Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Bushe Tulingile Ukupepa Kuli Yesu Kristu?

Awe iyo. Yesu umwine atusambilishe ukuti tufwile ukulapepa kuli Yehova, pantu na o alepepa kuli Yehova Wishi. (Mat. 6:6-9; Yoh. 11:41; 16:23) Abasambi ba kwa Yesu abakubalilapo nabo balepepa kuli Lesa, te kuli Yesu iyo. (Imil. 4:24, 30; Kol. 1:3)—1/1, ibula 14.

Finshi tufwile ukulacita cila mwaka pa kupekanya ukwibukisha imfwa ya kwa Yesu?

Cimo ico tufwile ukucita kulabelenga Amalembo ya mu nshita ya Cibukisho. Na kabili tufwile ukubombesha mu mulimo wa kubila imbila nsuma, e lyo no kulatontonkanya sana pa fintu ifisuma ifyo Lesa atulaya.—1/15, amabula 14-16.

Finshi fyacitike ku bafungwa abena Egupti babili abo Yosefe alondolwelele ifiloto balotele?

Yosefe aebele uwalepeela Farao ifya kunwa ukuti, imfumu yali no ku mubwesesha pa cifulo cakwe. Lelo aebele uwalepanga umukate ukuti Farao akamufumya mu cifungo no kumuputulako umutwe, kabili akamukulika na ku cimuti. Ifi Yosefe aebele aba bafungwa fyalicitike. (Ukute. 40:1-22)—2/1, amabula 12-14.

Ca bupe nshi icisuma ico bamunyinefwe ku Japan bapokelele?

Bamunyinefwe bapokelele akatabo ke buuku lya kwa Mateo ilyapilibwilwe ukufuma muli Baibolo ya Amalembo ya Calo Cipya iya mu ciNgeleshi. Bamunyinefwe nga baleshimikila balapeela abantu aka katabo. Nangu ca kuti abantu abengi mu Japan tabaishiba ifyaba muli Baibolo, balitemwa sana ukubelenga aka katabo.—2/15, ibula 3.

Finshi fyalengele ukuti imbila nsuma isalangane mu nshita ya batumwa?

Ifunde lya bena Roma ilya Pax Romana lyalengele ukuti mu ncende shonse isho abena Roma baleteeka mube umutende. Ilyo abasambi bakubalilapo balebila imbila nsuma, balepita mu misebo iisuma iyo abena Roma bapangile. Abantu abengi balelanda iciGriki, ne ci calyafwile abasambi ukubila imbila nsuma na ku baYuda abaleikala mu fifulo abena Roma baleteeka. Kabili abasambi balebomfya ifunde lya bena Roma ku kucingilila imbila nsuma.—2/15, amabula 20-23.

Cinshi Abena Kristu ba cine bashisefeshako Isita?

Yesu aebele abasambi bakwe ukuti baleibukisha imfwa yakwe, te kubuuka kwakwe iyo. (Luka 22:19, 20)—3/1, ibula 8.

Mulandu nshi muno nshiku tatulandila sana mu mpapulo shesu ukuti amalyashi yamo ayaba mu Baibolo yalemininako ifintu fimo ifikacitika ku ntanshi?

Baibolo ilanda ukuti abantu bamo abo amalembo yalandapo baleimininako ifintu fimo ifyacindama. Ica kumwenako caba muli Abena Galatia 4:21-31. Lelo tatufwile ukulamona ukuti amalyashi yonse ayaba mu Baibolo yalemininako fimo ifya ku ntanshi. Kanshi ngatwabelenga pa bantu bamo nelyo pa fyacitike kale, tufwile fye ukutontonkanya pa fyo twingasambililako. (Rom. 15:4)—3/15, amabula 17-18.

Mulandu nshi icipaapatu ca macinda ico basangile mu Egupti cacindamina?

Mu myaka ya muli ba 1900, balisangile icipaapaatu ca macinda apalembwa amashiwi yaba mu fikomo fimo ifye buuku lya kwa Yohane. Ici cipaapaatu calembelwe nalimo imyaka fye iinono ukutula apo Yohane apwishishe ukulemba ibuuku lyakwe. Ifyalembwa pali ici cipaapaatu, e fyalembwa na mwi buuku lya mu Baibolo ilya kwa Yohane. Ubu bushininkisho bwa kuti ifyo tubelenga muli Baibolo fya cine.—4/1, amabula 10-11.

Cinshi cawamina ukutamfya abashilapila mu cilonganino?

Baibolo e yalanda ukuti abashilapila bafwile ukutamfiwa mu cilonganino, kabili yalilanda no busuma bwabamo. (1 Kor. 5:11-13) Ukutamfya uushilapila kulalenga ishina lya kwa Lesa ukucindikwa, kulalenga icilonganino ukutwalilila ukuba icasanguluka, kulalenga no muntu uucitile ulubembu ukulapila. —4/15, amabula 29-30.