. Bwakinyi bi na muulo bwatudya kufwila bangi lusa?

¹¹ Mbya malwa, mwanda bu byatudi bantu bakutwe kupwidika, ingi nsaa twi kulamina bangi nsungu. (Lv. 19:18) Su atwisamba myanda ibubi yabadi betukitshiine, bangi be kukila ku lupese lwetu na byabya bi kutwesha kwiabuula mu kakongye. Patutadiila yaaya myanda, abileesha  shi t’atwata lusa lw’Efile Mukulu na nkuulo ya Yesu na muulo. Byabya, su atukumiina shi Yehowa etufwile lusa, abitungu’twe namu tufwile bangi lusa. (Mat. 18:35) Yesu baadi mwibileeshe musango umune kunyima kwa kutuusha luteko lwa kileshesho. (Badika Mateo 6:14, 15.) Akupu, su atukumiina shi Yehowa etufwile lusa, abitungu tusuukye kukita milwisho ikata. Lukalo lwetu lwa kusuuka kukita mulwisho alwitutwala ku ungi mwanda wa mu lwalwa luteko.—1 Yo. 3:4, 6.

12, 13. (a) Nkinyi kibaadi kikitshikile Yesu kunyima kwa’ye kubatshishibwa? (b) Bwakinyi taabitungu tutopekye bangi su tubapono mu kutompibwa? (c) Yesu baadi muleeshe kinyi pa kushaala na lulamato mpa na ku lufu?

¹² Kuuka mwanda ubaadi ufikile Yesu kunyima kwa lubatshisho lwaye kwi kwitukwasha bwa kupusha bwakinyi twi kuteka Yehowa shi: “Twetufishanga mu kotompiibwa.” Yesu baadi mutwadibwe na kikudi ky’Efile Mukulu mu kabaaka. Bwakinyi? “Bwabadya kumutompa kwi Kafilefile.” (Mat. 4:1; 6:13) Byabya bi kwitukaanyisha su? Nya, anka su t’atuuku bwakinyi Efile Mukulu batumine Mwan’aye pa nsenga. Bibaadi bwa kutuusha lwaluulo ku butomboshi bwa Adame na Eeva babaadi basubusheene matalwa a kumunana a Efile Mukulu. Bibaadi abitungu mafuku bwa kutuusha lwaluulo. Bu kileshesho, kubaadi kintu kibubi mu mushindo ubaadi Efile Mukulu mupangye muntu? Bibaadi bukopo kwi muntu mupwidikye bwa kukwatshisheena kumunana kw’Efile Mukulu muyiile bibaadi bimusukume yawa “mubi” su? Bantu babaadi na kya kwikala bibuwa su tabe ku bukunkushi bw’Efile Mukulu bu bibaadi abimono Satana? (Kib. 3:4, 5) Bwa kwaluula ku ino nkonko kubaadi akutungu mafuku, kadi, kubaadya kuleesha bipwangwa byooso bi na binangu shi Yehowa kwetu kufuba kalolo na matalwa aaye a kumunana bwa buwa bwabo.

¹³ Yehowa e selele, na ta mukubeene kutompa muntu su ngumune bwa kukita bubi. Anka, Diabulu nyi “Atompanaa.” (Mat. 4:3, Kilombeno kipya 2014) Diabulu e kwitufwishisha bitompwanga. Muntu ooso e kwitwesha mu kutompiibwa sunga kukutwa kwitwesha mwanka. (Badika Jaake 1:13-15.) Kadi bwa Yesu, baadi musumbule musango umune kutompiibwa p’aye kutemuna bifundwe bya mu Eyi dy’Efile Mukulu. Byabya, Yesu baadi mukwatshisheene matalwa a kumunana a Efile Mukulu. Anka Satana t’abaadi mwimikye kumutompa nya. “Baamulekyele mbalo nyaa na ku nguba mufundiibwe.” (Luk. 4:13) Yesu baadi mutungunukye na kukabila Satana baadi akimbi kutshokola lulamato lwaye. Kidishitu baadi mukwatshisheene matalwa a kumunana a Yehowa bwa kuleesha shi muntu mupwidikye e bya kushaala na lulamato sunga mu bitompwanga bibokopo. Kushi mpaka, Satana kwete kutompa balongi ba Kidishitu mpa’nka n’obe.

