BO ANITA * haneba kalile kuswalisana ni lipaki za Jehova, bo muunaa bona nebanyemile hahulu. Bo muunaa bona nebalikile kubapalelwisa kuyanga kwa mikopano mi nebabalaezi kuli basike babulelanga libizo la Mulimu. Bo Anita hane bapundanga libizo la Jehova, bo muunaa bona nebanyemanga hahulu.

Kutuha fo, bo muunaa bo Anita nebasalati kuli bo Anita balute bana babona ka za Jehova kamba kuyanga ni bona kwa mikopano. Nto yeo nesi yebunolo ku bo Anita kakuli nebanani kutusa bana babona kuziba za Mulimu bo muunaa bona inze basazibi.

Sina monekubezi ku bo Anita, mutu yomuñwi mwa lubasi lwamina mwendi wakona kulika kumipalelwisa kusebeleza Jehova. Kamba mwendi kunani muinelo omuñwi otaata omutalimana ni ona. Mwendi semutandile nako yetelele inze mukula. Mwendi mushwezwi ki mwanaa mina kamba bakumina. Kamba mwendi mutu yomuñwi wa mwa lubasi lwamina yemulata hahulu utuhezi kusebeleza Jehova. Ki lika mañi zemukona kueza kuli muzwelepili kusepahala ku Jehova hamuli mwa miinelo yecwalo?

Muapositola Paulusi naabulezi kuli: “Mu tokwa ku ba ni buitiiso.” (Maheb. 10:36) Kacwalo ki nto mañi yekona kumitusa kuitiisa?

Hamutalimana ni matata, muhupule kuli mutokwa kuitinga ku Jehova kuli amituse kuitiisa. Mulapele kuyena kuli amituse. Zeo ki zona zene baezize bo Ana, bo muunaa bona hane batimezi kasipundumukela. Nebatandile lilimo ze 30 mwa linyalo. Bo Ana babulela kuli: “Bo muunaa ka nebasika kuta kwa ndu kuzwa kwa musebezi. Nebatimezi inze banani feela lilimo ze 52.”

Nihaike kuli bo Ana nebapatehisizwe ki musebezi wa bona, nebazwezipili kuikutwa bumaswe. Ki lika mañi zene baezize? Babulela kuli: “Nenitaluselize Jehova mone niikutwela ni kumukupa kuli anituse.” Bo Ana baziba kuli Jehova naabatusize, bakeñisa kuli hamulaho feela wa kulapela, nebaikutwile kuomba-ombiwa. Mi babulela kuli: “Ninani buikolwiso bwa kuli Jehova ukakutiseza bo muunaa ka kwa bupilo ka nako ya zuho.”—Mafil. 4:6, 7.

Jehova usepisa batanga hae kuli ukautwa litapelo zabona. (Samu 65:2) Mi ukabafa lika kaufela zebatokwa kuli bazwelepili kumusebeleza. Jehova ukamitusa kuzwelapili kusepahala niha muli mwa miinelo yetaata.

Kunani nzila yeñwi hape yeo Jehova alutusa ka yona kuli luzwelepili kuitiisa. Ulufile mizwale ni likaizeli mwa puteho. Lwakona kuituta kwa mizwale ba kwa Tesalonika bane batusani ka nako yene banyandiswa hasituhu. Ka nako yeo, nebatokwa hahulu kuzwelapili kususuezana. (1 Mates. 2:14; 5:11) Nebatusize mizwale ni likaizeli babona kuzwelapili kusepahala ku Jehova ka kukopananga hamoho ni kuswalisana hahulu sina balikani. Ki lika mañi zelukona kueza kuli luzwelepili kusepahala sina mizwale ba kwa Tesalonika?

Lutokwa kufumana balikani mwa puteho ni kususuezana, sihulu ka linako zetaata. (Maro. 14:19) Muapositola Paulusi naanyandile bakeñisa nyandiso ni matata amañwi, kono Jehova naamufile maata akuitiisa. Ka mutala, Jehova naasusuelize Paulusi kakuitusisa mizwale ni likaizeli. Muapositola yo, naabulezi ka za balikani bahae kuli: “Ba ni omba-ombile hahulu.” (Makolo. 4:10, 11) Mizwale bao nebalata Paulusi. Kacwalo, hanaatokwa tuso, neba muomba-ombile ni kumususueza. Mwendi mwahupula nako yeñwi yeo mizwale ni likaizeli mwa puteho yamina nebabulezi kamba kueza nto yeñwi yene misusuelize.

