OMU Anita * vamumbapachishile nakupwa Chinjiho chaYehova, lunga lyenyi amufumbukilile. Anita ambile ngwenyi: “Angukanyishilenga kuya nakukunguluka nakungukanyisa kuvuluka numba vene lijina lyaKalunga. Kuvuluka lijina lyaKalunga chasulakanyishilenga lunga lyami.”

Ukalu ukwavo apwile nawo Anita shina wakunangula vana venyi vyaYehova. Ambile ngwenyi: “Angukanyishile nakulemesa Yehova hembo lyami. Kangwahashilenga kulinangula hatoma navana vami chipwe vene kuya navo nakukungulukako.”

Ngana muze unasolola mujimbu waAnita, kausoko kenu nahase kumilingisa muhone kuzachila Yehova. Pamo munahase kupwa muukalu weka wakufwana nge kuviza musongo chipwe kufwisa mwanenu, chipwe muka-mahyenu. Nyi pamo kausoko kenu naseze Yehova. Nge muli muukalu kanou, kaha vyuma muka vinahase kumikafwa mupwenga lika vakushishika kuli Yehova?

Vyuma muka mwatela kulinga nge muli muvyeseko vyangana? Kaposetolo Paulu ambile ngwenyi: “Mwatela kukakachila.” (Hepe. 10:36) Uno vyuma muka vinahase kumikafwa mukakachile?

Chuma chachinene chinahase kutukafwa tupwenga vakuzama nakukakachila muvyeseko shina kupendamina hali Kalunga. Talenu hachakutalilaho chimwe. Likumbi lyaMande namusana, mutanga yaAna mwasolokele ukalu. Lunga lyenyi uze apwile nenyi muulo hamyaka 30 afwile mukukasumuka. Ana ambile ngwenyi, “Omu lunga lyami uze apwile namyaka yakusemuka 52 ayile kumilimo, kakindulukile kwimboko.”

Uno Ana alingile ngachilihi? Aputukile cheka kuzata milimo, kahechi chamukafwile chikuma mwomwo milimo yenyi yasakiwile kuhakako chikuma mangana, olozenyi echi kachakumishile ushona apwile nakwivwako. Ambile ngwenyi: “Ngwalombele kuli Yehova namuchima wami wosena nakumulembelela angukafwe.” Kutala Yehova akumbulwile kulomba chenyi tahi? Yivene ngwenyi mukiko vene. Ambile ngwenyi: “Kuunda chakufuma kuli Kalunga changuvendejekele. Ngwafwelela chikupu ngwami Yehova mwakasangula lunga lyami.”—Fwili. 4:6, 7.

“Muka-kwivwilila kukulomba” ashika kuhana vangamba jenyi kala vyuma navasaka mangana vatwaleho lika kushishika kuli ikiye. (Samu 65:2) Kutala chuma kana kachazamishile lufwelelo lwenuko nakumilingisa mangana nayenu mupwenga vakumika tahi? Yehova mwamikafwa mupwenga vakushishika namulwola lwalukalu.

Yehova nakafwenga vatu jenyi kuhichila muchikungulwilo chavaka-Kulishitu. Chakutalilaho, omu vaka-Kulishitu vamuchikungulwilo chamuTesolonyika vahichile muluyanjisa, Paulu avalwezele ngwenyi: “Likolezezenunga navakwenu, nakulitunganga nawa navakwenu nganomu vene muli nakulinga.” (Teso. 1, 2:14; 5:11) Kulikwatasana nakulikafwa chakafwile vaka-Kulishitu vamuTesolonyika vahase kufungulula cheseko kana. Mujimbu wakukakachila chavo watuhana chakutalilaho chamwaza makumbi ano, kaha nawa wasolola vyuma vize vinahase kutukafwa mangana tukakachile.

Kulikata hamwe navandumbwetu muchikungulwilo chinahase kutukafwa ‘tulitunge navakwetu.’ (Loma 14:19) Echi chapwa chachilemu chikumanyi mulwola lwaluyando. Paulu naikiye ahichile muluyando lwaluvulu, kaha Yehova amukafwile omike. Hajola jimwe, Kalunga akolezezelenga Paulu kuhichila muli vakwavo vaka-kwitava. Chakutalilaho, omu Paulu atumine mitende kuli vandumbwenyi vamuchikungulwilo chamuKolose, ahanjikile kupandama kuli vakiko ngwenyi: “Vanapu vaka-kunguvendejeka.” (Kolo. 4:10, 11) Enga, kuzanga Paulu chavalingishile vamuvendejeke nakumujikijisa omu apwile muukalu. Pamo nayenu vamikolezezaho lyehi nakumikafwa kuli vandumbwenu muchikungulwilo.

