NI PAPITAISO oti o Milika * me dua na iVakadinadina i Jiova, dua na ka nona veitusaqati o watina. E kaya, “E tarova noqu lako ena soqoni qai vakatabuya meu cavuta mada ga na yaca ni Kalou. Dau tubu sara ga na dra i watiqu niu cavuta na yaca i Jiova.”

E dredre tale ga vei Milika me vakavulici rau na luvena ena veika me baleti Jiova. “E vakatatabutaki tu ena noqu vale na sokaloutaki Jiova. Au sega ni rawa ni vuli kei rau na luvequ, se meu kauti rau ena soqoni.”

Na ivakaraitaki nei Milika e dusia ni rawa ni vakatovolea noda yalodina na lotu vaKarisito na nodra veitusaqati na lewe ni noda vuvale. E rawa ni tukuni tale ga qori ena tauvimate bibi, ni mate e dua na luvemu se watimu, se vakanadakui Jiova e dua na wekada voleka. Na cava ga e rawa ni vukei keda na lotu vaKarisito meda yalodina tiko ga vei Jiova?

Na cava o na cakava ena ituvaki dredre va qo? E tukuna na yapositolo o Paula: “Me tiko vei kemuni na vosota.” (Iper. 10:36) Na cava mo cakava mo vosota rawa kina?

Dua na sala bibi meda vakaukauataki kina meda vosota oya noda vakararavi vua na Kalou ena masu. Dikeva mada e dua na ivakaraitaki. Dua na ka vakaloloma e yaco ena nona vuvale o Ana ena yakavi ni Moniti. E mate vakasauri na watina, rau veiwatini tu mai ena 30 na yabaki. E kaya, “A sega ni lesu mai vale ni suka na cakacaka, se yabaki 52 ga o koya.”

E vosota vakacava o Ana? E lai cakacaka tale, e dau vakaosoosotaki koya nona cakacaka, e sega ga ni vakaotia na rarawa e vakila tu. E kaya: “Au talaucaka vei Jiova na lomaqu qai cikevi koya me vukei au meu vosota na ituvaki vakaloloma oya.” E rogoca o Jiova nona masu? E vakadeitaka o koya ni rogoca o Jiova. E kaya: “Na vakacegu e rawa ni solia duadua ga na Kalou, e vakacegui au qai vakavuna noqu yalomatua. Macala ga ni na vakaturi watiqu o Jiova.”—Fpai. 4:6, 7.

E yalataka o koya na “Daurogo masu” ni na vakarautaka vei ira na nona dauveiqaravi na ka era gadreva mera yalodina tiko ga vua. (Same 65:2) Vakacava, e uqeti iko na veivakadeitaki qori? Bau vukei iko qori mo vosota?

O Jiova e tokoni ira na nona tamata ena ivavakoso vaKarisito. Kena ivakaraitaki, nira vakacacani vakaca sara na mataveitacini e Cesalonaika, e uqeti ira na lotu vaKarisito qori o Paula: “Moni veivakayaloqaqataki tiko, moni veivakauqeti, me vaka ga oni sa cakava tiko mai.” (1 Ces. 2:14; 5:11) Nira veilomani ra qai veivukei, e rawa kina vei ira na lotu vaKarisito e Cesalonaika mera vosota ni vakatovolei nodra vakabauta. E ivakaraitaki vinaka vei keda nikua na itukutuku ni nodra vosota, e vakaraitaka tale ga na sala meda vosota kina.

