NỌ ANITA * ọ họ-ame zihe ruọ omọvo Isẹri Jihova no, ọzae riẹ ọ tẹ jẹ wọso iẹe gaga. Anita ọ ta nọ: “Ọ whaha omẹ nọ me re kpohọ iwuhrẹ hẹ, yọ mẹ rẹ jọ uwou na se odẹ Ọghẹnẹ hẹ. O rẹ kpare ofu riẹ nọ o te yo nọ me se odẹ na, Jihova.”

Oware ofa nọ o jọ ẹbẹbẹ ologbo kẹ Anita họ, re o wuhrẹ emọ riẹ kpahe Jihova. Ọ ta nọ: “A jọ uwou obọmẹ fi awhaha họ kpahe egagọ Jihova. Mẹ sae jọ iraro ọzae mẹ wuhrẹ emọ mẹ hayo whae kpohọ ewuhrẹ hẹ.”

Iku Anita na i dhesẹ nọ odawọ ulogbo o rrọ kẹ Oleleikristi nọ ahwo uwou obọriẹ a tẹ be wọso iẹe. Epọvo na o rrọ re nọ Oleleikristi o te wo okpẹyao, nọ ọmọ, ọzae, hayo aye riẹ o te whu, hayo nọ ohwo jọ evaọ uviuwou riẹ o te kiukeku Jihova. Nọ o rrọ ere na, eme o rẹ sai fiobọhọ kẹ Oleleikristi ruabọhọ egagọ Jihova ghelọ ebẹbẹ itieye?

Nọ whọ tẹ rẹriẹ ovao dhe edawọ itieye, eme who ti ru? Pọl ukọ na ọ ta nọ: “O gwọlọ nọ wha re thihakọ.” (Hib. 10:36) Rekọ eme ọ rẹ sai fiobọhọ kẹ owhẹ thihakọ?

Edhere jọ nọ ma re ro wo ẹgba nọ ma re ro thihakọ edawọ họ olẹ nọ ma rẹ lẹ se Ọghẹnẹ. Roro kpahe oriruo nana. Evaọ uvo Ẹdọvo-Oka jọ, oware okpẹtu jọ o via kẹ uviuwou Ana. Ọzae riẹ nọ a gbẹ jọ orọo te ikpe 30 no o whu ku ei idudhe. Ana ọ ta nọ: “O no uwou kpiruo rekọ o gbe zihe ze viere he, yọ ikpe 52 ọvo ọ jọ.”

Eme o fiobọhọ kẹ Ana thihakọ? O mu iruo họ, yọ onana u fiobọhọ kẹe keme o jọ iruo nọ e rẹ joma rehọ iroro ohwo kpobi. O make jọ ere na, uwhu ọzae riẹ na o gbẹ jẹ kẹe uye. Ọ ta nọ: “Mẹ lẹ se Jihova gaga jẹ yare iẹe nọ o fiobọhọ kẹ omẹ thihakọ uwhu ọzae mẹ na.” Kọ Jihova ọ kuyo elẹ riẹ? U mu rie ẹro nọ o ru ere. Ọ ta nọ: “Udhedhẹ nọ Ọghẹnẹ ọvo ọ rẹ kẹ na u ru udu dhẹ omẹ, je ru nọ iroro mẹ i ro totọ. Me wo avro ọvo ho sọ Jihova ọ te kpare ọzae mẹ ze evaọ oke ẹkparomatha na.”—Fil. 4:6, 7.

“Ọnọ o re yo elẹ” na ọ ya eyaa nọ ọ te kẹ idibo riẹ oware nọ o gwọlọ kpobi re a sai kru ẹrọwọ rai. (Ol. 65:2) Kọ u gbe mu owhẹ ẹro nọ eyaa nana e rẹ sae bọ ẹrọwo ohwo ga? Kọ whọ gbẹ jọ onana ruẹ ẹjiroro nọ whẹ omara whọ sai ro thihakọ?

Jihova ọ rọ ukoko Ileleikristi na fiobọhọ kẹ idibo riẹ no. Wọhọ oriruo, okenọ ọwọsuọ ọgaga o te ukoko obọ Tẹsalonika, Pọl ukọ na ọ ta kẹ Ileleikristi nọ e jọ obei nọ: “Wha gbẹ hae tuduhọ ohwohwo awọ jẹ hae bọ ohwohwo ga, nwane wọhọ epanọ wha bi ru na.” (1 Tẹs. 2:14; 5:11) Omakugbe gbe obọ nọ a je fihọ kẹ ohwohwo u ru nọ Ileleikristi obọ Tẹsalonika na a sai ro fi edawọ nọ i te rai kparobọ. Ikuigbe ithihakọ rai e rrọ oriruo kẹ omai nẹnẹ, i bi je ru omai riẹ oware jọ nọ o rẹ sai fiobọhọ kẹ omai thihakọ edawọ.