14. Abitungu tukite kinyi bwa kupela kutwela mu kutompibwa?

¹⁴ Bu biikale mwanda utale matalwa a kumunana a Efile Mukulu ukyautungunuka, Yehowa ki mutadiile Satana bwadya kutumika na ndumbulwilo aaye bwa kwitutompa. Yehowa ta kwitutwesha mu kutompiibwa nya. Mu kwilekeena na byabya, mwitukulupile na akumiina kwitukwasha. Byabya, bu byanemekaa bulungantu bwetu, Yehowa t’etutakulaa pa bukopo bwa kukita bibuwa nya. Abitungu tukite ino myanda ibidi—tushaale bapasukye mu kikudi na kunyingiila mu nteko. Kadi, Yehowa aluulaa nteko yeetu naminyi?

15, 16. (a) Mbitompwanga kinyi abitungu shi tukambile? (b) Twi kutopeka nnanyi su tubapono mu kutompiibwa?

¹⁵ Yehowa kwete kwitupa bukome bwaye bwa kikudi ki selele bwatudya kunyingiila mu kutompiibwa. Yehowa kwete kwitudimusha dingi ku bukwashi bw’ Eyi dyaye na kakongye pabitale myanda ayitungu kusuuka, bu kukisha nsaa ikile  bungi, kutuusha makuta akile bungi sunga bukome bwetu ku myanda na bintu bishi na muulo. Ungi mukwetu na mukashi aaye babetamina bu Espen na Janne be mwiumbo dya ku Mputu, babaadi bafube munda mwa bipwa bibungi bu ba mbala-mashinda mu mbalo ibaadi lukalo na balungudi. Pabaadi patandikwe mwan’abo a kumpala, abaadi bemikye mudimo wa bu mbala-mashinda, na binobino tabadi na bana babidi. Espen akula’shi: “Tukwete kuteka Yehowa misango ibungi bwashi tatuponanga mu kutompiibwa bu byatushi na mushindo wa kwipaana kebungi mu midimo ya teokrasi. Tukwete kuteka Yehowa bwashi etukwashe bwatudya kulama bwin’Efile na katshintshi keetu mu bulungudi.”

¹⁶ Kingi kitompwanga kikata ki kwanka kano kabidi, nyi kutala kwa pornografi. Su tubapono mu kyakya kitopwanga, tatudimbilanga Satana. Bwakinyi? Mwanda Satana na ndumbulwilo aaye ta bakwitukitshisha kintu kyatushabakumiina pa bukopo. Bangi mbafikye mu kupona mu kino kitompwanga p’abo kutadiila binangu byabo ku myanda i bubi. Anka, twi bya kukambila byabya binangu nka bu bakwetu bebungi.—1 Kod. 10:12, 13.

17. (a) Twi kwikala mu kwipusheena na byatutekye shi betupaashe kwi mubi naminyi? (b) Atwikala na muloo kinyi binobino?

¹⁷ Bwatudya kwikala na nshalelo mwipusheene na byatutekye shi Yehowa “etupaashe kwi mubi.” abitungu tupele ‘kwikala ba pano’ pa nsenga ya Satana na kupela “kufula nsenga sunga mbintu bi pa nsenga” Yaaye. (Yo. 15:19; 1 Yo. 2:15-17, Kilombeno kipya 2014) Kukita byabya nta kubofule nya. Atukeekala na muloo ukata apakaluula Yehowa luno luteko p’aye kukatusha Satana na kubutula uno ndumbulwilo aaye! Byabaya, abitungu tutentekyeshe shi, pabaabadi babingye Satana mwiyilu, baukanga shi kipindji kyaye nkipeela. Na nsungu yooso, kwete kukimba muntu ooso aadya kuponesha. Abitungu tutungunukye na kuteka bwashi betupaashe kwadi.—Bif. 12:12, 17.

18. Bwa kupanda ku nfudilo ya ndumbulwilo a Satana, abitungu tuyididiile na kukita kinyi?

¹⁸ Okumiina kwikala mu nsenga ishi na Satana su? Byabya, ididiila na kuteka bwashi Bufumu bw’Efile Mukulu bwikashe eshina dyaaye dya kishila na kikyebe ky’eshimba dyaaye pa nsenga. Ikala otekye misango yooso bwa nkalo yoobe ya mu kikudi na ya ku mbidi. Oolo, ikala na kitshibilo kya kwikala na nshalelo mwipusheene na luteko lwa kileshesho.