Noda veivolekati kei ira ena ivavakoso ena uqeti keda meda cakava na “ka ena vakauqeti keda yadua.” (Roma 14:19) Vakauasivi ena gauna ni rarawa. Levu na ituvaki rarawataki e sotava o Paula, ia e vakaukauataki koya o Jiova me vosota. Eso na gauna e vakayaloqaqataki Paula na Kalou ni vakayagataki ira na tacina. Kena ivakaraitaki, ni kidavaki ira yadua ena ivavakoso mai Kolosa o Paula, e tukuna me baleti ira: “Eratou dau vukei au, eratou dau vakacegui au tale ga.” (Kolo. 4:10, 11) Na nodra lomani Paula e uqeti ira mera vakacegui koya ra qai vakaukauataki koya ena gauna sara ga e gadreva kina. De dua era vakaukauataki iko tale ga, ra qai tokoni iko o ira ena nomu ivavakoso.

Dua tale na sala e tokoni keda kina na Kalou, oya ni vakayagataki ira na qase ni ivavakoso. O ira na tagane matua vakayalo qo era “vaka na ivunivuni mai na cagi, na ivakaruru mai na uca bi, ena vaka na uciwai ena vanua dravuisiga, ena vaka na yaloyalo ni vatu levu ena vanua sigasiga.” (Aisea 32:2) E veivakabulabulataki dina qori! Vakacava, o sa vakayagataka vinaka tiko na isolisoli vakayalololoma qo? Nodra veiuqeti kei na nodra veitokoni na qase ena vukei iko mo vosota.

Era sega ga ni cakamana o ira na qase. Era ivalavala ca ra qai “malumalumu ga me vakataki kemuni.” (Caka. 14:15) Ia e levu na ka e rawati nira masu ena vukuda. (Jeme. 5:14, 15) E dua na tacida tagane mai Itali a vosota toka ena dua na gauna dede na revurevu ni mate ni masela (muscular dystrophy) e tukuna: “Na nodra loloma kei na nodra dau sikovi au na qase ni ivavakoso e vukei au meu vosota.” Vakacava, e yaga vei iko na isolisoli vakayalololoma i Jiova, oya o ira na qase ni ivavakoso?

Eso tale na ka eda rawa ni cakava meda vosota kina. Dua oya, me dei tiko ga noda ituvatuva vakayalo. Dikeva mada na ka e sotava o Joni se qai yabaki 39. E laurai vua e dua na mataqali kenisa. E tukuna: “Mosi dina vei au niu se gone ga.” Ena gauna qo se yabaki tolu na luvena tagane. E kaya o Joni: “E sega ni qaravi luvei keirau ga o watiqu, e qaravi au tale ga, e vukei au meu lai raici vakavuniwai.” Na veiqaravi vakavuniwai e caka vei Joni e dau vakavuna me wawale qai lomalomaca. Sega ni o koya ga qori. E tauvimate bibi tale ga o tamana qai vinakati me dua e qaravi koya.

Eratou vosota vakacava o Joni kei na nona vuvale? E kaya, “Dina niu wawale, au raica me dei tu ga neitou ituvatuva vakayalo. Keitou gole ena soqoni kece, lai vunau ena veimacawa, keitou sokalou wasoma tale ga vakavuvale se mani dredre vakacava na ituvaki.” E raica o Joni ni sala me vosota kina e dua na ituvaki dredre oya me kaukaua tiko ga vakayalo. Na ivakasala cava e rawa ni vukei ira kina na vakila tiko na ituvaki dredre? E kaya: “O na kidacala ena gauna o kila kina ni o tauvimate. Ia ena seavu yani na lomaleqa, o na qai vakila na kaukaua kei na loloma i Jiova. Ena vakaukauataki iko o Jiova me vaka ga e cakava vei au.”

Sega ni vakatitiqataki nida na vosota na veika dredre cava ga ena veitokoni ni Kalou, se ituvaki ena gauna qo kei na veigauna se bera mai. Meda vakararavi vei Jiova ena masu, meda volekati ira na tacida ena ivavakoso, meda dau ciqoma nodra veitokoni na qase ni ivavakoso, da qai dei ena noda ituvatuva vakayalo. Noda cakava qori, eda muria kina na vosa i Paula: “Me tiko vei kemuni na vosota.”