Kalunga atuhana vakulwane vamuchikungulwilo mangana vatukafwe. Ava malunga vakuhya kushipilitu vapwa “nge chihela chakuswama peho yanyamanganda, nge uswamo wakuswama vula yamishilinjinji, nge vana vatulwiji mulifuchi lyakuzeneka meya, nge muvule walilolwa lyalinene mulifuchi lyamusana wakaza.” (Isa. 32:2) Mazu kana atukolezeza mwomwo ava vandumbwetu vapwa vakulizanga kutukafwa. Kutala muli nakulwezanga vakulwane ukalu wenu mangana vamikafwe tahi? Vakulwane vanahase kumikafwa mutwaleho lika kuzachila Yehova.

Tachikizenu ngwenu vakulwane kaveshi kuhasa kukumisa ukalu wenu wosenako. Vapwa vatu vakuhona kukupuka mwosena ngana ‘mwayetu.’ (Vili. 14:15) Nge natuya kuli mukulwane atulombeleko kuli Yehova haukalu tuli nawo, kaha tunahase kwivwa hwo kumuchima. (Yako. 5:14, 15) Ndumbwetu umwe walunga wamuItaly uze nalipiki hamyaka yayivulu namusongo uze wamutekelekele nakumuzeyesa mishisa ambile ngwenyi: “Zangi yavandumbwami nakungutambukila kuswakumwe vinangukafwe ngukakachile.” Kutala munahase kunganyala chikuma hakupwa navakulwane vaze atuhana Yehova tahi?

Kuli nawa chuma cheka chize twatela kulinga mangana tukakachile. Chuma kana shina kuhaka muchima kukuzachila Yehova. Talenu chakutalilaho chaJohn, wamyaka yakusemuka 39 uze vawanyine namusongo wacancer. Ambile ngwenyi: “Ngwevwile kupihya chikuma namusongo kana mwomwo ngwapwile nguchili ngukanyike.” Halwola kana, John apwile namwana walunga wamyaka yakusemuka yitatu. John ambile ngwenyi: “Puwami apwile namulimo wakuzakama mwanetu wamundende, nayami, nakungutwalanga kuchipatela.” Vamuhanyine vitumbo vyangolo chikuma, ngocho vyamuzeyesele nakumuvijisa nakumulingisa evwenganga kuzemba kumuchima. Kwapwile nawa ukalu ukwavo. Ise yaJohn avijile chikuma kaha asakiwile mutu wakumuzakama.

Vyuma muka vyakafwile John natanga jenyi mulwola kanelu lwalukalu? John ambile ngwenyi: “Numba tuhu musongo kana wanguzeyesele chikuma, oloze ngwakafwilenga tanga yami mangana yihake muchima kukuzachila Yehova. Twayilenga kukukunguluka lwola lwosena, chalumingo hichalumingo twayilenga mumulimo wamuwande, kaha nawa twapwilenga nachilongesa chakulemesa Kalunga mwatanga numba tuhu chapwile chachikalu kulinga ngocho.” Chikupu vene, John amwene ngwenyi kulama usoko wenyi naYehova kupwa wakukola chapwa chachilemu. Numba tuhu hakavanga alizakaminyine chikuma, oloze nakushimbula chiku muchima wenyi waunjile. Atachikijile ngwenyi Yehova amuzanga nakumukolezeza. Nayenu Yehova nahase kumikafwa nge munalizakamina chipwe munakwivwa woma. John ambile ngwenyi, “Yehova nahase kumijikijisa nganomu najikijisa yami.”

Nge muli nakuyanda, kaha anukenu mazu aPaulu aze ambile ngwenyi “Mwatela kukakachila.” Pendaminenunga hali Yehova kuhichila mukulomba. Pandamenunga kuli vandumbwetu muchikungulwilo nakulweza vakulwane vamikafwe mangana mutwaleho lika kuzachila Yehova. Yehova mwamikafwa mukala ukalu muli nakumona oholyapwa chipwe uze nawiza kulutwe.