Jehova hape umifile baana-bahulu mwa puteho. Baana bao bakona kumisusueza ni kumifa kelezo yende kakuitusisa Bibele. Baswana “sina mukunda ha ku fuka moya, ni sina sisabelo ha ku taha liñungwa; . . . sina linuka ze isa mezi mwa naha ye omile, ni sina muluti wa licwe le lituna mwa naha ye shukezwi mezi.” (Isa. 32:2) Kuziba kuli mizwale bao baitukiselize kulutusa kwaluomba-omba. Kacwalo, hamutalimana ni miinelo yetaata, mukupe tuso kwa baana-bahulu. Bakona kumitusa kuzwelapili kusebeleza Jehova.

Ki niti kuli baana-bahulu habakoni kutatulula matata amina kaufela. Mi habasika petahala sina mina. (Lik. 14:15) Kono mwakona kuikutwa hande hamutaluseza muuna-muhulu butata bwamina ni kumuutwa inze alapela kuli Jehova amituse. (Jak. 5:14, 15) Ka mutala, baana-bahulu kwa Italy nebatusize muzwale yomuñwi yakulile butuku bobutuna ka lilimo zeñata. Muzwale yo naabulezi kuli: “Lilato lene banibonisize mizwale hamohocwalo ni kunipotelanga kamita, linitusize kuzwelapili kuitiisa.” Haiba mutalimana ni butata bobuñwi, Jehova ubata kuli mukupe tuso kwa baana-bahulu.

Kunani lika zeñwi zelutokwa kueza kuli luzwelepili kuitiisa. Yeñwi ya lika zeo ki kuisa pilu yaluna kwa kusebeleza Jehova. Ki mona mone baezelize bo John ona cwalo. Hane banani lilimo ze 39, nebafumanehile ni butuku bwa kansa yesazibahali hahulu. Nebaikutwile bumai kukula butuku bobutuna cwalo, bakeñisa kuli nebasali babanca. Mi nebabilaela bakeñisa bo musalaa bona ni mwanaa bona wa mushimani yanaanani feela lilimo zetaalu. Babulela kuli: “Bo musalaa ka ki bona bane bababalela mwanaa luna mi hape ki bona bane banibabalela ni kuniisanga kwa sipatela kuli ni yo alafiwa.” Bakeñisa likalafo zenebafiwa, ne baikutwile kukatala hahulu mi nebatahezwi ki butuku bwa mwa mba. Kono hape nekunani matata amañwi. Bo John nebataluselizwe kuli bo ndataa bona nebatuha bashwa, kacwalo nebatokwa mutu yanaaka bababalela.

Ki nto mañi yenetusize bo John ni lubasi lwabona kutiyela miinelo yetaata yeo? Nihaike kuli hañata bo John nebaikutwanga kukatala, nebabonanga teñi kuli lubasi lwabona lwazwelapili kusebeleza Jehova. Babulela kuli: “Nelufumanehanga kwa mikopano kaufelaa yona, sunda ni sunda nelukutazanga, mi kamita nelubanga ni nako ya kulapela sina lubasi niha nekubanga taata kueza cwalo.” Bo John nebalemuhile kuli ki kwabutokwa hahulu kuzwelapili kutiisa silikani sabona ni Jehova. Nihaike kuli kwa makalelo nebakomokile hahulu mi nebabilaelanga, hamulaho wa nako baikutwa kulukuluha. Nebaziba kuli Jehova wabalata ni kuli naabafile maata ene batokwa. Jehova wakona kumitusa ka nzila yeswana haiba kunani nto yemibilaeza kamba kumisabisa. Bo John babulela kuli: “Jehova wakona kumitiisa sina mwa nitiiselize.”

Haiba mutalimana ni miinelo yetaata, muhupule manzwi a Paulusi ali: “Mu tokwa ku ba ni buitiiso.” Muitinge ku Jehova ka kulapelanga kuyena. Muzwelepili kuba bukaufi ni mizwale bamina mwa puteho, mukupe tuso kwa baana-bahulu, mi muzwelepili kuisa pilu kwa kusebeleza Jehova. Uka mitusa kuitiisa mwa matata emutalimana ni ona cwale mane ni mwa matata emuka kutalimana ni ona kwapili.