Usu okpekpe nọ ma re wo kugbe inievo ukoko na u re fiobọhọ kẹ omai ru “eware nọ e rẹ bọ ohwohwo ga.” (Rom 14:19) Onana o roja gaga evaọ etoke ẹbẹbẹ. Ikpokpoma buobu i te Pọl omariẹ, yọ Jihova ọ kẹ riẹ ẹgba nọ o ro thihakọ rai. U wo okejọ nọ Ọghẹnẹ ọ jẹ hae tubẹ rehọ inievo na tuduhọ Pọl awọ gaga. Wọhọ oriruo, nọ Pọl o vi uyere se inievo jọ nọ e jọ ukoko obọ Kọlọsi, ọ ta kpahe ae nọ: “A rrọ omosasọ ulogbo kẹ omẹ.” (Kọl. 4:10, 11) Uyoyou nọ a wo kẹ Pọl o wọ rai sasa iẹe oma jẹ tuduhọ iẹe awọ evaọ okenọ ebẹbẹ i tei. Ẹsejọhọ u wo okejọ nọ inievo nọ e rrọ ukoko ra a tuduhọ owhẹ awọ je fiobọhọ kẹ owhẹ no re.

Ekpako ukoko na yọ ọruẹrẹfihotọ ọfa nọ Ọghẹnẹ ọ be rọ jọ ukoko Ileleikristi na kẹ omai uketha. Ezae nana nọ i wo ẹrọwo na a “wọhọ oria nọ u sioma no ofou, oria nọ [u dhere] no ẹkporo, wọhọ oko-ame eva oria oyaya, wọhọ edhedhẹ utho ulogbo nọ u ruru otọ oyaya.” (Aiz. 32:2) Eme nana e kẹ uduotahawọ kẹhẹ! Kọ whọ nyabru ekpako na kẹ obufihọ no ẹdẹjọ? Uduotahawọ gbe obufihọ rai o rẹ sae kẹ owhẹ ẹgba nọ who re ro thihakọ.

Ekpako na yọ ahwo nọ a re ru iruo igbunu hu. Ahwo-akpọ nọ “a gba ha wọhọ [omai]” a rrọ. (Iruẹru 14:15) Ghele na, olẹ nọ a rẹ lẹ fiki mai u re fiobọhọ gaga. (Jem. 5:14, 15) Oniọvo-ọmọzae jọ evaọ obọ Italy nọ ẹyao nọ ọ rẹ raha iriẹ-oma ohwo nọ a re se muscular dystrophy ọ kẹ uye ikpe buobu ọ ta nọ: “Uyoyou inievo na gbe ẹnyaze nọ a jẹ hae nyaze te ruẹ omẹ ẹsikpobi u fiobọhọ kẹ omẹ thihakọ.” Whọ sai wo erere ziezi no uduotahawọ ekpako ukoko na ze.

Eware efa e riẹ nọ ma re ru nọ i re fiobọhọ kẹ omai thihakọ. Ojọ họ, iruẹru egagọ Jihova nọ ma rẹ jọ wobọ kẹse kẹse. Roro kpahe oriruo John, ikpe 39 ọvo ọ jọ okenọ edọkita ọ vuẹe nọ o wo ẹyao-ọta oghẹrẹsa jọ. John ọ ta nọ: “O jọ omẹ oma nọ akpọ o kienyẹ omẹ keme oke yena mẹ gbẹ maha gaga.” Yọ ikpe esa ọvo ọmọ John ọ jọ oke oyena. John ọ ta re nọ: “Ukpenọ aye mẹ ọ rẹrote ọmọ mai na ọvo, ọ tẹ jẹ rẹrote omẹ re jẹ hae wọ omẹ kpohọ ẹsipito.” Imu nọ John ọ jẹ rehọ u ru nọ oma o jẹ hae rọ lọhọ iẹe, je ru ei gwọlọ geli. U no etẹe kuhọ họ. Ọsẹ John o te muhọ ẹmọ gaga, onọ o gwọlọ nọ ahwo uviuwou riẹ a rẹ rẹrotei.

Ẹvẹ John avọ uviuwou riẹ a ro thihakọ ẹbẹbẹ ologbo nana? John ọ ta nọ: “Ghelọ oma nọ o jẹ hae rrọ omẹ, mẹ daoma ruẹ nọ ahwo uviuwou mẹ a re ru eware nọ i wobọ kugbe egagọ Ọghẹnẹ ẹsikpobi. Ma jẹ hai kpohọ iwuhrẹ ukoko na kpobi, kpohọ usiuwoma koka koka, je ru egagọ uviuwou mai koka koka makọ okenọ o rrọ bẹbẹ.” John ọ ruẹ nọ oware nọ o rẹ mai fiobọhọ kẹ ohwo thihakọ ẹbẹbẹ họ, usu riẹ kugbe Jihova nọ o re ru ga ẹsikpobi. Kọ John o wo ohrẹ jọ kẹ ahwo nọ ẹbẹbẹ ọ rrọ oma? John ọ ta nọ: “Uduama nọ ohwo o re wo evaọ oke ọsosuọ na o tẹ rọ ẹmẹrera kpotọ no, uyoyou Jihova gbe ẹgba nọ ọ rẹ kẹ e vẹ rehọ ẹta iroro elọhoma kpobi. Jihova ọ rẹ sae kẹ owhẹ ẹgba wọhọ epanọ ọ kẹ omẹ na.”

Avro ọ riẹ hẹ, avọ obufihọ Ọghẹnẹ ma rẹ sai thihakọ ebẹbẹ ilogbo enẹna hayo evaọ obaro. Joma hae dhesẹ nọ ma rẹroso Jihova evaọ olẹ, daoma wo usu okpekpe kugbe ibe Ileleikristi mai, gwọlọ obufihọ ekpako ukoko na, je wobọ ẹsikpobi evaọ iruẹru ukoko na. Ma te bi ru eware nana, kiyọ ma bi ru lele ẹme Pọl na inọ: “O gwọlọ nọ wha re thihakọ.”