Eski ou’n lir byen bann dernyen nimero Latour Veyer? Be, vwar si ou kapab reponn sa bann kestyon swivan:

Ki nou kapab fer pour prepar nou pour komemor lanmor Zezi tou le-z-an?

En keksoz ki nou kapab fer i swiv progranm lektir Labib ki annan pour fer avek sa levennman. Nou osi kapab fer zefor pour fer plis dan predikasyon pandan sa letan e dan lapriyer nou kapab mazin lo sa zoli lespwar ki Bondye in donn nou.—15/1-SC paz 14-16.

Ki sirpriz bann frer ek ser Zapon ti gannyen?

Zot ti ganny en nouvo liv ki annan pour tit Labib—Levanzil dapre Matye ki’n ganny enprimen dapre New World Translation. I pe ganny ofer dan predikasyon e bokou dimoun ki pa konn Labib byen in aksepte sa liv.—15/2-SC paz 3.

Ki bann sityasyon ki ti ede propaz bon nouvel dan premye syek?

Pax Romana ti fer ki i ti annan stabilite ek lape. Bann disip dan premye syek ti kapab vwayaze lo bann semen ki ti konekte avek apepre tou provens. Langaz Grek ki ti ganny servi preski partou ti fer li pli fasil pour prese menm avek bann Zwif ki ti reste en pe partou dan sa lanpir. Bann disip ti kapab servi lalwa Romen pour defann sa bon nouvel.—15/2-SC paz 20-23.

Eski bann Kretyen i devret priy avek Zezi?

Non. Zezi ti ansenny nou pour priy avek Zeova e i ti kit en legzanp par priy avek son Papa. (Mat. 6:6-9; Zan 11:41; 16:23) Pareyman, bann Kretyen dan premye syek ti priy avek Bondye, pa avek Zezi. (Akt 4:24, 30; Kol. 1:3)—1/3-SC paz 10.

Ki mesaz i annan dan sa parabol dis zenn fiy?

Zezi ti fek diskit lo lesklav fidel e pridan. Sa lesklav ti pou en pti group frer swazir ki ti pou diriz bann Kretyen pandan bann dernyen zour. Zezi ti averti sa bann zonm ki zot bezwen reste fidel. Apre sa, i ti donn sa parabol pour ankouraz tou bann Kretyen swazir dan bann dernyen zour pour “veye” pour ki zot pa perdi zot rekonpans. (Mat. 25:13)—15/3-SC paz 13.

Dan lepase nou bann piblikasyon ti dir serten resi i reprezant en keksoz ki pou annan en pli gran sinifikasyon a lavenir, konmela nou nepli, akoz?

Labib i dir ki serten dimoun i reprezant en keksoz ki annan en pli gran sinifikasyon. En legzanp i ganny trouve dan Galat 4:21-31. Me nou pa pou rod en pli gran sinifikasyon dan en resi Labib si i napa okenn rezon dapre Labib. Par kont, nou kapab tir bann leson avek bann dimoun ek levennman ki ganny mansyonnen dan Labib. (Rom. 15:4)—15/3-SC paz 17-18.

Ki similarite i annan ant sa parabol konsernan bann talan ek parabol larzan?

Tou le de i dekrir en msye ki annan lotorite ki rasanble son bann serviter avan ki i vwayaze, i donn zot son larzan e dir zot ogmant son propriyete. Ler i retournen son bann serviter i bezwen rann kont pour lafason ki zot in servi sa larzan. (Mat. 25:14-30; Lik 19:12-27) Dan tou le de parabol sa met i reprezant Zezi, bann serviter i reprezant son bann disip swazir e sa larzan i reprezant sa zoli privilez pour fer disip.—15/3-SC paz 21.

Akoz sa laranzman pour ekskli en dimoun ki pa repantir i demontre lanmour?

Labib i eksplike kwa ki fer en dimoun ganny ekskli e ki byenfe sa i kapab anmennen. (1 Kor. 5:11-13) I onor non Bondye, gard kongregasyon prop e i kapab fer sa dimoun sanz son latitid.—15/4-SC paz 29-30.

Lekel Gog sorti Magog ki ganny mansyonnen dan liv Ezekyel?

Ler nou konpar tou sa bann verse Labib konsernan dernyen latak kont pep Bondye, i evidan ki sa non Gog sorti Magog pa refer avek Satan me avek plizyer nasyon ki’n ralye ansanm.—15/5-SC paz 29-30.